3
ᑖᓐ ᑳ ᐄᔑ ᒥᔻᐱᑎᓯᑦ ᑎᒧᕢ ᕞᓵᓨᓈᐃᑳᐦᒡ ᐃᐦᑖᐎᓂᐦᒡ
1 ᐋᒄ ᒫᒃ ᐄᔥᐱᐦ ᐋᑳ ᐙᐦᒋ ᒋᑎᔮᐦᒡ ᐋᐦᐋᑳ ᐙᐱᒥᑖᐦᒡ ᐋᒄ ᑳ ᐎᔮᔨᐦᑎᒫᐦᒡ ᐅᑎᐦ ᐋᕞᓐᓯᐦᒡ ᐃᐦᑖᐎᓂᐦᒡ ᒑ ᒌᐦ ᑖᔮᐦᒡ, ᒥᒄ ᓃᔮᓐ᙮
2 ᐋᒄ ᑎᒧᕢ ᑳ ᐄᑎᔑᐦᐅᒋᐦᑦ ᐊᓂᑖᐦ ᐋᐦᑖᐙᒄ᙮ ᐆ ᒌᒋᔖᓂᐤ ᓂᐐᒋᐋᐱᑎᓰᒥᑯᓈᓐ ᒋᔖᒥᓂᑑ ᐋᐦ ᐋᐱᑎᔒᔥᑖᒥᒋᐦᑦ ᑭᔮᐦ ᐐᔨ ᐋ ᐙᐐᐦᑎᐦᒃ ᒥᔻᒋᒧᐎᓂᔨᐤ ᐋ ᑎᐹᒋᒫᑭᓂᐎᔨᒡ ᙭᙮ ᓂᒌᐦ ᐄᑎᔑᐦᐙᓈᓐ ᒑ ᒌ ᐐᒋᐦᐄᑖᒄ ᐊᑎᑎᐤ ᒑ ᒌ ᒥᔥᑭᐎᑳᐳᐙᒄ ᑖᓐ ᐋ ᐄᔑ ᑖᑆᔮᔨᒫᐦᒄ ᙭
3 ᐋᑳ ᐙᒋ ᐹᔨᒄ ᐋ ᑎᔑᔮᒄ ᒑ ᒌ ᒌᐙᑳᐳᔮᒄ ᒋᑖᑆᔮᔨᐦᑎᒧᐎᓂᐙᐦᒡ ᐊᓐ ᐋ ᓂᓈᐦᑭᒋᐦᐄᑯᐎᔮᒄ ᙭ ᐅᐦᒋ᙮ ᒌᔨᐙᐤ ᑎᐱᔨᐙ ᒋᒋᔅᒑᔨᐦᑖᓈᐙᐤ ᐋᔪᐎᒄ ᑭᔮᐦ ᑳ ᐄᔑ ᐎᔮᔨᐦᑎᐦᒃ ᒋᔖᒥᓂᑑ, ᒑ ᒌ ᓂᓈᐦᑳᒋᐦᐄᑯᐙᒄ ᐋ ᓅᔔᔥᑳᒫᒄ ᒌᓴᔅᐦ᙮
4 ᐙᔥ ᐋᔥᒄ ᐊᓂᑎᐦ ᐋᐦ ᑖᔮᒄ ᐋ ᒌᐦ ᑖᔮᐦᒡ ᔖᔥ ᓂᔮᑭᓐᐦ ᒋᒌ ᐐᐦᑎᒫᑎᓈᓐ ᒑ ᐅᑎᐦᒋᐱᔨᐦᒡ ᐋ ᓂᓈᐦᑳᒋᐦᐄᑭᐎᔨᐦᒄ᙮ ᐋᐅᒄ ᒫᒃ ᒧᔮᒻ ᑖᑆᐦ ᑳ ᐄᔅᐱᔨᒡ ᒧᔮᒻ ᐋ ᐄᔑ ᒋᔅᒑᔨᐦᑎᒫᒄ ᐊᓅᐦᒡ᙮
