4
ᑳ ᑭᒌᔑᐦᐄᐙᒡ
1 ᑳ ᐱᔮᐦᒋᓰᑦ ᐊᐦᒑᐦᒄ ᐱᔮᑭᔅᒡ ᐐᐦᑎᒫᒑᐤ ᑖᓐ ᒑ ᐋᑎ ᐃᔅᐱᔨᔨᒡ ᒫᐦᒋᒡ ᐋᑎᒌᔑᑳᔨᒑ᙮ ᑭᑎ ᑖᐅᒡ ᐄᔨᔨᐅᒡ ᐋ ᐴᓃᒡ ᐋ ᑖᑆᔮᔨᒫᒡ ᒌᓴᔅᐦ᙮ ᒋᑭ ᑳᒌᔑᒥᑯᒡ ᑳ ᓂᓂᑏᔨᒡ ᒥᒋᐊᐦᒑᐦᒄ ᐋᒄ ᒑ ᓅᔔᔥᑭᒸᒡ ᑖᓐ ᐋ ᐄᔑ ᒋᔅᑯᑎᒫᒑᔨᒡ᙮
2 ᐋᔪᐎᒄ ᐊᓂᒌ ᐄᔨᔨᐅᒡ ᒑ ᐄᔑ ᐎᓂᐱᔨᐦᐄᐙᒡ ᐅᒌ ᓂᑎᐐ ᒥᒄ ᐋ ᐄᔑ ᒋᔅᑯᑎᒫᒑᒡ᙮ ᐋᑯᑖᐦ ᒑ ᐅᐦᒋ ᐱᐹᐦᑖᑯᐦᒡ ᐅᐦᐄ ᒥᒋᒋᔅᑯᑎᒫᒑᐎᓐ ᑭᔮᐦ ᓂᓂᑎᔨᐆᓐ᙮ ᓂᒧᐃ ᒥᑐᓐ ᑭᑎ ᐅᐦᒋ ᐱᐹᒫᔨᐦᑎᒧᒡ ᑖᓐ ᐋ ᐄᔑ ᒥᒋᐦᑐᑎᐦᒡ᙮
3 ᒋᑭ ᐐᐦ ᒋᔅᑎᐦᐋᒫᒑᐅᒡ ᒑ ᒌ ᒋᐦᒋᐐᒋᑐᓈᓂᐎᔨᒡ᙮ ᑭᔮᐦ ᒋᑭ ᑎᑯᓂᔨᐤ ᒦᒋᒥᔨᐤ ᐋ ᐐᐦ ᒋᔅᑎᐦᐋᒫᒑᒡ ᒑ ᒌ ᒦᒋᓈᓂᐎᔨᒡ᙮ ᒋᔖᒥᓂᑑ ᒫᒃ ᒌ ᐅᔑᐦᑖᐤ ᐅᔮᔨᐤ ᒦᒋᒥᔨᐤ ᒑ ᒌ ᒦᒋᔨᒡ ᐋ ᓂᓈᔅᑯᒧᔨᒡ ᐊᓂᔮᔨᐤ ᑳ ᑖᑆᐦᑎᒥᔨᒡ ᑭᔮᐦ ᑳ ᒋᔅᒑᔨᐦᑎᒥᔨᒡ ᑖᑆᐎᓂᔨᐤ᙮
4 ᐙᔥ ᒥᓯᐙ ᒦᒋᒥᔨᐤ ᐋ ᒦᒋᓈᓂᐎᔨᒡ ᑳ ᐅᔑᐦᑖᑦ ᒋᔖᒥᓂᑑ ᒥᔻᔑᔨᐤ᙮ ᓂᓈᔅᑯᒫᒄᐦ ᒫᒃ ᒋᔖᒥᓂᑑ ᒥᒄ ᒑᒀᓐ ᐙᐦ ᒦᒋᔮᒄ᙮
5 ᐙᔥ ᒋᔖᒥᓂᑑ ᐅᑎᔨᒧᐎᓐᐦ ᑭᔮᐦ ᐅᑎᔨᒥᐦᐋᐎᓐ ᐋᔪᐎᒄ ᓂᓂᐦᐄᐙᐦᐄᑯᑦ᙮
ᐊᐙᓐ ᑳ ᒥᔪ ᐋᐱᑎᔒᔥᑎᐙᑦ ᙭
