19
Nguluꞌu Jesús chaꞌ ná xtyanu nguꞌ jiꞌi̱ clyoꞌo nguꞌ
1 Loꞌo ndye nchcuiꞌ Jesús chaꞌ biꞌ loꞌo nguꞌ, liꞌ nduꞌu yu loyuu su cuentya Galilea biꞌ, ndyaa yu nde loyuu su cuentya Judea. Nteje tacui Jesús staꞌa̱ Jordán,
2 loꞌo quiñaꞌa̱ tsa ñati̱ ndyaꞌa̱ lcaꞌa̱ jiꞌi̱ yu chaꞌ cuaꞌni yu joꞌo jiꞌi̱ lcaa nu quicha nu lijya̱ loꞌo nguꞌ biꞌ; nguaꞌni Jesús joꞌo jiꞌi̱ nguꞌ quicha biꞌ, ngua tsoꞌo nguꞌ biꞌ liꞌ.
3 Laja liꞌ lijya̱ xi nguꞌ fariseo slo Jesús chaꞌ chcuiꞌ cuayáꞌ nguꞌ loꞌo yu si caca tyiji̱loo nguꞌ jiꞌi̱ yu, ngua tiꞌ nguꞌ.
―¿Ha ntsuꞌu chacuayáꞌ cuentya jiꞌna chaꞌ xtyanu sca ñati̱ jiꞌi̱ clyoꞌo yu tsiyaꞌ ti, si ngaꞌaa ntiꞌ yu jiꞌi̱ nu cunaꞌa̱ biꞌ? ―nacui̱ nguꞌ jiꞌi̱ Jesús.
4 ―¿Ha bilya chcuiꞌ ma̱ lo quityi chaꞌ jiꞌi̱ ycuiꞌ Ndyosi? ―nacui̱ Jesús jiꞌi̱ nguꞌ biꞌ―. “Clyo ngüiñá Ni jiꞌi̱ ñati̱, sca nu quiꞌyu loꞌo sca nu cunaꞌa̱”, juaꞌa̱ nscua lo quityi biꞌ.
5 Loꞌo juaꞌa̱ ndiꞌya̱ nacui̱ Ni: “Biꞌ chaꞌ tyuꞌutsuꞌ sca nu quiꞌyu slo sti yu, slo xtyaꞌa̱ yu, chaꞌ caja clyoꞌo loꞌo sca nu cunaꞌa̱, chaꞌ caca nguꞌ sca ti xtañi tyucuaa nguꞌ”.
6 Ngaꞌaa siꞌi tucua tyaꞌa ñati̱ laca nguꞌ, cua laca jiꞌi̱ nguꞌ ñiꞌya̱ si laca nguꞌ sca ti ñati̱. Biꞌ chaꞌ ná tsoꞌo xtyanu nguꞌ jiꞌi̱ clyoꞌo nguꞌ, chaꞌ cua nda ycuiꞌ Ndyosi chaꞌ clyoꞌo jiꞌi̱ nguꞌ.
7 Liꞌ nguxacui̱ nguꞌ biꞌ chaꞌ jiꞌi̱ Jesús:
―¿Ni chaꞌ laca ngulo jyoꞌo Moisés cña jiꞌna lacua? Chaꞌ tsoꞌo jiꞌi̱ sca nu quiꞌyu, nacui̱ jyoꞌo cusuꞌ biꞌ, si culo yu sca quityi chaꞌ xtyanu yu jiꞌi̱ nu cunaꞌa̱ nu laca clyoꞌo yu.
8 Xaꞌ nchcuiꞌ Jesús loꞌo nguꞌ biꞌ liꞌ:
―Ná ndaquiyaꞌ ma̱ jiꞌi̱ ycuiꞌ Ndyosi tsiyaꞌ ti, biꞌ chaꞌ nda jyoꞌo Moisés chacuayáꞌ jiꞌi̱ ma̱ chaꞌ xtyanu ma̱ jiꞌi̱ clyoꞌo ma̱ loꞌo sca quityi ti ―nacui̱ Jesús jiꞌi̱ nguꞌ―. Pana siꞌi juaꞌa̱ ngua tiꞌ ycuiꞌ Ni tya loꞌo ngüiñá Ni chalyuu.
