11
ᒌᓴᔅ ᑳ ᒋᔅᑯᑎᒫᒑᑦ ᑖᓐ ᒑ ᐄᔑ ᐊᔨᒥᐦᐋᓂᐎᔨᒡ
ᒫᕠᔫ 6:9-13; 7:7-11
1 ᐹᔨᒀᐤ ᐄᔥᐱᐦ ᒌᓴᔅ ᑳ ᒌᔥ ᐊᔨᒥᐦᐋᑦ, ᐹᔨᒄ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ ᒌ ᐄᑎᑰ, “ᑎᐹᔨᐦᒋᒑᔨᓐ, ᐹᒋ ᒋᔅᑯᑎᒨᓈᓐ ᒫᐦ ᑭᔮᐦ ᓃᔮᓐ ᑖᓐ ᒑ ᐄᔑ ᐊᔨᒥᐦᐋᔮᐦᒡ ᒧᔮᒻ ᒞᓐ ᑳᐦ ᑐᑎᐙᑦ ᐅᒋᔅᒋᓂᐦᐊᒧᐙᑭᓐᐦ᙮”
2 ᒌᓴᔅ ᒌᐦ ᐄᑖᐤ, “ᒫᐤ ᒑ ᐄᔑ ᐊᔨᒥᐦᐋᔮᒄ,
ᓅᐦᑖᐐᓈᓐ, ᒋᐦᒋᒌᔑᑯᐦᒡ ᐋᐦ ᑖᔨᓐ, ᑭᑎ ᒋᔅᑖᔨᐦᑖᑭᓂᐤ ᐋ ᐱᔮᐦᒋᓰᒥᑭᐦᒡ ᒋᑎᐃᔑᓂᐦᑳᓱᐎᓐ᙮ ᒋᐦᒋᐅᒫᐎᓐ ᑭᑎ ᐅᑎᐦᒋᐱᔨᐤ᙮ ᒋᑎᐄᑖᔨᐦᑎᒧᐎᓐ ᑭᑎ ᑐᑖᑭᓂᐤ ᐅᑎᐦ ᐊᔅᒌᐦᒡ, ᒧᔮᒻ ᒋᐦᒋᒌᔑᑯᐦᒡ᙮
3 ᒥᔨᓈᓐ ᑎᐦᑐ ᑳᔑᑳᒡ ᐋᐃᐦᑯᓈᐤ ᒑ ᐅᐦᒋ ᐱᒫᑎᓰᔮᐦᒡ᙮
4 ᐙᐹᔨᐦᑎᒨᐎᓈᓐ ᒫᒃ ᓂᒥᒋᐦᑣᐎᓈᓐ, ᐙᔥ ᑭᔮᐦ ᓃᔮᓐ ᐋ ᐙᐹᔨᐦᑎᒧᒋᐦᒡ ᒥᓯᐙ ᑳ ᒥᒋᐦᑐᑎᐐᒥᔨᐦᒡ᙮ ᐊᑳᐐ ᒫᒃ ᐄᑐᐦᑎᐦᐄᓈᓐ ᐊᓂᑖᐦ ᒑ ᒌ ᐄᔑ ᑯᒀᒋᐦᐄᑭᐎᔮᐦᒡ᙮ ᒥᒄ ᒥᑖᒀᓂᒨᓈᓐ ᐊᓐ ᑳ ᒫᔮᑎᐦᒡ᙮”
5 ᐋᒄ ᒌᓴᔅ ᑳᐦ ᐄᑖᑦ ᐊᓂᔮᔨᐤᐦ ᐅᒋᔅᒋᓂᐦᐊᒧᐙᑭᓐᐦ, “ᐱᑯᓃᒑ ᓂᑎᐙᐱᒫᑦ ᒫᐦ ᒋᐐᒑᐙᑭᓐ ᐋᐦ ᐋᐱᐦᑖᑎᐱᔅᑳᔨᒡ ᐋ ᐐ ᓂᑑᐊᐅᐦᐋᓱᒫᑦ ᒑᒀᔨᐤ, ᐋᒄ ᒫᒃ ᐄᑎᑦ ᐊᓐ ᒋᐐᒑᐙᑭᓐ, ‘ᐹᒋ ᐊᐅᐦᐄᐦ ᒫᐦ ᓂᔥᑐ ᐲᔣᔮᐃᐦᑯᓈᐎᒡ
6 ᐙᔥ ᓂᐐᒑᐙᑭᓐ ᓂ ᐹᒋ ᒧᐎᑎᑎᐦᒄ ᐋᑯᑖᐦ ᐋᐦᑖᐅᒡ ᒑ ᓂᐹᑦ᙮ ᓂᒧᐃ ᓂᑎᔮᐙᓐ ᒑᒀᔨᐤ ᒑ ᐊᔑᒥᒃ᙮’
7 ᐋᒄ ᒫᒃ ᐄᑎᔅᒃ ᐊᓐ ᒋᐐᒑᐙᑭᓐ ᑳ ᓂᑑᐅᔅᐹᐙᐦᐄᑦ, ‘ᐊᑳᐐ ᐹᒋ ᒧᑯᔥᑳᒋᐦᐄᐦ ᐙᔥ ᔖᔥ ᓂᒌ ᒋᐱᐦᐙᐤ ᒋᔥᑐᐦᑭᓐ ᑭᔮᐦ ᓂᑎᐊᐙᔑᔒᒥᒡ ᓂᐐᐦᐹᒥᑯᒡ, ᓂᒧᐃ ᓂᑭ ᒌ ᐎᓂᔥᑳᓐ ᒑ ᒌ ᒥᔨᑖᓐ᙮’
8 ᒋᐐᐦᑎᒫᑎᓈᐙᐤ, ᐋᑳ ᐐᐦ ᐎᓂᔥᑳᒑ ᒑ ᒌ ᒥᔨᔅᒃ ᐊᓂᔮᔨᐤ ᐱᔣᔮᐃᐦᑯᓈᐤ ᐋᑎ ᐋ ᒌ ᒥᔪ ᐐᒑᐙᑭᓂᑐᑖᔅᒃ ᐊᔮᐱᒡ ᒫᒃ ᒑᒃ ᒋᑭ ᐎᓂᔥᑳᐤ ᒑ ᒌ ᒥᔨᔅᒃ ᑖᓐ ᐋ ᐄᔑ ᓂᑎᐙᔨᐦᑎᒨᑦ, ᐋᑳ ᐴᓂᐦᐄᑖ ᐋ ᓂᑎᐙᔨᐦᑎᒨᑦ᙮