6 ᒥᔔ ᒫᒃ ᐅᔮᔨᐤ ᐄᔑ ᒋᔅᑯᑎᒫᐎᑣᐙ ᐐᒋᔖᓂᒫᐅᒡ, ᒋᑭ ᒥᔪ ᐋᐱᑎᓰᔅᑎᐙᐤ ᙭ ᒌᓴᔅ, ᐋ ᓄᔓᔅᑭᒥᓐ ᐋᑖᑆᒫᑳᐦᒡ ᑖᑆᔮᔨᐦᑎᒧᐎᓐ ᑭᔮᐦ ᐊᓐ ᒥᔪ ᒋᔅᑯᑎᒫᒑᐎᓐ ᒌ ᒥᔪ ᓂᐦᑖᐅᒋᐦᐄᑯᓐ᙮
7 ᐊᑳᐐ ᐃᔮᐱᑖᔨᐦᑦ ᐊᓂᐦᐄ ᐋᑳ ᑳ ᐎᔮᔥ ᐄᑖᐱᑎᐦᒡ ᓂᑎᐐ ᑎᐹᒋᒧᐎᓐ᙮ ᐊᐅᔅᑖ ᐐᐦ ᒋᔅᑯᑎᒫᓱᐦ ᑖᓂᑖᐦ ᐊᑎᑎᐤ ᒑ ᒌ ᐅᐦᒋ ᓂᓂᐦᐄᐙᐦᐄᑦ ᒋᔖᒥᓂᑑ᙮
8 ᑎᑯᓂᔨᐤ ᑭᔨᑆ ᑖᓐ ᐋ ᐄᔑ ᐐᒋᐦᐄᑯᑦ ᐊᐙᓐ ᐋ ᓯᓵᐅᐱᔨᐦᐅᑦ᙮ ᐋᒄ ᒫᒃ ᐊᓐ ᐊᐙᓐ ᓲᐦᒃ ᒨᔥ ᑳ ᐐᐦ ᓂᓂᐦᐄᐙᐦᐋᑦ ᒋᔖᒥᓂᑑ ᐋᔪᐎᒄ ᐅᔮᔨᐤ ᐊᑎᑎᐤ ᒑ ᐐᒋᐦᐄᑯᑦ ᐊᓅᐦᒡ ᐅᑎᐦ ᐋ ᐱᒫᑎᓰᑦ ᑭᔮᐦ ᒫᒃ ᐊᓂᑖᐦ ᐄᔑ ᓃᔥᑖᒥᐦᒡ᙮
9 ᑖᑆᒥᑭᓐ ᐆ ᐊᔨᒥᐎᓐ, ᑭᔮᐦ ᐄᑖᔨᐦᑖᑯᓐ ᒑ ᒌ ᑖᑆᐦᑖᑭᓂᐎᒡ᙮
10 ᐋᐅᒄ ᒫᒃ ᐙᐦᒋ ᓲᐦᒃ ᐊᔮᐱᒡ ᐄᑖᔨᐦᑎᒥᐦᐄᑯᔨᐦᒄ ᐆ ᑖᓐ ᐋᐦ ᐄᑖᐱᑎᓰᐦᒄ ᐋᑦ ᐋᐦ ᐋᔨᒧᐦᐅᔨᐦᒄ ᐙᔥ ᒋᑎᔅᐹᔨᒧᑐᑎᐙᓂᐤ ᒋᔖᒥᓂᑑ ᑳ ᐱᒫᑎᓰᑦ, ᐊᓐ ᑳ ᓂᑎᐙᔨᒫᑦ ᒥᓯᐙ ᐊᐙᔨᐤᐦ ᒑ ᒌ ᐱᒫᒋᐦᐅᔨᒡ ᑭᔮᐦ ᑳ ᐱᒫᒋᐦᐋᑦ ᒥᓯᐙ ᐊᓂᔮᔨᐤ ᑳ ᑖᑆᔮᔨᒥᑯᑦ᙮
11 ᐋᔪᐎᒄ ᐅᔮᔨᐤ ᒋᐱᐦ ᐄᑎᔓᒫᐙᐅᒡ ᑭᔮᐦ ᒋᐱᐦ ᐄᔑ ᒋᔅᑯᑎᒧᐙᐙᐅᒡ ᐄᔨᔨᐅᒡ ᑳ ᑖᑆᐦᑎᐦᒡ᙮
