17
ᒌᓴᔅ ᑳᐦ ᐋᔨᒧᑎᐦᒃ ᒥᒋᐦᑣᐎᓂᔨᐤ
ᒫᕠᔫ 18:6, 7, 21, 22; ᒫᕐᒃ 9:42
1 ᒌᓴᔅ ᒌᐦ ᐄᑖᐤ ᐅᒋᔅᒋᓂᐦᐊᒧᐙᑭᓐᐦ, “ᒨᔥ ᑖᑆᐦ ᒋᑭ ᑎᑯᓂᔨᐤ ᒑᒀᔨᐤ ᒑ ᑐᑖᑯᒡ ᐄᔨᔨᐅᒡ ᒑ ᒌ ᒥᒋᐦᑑᑎᐦᒡ᙮ ᒥᒄ ᒫᒃ ᑭᑎ ᐋᐦᒀᒋᐦᐄᓱᐎᒡ ᐊᓂᒌ ᑳᐦ ᑐᑎᐙᒡ ᐊᐙᔨᐤᐦ ᒑ ᒌ ᒥᒋᐦᑑᑎᒥᔨᒡ᙮
2 ᐊᓐ ᐊᐙᓐ ᒑ ᑐᑎᐙᒀ ᒑ ᒌ ᒥᒋᐦᑑᑎᒥᔨᒡ ᐹᔨᒄ ᐅᔮᔨᐤ ᐊᐙᔑᔥ ᑳ ᑖᑆᔮᔨᒥᔨᒡ ᐊᐅᔅᑖ ᑭᑎ ᒥᔻᔑᔨᐤ ᒑ ᒌ ᒫᐦᑯᐱᑎᒫᑭᓂᐎᔨᒡ ᐋ ᒥᐦᒑᐱᔅᒋᔨᒡ ᐊᓯᓃ ᐅᑯᔮᐦᒡ, ᐋᒄ ᒫᒃ ᐊᓂᑖᐦ ᒋᐦᒋᑭᒦᐦᒡ ᒑ ᒌ ᐱᑭᔥᑎᐙᐱᓈᑭᓅᑦ᙮
3 ᔮᒀᒦᒄ ᐋᑳ ᒑ ᒌᐦ ᑐᑎᐙᒄ ᐊᐙᓐ ᒑ ᒌ ᒥᒋᐦᑐᑎᐦᒃ᙮ ᒌᒋᔖᓐ ᒥᒌᐦᑐᑖᔅᑳ ᐐᐦᑎᒨ ᑖᓐ ᐋ ᐄᔑ ᒥᒋᐦᑐᑖᔅᒃ᙮ ᒥᐦᒋᔨᐙᓯᒑ ᒫᒃ, ᒑ ᐙᐹᔨᐦᑎᒨᐙᑦ᙮
4 ᐋᑦ ᒫᒃ ᓃᔣᔥᒡ ᑎᐦᑣ ᒥᒌᐦᑐᑖᔅᑳ ᐹᔨᒄ ᒌᔑᑳᐤᐦ, ᑭᔮᐦ ᒥᒄ ᑎᐦᑣ ᐱᔮᒡ ᓂᑎᐙᐱᒥᔅᑳ ᐋᐦ ᐄᑎᔅᒃ, ‘ᓂᒥᐦᒋᔨᐙᓯᓐ ᑖᓐ ᑳ ᐄᔑ ᒥᒌᐦᑐᑖᑖᓐ,’ ᐊᔮᐱᒡ ᐙᔥ ᒋᐱᐦ ᐙᐹᔨᐦᑎᒧᐙᐤ᙮”
ᒌᓴᔅ ᑳ ᐊᔨᒧᑎᒧᐙᑦ ᐅᒋᔅᒋᓂᐦᐊᒧᐙᑭᓐᐦ ᐅᑖᑆᔮᔨᐦᑎᒧᐎᓂᔨᐤ
5 ᒌᓴᔅ ᐅᒋᔅᒋᓂᐦᐊᒧᐙᑭᓐᐦ ᒌ ᐄᑎᑰ, “ᑎᐹᔨᐦᒋᒑᔨᓐ, ᓅᔅᒌᐦᑖᐦ ᐊᑎᑎᐤ ᓂᑖᑆᔮᔨᐦᑎᒧᐎᓈᓐ᙮”