9 ᐙᔥ ᒋᐐᐦᑎᒫᑎᓈᐙᐤ, ᓂᑐᑎᒫᒄ ᑖᓐ ᐋ ᐄᔑ ᓂᑎᐙᔨᐦᑎᒫᒄ, ᒋᑭ ᒥᔨᑯᓈᐙᐤ ᒫᒃ, ᓈᓂᑐᐙᔨᒻ ᒋᔖᒥᓂᑑ ᐋᒄ ᒫᒃ ᒑ ᒥᔅᑭᐙᑦ᙮ ᒥᒥᑣᐦᐄᒑ ᒋᔥᑐᐦᑭᓐ ᐋᒄ ᒫᒃ ᒑ ᐋᐱᐦᐊᒫᑭᐎᔨᓐ᙮
10 ᐙᔥ ᑎᐦᑐ ᐊᐙᓐ ᑳ ᓂᑐᑎᒫᑦ ᒋᑭ ᒥᔮᑭᓂᐤ᙮ ᑭᔮᐦ ᑎᐦᑐ ᐊᐙᓐ ᑳ ᓈᓂᑎᐙᔨᒫᑦ ᒋᔖᒥᓂᑑ ᒋᑭ ᒥᔅᑭᐙᐤ, ᑭᔮᐦ ᑎᐦᑐ ᐊᐙᓐ ᑳ ᒥᒥᑣᐦᐄᒑᑦ ᑭᑎ ᐋᐱᐦᐊᒧᐙᑭᓂᐤ᙮”
11 “ᒌᔨᐙᐤ ᐅᐦᑖᐐᒫᑐᒄ, ᓂᑎᐙᔨᐦᑎᒫᔅᒃ ᒫᐦ ᒋᑯᓯᔅ ᓂᒫᔅ ᒋᐱᐦ ᒌᐦ ᑎᓈ ᐋ ᒑ ᒌ ᒥᔨᑦ ᐊᒋᓈᐱᒄ,
12 ᑭᔮᐦ ᒫᒃ ᓂᑎᐙᔨᐦᑎᒫᔅᒃ ᐙᐅᔨᐤ, ᒋᐱᐦ ᒌᐦ ᑎᓈ ᐋ ᒑ ᒌ ᒥᔨᑦ ᒥᓂᑐᔥ ᐋ ᒋᔅᑐᐦᐅᐙᔨᒡ᙮
13 ᐋᑦ ᐋ ᒥᒑᑎᓯᔮᒄ ᐊᔮᐱᒡ ᒋᒋᔅᒑᔨᐦᑖᓈᐙᐤ ᒑ ᒌ ᒥᔪ ᒥᔮᑯᒡ ᒋᑎᐙᔑᔒᒧᐙᐅᒡ᙮ ᐊᑎᑎᐤ ᒫᒃ ᑰᐦᑖᐐᐙᐤ ᒋᐦᒋᒌᔑᑯᐦᒡ ᑳᐦ ᑖᑦ ᒋᔅᒑᔨᐦᑎᒻ ᒑ ᒌ ᒥᔪ ᒥᔨᐙᑦ᙮ ᒥᔻᔨᐦᑎᒻ ᐋ ᒥᔮᑦ ᐊᐙᔨᐤᐦ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᐊᓂᔮᔨᐤ ᑳ ᓂᑐᑎᒫᑯᑦ᙮”
ᑖᓂᑖᐦ ᑳ ᐅᐦᑎᓂᐦᒃ ᒌᓴᔅ ᐅᓲᐦᑳᑎᓰᐎᓐ
ᒫᕠᔫ 12:22-30; ᒫᕐᒃ 3:20-27
14 ᒌᐦ ᑖᐤ ᓈᐹᐤ ᒥᑐᓐ ᐋ ᒌ ᑐᑖᑯᑦ ᒥᒋᐊᐦᒑᐦᒄ ᐋᑳ ᒑ ᒌ ᑭᔅᒋᐦᐅᑦ ᐋ ᐊᔨᒥᑦ᙮ ᐄᔥᐱᐦ ᒫᒃ ᒌᓴᔅ ᑳ ᐎᔨᐐᑎᔑᐦᐙᑦ ᐊᓂᔮᔨᐤ ᒥᒋᐊᐦᒑᐦᒄ, ᐋᒄ ᑳ ᐅᐦᒋ ᓂᐦᑖᐙᑦ ᐊᓐ ᓈᐹᐤ᙮ ᐋᒄ ᐊᓂᒌ ᐄᔨᔨᐅᒡ ᓈᔥᑖᑆᐦ ᒌ ᒫᒥᔥᑳᑖᔨᐦᑎᒥᐦᐄᑯᒡ ᐅᔮᔨᐤ᙮
15 ᐋᒄ ᐱᔅᒡ ᒌ ᐄᑖᐅᒡ, “ᐊᓂᔮᔨᐤ ᐯᓪᓯᐳᓚ ᑳ ᐃᔑᓂᐦᑳᓱᔨᒡ ᒥᒋᐊᐦᒑᐦᒄ ᐅᒋᒫᐤ ᐋᔨᐅᑯᓐ ᐊᓂᔮᔨᐤ ᑳ ᒥᔨᑯᑦ ᒥᑖᐅᐎᓂᔨᐤ ᒑ ᒌ ᐎᔨᐐᑎᔑᐦᐙᑦ ᒥᒋᐊᐦᒑᐦᒄ᙮”
16 ᑯᑎᑭᒡ ᒫᒃ ᒋᐐᐦ ᑯᒀᒋᐦᐋᐅᒡ ᒌᓴᔅᐦ ᐋ ᐐᐦ ᓈᓂᑐ ᒋᔅᒑᔨᐦᑎᒸᒡ ᑖᓂᑖᐦ ᐙᐦᒋᐱᔨᒡ ᐊᓂᔮᔨᐤ ᐅᓲᐦᑳᑎᓰᐎᓂᔨᐤ᙮ ᐋᒄ ᑳᐦ ᐄᑖᒡ ᒑ ᒌ ᐙᐱᐦᑎᔨᑯᒡ ᒫᒥᔥᑳᒡ ᐙᐱᐦᑏᐙᐎᓂᔨᐤ ᒋᔖᒥᓂᑑ ᐋᐦ ᑖᔨᒡ ᐋ ᐅᐦᒋᐱᔨᒡ᙮
