8
Jesús laca nu ndiꞌi̱ ca slo ycuiꞌ Ndyosi, chaꞌ chcuiꞌ loꞌo Ni cuentya jiꞌna
1 Ndiꞌya̱ ndyuꞌu chaꞌ nu ntiꞌ naꞌ chcui̱ꞌ loꞌo ma̱ juani: Ca cua̱ ntucua Jesús, nde laꞌa tsuꞌ cui̱ ca su ntucua ycuiꞌ Ndyosi, chaꞌ nclyo Ni cña tyucui ñaꞌa̱ chalyuu; ca biꞌ ntucua Jesús chaꞌ laca Ni sti joꞌó nu laca loo la cuentya jiꞌna.
2 Nduꞌni Ni cña ca sca seꞌi̱ su tacati tsa nu ngüiñá ycuiꞌ Ndyosi; siꞌi ñati̱ chalyuu ti nu ngüiñá jiꞌi̱, chaꞌ laca biꞌ ñiꞌya̱ nu ngua tiꞌ ycuiꞌ Ndyosi chaꞌ caca.
3 Lcaa xuꞌna sti joꞌó nde chalyuu ni, ntsuꞌu chaꞌ sta nguꞌ msta̱ ca slo ycuiꞌ Ndyosi, ntsuꞌu chaꞌ taqui̱ nguꞌ xaꞌ la msta̱ lo mesa quiiꞌ, chaꞌ biꞌ laca cña jiꞌi̱ nguꞌ; loꞌo juaꞌa̱ Jesús ni, ntsuꞌu msta̱ nu nda Ni ca slo ycuiꞌ Ndyosi cuentya jiꞌna,
4 masi ná ngua Jesús sti joꞌó loꞌo ngutiꞌi̱ yu nde chalyuu. Ná nda nguꞌ cña biꞌ jiꞌi̱, chaꞌ cua laca ndiꞌi̱ xaꞌ la sti joꞌó nu nsta msta̱ nu ntsuꞌu chaꞌ ta nguꞌ quichi̱ chacuayáꞌ jiꞌi̱ jyoꞌo Moisés.
5 Pana nu xaꞌ la sti joꞌó biꞌ ni, ñati̱ nu cajaa ti laca nguꞌ biꞌ; cua laca ti cña nduꞌni nguꞌ. Xquiꞌya nguꞌ biꞌ nchca cuayáꞌ tiꞌ na chaꞌ tsoꞌo la tsiyaꞌ ti sti joꞌó laca Jesús, nu ntucua ca slo ycuiꞌ Ndyosi. Loꞌo juaꞌa̱ nu chcuaꞌya lateꞌ nu ngüiñá jyoꞌo Moisés su nguaꞌni tlyu jyoꞌo cusuꞌ jiꞌna jiꞌi̱ ycuiꞌ Ndyosi nu ngua liꞌ, ndiꞌya̱ nchcuiꞌ Ni loꞌo nu cusuꞌ biꞌ cuentya jiꞌi̱ chcuaꞌya biꞌ: “Cuiꞌya nuꞌu̱ cuentya chaꞌ cuiñá ma̱ niꞌi̱ biꞌ ñiꞌya̱ nu nguluꞌu naꞌ jiꞌi̱ ma̱ chaꞌ cuiñá ma̱ jiꞌi̱, nu loꞌo ngutu̱ nuꞌu̱ nchcuiꞌ nuꞌu̱ loꞌo naꞌ lo xlya caꞌya cua̱ biꞌ”, nacui̱ Ni. Pana sca na nu culiji yuꞌu ti ngua biꞌ, tsoꞌo la tsiyaꞌ ti su ntucua Ni nde cua̱.
6 Biꞌ chaꞌ cua nchca cuayáꞌ tiꞌ na chaꞌ tsoꞌo la tsiyaꞌ ti cña nu nduꞌni Jesús cuentya jiꞌna, siyaꞌ la cña nu ndyuꞌni nu xaꞌ la sti joꞌó nde chalyuu. Loꞌo juani ndulo tsa chaꞌ jiꞌna, la cuiꞌ chaꞌ nu cua ngüiñi jiꞌi̱ ycuiꞌ Ndyosi loꞌo na xquiꞌya Jesús, chaꞌ xcuiꞌ chaꞌ liñi tsiyaꞌ ti nchcuiꞌ ycuiꞌ Ndyosi loꞌo na.