6 ᐋᒄ ᑎᐹᔨᐦᒋᒑᓯᐤ ᑳᐦ ᐄᑖᑦ, “ᐋᑦ ᓈᔥᒡ ᐊᐱᔖᔑᒑ ᒋᑖᑆᔮᔨᐦᑎᒧᐎᓂᐙᐤ ᒧᔮᒻ ᒫᐅᒡ ᑳᐦ ᐋᐱᔒᔑᑦ ᔒᒥᓐ ᑳᐦ ᐋᔅᑎᑎᒃ ᐃᔥᐱᔖᒑ, ᒥᔥᑎᒄ ᒋᑭ ᒌᐦ ᐄᑖᐤ, ‘ᐱᑯᐦᐄᓲ ᐊᓂᑎᐦ ᑳ ᓂᐦᑖᐅᒋᔨᓐ ᐋᒄ ᐊᓂᑖᐦ ᒑ ᐄᔑ ᓂᐦᑖᐅᒋᐦᔨᓲᔨᓐ ᒋᐦᒋᑭᒦᐦᒡ,’ ᒋᑭᑐᑎᒻ ᒫᒃ᙮”
7 ᒌᓴᔅ ᒦᓐ ᑳᐦ ᐋᑎ ᐃᔨᑦ, “ᒧᔮᒻ ᐊᓂᑖᐦ ᐋᐱᒋᐦᐋᑭᓐ ᐋ ᓂᐦᑖᐅᒋᐦᒑᑦ ᑭᔮᐦ ᒫᒃ ᒫᓂᔥᒑᓂᔥ ᐋ ᓈᓈᑭᒋᐦᐋᑦ, ᐄᔥᐱᐦ ᒫᒃ ᒑ ᒌᐦᐙᒡ ᐋ ᒌᔥ ᐋᐱᑎᓰᑦ ᒋᑭ ᐄᑎᑰ ᐋ ᐅᒋᒫᒻ? ‘ᐋᔥᑎᒻ, ᐹᒋ ᐲᐦᒑᐦ, ᐹᒋ ᒦᒋᓲ᙮’
8 ᓂᒫ, ᐅᔮᔨᐤ ᒋᑭ ᐄᑎᑰ, ‘ᐹᒋ ᐎᔨᔥᑑᐦ ᐋᒄ ᒫᒃ ᒌᔥ ᒦᒋᓱᔮᓈ, ᐋᒄ ᒌᔨ ᒀᔅᒋᐦᐱᓐ ᒑ ᒦᒋᓱᔨᓐ᙮’
9 ᓂᒧᐃ ᒋᑭ ᐅᐦᒋ ᓂᓈᔅᑯᒫᐤ ᐊᓂᔮᔨᐤ ᐅᑖᐱᒋᐦᐋᑭᓐ ᐋ ᒌᐦ ᑐᑎᒥᔨᒡ ᑖᓂᔮᔨᐤ ᑳ ᐐᐦ ᐄᑖᐱᒋᐦᐋᑦ᙮
10 ᒌᔨᐙᐤ ᒫᒃ ᐄᔥᐱᐦ ᑳ ᒌᔑᐦᑖᔮᒄ ᒥᓯᐙ ᒑᒀᓐ ᑳᐦ ᐄᑎᔓᒥᑯᐎᔮᒄ ᒑ ᒌ ᐄᐦᑐᑎᒫᒄ, ᒋᐱᐦᐄᓈᐙᐤ, ‘ᐙᔥ ᒥᒄ ᐋᐱᒋᐦᐋᑭᓂᒡ ᓃᔮᓐ᙮ ᓂᒌᐦ ᑐᑖᓈᓐ ᒥᒄ ᐊᓐ ᑖᓐ ᑳᐦ ᐄᑎᔓᒥᑭᐎᔮᐦᒡ ᒑ ᑐᑎᒫᐦᒡ᙮’ ”
ᒌᓴᔅ ᑳ ᓂᒋᔥᑭᐙᑦ ᒥᑖᐦᑐ ᓈᐹᐤ ᐋ ᐅᒥᒌᐙᔅᐱᓈᔨᒡ