17 ᒌᓴᔅ ᒫᒃ ᒌ ᒋᔅᒑᔨᒫᐤ ᑖᓐ ᐋ ᐄᔑ ᒫᒥᑐᓈᔨᐦᑎᒥᔨᒡ, ᐋᒄ ᑳᐦ ᐄᑖᑦ, “ᒫᓯᐦᐄᑐᑣᐙ ᐄᔨᔨᐅᒡ ᐊᐹᔨᑯᔅᑳᓈᔑᒡ ᒋᑭ ᓂᔑᐎᓈᒋᐦᐄᑑᒡ᙮ ᒧᔮᒻ ᐋ ᐃᓯᓈᑯᐦᒡ ᐹᔨᑯᑖᓂᐤ ᐄᔨᔨᐅᒡ ᐋ ᒥᒋᐱᔨᒡ ᓂᒧᐃ ᒋᑭ ᐅᐦᒋ ᒋᐦᑳᐙᒋᐱᔨᐎᒡ ᑭᔮᐦ ᒋᑭ ᒌ ᓂᔑᐎᓈᒋᐦᐄᑑᒡ᙮
18 ᐊᓂᒌ ᒫᒃ ᒥᒋᐊᐦᒑᐦᑯᒡ ᑳ ᓅᔔᔥᑯᐙᒡ ᒥᒋᒥᓂᑑ, ᒫᓯᐦᐄᑐᑣᐙ ᒫᒃ, ᒥᒋᒥᓂᑑ ᐅᒋᐦᒌᐅᒋᒫᐎᓐ ᒋᑭ ᓂᔑᐎᓈᒋᐦᑖᑭᓂᐎᔨᐤ᙮ ᐋᐅᒄ ᒫᒃ ᒋᐱᐦ ᐄᔅᐱᔨᐤ ᑖᑆᐦ ᐯᓪᓯᐳᓪ ᐹᒋ ᒥᔨᑦ ᒥᑖᐅᐎᓂᔨᐤ ᒑ ᒌ ᐋᐱᒋᐦᑖᐅᒡ ᒑ ᒌ ᐎᔨᐐᑎᔑᐦᐆᒀᐤ ᒥᒋᐊᐦᒑᐦᑯᒡ᙮
19 ᑖᑆᐦ ᐯᓪᓯᐳᓪ ᐅᒥᑖᐅᐎᓐ ᐃᔮᐱᒋᐦᑖᐙᐅᒑ ᐋ ᐎᔨᐐᑎᔑᐦᐅᒀᐤ ᒥᒋᐊᐦᒑᐦᑯᒡ, ᑭᔮᐦ ᒫᒃ ᒋᑎᐄᔨᔨᒥᐙᐅᒡ ᐋ ᐎᔨᐐᑎᔑᐦᐙᒡ ᒥᒋᐊᐦᒑᐦᒄ, ᐊᐙᔨᐤᐦ ᒫᒃ ᑳ ᐐᒋᐦᐄᑯᒡ ᐐᔨᐙᐤ ᐅᔮᔨᐤ ᒑ ᒌ ᑎᒡ? ᒋᑭ ᒌ ᐐᐦᑎᒫᑯᐙᐅᒡ ᐋᐦᐋᑳ ᑖᑆᔮᒄ ᐊᓐ ᐋᐦ ᐃᔨᔮᒄ ᒥᒋᒥᓂᑑ ᐋ ᐐᒋᐦᐋᑦ ᐊᐙᔨᐤᐦ ᒑ ᒌ ᐎᔨᐐᑎᔑᐦᐙᔨᒡ ᒥᒋᐊᐦᒑᐦᒄ᙮
20 ᒋᔖᒥᓂᑑ ᐋᐅᒄ ᑳ ᐹᒋ ᒥᔨᑦ ᓲᐦᑳᑎᓰᐎᓂᔨᐤ ᒑ ᒌ ᐎᔨᐐᑎᔑᐦᐆᒥᒀᐤ ᒥᒋᐊᐦᒑᐦᒄ᙮ ᐋᑯᑖᐦ ᒫᒃ ᐙᐦᒋ ᐙᐱᐦᑎᔨᑯᐎᔮᒄ ᑖᑆᐦ ᒋᔖᒥᓂᑑ ᐅᒋᐦᒌᐅᒋᒫᐎᓐ ᔖᔥ ᒥᑐᓐ ᐋ ᐅᑎᐦᑎᐦᐅᑯᐙᒄ᙮”
21 “ᐋᒄ ᐊᓯᓈᑯᓯᑦ ᒥᒋᒥᓂᑑ ᒧᔮᒻ ᐋ ᓲᐦᒋᓰᑦ ᓈᐹᐤ ᒥᓯᐙ ᐋ ᐄᔑ ᐃᔮᔅᑰᐎᔅᑖᑦ ᐅᓂᑐᐱᔫᐋᐱᒋᑖᐎᓐ ᐋ ᓈᓈᑭᒋᐦᑖᑦ ᐐᒋ ᑭᔮᐦ ᒫᒃ ᒥᓯᐙ ᐋ ᐄᔑ ᑎᐱᔨᐙᐎᓰᑦ, ᓂᒧᐃ ᐊᐙᔨᐤᐦ ᑭᑎ ᒌ ᐱᒫᔨᐦᑎᒥᔨᐤ ᐊᓂᔮᔨᐤ ᐅᒑᒀᓂᒻ᙮
22 ᐅᑎᐦᑎᑯᑦ ᒫᒃ ᐊᐙᔨᐤᐦ ᐊᐅᔅᑖ ᐋ ᓲᐦᒋᓰᔨᒡ ᐃᔥᐱᔥ ᐐᔨ ᑭᑎ ᒌ ᔑᐦᑯᒋᐦᐄᑰ᙮ ᐋᒄ ᒫᒃ ᒥᓯᐙ ᒑ ᐅᑎᓂᒥᔨᒡ ᐊᓂᔮᔨᐤ ᐅᓂᑐᐱᔫᐋᐱᒋᑖᐎᓐ ᐊᓂᔮᔨᐤ ᑳ ᐐ ᒫᒥᔒᑐᑎᐦᒃ ᒑ ᒌ ᐅᐦᒋ ᑭᓂᐙᔨᒦᓱᑦ᙮ ᐋᒄ ᒫᒃ ᒥᓯᐙ ᐊᓂᔮᔨᐤ ᑖᓐ ᑳ ᐄᔑ ᐃᔮᑦ, ᒥᓯᐙ ᑭᑎ ᐄᔑ ᒫᑎᓂᐙᐱᔨᐦᑖᔨᐤ᙮”
