3
John dune too be 'ulh'en-un ts'iyanne, “NeMoodihti ooti ooba lhaoodahleh” ubulhni
'Et 'awet Caesar Tiberius, 'en yun k'ut ndulcho whe lerwe inle'. Whunizyat 'on 'at kwulat yus k'ut (15) ant'e'. 'Et Pontius Pilate, 'en Judea yun k'ut whumoodih unli. Herod, 'en Galilee yun k'ut whumoodih unli. Bulhutsin Philip, 'en Iturea 'ink'ez Trachonitis yun k'ut whumoodih unli. 'Ink'ez Lysanius, 'en Abilene yun k'ut whumoodih unli.
Annas 'ink'ez Caiaphas, 'enne 'udedo lubretne 'uhint'oh. 'Et 'oh whuya whudizulh whutoh 'et John Zacharias ooye' 'en dune lhuhoot'ih ts'e usda whe Yak'usda ooghuni ookw'édilts'ut.
'Et Jordan koh 'et whunat 'oh nuya whe dune ubulh yalhduk too be' hoolneh ha hukwa. 'Et whe whubunulhtun dulubeshi ch'a dudeni náhoondunooleh ha. 'Et whe lubeshi buba hooloh yutilhtselh.
'Et whuz un'a Isaiah ooghuni 'uk'eguz whe nja dutni,
“Dune lhuhoot'ih ts'e dune yiz dusts'ai whe 'ultus-un huyih whe nja dutni,
‘NeMoodihti ooti lhaoodahleh!
Ooti soo lhts'e oodiz'a ooba whulhtsi!
Deyo totsuk naoodutibun.
Dzulh 'ink'ez shus bulh ts'iyawh lhgha yo na'titnelh.
Whuduzoh-un 'et cha lhts'enaoodutákih.
Yun núdist'ai-un 'et cha lhgha na'whutátnelh.
'Ink'ez nts'en'a la Yak'usda dune ulhyis-un,
'et ts'iyanne whuti'elh.’ ”
John dune too be 'ulh'en-un, 'en dune bulubeshi huwun khuni ulhtus-i be ubulhni
Dune lhane yughu nindil too be' hutilnelh hukwa' huninzun. 'Et 'ubulhni, “Nohni lubezo tl'ughus buzkehke le'áht'oh. Yak'usda lubeshi 'ulh'enne bubulh húntalch'oh-un 'et whuz de hoolts'ulh, mbe 'unohúlhni whuch'a úlhwus?
Whute, nohlubeshi ch'a noheni náhandunoohleh de, ndaht'en-un ts'iyanne t'ehonózin ndaht'oh la. 'Ink'ez khun lhts'un njan dudoohni' junih wheni Abraham oots'u haindene 'uts'int'oh. 'Alha ts'ih'un un'a nohdusni, Yak'usda soo 'ultus whe 'unt'oh, ndi tse 'i hoonts'i 'i be Abraham oots'u haindene ubutilhtselh.
Njan soo cho whunulh'en, nohni duchun lé'aht'oh. 'Awet tsetselh be lhadínt'oh-un. 'Et nohni whulohne duchun oomai' hooloh-i, 'et ndaht'oh. 'Andit hoonts'i ndai la oomai' hooloh-i, tsetselh be ooghih tubulh tsuhidantsel 'ink'ez hidutálhk'un.”
10 'Ink'ez dunene ts'iyawh huyoodulhkut, “'Ink'ez nts'en'a suba dats'óoneh.”
11 'Et ubulhni, “Mbe la ts'oot'an nanki 'ut'i-un, mbe la ts'oot'an lhitíh-un, 'en 'ilho yugha óolhchoos. 'Ink'ez mbe la t'alh-i 'ut'i-un, 'en cha whuz un'a za edóneh.”
12 Ndunne sooneya 'ilhunaoos'aihne, 'enne cha too be' hutilnelh ha hits'u whusaindil whe huyoodulhkut, “Whuneodulh'eh-un nts'en'a daztinelh”
13 'Et 'ubulhni, “Ndet 'ultsuk italhchulh huba' hoont'oh-un, 'et 'aw 'on lhe'izólhchoot.”
14 Lhuganne, 'enne cha huyoodulhkut, “Wheni do' daztinelh.” 'Et ndúbulhni, “Khun nohni dune sooneya nohgha hoo'alh uboolhtselh junih! Khun dune whuts'it be buk'éhoh'alh junih! 'Ink'ez daltsuk nohba k'elha whutaleh-un, 'et 'awet hóht'e' huba' hoont'oh!”
15 Ts'iyanne hoonli-unyaz hukwa tse huhooli. 'Et dudzi be dahoont'oh suba John 'en ghun. Mbe la Christ ts'utni-un, 'en tilah 'unt'oh k'us 'awundooh.
16 John ts'iyawh 'et 'ubúlhni, “Too za-i be too bé' nohus'en. 'Et hoonts'i sk'elh'az whusatiyalh-un, 'en sanus dizti' whe 'unt'oh. 'Aw ookechun natl'oolh ooba k'unatis'uk 'et hoonts'i huba soo lhe'ust'oh. Ndun 'en Ndoni 'ink'ez kwun bulh 'i be too be' nohtilh'elh.