11 ᒫᒀᒡ ᒌᓴᔅ ᑳ ᐄᑐᐦᑖᑦ ᐊᓂᑖᐦ ᒋᕉᓯᓕᒥᐦᒡ, ᒌ ᐱᒧᐦᑖᐤ ᐊᓂᑎᐦ ᐋ ᐅᐦᒋ ᑖᐦᒋᔅᑳᑑᔨᔨᒡ ᓵᒫᕆᔮ ᐊᔅᒌᔨᐤ ᑭᔮᐦ ᒫᒃ ᑳᓕᓖ ᐊᔅᒌᔨᐤ᙮
12 ᓂᐦᐋᐤ ᒫᒃ ᐋᑎ ᐅᑎᐦᑎᐦᒃ ᐃᐦᑖᐎᓂᔨᐤ ᒥᑖᐦᑐ ᓈᐹᐤ ᒌ ᓂᒋᐦᐄᑰ ᓈᔥᒡ ᐋ ᒫᔮᑎᓃᔨᒡ ᐅᒥᒌᐙᔅᐱᓈᐎᓂᔨᐤ ᐋ ᐃᔮᔨᒡ᙮
13 ᐋᐦᐋᑳ ᒫᒃ ᐅᐦᒌ ᐹᔓᒋᑳᐳᔥᑖᑯᑦ᙮ ᐋᒄ ᑳ ᑖᑆᑖᒡ ᒌᓴᔅᐦ ᐋᐦ ᐄᑖᒡ, “ᒌᓴᔅᐦ, ᒋᔅᑯᑎᒫᒑᓯᐤ, ᐹᒋ ᒋᔅᑎᒫᒑᔨᒥᓈᓐ ᐆ ᐋ ᐃᓯᓈᑯᓯᔮᐦᒡ᙮”
14 ᒌᓴᔅ ᒫᒃ ᐄᔥᐱᐦ ᐎᔮᐱᒫᑦ ᒌᐦ ᐄᑖᐤ, “ᒫᒌᒄ, ᓂᑎᐙᐱᒫᐦᒄ ᐊᔨᒥᐦᐋᐅᒋᒫᐤ, ᒑ ᒌ ᐙᐱᒥᑖᒄ᙮” ᒫᒀᒡ ᒫᒃ ᐋ ᐃᔥᐱᔑᐱᔨᒡ ᐋ ᓂᑎᐙᐱᒫᒡ ᐊᔨᒥᐦᐋᐅᒋᒫᐤ, ᒌ ᒦᓂᐙᑎᓰᐆᒡ᙮
15 ᐄᔥᐱᐦ ᒫᒃ ᐊᓐ ᐹᔨᒄ ᓈᐹᐤ ᒑᔅᒑᔨᐦᑎᐦᒃ ᐋ ᒌ ᒦᓂᐙᒋᐦᐋᑭᓅᑦ, ᒌ ᒌᔨᐙᐤ ᑳ ᓂᑎᐙᐱᒫᑦ ᒌᓴᔅᐦ, ᐋ ᒋᔣᐙᑦ ᐋ ᒫᒥᐦᒋᒫᑦ ᒋᔖᒥᓂᑑ᙮
16 ᐄᔥᐱᐦ ᒫᒃ ᑖᑯᔑᐦᒃ ᒌ ᐅᒋᐦᒌᐦᑯᓂᐱᔨᐦᐆ ᐅᐦᑎᔅᑰ ᒌᓴᔅᐦ ᐋᐦ ᑖᔨᒡ ᐋ ᓂᓈᔅᑯᒫᑦ᙮ ᐆ ᒫᒃ ᓈᐹᐤ ᓵᒫᕆᔮ ᐊᔅᒌᐦᒡ ᒌ ᐅᐦᒌᐤ᙮
17 ᒌᓴᔅ ᒫᒃ ᒌᐦ ᐄᑖᐤ, “ᒌ ᒥᑖᐦᑎᔔᒡ ᐊᓂᒌ ᑳ ᒦᓂᐙᒋᐦᐋᑭᓂᐎᒡ᙮ ᑖᓐ ᐋᔨᑎᐦᒡ ᐊᓂᔮᐦᑳ ᐹᔨᑯᔥᑖᐤ?