9 Cuentya jnaꞌ ni, ta naꞌ sca cui̱i̱ loꞌo ma̱ juani: Si ntsuꞌu sca ñati̱ nu nguxtyanu jiꞌi̱ clyoꞌo chaꞌ caja clyoꞌo loꞌo xaꞌ nu cunaꞌa̱, nguaꞌni tyucuaa tiꞌ yu loꞌo nu cunaꞌa̱ clyoꞌo yu. Sca ti si clyoꞌo yu nguaꞌni subaꞌ loꞌo xaꞌ nu quiꞌyu, liñi chaꞌ xtyanu yu jiꞌi̱ nu cunaꞌa̱ biꞌ liꞌ. La cuiꞌ juaꞌa̱, nu cunaꞌa̱ nu cua nguxtyanu clyoꞌo jiꞌi̱ biꞌ, si xaꞌ caja clyoꞌo loꞌo chaca ñati̱, chaꞌ subaꞌ cuaꞌni nguꞌ biꞌ liꞌ.
10 Loꞌo liꞌ nchcuiꞌ nguꞌ nu ndyaca tsaꞌa̱ jiꞌi̱ loꞌo Jesús:
―Tsoꞌo la si ná caja clyoꞌo na tsiyaꞌ ti, si juaꞌa̱ laca chaꞌ jiꞌi̱ nguꞌ quiꞌyu loꞌo clyoꞌo nguꞌ ―nacui̱ nguꞌ.
11 ―Ntsuꞌu tsa nguꞌ quiꞌyu nu ná talo nguꞌ chaꞌ ntucua nguꞌ ycuiꞌ ti nguꞌ ―nacui̱ Jesús jiꞌi̱ nguꞌ nu ndyaca tsaꞌa̱ jiꞌi̱ liꞌ―. Sca ti si culo ycuiꞌ Ndyosi cña jiꞌi̱ sca ñati̱ chaꞌ ná caja clyoꞌo, liꞌ talo yu chaꞌ ná calaꞌ jiꞌi̱ sca nu cunaꞌa̱ tsiyaꞌ ti, si xtyucua ycuiꞌ Ndyosi jiꞌi̱ yu biꞌ.
12 Ntsuꞌu tyu̱u̱ lo chaꞌ nu nduꞌni chaꞌ ná nchca caja clyoꞌo sca nu quiꞌyu: ntsuꞌu nguꞌ nu quicha nguꞌ tya loꞌo ngula nguꞌ; loꞌo juaꞌa̱ ntsuꞌu xi nguꞌ nu quicha nguꞌ xquiꞌya chaꞌ nguaꞌni ñuꞌu̱ ñati̱ jiꞌi̱ nguꞌ biꞌ; loꞌo juaꞌa̱ ntsuꞌu xi nguꞌ nu cua ngusubi ycuiꞌ Ndyosi jiꞌi̱ chaꞌ cuaꞌni nguꞌ cña jiꞌi̱ Ni, biꞌ chaꞌ tsoꞌo la masi ná caja clyoꞌo nguꞌ biꞌ liꞌ, ntiꞌ nguꞌ, chaꞌ sca ti ycuiꞌ Ndyosi caca loo jiꞌi̱ nguꞌ liꞌ, ntiꞌ nguꞌ. Nu quiꞌyu biꞌ ni, ycuiꞌ yu nda yu cuentya si caca jiꞌi̱ yu tyiꞌi̱ yu ycuiꞌ ti yu; tsoꞌo si talo yu biꞌ tyiꞌi̱ yu ycuiꞌ ti yu lacua.