23 ᒌᓴᔅ ᒦᓐ ᒌᐦ ᐄᑖᐤ, “ᐊᓐ ᐊᐙᓐ ᐋᑳ ᑳ ᐹᒋ ᐐᒋᐦᐄᑦ, ᓂᓂᔥᑰᔥᑖᒄ᙮ ᐊᐙᓐ ᐋᑳ ᑳ ᐐᒋᐦᐄᑦ ᐋ ᒥᒨᓯᒋᓂᒑᐅᒡ ᐙᐱᓂᒑᐤ ᐐᔨ ᐃᓯᓈᑯᓯᐤ᙮”
ᑳ ᐹᒋ ᒌᐙᑦ ᒥᒋᐊᐦᒑᐦᒄ
ᒫᕠᔫ 12:43-45
24 ᐋᒄ ᒌᓴᔅ ᒦᓐ ᑳᐦ ᐄᑖᑦ, “ᐄᔥᐱᐦ ᐋ ᒌ ᐎᔨᐐᑦ ᒥᒋᐊᐦᒑᐦᒄ ᐲᐦᒡ ᐊᐙᔨᐤᐦ ᐋᐦ ᑖᔨᒡ ᐅᐦᒋ ᐊᓂᑖᐦ ᐋ ᐹᐦᒀᔨᒡ ᐱᐹᐊᔨᑖᐤ ᐋ ᓈᓂᑎᐙᔨᑎᐦᒃ ᑖᓂᑖᐦ ᒑ ᒌ ᐋᔨᐙᓯᑦ᙮ ᐋᐦᐋᑳ ᒫᒃ ᒫᔅᑭᐦᒃ ᐋᒄ ᐋᑏᓱᑦ, ‘ᓂᑭ ᒌᐙ ᓈᓂᑎᐙᐱᒫᐤ ᐊᓐ ᓈᐹᐤ ᑳ ᓂᑭᑎᒃ᙮ ᐊᓂᔮᔨᐤ ᒫᒃ ᓈᐹᐤ ᒧᔮᒻ ᐙᔅᑳᐦᐄᑭᓐ ᐋᔪᐎᒄ ᐋ ᐃᓯᓈᑯᓰᔨᒡ᙮’
25 ᑭᔨᑆ ᑳᐤ ᐋ ᐄᔑ ᒌᐙᑦ ᐊᓐ ᒥᒋᐊᐦᒑᐦᒄ ᐋ ᓈᓂᑐᐙᔨᐦᑎᐦᒃ ᐊᓂᑎᐦ ᑳ ᐅᐦᒋ ᐎᔨᐐᑦ ᐊᓂᔮᔨᐤ ᐙᔅᑳᐦᐄᑭᓂᔨᐤ᙮ ᐄᔥᐱᐦ ᒫᒃ ᐹᐦᒑᑦ ᐋᒄ ᒫᔅᑭᐦᒃ ᓈᔥᒡ ᐋ ᐱᔮᐦᒋᓈᑯᓃᔨᒡ ᑭᔮᐦ ᓈᔥᒡ ᐋ ᒥᔪᓈᑯᓃᔨᒡ᙮
26 ᐅᔮᔨᐤ ᒫᒃ ᐎᔮᐱᐦᑎᐦᒃ ᐋ ᐃᓯᓈᑯᓃᔨᒡ ᐋᒄ ᒑᔅᑐᐦᑖᑦ, ᓂᔮᓂᑎᐙᔨᒫᑦ ᓃᔣᔥᒡ ᒥᒋᐊᐦᒑᐦᒄ ᐊᐅᔅᑖ ᐋ ᐄᑖᔨᐦᑖᑯᓰᔨᒡ ᐋ ᐄᑖᔨᐦᑖᑯᓯᑦ ᐐᔨ ᒑ ᒌ ᐐᒋᒥᑯᑦ ᐊᓂᑎᐦ ᐊᓂᔮᔨᐤ ᓈᐹᐤ ᐲᐦᒡ ᐋᐦ ᑖᔨᒡ᙮ ᐋᒄ ᒫᒃ ᐊᓐ ᓈᐹᐤ ᐊᑎᑎᐤ ᒋᑭ ᐄᑖᔨᐦᑖᑯᐦᐄᑰ ᐊᓂᔮᔨᐤ ᓃᔣᔥᒡ ᒥᒋᐊᐦᒑᐦᒄ ᑖᓐ ᑳ ᐄᑖᔨᐦᑖᑯᐦᐄᑯᑦ ᓃᔥᑎᒻ, ᒥᒄ ᐋ ᒌ ᐹᔨᑯᔑᔨᒡ ᒥᒋᐊᐦᒑᐦᒄ᙮”
ᐃᔅᒀᐤ ᑳᐦ ᐋᔨᒨᒫᑦ ᒌᓴᔅᐦ ᐅᑳᐐᔨᐤ
27 ᒫᒀᒡ ᐅᔮᔨᐤ ᐋᐦ ᐊᔨᒥᑦ ᒌᓴᔅ, ᐃᔅᒀᐤ ᐊᓂᑎᐦ ᐋᐦ ᑖᑦ ᐊᓂᔮᔨᐤ ᐋ ᒥᐦᒑᑎᓈᓂᐎᔨᒡ ᒌ ᐅᐦᒋ ᑖᑆᐤ ᐋᐦ ᐃᔨᑦ, “ᑖᑆᐦ ᔑᐙᔨᐦᑖᑯᓲ ᐊᓐ ᐃᔅᒀᐤ ᐊᓂᑎᐦ ᐋᐦ ᑖᑦ ᑳ ᐅᐦᒋ ᓂᐦᑖᐅᒋᔨᓐ ᑭᔮᐦ ᑳ ᓅᔖᓂᐦᐄᔅᒃ᙮”
28 ᐋᒄ ᒌᓴᔅ ᑳᐦ ᐄᑖᑦ, “ᐋᐦᐋ, ᑖᑆᐦ, ᒥᒄ ᒫᒃ ᐊᐅᔅᑖ ᔑᐙᔨᐦᑖᑯᓯᐎᒡ ᐊᓂᒌ ᑳ ᐹᐦᑎᐦᒡ ᒋᔖᒥᓂᑑ ᐅᑎᔨᒧᐎᓂᔨᐤ ᑭᔮᐦ ᐋᐦ ᑐᑎᐦᒡ᙮”
ᐄᔨᔨᐅᒡ ᑳ ᓂᑎᐙᔨᐦᑎᐦᒡ ᒨᔥ ᒑ ᒌ ᐙᐱᐦᑏᔮᑭᓂᐎᒡ ᒫᒥᔥᑳᒡ ᒑᒀᔨᐤ