5 ᐄᔥᐱᐦ ᐋᑳ ᐙᐦᒋ ᑎᔮᓐ, ᐋᔪᐎᒄ ᒫᒃ ᐊᓂᔮᔨᐤ ᐙᐦᒋ ᔮᐃᑖ ᒌ ᐄᑎᔑᐦᐆᒄ ᑎᒧᕢ ᐊᓂᑖᐦ ᐋᐦᑖᐙᒄ, ᒑ ᒌ ᓃᑐᒋᔅᒑᔨᒥᑖᒄ ᒌ ᑖᑆᔮᔨᐦᑖᒨᓂᐙᐦᒡ᙮ ᓂᒌ ᑯᔅᐱᓈᔨᐦᑖᓐ ᒑ ᑐᑖᑖᒄ ᒥᒋᒥᓂᑑ ᒑ ᒌ ᐴᓃᐙᒄ ᐋ ᑖᑆᔮᔨᐦᑎᒸᒄ, ᒑᔅᑳᐦ ᒫᒃ ᒑ ᒌ ᐃᓯᓈᑯᐦᒡ ᑖᓐ ᑳ ᐄᔑ ᐋᐱᑎᔒᔥᑑᒋᐦᑦ ᑎᐹᔨᐦᒋᒑᓯᐤ ᐊᓂᑖᐦ ᐋᐦ ᑖᔮᒄ᙮
6 ᐋᒄ ᒫᒃ ᐋ ᒌ ᐹᒋ ᑎᑯᔑᐦᒃ ᑎᒧᕢ ᐊᓂᑖᐦ ᐋᐦᑖᐙᒄ ᐋ ᐅᐦᑐᐦᑖᑦ ᑭᔮᐦ ᒫᒃ ᐋ ᒌ ᒥᔪ ᐋᔨᒨᑎᒧᔨᒥᐦᑦ ᒋᑖᑆᔮᔨᐦᑎᒧᐎᓂᐙᔨᐤ ᑭᔮᐦ ᒌ ᓵᒋᐦᐄᐙᐎᓂᐙᔨᐤ, ᐋᔨᐤᐦ ᓂᒌ ᐐᐦᑎᒫᑯᓈᓐ ᒨᔥ ᐋ ᒥᔪ ᒋᔥᒋᓯᑐᑎᐎᔮᐦᒡ ᑭᔮᐦ ᓈᔥᒡ ᐋ ᐐᐦ ᐙᐱᒥᔮᐦᒡ ᒧᔮᒻ ᓃᔮᓐ ᐙᔥᐱᔥ ᐐᐦ ᐙᐱᒥᑖᐦᒡ᙮
7 ᓃᒋᔖᓂᑎᒄ ᐋᒄ ᒫᒃ ᐊᓐ ᒫᒀᒡ ᐋ ᒥᑯᔥᑳᑖᔨᐦᑎᒥᐱᔮᐦᒡ ᑭᔮᐦ ᐋ ᓂᓈᐦᑳᑖᔨᒧᔮᐦᒡ ᓂᒌ ᐅᐦᐱᓂᑯᐙᓈᓐ ᓂᐱᒫᑎᓰᐎᓈᐦᒡ ᐅᔮᔨᐤ ᑳ ᐄᑖᒋᒥᑖᒄ᙮ ᓈᔥᒡ ᓂᒥᔻᔨᒧᐦᐄᑯᓈᓐ ᐋ ᐹᐦᑎᒫᐦᒡ ᑖᓐ ᐋ ᐄᔑ ᑖᑆᔮᔨᒫᒄ ᙭᙮
8 ᐋᒄ ᒫᒃ ᒧᔮᒻ ᐋ ᐅᔅᒋᐦᐄᑯᔮᐦᒡ ᓂᐱᒫᑎᓰᐎᓈᐦᒡ ᓂᑎᐄᑖᔨᐦᑎᓈᓐ ᐋ ᒋᔅᒑᔨᒥᑖᐦᒡ ᐋᔥᒄ ᐊᔮᐱᒡ ᐋ ᓲᐦᒋᑳᐳᔮᒄ ᐋ ᐐᒑᐙᒄ ᑎᐹᔨᐦᒋᒑᓯᐤ᙮