18 ᒥᒄ ᐆ ᐹᔨᒄ ᓈᐹᐤ ᐋᐦᐋᑳ ᒎᐤ ᐄᑎᔅᑳᓈᓯᑦ ᐋ ᐹᒋ ᓂᓈᔅᑯᒫᑦ ᒋᔖᒥᓂᑑ᙮”
19 ᐋᒄ ᒌᓴᔅ ᑳᐦ ᐄᑖᑦ ᐊᓂᔮᔨᐤ ᓈᐹᐤ, “ᐱᓯᑰᐦ, ᐋᒄ ᒫᒃ ᒑ ᒌᐙᔨᓐ, ᐙᔥ ᒋᑖᑆᔮᔨᐦᑎᒧᐎᓐ ᒋᒦᓂᐙᒋᐦᐄᑯᓐ᙮”
ᒌᓴᔅ ᑳᐦ ᐋᔨᒨᑎᐦᒃ ᒑ ᐅᑎᐦᒋᐱᔨᒡ ᒋᔖᒥᓂᑑᐦ ᐅᒋᐦᒋᐅᒋᒫᐎᓂᔨᐤ
ᒫᕠᔫ 24:23-28, 37-41
20 ᐹᔨᒀᐤ ᐹᕆᓰᒡ ᒌ ᑯᒀᒋᒫᐅᒡ ᒌᓴᔅᐦ ᐋᐦ ᐄᑖᒡ, “ᑖᔨᔥᐱᔥ ᒑ ᐅᑖᐦᒋᐱᔨᒡ ᒋᔖᒥᓂᑑ ᐅᒋᐦᒌᐅᒋᒫᐎᓐ᙮” ᐋᒄ ᒌᓴᔅ ᑳᐦ ᐄᑖᑦ, “ᒋᔖᒥᓂᑑ ᐅᒋᐦᒌᐅᒋᒫᐎᓐ ᐅᑖᐦᒋᐱᔨᒑ ᓂᒧᐃ ᒧᔖ ᑭᑎ ᓅᑯᓂᔨᐤ᙮
21 ᓂᒧᐃ ᐊᐙᓐ ᒋᑭ ᒌ ᐃᔨᐤ, ᐹᒋ ᑭᓂᐙᐱᐦᑏ ᒫᐦ᙮ ᒫᐅᑖ ᐋᐦᑎᑯᓃᔨᒡ ᒋᔖᒥᓂᑑ ᐅᒋᐦᒌᐅᒋᒫᐎᓐ᙮ ᐙᔥ ᒋᔖᒥᓂᑑ ᐅᒋᐦᒌᐅᒋᒫᐎᓐ ᔖᔥ ᑎᑯᓂᔨᐤ ᐅᑎᐦ ᑖᐙᔨᔥ ᐋᐦ ᑖᔮᒄ᙮”
22 ᐋᒄ ᒫᒃ ᑳᐦ ᐄᑖᑦ ᐅᒋᔅᒋᓂᐦᐊᒧᐙᑭᓐᐦ, “ᐋᔥᒄ ᐊᓂᑖᐦ ᓃᔥᑖᒥᐦᒡ ᑭᑎ ᐅᑎᐦᒋᐱᔨᐤ ᓈᔥᒡ ᒑ ᐱᑯᓵᔨᐦᑎᒫᒄ ᒦᓐ ᑳᐤ ᒑ ᒌ ᐙᐱᒫᒄ ᐄᔨᔨᐅᑯᓯᓵᓐ ᐋᑎᑯᓯᐦᒃ, ᓂᒧᐃ ᒫᒃ ᒋᑭ ᒌ ᐙᐱᒫᐙᐤ ᐊᓂᑎᐦ ᐊᓐ ᒫᒀᒡ᙮