ᒫᕠᔫ 12:38-42
29 ᐋᒄ ᒫᒃ ᐊᑎᑎᐤ ᒥᐦᒑᑐ ᐊᐙᔨᐤᐦ ᑳ ᐹᒋ ᓂᑑᐦᑖᑯᑦ ᒌᓴᔅ᙮ ᑳᐦ ᐄᑖᑦ, “ᐊᓅᐦᒡ ᐄᔨᔨᐅᒡ ᑳ ᐱᒫᑎᓰᔨᒡ ᓈᔥᑖᑆᐦ ᒥᒑᑎᓯᐎᒡ᙮ ᑯᒀᒋᐦᒑᔨᒨᐎᒡ ᒑ ᒌ ᐙᐱᐦᑏᔮᑭᓂᐎᒡ ᒫᒥᔥᑳᒡ ᐙᐱᐦᑏᐙᐎᓂᔨᐤ᙮ ᓂᒧᐃ ᒫᒃ ᒋᑭ ᐅᐦᒋ ᐙᐱᐦᑏᔮᑭᓂᐎᒡ᙮ ᒥᒄ ᐊᓂᔮᔨᐤ ᑖᓐ ᑳ ᐄᔑ ᒫᒥᔥᑳᒡ ᐄᔅᐱᔨᔨᒡ ᐊᓂᔮ ᐅᒋᔅᒋᐙᐦᐄᒑᓯᐤ ᒞᓈ ᐋᔪᐎᒄ ᒥᒄ ᐊᓂᔮᔨᐤ ᒑ ᐙᐱᐦᑏᔮᑭᓂᐎᒡ᙮
30 ᒧᔮᒻ ᐙᐱᐦᑏᐙᐎᓐ ᒌ ᐃᓯᓈᑰᓲᐤ ᒞᓈ ᒌ ᐄᑎᔓᐦᐅᑰ ᒋᔖᒥᓂᑑ ᐊᓂᑖᐦ ᓂᓀᕓ ᑳ ᐃᔑᓂᐦᑳᑖᔨᒡ ᐃᐦᑖᐎᓂᔨᐤ ᒑ ᒌ ᐃᔮᒀᒥᒫᑦ ᐊᓂᔮᔨᐤ ᐄᔨᔨᐤᐦ ᐊᓂᑖᐦ ᑳᐦ ᑖᔨᒡ ᒑ ᒌ ᒀᔅᑳᑎᓰᔨᒡ᙮ ᐋᔪᐎᒄ ᒫᒃ ᒧᔮᒻ ᑭᔮᐦ ᐄᔨᔨᐅᑯᓯᓵᓐ ᒑ ᐄᔑᓈᑰᓯᑦ ᐙᐱᐦᑏᐙᐎᓐ ᐙᐦᒋ ᐄᑎᔑᐦᐙᑭᓄᑦ ᐊᓂᑖᐦ ᐊᓅᐦᒡ ᑳ ᐱᒫᑎᓰᔨᒡ ᐄᔨᔨᐤ ᐋᐦ ᑖᔨᒡ᙮
31 ᐄᔥᐱᐦ ᒫᒃ ᐋ ᑎᐹᔅᑯᓂᒑᐤ ᒌᔑᑳᒡ ᐅᑎᐦᒋᐱᔨᐦᒑ, ᐊᓂᔮ ᒋᐦᒋᐅᒋᒫᔥᒀᐤ ᐲᓯᒸᑖᐦᒡ ᑳ ᑎᐹᔨᐦᒋᒑᑯᐱᓈ ᒋᑭ ᐅᐦᒋ ᐱᓯᑰ ᒑ ᒌ ᐃᔨᑦ ᐋ ᓂᔑᐎᓈᒋᒫᑦ ᐊᓂᔮᔨᐤᐦ ᐄᔨᔨᐤᐦ ᐊᓅᐦᒡ ᑳ ᐱᒫᑎᓰᔨᒡ᙮ ᐙᔥ ᐐᔨ ᓈᔥᑖᑆᐦ ᐙᐦᔨᐤ ᒌ ᐅᐦᑐᐦᑖᐤ ᒥᒄ ᒑ ᒌ ᓂᑑ ᓂᑑᐦᑎᒸᑦ ᐊᓂᔮ ᒋᐦᒋᐅᒋᒫᐤ ᔂᓚᒥᓐ ᐅᑭᒑᐦᑖᐙᔨᐦᑎᒧᐎᓂᔨᐤ᙮ ᑖᐤ ᒫᒃ ᐅᑎᐦ ᐊᐙᓐ ᐊᐅᔅᑖ ᐋ ᒋᑳᔮᔨᑖᑯᓯᑦ ᐃᔥᐱᔥ ᐐᔨ ᔂᓚᒥᓐ, ᓂᒧᐃ ᒫᒃ ᐃᔮᐱᓯᐦᑎᐙᑭᓂᐤ᙮
32 ᐄᔥᐱᐦ ᒫᒃ ᑎᐹᔅᑯᓂᒑᐤ ᒌᔑᑳᒑ, ᐊᓂᔮᐦᑳ ᐄᔨᔨᐅᒡ ᐊᓂᑖᐦ ᓂᓀᕓᐦᒡ ᑳ ᒌᐦ ᑖᒡ ᒋᑭ ᐅᐦᐱᑳᐳᐎᒡ ᒑ ᐃᔨᒡ ᒑ ᒌ ᓂᔑᐎᓈᒋᒥᑖᑯᒡ ᒌᔨᐙᐤ ᐊᓅᐦᒡ ᑳ ᐱᒫᑎᓰᐙᒄ᙮ ᐙᔥ ᐋᑯᑖᐦ ᑳ ᐅᐦᒋ ᒀᔅᑳᑎᓰᔨᒡ ᐄᔥᐱᐦ ᑳ ᐹᐦᑎᐙᒡ ᒞᓈ ᐋ ᑭᒑᔅᒀᔨᒡ᙮ ᑖᐤ ᒫᒃ ᐊᐙᓐ ᐅᑎᐦ ᐊᐅᔅᑖ ᐋ ᒋᑳᔮᔨᐦᑖᑯᓯᑦ ᐃᔥᐱᔥ ᐐᔨ ᒞᓈ᙮”
ᐙᔥᑖᓂᒫᑭᓐ
ᒫᕠᔫ 5:15; 6:22, 23