7 Ntsuꞌu tsa chaꞌ nu lyiji jiꞌi̱ chaꞌ cusuꞌ nu ngua tya clyo, nu cua ngüiñi jiꞌi̱ Ni loꞌo ñati̱ tyempo biꞌ, biꞌ chaꞌ nda ycuiꞌ Ndyosi chaca chaꞌ loꞌo ñati̱. Ná ndyuꞌu scua chaꞌ cusuꞌ biꞌ, chaꞌ taca ca tsoꞌo cresiya jiꞌi̱ ñati̱ cuentya jiꞌi̱ ycuiꞌ Ndyosi,
8 chaꞌ ná tsoꞌo nguaꞌni ñati̱ biꞌ liꞌ. Ndiꞌya̱ nscua lo quityi jiꞌi̱ ycuiꞌ Ndyosi cuentya jiꞌi̱ chaꞌ biꞌ:
Cua ngulala ti tyalaa tsa̱ chaꞌ quiñi chaꞌ ꞌna loꞌo tyaꞌa nguꞌ Israel chaca quiyaꞌ,
la cuiꞌ juaꞌa̱ loꞌo tyaꞌa nguꞌ Judá, nacui̱ ycuiꞌ Ndyosi nu Xuꞌna na.
9 Siꞌi la cuiꞌ chaꞌ ñiꞌya̱ nu cua ngüiñi ꞌna loꞌo jyoꞌo cusuꞌ jiꞌi̱ nguꞌ biꞌ nu ngua saꞌni, nacui̱ Ni.
Nu ngua liꞌ ntejeyaꞌ naꞌ jiꞌi̱ nguꞌ chaꞌ ngutuꞌu nguꞌ ca quichi̱ tyi nguꞌ Egipto, ndyaa nguꞌ.
Pana ná ndaquiyaꞌ nguꞌ jiꞌi̱ chaꞌ nu cua ngüiñi ꞌna loꞌo nguꞌ;
ñaꞌa̱ ti nguaꞌni tsa nguꞌ chaꞌ cuxi, biꞌ chaꞌ ngaꞌaa ntucuá naꞌ chaꞌ jiꞌi̱ nguꞌ, nacui̱ ycuiꞌ Ndyosi nu Xuꞌna na.
10 Loꞌo juani nde laca chaꞌ cucui nu cua quiñi ti ꞌna loꞌo nguꞌ Israel juani, nacui̱ Ni.
Nu loꞌo tyalaa tyempo, liꞌ cuaꞌni naꞌ chaꞌ tyanu tsoꞌo lcaa chaꞌ neꞌ cresiya jiꞌi̱ nguꞌ, ñiꞌya̱ nu chcuiꞌ naꞌ loꞌo nguꞌ liꞌ.
Tyucui tiꞌ tyiquee nguꞌ cuaꞌni nguꞌ cña ꞌna liꞌ;
caca naꞌ ycuiꞌ Ndyosi nu Xuꞌna nguꞌ liꞌ, loꞌo juaꞌa̱ caca nguꞌ biꞌ ñati̱ jnaꞌ.
11 Taca jlo tiꞌ nguꞌ tilaca laca naꞌ liꞌ,
lcaa nguꞌ loꞌo tyaꞌa nguꞌ, masi nu sube, masi ñati̱ cusuꞌ.
Loꞌo liꞌ ngaꞌaa ntsuꞌu chaꞌ cachaꞌ nguꞌ jiꞌi̱ tyaꞌa nguꞌ tilaca laca naꞌ;
ngaꞌaa ntiꞌ chaꞌ culuꞌu nguꞌ jiꞌi̱ tyaꞌa quichi̱ tyi nguꞌ chaꞌ laca naꞌ ycuiꞌ Ndyosi nu Xuꞌna nguꞌ liꞌ.
12 Cuaꞌni clyu tiꞌ naꞌ jiꞌi̱ nguꞌ jiꞌi̱ quiꞌya nu ntsuꞌu jiꞌi̱ nguꞌ liꞌ; ngaꞌaa culotu̱ naꞌ quiꞌya jiꞌi̱ nguꞌ liꞌ.
Juaꞌa̱ nchcuiꞌ quityi jiꞌi̱ ycuiꞌ Ndyosi biꞌ.
13 Na cua culiji yuꞌu ti chaꞌ cusuꞌ nu ngua tya clyo; juaꞌa̱ ndyuꞌu chaꞌ biꞌ liꞌ, nu loꞌo nchcuiꞌ ycuiꞌ Ndyosi jiꞌi̱ chaca chaꞌ cucui nu cua quiñi ti jiꞌi̱ Ni loꞌo na. Saꞌni tsa nguxana chaꞌ cusuꞌ biꞌ; cua jyoꞌo ti chaꞌ biꞌ juani, cua culiji ti chaꞌ juaꞌa̱ ti.