23 ᒋᑭ ᑖᐅᒡ ᒫᒃ ᐄᔨᔨᐅᒡ ᒑ ᐄᑎᑖᑯᒡ, ‘ᒫᐅᑖ ᐋᐦ ᑖᑦ ᐄᔨᔨᐅᑯᓯᓵᓐ,’ ᑭᔮᐦ ᒫᒃ, ‘ᒫᓈ ᓈᑖᐦ ᐋᐦ ᑖᑦ᙮’ ᒥᒄ ᒫᒃ ᐊᑳᐐ ᒋᑭ ᐅᐦᒋ ᓈᓂᑐᐙᐱᒥᓈᐙᐤ ᐊᓂᑖᐦ᙮
24 ᐙᔥ ᐄᔨᔨᐅᑯᓯᓵᓐ ᐊᓂᔮᔨᐤ ᒌᔑᑳᔨᒑ ᑳᐤ ᒑ ᑎᑯᔑᓃᔨᒡ ᒧᔮᒻ ᐋ ᐙᔥᑖᐱᔨᐦᒡ ᑳ ᒌ ᐃᓯᓈᑯᐦᒡ ᒥᓯᐙ ᐊᔅᐱᓵᒡ ᒑ ᐙᔥᑎᐙᒡ ᒌᔑᒄ᙮
25 ᒥᒄ ᒫᒃ ᐋᔥᒄ ᐋᒸᔮ ᐅᑎᐦᒋᐱᔨᒡ ᐆ ᐊᓂᒌ ᐄᔨᔨᐅᒡ ᒫᒀᒡ ᐊᓅᐦᒡ ᑳ ᐱᒫᑎᓰᔨᒡ ᓈᔥᒡ ᓂᑭ ᐐᓯᒑᔨᐦᑎᒥᐦᐄᑯᒡ ᑭᔮᐦ ᓂᑭ ᐋᑎᐙᔨᒥᑯᒡ᙮
26 ᒧᔮᒻ ᒫᒃ ᑖᓐ ᑳ ᐄᑖᔨᐦᑖᑯᓃᔨᒡ ᐊᓂᑎᐦ ᒫᒀᒡ ᑳ ᐱᒫᑎᓰᑦ ᐊᓂᔮ ᓄᐙ, ᐋᐅᒄ ᐊᓐ ᒑ ᐄᑖᔨᐦᑖᑯᐦᒡ ᒦᓐ ᑎᑯᔑᐦᑳ ᐄᔨᔨᐅᑯᓯᓵᓐ᙮
27 ᒥᒄ ᐙᐦ ᑎᒡ ᒌᐦ ᑑᐎᒡ ᐊᓂᔮᐦᑳ ᐄᔨᔨᐅᒡ, ᒌ ᒦᒋᓯᐎᒡ, ᒌ ᒥᓂᐦᒀᐅᒡ, ᒌ ᒋᐦᒋᐐᒋᑐᐎᒡ ᐲᐦᐃᒻ ᑳ ᐅᑎᐦᒋᐱᔨᒡ ᒑ ᐲᐦᒑᑦ ᓄᐙ ᐅᒌᒫᓐ᙮ ᐋᒄ ᑳ ᐊᔅᒋᐳᑖᒡ ᐊᔅᒌ, ᒥᓯᐙ ᑳ ᓂᔔᐎᓈᑎᓰᔨᒡ ᐋ ᐃᑎᔑᒡ ᐊᓂᒌ ᐄᔨᔨᐅᒡ᙮