9 ᑖᓂᑖᐦ ᒫᒃ ᒑ ᒌ ᐅᐦᒋ ᑖᐱ ᓂᓈᔅᑯᒥᒋᐦᑦ ᒋᔖᒥᓂᑑ ᒌᔨᐙᐤ ᐅᐦᒋ ᐊᓐ ᐋ ᐃᔥᐱᔥ ᓈᔥᒡ ᒥᔻᔨᐦᑎᒥᐦᐄᔮᐦᒡ ᐄᔥᐱᐦ ᐋ ᐊᔨᒥᐦᐄᒋᐦᑦ ᒋᔖᒥᓂᑑ᙮
10 ᓲᐦᒃ ᓂᓂᑐᑎᒧᐙᓈᓐ ᒋᔖᒥᓂᑑ ᒑ ᒌ ᐙᐱᒥᑖᐦᒡ ᒦᓐ ᒑ ᒌᐦ ᑖᔮᐦᒡ ᐊᓂᑎᐦ ᐋᐦ ᑖᔮᒄ ᐋᒄ ᒫᒃ ᒑ ᒌ ᐐᒋᐦᐄᑖᒡ ᑖᓐ ᐋᔥᒄ ᐋ ᐄᔑ ᓅᐦᑖᐱᔨᔮᒄ ᑖᑆᐦ ᒑ ᒌ ᑖᑆᔮᔨᒫᒄ ᙭ ᐊᓂᔮᔨᐤ ᒑ ᐄᔑ ᑖᑆᔮᔨᒫᐙᑯᐱᓈ᙮
11 ᐋᐅᒄ ᒫᒃ ᐆ ᐋ ᐄᔑ ᐊᔨᒥᐦᐋᔥᑎᒫᑖᐦᒡ, ᓂᓂᑐᑎᒧᐙᓈᓐ ᒋᔖᒥᓂᑑ ᑰᐦᑖᐐᓂᐤ ᑭᔮᐦ ᒫᒃ ᑎᐹᔨᐦᒋᒑᓯᐤ ᒌᓴᔅ ᒑ ᒌ ᓂᐦᐄᐱᔨᐦᑖᒡ ᒦᓐ ᒑ ᒌ ᓂᑎᐙᐱᒥᑖᐦᒡ᙮
12 ᓂᓂᑐᑎᒧᐙᓈᓐ ᑎᐹᔨᐦᒋᒑᓯᐤ ᒑ ᒌ ᑐᑖᑖᒄ ᐋᔮᔅᒃ ᐊᑎᑎᐤ ᒥᔥᑎᐦ ᒑ ᒌ ᓵᒋᐦᐄᑐᐙᒄ ᑭᔮᐦ ᑯᑎᒃ ᐊᐙᔨᐤᐦ ᒑ ᒌ ᓵᒋᐦᐄᒫᒄ, ᒑ ᒌ ᐋᑎ ᐃᔥᐱᔥ ᓵᒋᐦᐄᑐᔮᒄ ᑭᔮᐦ ᒑ ᒌ ᐋᑎ ᐃᔥᐱᔥ ᓵᒋᐦᐋᐦᑯᒡ ᑯᑎᑭᒡ ᐄᔨᔨᐅᒡ ᒧᔮᒻ ᓃᔮᓐ ᐋ ᐃᔥᐱᔥ ᓵᒋᐦᐄᑖᐦᒡ᙮
13 ᐋᑯᑖᐦ ᒑ ᐅᐦᒋ ᒥᔅᑭᐎᐦᐄᑖᒄ ᐋᒄ ᒫᒃ ᑯᐃᔅᒄ ᒑ ᐄᔑ ᐱᒫᑎᓰᔮᒄ ᑭᔮᐦ ᒑ ᐱᔮᐦᒋ ᐱᒫᑎᓰᔮᒄ ᐄᔥᐱᐦ ᐎᑎᔅᑭᐎᑳᐳᔥᑎᐙᒀ ᒋᔖᒥᓂᑑ ᑰᐦᑖᐐᓂᐤ ᑎᑯᔑᐦᑳ ᑎᐹᔨᐦᒋᒑᓯᐤ ᒌᓴᔅ ᙭ ᐋ ᐹᒋ ᐐᒑᐙᑦ ᒥᓯᐙ ᐊᓂᔮᔨᐤ ᑳ ᑖᑆᔮᔨᐦᑎᒥᔨᒡ᙮