Ngulacua̱ Jesús jiꞌi̱ nu sube
13 Loꞌo liꞌ ngua sca quiyaꞌ ñaa loꞌo nguꞌ jiꞌi̱ tyu̱u̱ tyaꞌa nu sube ca su ngaꞌa̱ Jesús. Ngua tiꞌ nguꞌ chaꞌ sta yaꞌ ycuiꞌ Jesús hique nu sube biꞌ, chaꞌ chcuiꞌ yu loꞌo ycuiꞌ Ndyosi cuentya jiꞌi̱ nu sube biꞌ. Liꞌ nguaꞌni tyaala nu nguꞌ nu ndyaca tsaꞌa̱ jiꞌi̱ Jesús jiꞌi̱ nguꞌ biꞌ,
14 pana hora ti nchcuiꞌ Jesús loꞌo nguꞌ nu ndyaca tsaꞌa̱ jiꞌi̱ liꞌ:
―Ta ma̱ chacuayáꞌ jiꞌi̱ nu sube chaꞌ ca̱a̱ nguꞌ slo naꞌ ―nacui̱ Jesús jiꞌi̱ nguꞌ biꞌ―. Ná cuaꞌa ma̱ jiꞌi̱ nu sube biꞌ. Ñiꞌya̱ laca loꞌo jlya tiꞌ nu sube jiꞌi̱ sti nguꞌ, la cuiꞌ juaꞌa̱ ntsuꞌu chaꞌ jlya tiꞌ ñati̱ jiꞌi̱ ycuiꞌ Ndyosi nu loꞌo caca Ni loo neꞌ cresiya jiꞌi̱ nguꞌ.
15 Liꞌ ngusta yaꞌ Jesús hique nu sube biꞌ. Loꞌo liꞌ nduꞌu Jesús ndyaa.
Nchcuiꞌ sca nu culiyaꞌ loꞌo Jesús
16 Ca tiyaꞌ la liꞌ ñaa sca nu quiꞌyu cuañiꞌ slo Jesús.
―Mstru, tsoꞌo tsa nduꞌni nuꞌu̱ ―nacui̱ yu jiꞌi̱ Jesús―. Cuaꞌni nuꞌu̱ chaꞌ tsoꞌo cachaꞌ nuꞌu̱ jnaꞌ: ¿Na laca nu tsoꞌo cuaꞌni naꞌ chaꞌ caja chalyuu nu ná ngaꞌa̱ chaꞌ tye ꞌna? ―nacui̱ yu.
17 Loꞌo liꞌ nchcuiꞌ Jesús loꞌo yu:
―¿Ni chaꞌ nchcuiꞌ nuꞌu̱ chaꞌ tsoꞌo tsa nduꞌni naꞌ? ―nacui̱ Jesús jiꞌi̱ yu biꞌ―. Sca ti ycuiꞌ Ndyosi laca nu chañi chaꞌ tsoꞌo laca Ni. Pana taquiyaꞌ nuꞌu̱ jiꞌi̱ lcaa cña nu ngulo ycuiꞌ Ndyosi jiꞌi̱ ma̱, si ntiꞌ nuꞌu̱ caja chalyuu nu ná ngaꞌa̱ chaꞌ tye jinuꞌu̱.
18 ―¿Ñiꞌya̱ nu laca cña biꞌ ntiꞌ nuꞌu̱? ―nacui̱ yu cuañiꞌ biꞌ jiꞌi̱.
Liꞌ nguluꞌu Jesús xi chaꞌ jiꞌi̱ yu biꞌ:
―Ná cujuii ma̱ jiꞌi̱ tyaꞌa ñati̱ ma̱. Ná cuaꞌni ma̱ chaꞌ subaꞌ loꞌo clyoꞌo xaꞌ ñati̱, ni ná cuaana ma̱ chaꞌ tsoꞌo nu ntsuꞌu jiꞌi̱ tyaꞌa ñati̱ ma̱. Ná chcuiꞌ ma̱ cuentyu jiꞌi̱ tyaꞌa ñati̱ ma̱.