28 ᐋᔪᐎᒄ ᒫᒃ ᒧᔮᒻ ᑳ ᐄᑖᔨᐦᑖᑯᓃᔨᒡ ᐋᔥᒄ ᐋ ᒌ ᐱᒫᑎᓰᑦ ᐊᓂᔮ ᓨᑦ᙮ ᒥᓯᐙ ᐄᔨᔨᐅᒡ ᒥᒄ ᐙᐦ ᐋᐃᐦᔨᑎᒡ ᒌᐦ ᑑᐎᒡ᙮ ᐋ ᒦᒋᓱᒡ, ᐋ ᒥᓂᐦᒀᒡ, ᐋ ᐅᑎᓂᒑᒡ, ᐋ ᐊᑖᐙᒡ, ᐋ ᓂᐦᑖᐅᒋᐦᒑᒡ, ᐋᔨᐤᐦ ᐋ ᒫᓄᒑᒡ᙮
29 ᐊᓂᔮᔨᐤ ᑳ ᒌᔑᑳᔨᒡ ᒑ ᓂᑭᑎᐦᒃ ᓨᑦ ᐊᓂᔮᔨᐤ ᐃᐦᑖᐎᓂᔨᐤ ᔂᑐᒻ ᑳ ᐃᔑᓂᐦᑳᑖᔨᒡ, ᒌ ᒋᒨᓂᐱᐦᒋᐦᑎᓐ ᐃᔥᑯᑖᐤ ᑭᔮᐦ ᐋ ᐃᔥᑯᑖᐅᒡ ᐊᓯᓃᔨᒡ ᒌ ᐹᐦᐱᐦᒋᔑᓂᒡ ᒋᐦᒋᒌᔑᑯᐦᒡ ᐅᐦᒋ᙮ ᐋᒄ ᒫᒃ ᒥᓯᐙ ᐄᔨᔨᐅᒡ ᐊᓂᑎᐦ ᐊᓂᔮᔨᐤ ᐃᐦᑖᐎᓂᔨᐤ ᑳᐦ ᑖᒡ ᒌ ᓂᔑᐎᓈᒋᐦᐄᑯᒡ ᐅᔮᔨᐤ ᑳ ᐄᔅᐱᔨᒡ᙮”
30 ᐋᒄ ᒌᓴᔅ ᑳᐦ ᐃᔨᑦ, “ᐋᔪᐎᒄ ᒧᔮᒻ ᒑ ᐄᑖᑎᓰᓈᓂᐎᔨᒡ ᐊᓐ ᐋ ᒌᔑᑳᒡ ᐹᒋ ᓅᑯᓯᒑ ᐄᔨᔨᐅᑯᓯᓵᓐ᙮”
31 “ᐆ ᒫᒃ ᐋ ᒌᔑᑳᒡ ᐅᑎᐦᒋᐱᔨᐦᒑ ᐊᓐ ᐊᐙᓐ ᐎᔨᐐᑎᒥᐦᒡ ᑳᐦ ᑖᑦ ᐊᑳᐐ ᑭᑎ ᐅᐦᒋ ᐲᐦᒑᐤ ᐐᒋᐦᒡ, ᑭᔮᐦ ᒫᒃ ᐊᐙᓐ ᐊᓂᑖᐦ ᓅᐦᒋᒦᐦᒡ ᑳᐦ ᑖᑦ ᐊᑳᐐ ᒋᑭ ᐅᐦᒋ ᒌᔨᐙᐤ ᒑ ᒌ ᓂᑑᓂᓈᔅᑐᓂᐦᒃ ᐅᒑᒀᓂᒻ᙮
32 ᒋᔅᒍᒄ ᒫᒃ ᑖᓐ ᑳ ᐄᔅᐱᔨᔨᒡ ᓨᑦ ᐅᐐᒋᒫᑭᓐ, ᐋ ᒌ ᒌᐙᐋᐱᓵᐱᔨᒡ, ᐋᑯᑖᐦ ᑳᐦ ᐋᑎ ᓂᔑᐎᓈᑎᓰᔨᒡ᙮