33 “ᓂᒧᐃ ᐊᐙᓐ ᓯᔅᑭᐦᐊᒻ ᐙᔥᑖᓂᒫᑭᓂᔨᐤ ᐋᒄ ᒫᒃ ᒑ ᒌ ᓂᑑᑳᑖᑦ, ᑭᔮᐦ ᒫᒃ ᐎᔮᔥᑖ ᐊᓂᑖᐦ ᒑ ᒌ ᐊᑯᓂᐦᐋᐦᒃ᙮ ᐊᔥᑖᐤ ᐊᓂᑎᐦ ᑖᓂᑖᐦ ᒥᓯᐙ ᐊᐙᓐ ᐋ ᐹᒋ ᐲᐦᒑᑦ ᒑ ᒌ ᐙᐱᐦᑎᐦᒃ ᐋ ᐙᔥᑖᔨᒡ᙮
34 ᒋᔅᒌᔑᒄ ᐋᐅᒄ ᐅᔮᔨᐤ ᐅᐙᔥᑖᓂᒫᑭᓐ ᒌᔨᐤ᙮ ᐋ ᒥᔻᒡ ᒋᔅᒌᔑᒄ ᒥᑐᓐ ᐙᔥᑖᐤ ᒌᔮᐦᒡ ᒥᒄ ᒫᒃ ᐋᑳ ᒥᔻᒑ ᒋᔅᒌᔑᒄ ᓈᔥᑖᑆᐦ ᐋ ᐅᑳᔥᑖᔮᐤ ᒌᔨᐤ᙮
35 ᔮᒀᒦᐦ ᐋᑳ ᒑ ᒌ ᑎᑯᐦᒡ ᐎᓂᑎᐱᔅᒋᓰᐎᓐ ᒌ ᐱᒫᑎᓰᐎᓂᐦᒡ, ᐙᔥᑖᐎᓐ ᐊᓂᑖᐦ ᒋᐱᐦ ᑎᑯᓐ᙮
36 ᐊᐙᓐ ᒫᒃ ᒥᑐᓐ ᐎᔮᔥᑖᐙᒀ ᐋᑳ ᒥᑐᓐ ᐃᔮᒀ ᐊᐅᑳᔅᑖᐎᓂᔨᐤ ᐅᐱᒫᑎᓰᐎᓂᐦᒡ, ᑖᑆᐦ ᒥᑐᓐ ᑭᑎ ᐙᔥᑎᐙᐤ, ᒧᔮᒻ ᑳ ᒌ ᐃᓯᓈᑯᓯᑦ ᐊᐙᓐ ᐙᔥᑖᓂᒫᑭᓂᔨᐤ ᐋ ᒋᐦᑳᔓᑯᑦ᙮”
ᒌᓴᔅ ᑳ ᐄᔑ ᐋᓍᔨᒫᑦ ᐹᕆᓰᐦ ᑭᔮᐦ ᐊᓂᔮᔨᐤ ᐐᔓᐙᐎᓂᔨᐤ ᑳ ᒋᔅᑯᑎᒫᒑᔨᒡ
ᒫᕠᔫ 23:1-36; ᒫᕐᒃ 12:38-40
37 ᐄᔥᐱᐦ ᑳ ᒌᔥ ᐊᔨᒥᑦ ᒌᓴᔅ, ᐹᔨᒄ ᐹᕆᓰ ᒌ ᓂᑑᒥᑰ ᒑ ᒌ ᐐᒋᒦᒋᓲᒫᑦ᙮ ᐋᒄ ᒌᓴᔅ ᑳ ᐄᑐᐦᑖᑦ ᐊᓂᑖᐦ, ᑳ ᓂᑑᐐᒋᒦᒋᓲᒫᑦ ᐊᓂᔮᔨᐤ ᐹᕆᓰ᙮
38 ᒌ ᒥᔅᑳᑖᔨᐦᑎᒻ ᐊᓐ ᐹᕆᓰ ᐋᐦᐋᑳ ᐅᐦᒋ ᑳᓰᑎᐦᒑᔨᒡ ᒌᓴᔅᐦ ᐋᒸᔮ ᒦᒋᓱᔨᒡ᙮ ᐙᔥ ᐋᔪᐎᒄ ᑳ ᒌᐦ ᑎᓈᓂᐎᔨᒡ ᒫᓐ᙮
39 ᐋᒄ ᒌᓴᔅ ᑳᐦ ᐄᑖᑦ, “ᒌᔨᐙᐤ ᐹᕆᓰᑐᒄ, ᓈᔥᒡ ᔮᒀᐦ ᑳ ᐄᑖᔨᐦᑎᒥᐦᐄᑯᔮᒄ ᑰᔮᑭᓂᐙᐤ ᑭᔮᐦ ᒋᒥᓂᐦᒀᑭᓂᐙᐤ ᒑ ᒌ ᐱᔮᐦᑭᐦᒡ ᐊᓂᑎᐦ ᐋ ᓅᑯᐦᒡ᙮ ᒥᒄ ᒫᒃ ᐋᐅᒄ ᒋᐦᒋᐙ ᐋ ᐄᑖᔨᐦᑖᑯᓯᔮᒄ ᓈᔥᒡ ᐋ ᐄᑖᔨᐦᑎᒥᐦᐄᑯᔮᒄ ᒑᒀᓐ ᑭᔮᐦ ᓈᔥᒡ ᐋ ᒥᒋᐦᑑᑎᒫᒄ᙮
40 ᓂᒧᐃ ᐋ ᒋᓂᔅᑐᐦᑖᓈᐙᐤ, ᒋᔖᒥᓂᑑ ᑳ ᐅᔑᐦᑖᑦ ᒥᔮᔨᐤ ᒌ ᐅᔑᐦᑖᐤ ᑭᔮᐦ ᐊᓂᔮᔨᐤ ᐲᐦᒡ ᑖᓐ ᐋ ᐃᓯᓈᑯᓃᔨᒡ᙮
41 ᒥᔮᐦᑯᒡ ᒫᒃ ᐊᓂᒌ ᑳ ᒋᔅᑎᒫᑎᓰᔨᒡ ᑖᓐ ᐋ ᐄᔑ ᓂᑎᐙᔨᐦᑎᐦᒡ᙮ ᐋᒄ ᒫᒃ ᒑ ᐱᔮᐦᒋᓈᑯᐦᒡ ᒋᐱᒫᑎᓰᐎᓂᐙᐤ᙮”