12 ᐊᑳᐐ ᒋᑭ ᐅᐦᒋ ᐃᔮᑐᐦᐄᑯᒡ ᐄᔨᔨᐅᒡ ᐊᓂᔮᔨᐤ ᐋ ᐅᔅᒋᓃᒌᐎᑦ᙮ ᒥᒄ ᐄᔑ ᐱᒫᑎᓰᐦ ᐊᓂᑎᐦ ᒑ ᒌ ᐅᐦᒋ ᒋᔅᒋᓄᐙᐱᐦᑎᐦᒡ ᒋᐱᒫᑎᓰᐎᓂᔨᐤ ᐊᓂᒌ ᑳ ᑖᑆᐦᑎᐦᒡ, ᑭᔮᐦ ᑖᓐ ᐋ ᐃᑎᐦᑖᑯᓃᔨᒡ ᒋᑎᔨᒧᐎᓂᔨᐤ, ᑭᔮᐦ ᑖᓐ ᐋ ᐃᓯᓈᑯᐦᒡ ᒋᐱᒫᑎᓰᐎᓂᔨᐤ ᑭᔮᐦ ᑖᓐ ᐋ ᐄᔑ ᓵᒋᐦᐄᐙᔨᓐ ᑭᔮᐦ ᒫᒃ ᐋ ᐄᔑ ᑖᑆᐦᑎᒥᓐ ᑭᔮᐦ ᑖᓐ ᐋ ᐄᔑ ᐱᔮᐦᒋᓯᔨᓐ᙮
13 ᒑ ᐃᔥᐱᔥ ᐋᑳ ᑎᑯᔑᓂᔮᓐ ᓲᐦᒃ ᐊᔮᐱᒡ ᒨᔥ ᐊᔨᒥᐦᑖ ᒋᐦᒋᒥᓯᓂᐦᐄᑭᓐ ᐊᓂᑖᐦ ᐋ ᒫᐅᒋᐦᐄᑐᔮᒄ ᑭᔮᐦ ᐋᑳ ᐴᓃ ᐋ ᑭᒑᔅᒀᔨᓐ ᑭᔮᐦ ᐋ ᒋᔅᑯᑎᒫᒑᔨᓐ᙮
14 ᒨᔥ ᐋᐱᒋᐦᑖᐦ ᐊᓐ ᐊᐦᒑᐦᒄ ᒥᔨᐙᐎᓐ ᐋ ᐄᔑ ᐃᔮᔨᓐ ᒑ ᒌ ᐋᐱᑎᔒᔥᑑᑦ ᒋᔖᒥᓂᑑ᙮ ᐙᔥ ᐋᐅᒄ ᐆ ᒥᔨᐙᐎᓐ ᑳ ᒥᔨᑯᐎᔨᓐ ᒋᔅᒋᐙᐦᐄᒑᐎᓂᐦᒡ ᐅᐦᒋ, ᑳ ᑖᐦᒋᓂᔅᒡ ᐋ ᐊᔨᒥᐦᐋᔥᑎᒫᔅᒡ ᐊᓂᒌ ᑳ ᓃᑳᓂᔥᑭᐦᒡ ᐊᔨᒥᐦᐋᐅᑭᒥᑯᔨᐤ᙮
15 ᓂᓈᑭᑐᐙᔨᐦᑎᒥᐦᐄᒄ ᒨᔥ ᒑ ᒌᐦ ᑐᑎᒥᓐ ᐆ ᑳ ᐄᔑ ᐋᔨᒨᑎᒫᑖᓐ ᐋᒄ ᒫᒃ ᒑ ᒌ ᐙᐱᐦᑎᐦᒡ ᒥᓯᐙ ᐄᔨᔨᐅᒡ ᑖᓐ ᐋ ᐄᔑ ᓈᓈᓂᒌᒻ ᑭᔅᒋᐦᐅᔨᓐ ᐋᐦ ᐋᐱᑎᔒᔥᑑᑦ ᒋᔖᒥᓂᑑ᙮
16 ᓂᓈᑭᑐᐙᔨᐦᑎᒥᐦᐄᒄ ᑭᔮᐦ ᒌ ᐱᒫᑎᓰᐎᓐ ᑭᔮᐦ ᐊᓐ ᐋ ᐄᔑ ᒋᔅᑯᑎᒫᒑᔨᓐ᙮ ᐆ ᐄᔑ ᓂᓈᑭᑎᐙᔨᐦᑎᒥᓈ ᐋᐅᒄ ᐆ ᒑ ᑭᓂᐙᔨᒥᑯᔮᒄ ᑭᔮᐦ ᒑ ᐱᒫᒋᐦᐄᑯᔮᒄ, ᒌᔨ ᑭᔨᑆ ᑭᔮᐦ ᒫᒃ ᐊᓂᒌ ᑳ ᓂᑑᐦᑖᔅᒡ᙮