33 ᐊᐙᓐ ᐋ ᐐᐦ ᑭᓄᐙᔨᐦᑎᒫᓱᑦ ᐅᐱᒫᑎᓰᐎᓐ ᒋᑭ ᐎᓂᐦᑖᐤ᙮ ᐊᓐ ᒫᒃ ᐊᐙᓐ ᑳ ᐱᒋᔥᑖᔨᐦᑎᐦᒃ ᐅᐱᒫᑎᓰᐎᓐ ᐋᐅᒄ ᐊᓐ ᒑ ᑭᓂᐙᔨᐦᑖᑭᓂᐎᔨᒡ ᐅᐱᒫᑎᓰᐎᓐ᙮
34 ᒋᐐᐦᑎᒫᑎᓈᐙᐤ ᑖᓐ ᒑ ᐄᔅᐱᔨᒡ ᒦᓐ ᑎᑯᔑᒑ ᐄᔨᔨᐅᑯᓯᓵᓐ᙮ ᐊᓐ ᑎᐱᔅᑳᒑ ᑎᑯᔑᓂᔮᓈ ᑭᑎ ᓃᔓᓯᓂᒡ ᐄᔨᔨᐅᒡ ᓂᐹᐎᓂᐦᒡ᙮ ᐹᔨᒄ ᒫᒃ ᒋᔖᒥᓂᑑ ᒋᑭ ᐅᑎᓂᑰ ᐋᒄ ᐊᓐ ᑯᑎᒃ ᒑ ᓂᑭᑖᑭᓅᑦ᙮
35 ᑭᔮᐦ ᒋᑭ ᓃᔔᒡ ᐃᔅᒀᐅᒡ ᐋ ᐱᒥᓂᐙᒡ᙮ ᐹᔨᒄ ᐊᓐ ᒋᑭ ᐅᑎᓈᑭᓂᐤ ᐋᒄ ᐊᓐ ᑯᑎᒃ ᒑ ᓂᑭᑖᑭᓅᑦ᙮
36 ᑭᔮᐦ ᒫᒃ ᓃᔓ ᓈᐹᐅᒡ ᒋᑭ ᑖᐅᒡ ᓅᐦᒋᒦᐦᒡ᙮ ᐹᔨᒄ ᐊᓐ ᒋᑭ ᐅᑎᓈᑭᓂᐤ ᐋᒄ ᐊᓐ ᑯᑎᒃ ᒑ ᓂᑭᑖᑭᓅᑦ᙮”
37 ᒌᓴᔅ ᐅᒋᔅᒋᓂᐦᐊᒧᐙᑭᓐᐦ ᒌ ᑯᒀᒋᒥᑰ ᐋᐦ ᐄᑎᑯᑦ, “ᑎᐹᔨᐦᒋᒑᔨᓐ, ᑖᓂᑖᐦ ᐆ ᒑ ᐄᔅᐱᔨᒡ᙮” ᒌᐦ ᐄᑖᐤ ᒫᒃ ᒌᓴᔅ, “ᒥᑐᓐ ᒋᑭ ᒋᔅᒑᔨᐦᑖᓈᐙᐤ ᐄᔅᐱᔨᐦᒑ ᐆ᙮ ᒧᔮᒻ ᐊᓂᑖᐦ ᐋ ᓅᑯᓯᒡ ᑳᐦᑳᒍᐎᒡ ᐋ ᒥᐦᒑᑎᒡ ᒋᔅᒑᔨᐦᑖᑯᓂᔨᐤ ᐋᐦᑎᑯᓃᔨᒡ ᒑᒀᔨᐤ ᐋ ᓂᐲᒥᑭᓃᔨᒡ ᐊᓂᑖᐦ᙮”