42 “ᓄᐎᒡ ᒋᑭ ᐅᔅᑖᐱᓈᐙᐤ ᒌᔨᐙᐤ ᐹᕆᓰᒡ, ᓈᔥᒡ ᔮᒀᐦ ᒋᓈᓈᑭᒋᐦᑖᓈᐙᐤ ᐋ ᐄᔑ ᐱᐦᒀᓂᒧᐙᒄ ᒋᔖᒥᓂᑑ ᑖᓐ ᐋ ᐄᔑ ᓂᐦᑖᐅᒋᐦᒑᔮᒄ ᓂᐦᑖᐅᒋᐦᒋᑭᓂᔥ᙮ ᒥᔻᔑᐤ ᑭᔨᑆ ᐊᓐ ᐋᐦ ᑐᑎᒫᒄ᙮ ᒥᒄ ᒫᒃ ᓂᒧᐃ ᒥᔻᔑᐤ ᐋᐦᐋᑳ ᑯᐃᔅᒄ ᑐᑎᐙᑯᒡ ᑯᑎᑭᒡ ᐄᔨᔨᐅᒡ ᑭᔮᐦ ᐋᐦᐋᑳ ᓵᒋᐦᐋᒄ ᒋᔖᒥᓂᑑ᙮
43 ᓄᐎᒡ ᒋᑭ ᐅᔅᑖᐱᓈᐙᐤ ᒌᔨᐙᐤ ᐹᕆᓰᑐᒄ᙮ ᐙᔥ ᓈᔥᒡ ᐊᓂᑖᐦ ᐋ ᒋᔅᑖᔨᐦᑖᑯᐦᒡ ᒎᐤ ᐊᔨᒥᐦᐋᐅᑭᒥᑯᐦᒡ ᐋᑯᑖᐦ ᐙᐦ ᐊᐦᐄᔓᔮᒄ ᑭᔮᐦ ᓈᔥᒡ ᐋ ᓂᑎᐙᔨᐦᑎᒫᒄ ᒑ ᒌ ᒋᔅᑖᔨᒥᑯᐎᔮᒄ ᐋ ᐙᒋᔮᒥᑯᐎᔮᒄ ᐱᐹᒧᐦᑖᔮᒄ ᐊᓂᑖᐦ ᑳ ᒌ ᒥᐦᒑᑎᓈᓂᐎᔨᒡ ᐋ ᐊᑖᐙᓂᐎᒡ᙮
44 ᓄᐎᒡ ᒋᑭ ᐅᔅᑖᐱᓈᐙᐤ ᒌᔨᐙᐤ ᐐᔓᐙᐎᓐ ᑳ ᒋᔅᑯᑎᒫᒑᔮᒄ ᑭᔮᐦ ᒌᔨᐙᐤ ᐹᕆᓰᒡ, ᒌᔨᐙᐤ ᑳ ᐊᔨᒥᐦᐋᐦᑳᓱᔮᒄ, ᒥᒄ ᒫᒃ ᐋᐅᒄ ᐋ ᐃᓯᓈᑯᓯᔮᒄ ᒧᔮᒻ ᐋᐦᐋᑳ ᐅᐦᒋ ᒋᔅᒋᓂᐙᒋᑖᑳᓂᐎᒡ ᐋᑦ ᐋ ᒌ ᓂᐦᐄᑭᐙᑭᓅᑦ ᐊᐙᓐ᙮ ᐄᔨᔨᐅᒡ ᑖᑎᐦᑯᔅᑳᑎᒧᒡ ᐋᐦᐋᑳ ᒋᔅᒑᔨᐦᑎᐦᒡ ᒑᒀᔨᐤ ᐋᐦᑎᑯᓃᔨᒡ ᐊᓂᑖᐦ ᐄᑖᒥᐦᒡ᙮”
45 ᐹᔨᒄ ᑳ ᒋᔅᑯᑎᒫᒑᑦ ᐊᔨᒥᐦᐋᐤ ᐐᔓᐙᐎᓂᔨᐤ ᒌᐦ ᐄᑖᐤ, “ᒋᔅᑯᑎᒫᒑᓯᐤ, ᐆ ᑳᐦ ᐃᔨᓐ, ᒌ ᒫᔮᔨᒥᓈᓐ ᑭᔮᐦ ᓃᔮᓐ᙮”
46 ᒌᓴᔅ ᒌᐦ ᐄᑖᐤ, “ᓄᐎᒡ ᒋᑭ ᐅᔅᑖᐱᓈᐙᐤ ᒌᔨᐙᐤ ᐐᔓᐙᐎᓐ ᑳ ᒋᔅᑯᑎᒫᒑᔮᒄ, ᒌ ᐱᑯᓵᔨᒫᐙᐅᒡ ᐄᔨᔨᐅᒡ ᒑ ᒌ ᓂᓂᐦᐄᐦᑎᐦᒡ ᐊᓂᔮᔨᐤ ᐊᔨᒥᐦᐋᐤ ᐐᔓᐙᐎᓐ ᒌᔨᐙᐤ ᑳ ᐅᔑᐦᑖᔮᒄ, ᓈᔥᒡ ᑳ ᐋᔨᒥᐦᐄᑯᒡ ᒑ ᒌ ᓂᓂᐦᐄᐦᑎᐦᒡ᙮ ᒥᓯᒥᔅᑳᑰᐎᒡ ᐋᐦᐋᑳ ᒫᒃ ᐙᐙᒡ ᐊᐱᔑᔥ ᐐᐦ ᐄᒋᐦᐋᑯᒡ᙮
47 ᓄᐎᒡ ᒋᑭ ᐅᔅᑖᐱᓈᐙᐤ᙮ ᓈᔥᒡ ᒋᒌ ᒥᔪᐦᑖᐙᓈᐙᐤ ᐊᓂᑎᐦ ᑳ ᓂᐦᐄᑭᐙᑭᓂᐎᒡ ᐊᓂᔮᐦᑳ ᐅᒋᔅᒋᐙᐦᐄᒑᓱᒡ᙮ ᐊᓂᔮᐦᑳ ᒫᒃ ᐋᓂᔅᒑ ᑰᐦᑖᐙᐅᒡ ᐋ ᒌ ᓂᐱᐦᐋᒡ ᐅᔮᔨᐤ᙮
48 ᒋᓅᑰᐦᑖᓈᐙᐤ ᒫᒃ ᐋ ᓂᐦᐋᔨᐦᑎᒸᒄ ᐅᔮᔨᐤ ᐋ ᒌᐦ ᑎᒡ ᐋᓂᔅᒑ ᑰᐦᑖᐙᐅᒡ᙮ ᐐᔨᐙᐤ ᒌ ᓂᐱᐦᐋᐅᒡ ᐅᔮᔨᐤ ᐅᒋᔅᒋᐙᐦᐄᒑᓯᐤ ᒌᔨᐙᐤ ᒫᒃ ᒋᒌ ᒥᔪᓈᑯᐦᑖᐙᓈᐙᐤ ᐊᓂᑎᐦ ᑳ ᓂᐦᐄᑭᐙᑭᓂᐎᒡ᙮
