Yak'usda Ooghuni Unzoo-i Matthew 'Uk'unéyuzguz-i
1
Sizi Gri ubé dinzutne
1 Ndi 'udustl'us 'uk'eguz-un 'et dutni, 'i be Sizi Gri 'en ubé dinzutne 'uhínt'oh, 'i Sizi David ts'u hainzut-un 'unt'oh. David 'en Abraham ts'u hainzut-un 'unt'oh.
2 Abraham 'en Isaac oobá 'unt'oh.
Isaac 'en Jacob oobá 'unt'oh.
Jacob 'en Judah 'ink'ez bulhutsinke bubá 'unt'oh.
3 Judah 'en nyoon ts'eke Tamar 'en be Perez 'ink'ez Zerah bubá 'unt'oh.
Perez Hezron oobá 'ink'ez Hezron Ram oobá 'unt'oh.
4 Ram 'en Amminadab oobá.
Amminadab Nashon oobá,
'ink'ez Nashon Salmon oobá 'unt'oh.
5 Salmon oo'at Rahab 'en be Boaz oobá. Boaz Ruth 'en be Obed oobá.
'Ink'ez Obed Jesse oobá 'unt'oh.
6 Jesse lerwe David oobá.
'Et lerwe David, mbe la Uriah oo'at inle'-un, 'en be Solomon oobá 'unt'oh.
7 Solomon Rehoboam oobá.
Rehoboam Abijah oobá,
'ink'ez Abijah Asa oobá 'unt'oh.
8 Asa Jehoshaphat oobá.
Jehoshaphat Joram oobá,
'ink'ez Joram Uzziah oobá 'unt'oh.
9 Uzziah Jotham oobá.
Jotham Ahaz oobá,
'ink'ez Ahaz Hezekiah oobá 'unt'oh.
10 Hezekiah Manasseh oobá.
Manasseh Amon oobá,
'ink'ez Amon Josiah oobá 'unt'oh.
11 'Oh da' 'oh whuya whudizulh whe ts'iyanne dune keyoh whuti Babylon ts'e whebuhanla, 'et Josiah 'en Jeconiah 'ink'ez bulhutsinke 'enne bubá 'unt'oh.
12 Keyoh whuti Babylon whuz whebuhanla hukw'elh'az 'et Jaconiah Shealtiel oobá 'unt'oh.
Shealtiel Zurubbabel oobá 'unt'oh.
13 Zerubbabel Abiud oobá.
Abiud Eliakim oobá,
'ink'ez Eliakim Azor oobá 'unt'oh.
14 Azor Zadok oobá.
Zadok Achim oobá,
'ink'ez Achim Eliud oobá 'unt'oh.
15 Eliud Eleazor oobá.
Eleazor Matthan oobá,
'ink'ez Matthan Jacob oobá 'unt'oh.
16 Jacob Joseph oobá 'unt'oh.
'En Mary ooki 'ink'ez Mary 'en be Sizi whuzdli. 'En Christ huyulhni.
17 'Inka Abraham David whuts'un, 'enne ts'iyawh whunizyat 'on 'at dit-un bubé dindene 'uhint'oh. 'Ink'ez David 'oh da' whudizulh whe ts'iyanne keyoh whut'enne Babylon ts'e whebuhanla whuts'un, 'enne ts'iyawh whunizyat 'on 'at dit-un bubé dindene hinli. 'Ink'ez 'oh da' whudizulh whe ts'iyanne keyoh Babylon ts'e whebuhanla 'et hukw'elh'uz dich'oh dukeyoh yun k'ut Judah, whuz whenáhidil, Christ 'et whuts'un, 'enne ts'iyawh whunizyat 'on 'at dit-un bubé dindene hinli whe hint'oh.
Sizi Gri whuzdli-un
18 'Et 'awet Sizi Gri whuzdli-un, ndiz un'a 'uhooja. Ooloo Mary 'en Joseph 'en yughu tidalh ha lhahódinla, 'ink'ez yughu tidalh whutso whe 'et nahoon'ai 'uda' ts'oodun ba 'unt'oh. Ndoni, 'i be 'uja.
19 'Et ndun Joseph 'en ts'ih'un dune unli, 'et huwa lhgho tikelh ts'iyanne toh yooya yoolhtselh whuch'a dudeni lhaidinla. 'Ink'ez whu'iz yuch'a natidalh hukwa' ninzun.
20 'Et howu nuni nuzut whe 'et huwu nusúti whe neMoodihti oolizas 'en yulhni, “Joseph David oots'u hainzut-un inli whe' 'int'oh. Wheniljut iloh whe Mary n'at tileh. Ndun ts'oodun Ndoni be chainya whe 'unt'oh.
21 'Et 'awet ooyaz, duneyaz tileh. Nyunch'oh boozi' oogha ídon'alh. Sizi dóni'. 'En 'utinelh ts'iyanne lubeshi ch'a ubutilhyih.”
22 'Et ndiz un'a 'uhooja, neMoodihti nyoon nus hoo'en-un, 'en be daja ni la, whunilhchoh 'oh túne'whust'en. 'Et nyoon nus hoo'en-un ndiz un'a nja dutni,
23 “Soo zulhts'ai ndun ts'eke 'aw dune t'enuszun-un 'et hoonts'i khunsul ts'oodun ba 'uja, 'ink'ez ooyaz dune tileh, boozi' Emmanuel hidutánelh, Yak'usda nebulh 'únt'oh, ni whe utni.”
24 'Inka Joseph ts'enanzut whe neMoodihti oolizas daja yulhni la, 'oh tune' 'ust'en 'ink'ez 'awet Mary yilhchoot oo'at yutáleh ha.
25 'Udechoo ooyaz whutileh t'eoonanzin 'et whuts'un 'aw yut'álhasnai. 'Et 'awet ooye' whuzdli, 'et 'andit za soo yughusda. 'Inka boozi' yugha ídin'ai Sizi yulhni.