17 Lufoos tl'o mai' be tahawhúlts'ih-i, 'i lhaídilhdzun. 'Ink'ez ndi ndai la tl'o mai' yuk'ut tahawhúlhts'ih-i, 'i cha yuk'ut lhadút'ih de, 'ink'ez yuna'ulhdoh. 'Ink'ez ndi mai ndai la lhaduja-i, 'i ts'iyawh dénudzih 'ink'ez mai bayoh ts'e wheyúli. 'Et hoonts'i ndai la ndi kwun 'aw nalhnusne, ndi oot'ooz 'i be duták'un,” ubúlhni.
18 Ndi Khuni 'ink'ez 'uyoo khuni 'i bulh 'et whuz un'a khuni unzoo-i be budáni'. 'Et whuz un'a khuni ulhtus-i be ubúlhni.
19 'Et 'awet ndi yun yumoodih Herod, 'en 'ilhoghun 'unt'oh. 'En dulhutsin Philip oo'at 'en yuzih usda. John yulhni, “Lubeshi 'ilh'en.” 'Udun tank'us un'a cha 'ut'en. 'Et cha ts'iyawh lubeshi 'uhoont'oh yulhni.
20 'Et ndi ndai la lubeshi 'uyulh'en-i, 'i 'uyoo cha yuts'u na'ul'ih. Ndiz un'a nja duja, John 'en 'azdinla-un 'aiyan'ai.
Sizi too be 'úlya
21 'Et 'awet ts'iyanne dune too be 'úlya. Sizi 'en cha too be' yinla. Tenawhéndunidli 'i bulh yat dáha' dankez,
22 'ink'ez Ndoni dut'ai, dove huyulhni, 'i k'un'a ndus de hát'oh 'ink'ez yuk'ítoh. 'Et ndo yak'uz khuni huduzts'ai, 'i njan dutni, “Nyun sYe' ook'esi'-un 'int'oh. Tube nyulh hoonúst'i'.”
Sizi 'ubé dinzutne
23 'Et Sizi tat whunizyat at'en be suli' (30) 'et 'awet whé'nit'en. Ts'iyannetsuk 'en Joseph ooye' huninzun.
'Ink'ez 'en Heli ooye'.
24 'En Matthat ts'u hainzut-un,
'en Levi ts'u hainzut-un,
'en Melchi ts'u hainzut-un,
'en Janna ts'u hainzut-un,
'en Joseph ts'u hainzut-un.
25 'En Mattathiah ts'u hainzut-un
'en Amos ts'u hainzut-un,
'en Nahum ts'u hainzut-un,
'en Esdli ts'u hainzut-un,
'en Naggai ts'u hainzut-un.
26 'En Maath ts'u hainzut-un,
'en Mattathiah ts'u hainzut-un,
'en Semei ts'u hainzut-un,
'en Joseph ts'u hainzut-un,
'en Judah ts'u hainzut-un.
27 'En Joannas ts'u hainzut-un,
'en Rhesa ts'u hainzut-un,
'en Zerubbabel ts'u hainzut-un,
'en Shealtiel ts'u hainzut-un,
'en Neri ts'u hainzut-un.
28 'En Melchi ts'u hainzut-un,
'en Addi ts'u hainzut-un,
'en Cosam ts'u hainzut-un,
'en Elmodam ts'u hainzut-un,
'en Er ts'u hainzut-un.
29 'En Jose ts'u hainzut-un,
'en Eliezer ts'u hainzut-un,
'en Jorim ts'u hainzut-un,
'en Matthat ts'u hainzut-un,
'en Levi ts'u hainzut-un,
30 'En Simeon ts'u hainzut-un,
'en Judah ts'u hainzut-un,
'en Joseph ts'u hainzut-un,
'en Jonan ts'u hainzut-un,
'en Eliakim ts'u hainzut-un,
31 'En Melea ts'u hainzut-un,
'en Menan ts'u hainzut-un,
'en Mattatha ts'u hainzut-un,
'en Nathan ts'u hainzut-un,
'en David ts'u hainzut-un,
32 'En Jesse ts'u hainzut-un,
'en Obed ts'u hainzut-un,
'en Boaz ts'u hainzut-un,
'en Salmon ts'u hainzut-un,
'en Nahshon ts'u hainzut-un,
33 'En Amminadab ts'u hainzut-un,
'en Ram ts'u hainzut-un,
'en Hezron, ts'u hainzut-un,
'en Pharez ts'u hainzut-un,
'en Judah ts'u hainzut-un,
34 'En Jacob ts'u hainzut-un,
'en Isaac ts'u hainzut-un,
'en Abraham ts'u hainzut-un,
'en Terah ts'u hainzut-un,
'en Nahor ts'u hainzut-un,
35 'En Serug, ts'u hainzut-un,
'en Reu ts'u hainzut-un,
'en Peleg ts'u hainzut-un,
'en Eber ts'u hainzut-un,
'en Salah ts'u hainzut-un,
36 'En Cainan ts'u hainzut-un,
'en Arphaxad ts'u hainzut-un,
'en Sem ts'u hainzut-un,
'en Noah ts'u hainzut-un,
'en Lamech ts'u hainzut-un,
37 'En Methuselah ts'u hainzut-un,
'en Enoch ts'u hainzut-un,
'en Jared ts'u hainzut-un,
'en Mahalaleel ts'u hainzut-un,
'en Cainan ts'u, hainzut-un,
38 'En Enos ts'u hainzut-un,
'en Seth ts'u hainzut-un,
'en Adam ts'u hainzut-un,
'ink'ez 'en Yak'usda ts'u hainzut-un.