49 ᐋᔪᐎᒄ ᒫᒃ ᐙᐦᒋ ᐃᔨᑦ ᑳ ᑭᒑᐦᑖᐙᔨᐦᑎᐦᒃ ᒋᔖᒥᓂᑑ, ‘ᓂᑭ ᐄᑎᔓᐦᐊᒧᐙᐅᒡ ᐊᓂᒌ ᐄᔨᔨᐅᒡ ᐅᒋᔅᒋᐙᐦᐄᒑᓯᐤ, ᑭᔮᐦ ᐋᑆᔅᑎᓪᐦ᙮ ᒥᒄ ᒫᒃ ᒋᑭ ᓂᐱᐦᐋᐅᒡ ᐱᔅᒡ, ᑭᔮᐦ ᑯᑎᒃ ᒋᑭ ᓂᓈᐦᑳᒋᐦᐋᐅᒡ᙮’ ᐋᔪᐎᒄ ᒫᒃ ᑳ ᐄᔅᐱᔨᒡ ᐅᔮᔨᐤ ᑳᐦ ᐃᔨᑦ ᒋᔖᒥᓂᑑ᙮
50 ᐋᒄ ᒫᒃ ᐊᓂᒌ ᐄᔨᔨᐅᒡ ᐊᓅᐦᒡ ᑳ ᐱᒫᑎᓰᔨᒡ, ᐐᔨᐙᐤ ᑭᑎ ᑎᐹᔅᑯᓈᑭᓂᐎᒡ ᑖᓐ ᑳ ᐃᔥᐱᔥ ᐹᒋ ᓂᐱᐦᐄᒫᑭᓂᐐᔨᒡ ᐊᓂᔮᐦᑳ ᐅᒋᔅᒋᐙᐦᐄᒑᓯᐤ ᑳ ᐃᔥᐱᔥ ᑎᑯᓃᔨᒡ ᐅᔮᔨᐤ ᐊᔅᒌᔨᐤ,
51 ᐊᓂᑖᐦ ᑳ ᐅᐦᒋᐱᔨᒡ ᑳ ᓂᐱᐦᐋᑭᓅᑦ ᐁᐱᓪ ᑳ ᐃᔑᓂᐦᑳᓱᑦ ᐊᓂᑖᐦ ᒫᒃ ᐄᔑ ᐊᓂᔮ ᐅᒋᔅᒋᐙᐦᐄᒑᓯᐤ ᓵᑳᕌᔮ ᑖᓐ ᑳ ᐄᔑ ᓂᐱᐦᐋᑭᓅᑦ᙮ ᐲᐦᑎᑳᒥᐦᒡ ᒋᔖᐊᔨᒥᐦᐋᐅᑭᒥᑯᐦᒡ ᒌ ᓂᐱᐦᐋᑭᓂᐤ ᓵᑳᕌᔮ ᒋᔥᑖᐅᒡ ᐊᓂᔮᔨᐤ ᐱᒋᔅᑎᓂᒑᐤ ᒦᒋᓲᓈᐦᑎᑯᔨᐤ᙮ ᐊᓂᑎᐦ ᒫᒃ ᒫᐅᒡ ᐋ ᐱᔮᐦᒑᔨᐦᑖᑯᐦᒡ ᒋᔖᐊᔨᒥᐦᐊᐅᑭᒥᒄ᙮ ᐋᐦᐋ, ᑖᑆᐦ ᒋᐐᐦᑎᒫᑎᓈᐙᐤ, ᐊᓂᒌ ᐄᔨᔨᐅᒡ ᑳ ᐱᒫᑎᓰᔨᒡ ᐊᓅᐦᒡ ᐐᔨᐙᐤ ᒋᑭ ᐋᓂᔅᒑ ᐱᑎᑯᔥᑳᑯᒡ ᒥᓯᐙ ᐊᓂᔮᔨᐤ ᑖᓐ ᑳ ᐄᔑ ᐎᓂᑐᑎᐙᑭᓂᐎᔨᒡ᙮”
52 “ᓄᐎᒡ ᒋᑭ ᐅᔅᑖᐱᓈᐙᐤ ᒌᔨᐙᐤ ᑳ ᒋᔅᑯᑎᒫᒑᔮᒄ ᐐᔓᐙᐎᓐ᙮ ᒌ ᓂᑳᐦᐙᐅᒡ ᐄᔨᔨᐅᒡ ᒑ ᒌ ᒋᔅᒑᔨᒫᒡ ᑭᔮᐦ ᒑ ᒌ ᑖᑆᔮᔨᒫᒡ ᒋᔖᒥᓂᑑ᙮ ᒌᔨᐙᐤ ᓂᒧᐃ ᒋᐐᐦ ᐲᐦᒑᓈᐙᐤ ᒋᔖᒥᓂᑑ ᐅᒋᐦᒋᐅᒋᒫᐎᓂᐦᒡ ᐋᒄ ᒫᒃ ᒌ ᓂᑳᐦᐋᐙᐅᒡ ᐊᓂᒌ ᐄᔨᔨᐅᒡ ᑳ ᐐᐦ ᐲᐦᒑᒡ᙮ ᒧᔮᒻ ᐊᐙᓐ ᐋ ᐅᑎᓂᐦᒃ ᐊᓂᔮᔨᐤ ᐋᐱᐦᐄᑭᓂᔨᐤ ᐋᑳ ᒑ ᒌ ᐲᐦᒑᔨᒡ ᐊᐙᔨᐤᐦ ᐊᓂᑖᐦ ᒋᔖᒥᓂᑑ ᐋ ᐅᒋᐦᒋᐅᒋᒫᐎᓂᐦᒡ ᐋᐅᒄ ᐋ ᐃᓯᓈᑯᓯᔮᒄ᙮”
53 ᐄᔥᐱᐦ ᒫᒃ ᐋᐦ ᐋᑎ ᒋᔅᑐᐦᑖᑦ ᒌᓴᔅ ᐊᓂᑎᐦ ᐅᐦᒋ, ᐋᒄ ᐊᓂᒌ ᑳ ᒋᔅᑯᑎᒫᒑᒡ ᐐᔓᐙᐎᓂᔨᐤ ᑭᔮᐦ ᐊᓂᒌ ᐹᕆᓰᒡ ᒌ ᒋᔑᐙᐦᐄᑯᒡ᙮ ᓈᔥᒡ ᒫᒃ ᓲᐦᒃ ᐊᔮᐱᒡ ᒌ ᑯᒀᒋᒫᐅᒡ ᑯᑎᒋᔨᐤ ᒑᒀᔨᐤ
54 ᐋ ᐐᐦ ᓈᓂᑐ ᑳᐦᒋᔥᑎᓈᒡ ᓂᑎᐐ ᒑ ᒌ ᐄᔨᔨᒡ ᒑᒀᔨᐤ ᐋᑎ ᒑ ᒌ ᐅᐦᒋ ᒫᒥᔑᒫᒡ᙮