19 Loꞌo juaꞌa̱ cuaꞌni tlyu ma̱ jiꞌi̱ sti ma̱, jiꞌi̱ xtyaꞌa̱ ma̱. Cuaꞌni tyaꞌna tiꞌ ma̱ jiꞌi̱ tyaꞌa ñati̱ ma̱, ñiꞌya̱ laca si nduꞌni tyaꞌna tiꞌ ma̱ jiꞌi̱ ycuiꞌ ca ti ma̱.
20 Liꞌ nguxacui̱ yu biꞌ chaꞌ jiꞌi̱ Jesús:
―Tya loꞌo cuañiꞌ naꞌ ndaquiyaꞌ naꞌ jiꞌi̱ lcaa cña biꞌ lcaa tsa̱ ―nacui̱ yu cuañiꞌ biꞌ jiꞌi̱ Jesús―. ¿Ha tya ntsuꞌu la chaꞌ nu tya lyiji cuaꞌni naꞌ lacua? ―nacui̱.
21 ―¿Ha chañi chaꞌ ntiꞌ nuꞌu̱ chaꞌ ca lubii cresiya jiꞌnuꞌu̱, chaꞌ caja chalyuu nu ná ngaꞌa̱ chaꞌ tye jinuꞌu̱? ―nacui̱ Jesús jiꞌi̱ yu biꞌ―. Si chañi chaꞌ nu nchcuiꞌ nuꞌu̱, yaa clya cujuiꞌ nuꞌu̱ lcaa chaꞌ tsoꞌo nu ntsuꞌu jinuꞌu̱; tyuꞌu cñi chaꞌ ta nuꞌu̱ jiꞌi̱ nguꞌ tiꞌi liꞌ. Loꞌo liꞌ sta ycuiꞌ Ndyosi sca chaꞌ tsoꞌo nu tyacua jinuꞌu̱ ca su ntucua ycuiꞌ Ni. Loꞌo cua nguaꞌni nuꞌu̱ chaꞌ biꞌ, liꞌ ca̱a̱ nuꞌu̱ slo naꞌ chaꞌ tyaꞌa̱ nuꞌu̱ loꞌo naꞌ.
22 Loꞌo ndyuna yu cuañiꞌ biꞌ chaꞌ nu nda Jesús loꞌo yu, nduꞌu yu ndyaa yu liꞌ; xñiꞌi̱ xi tiꞌ yu chaꞌ nchcuiꞌ Jesús chaꞌ biꞌ, chaꞌ culiyaꞌ tsa yu.
23 Liꞌ nchcuiꞌ Jesús loꞌo nguꞌ nu ndyaca tsaꞌa̱ jiꞌi̱:
―Chaꞌ liñi nchcuiꞌ naꞌ loꞌo ma̱ juani ―nacui̱―, tucui tsa caca jiꞌi̱ nguꞌ culiyaꞌ chaꞌ tyatí̱ nguꞌ chaꞌ jiꞌi̱ ycuiꞌ Ndyosi, chaꞌ caca Ni loo neꞌ cresiya jiꞌi̱ nguꞌ.
24 Lasa la cña tyeje tacui sca naꞌni quiyaꞌ cuxa, masi sca naꞌni tonu ñiꞌya̱ ntiꞌ sca camello, lasa la chaꞌ biꞌ; tucui la tyalaa sca nguꞌ culiyaꞌ ca su laca ycuiꞌ Ni loo.
25 Ndube tsa tiꞌ nguꞌ nu ndyaca tsaꞌa̱ jiꞌi̱ loꞌo ndyuna nguꞌ chaꞌ biꞌ.
―¿Tilaca laca nu taca jiꞌi̱ clyaá jiꞌi̱ nu cuxi nu ntsuꞌu chalyuu chaꞌ tyalaa ca slo ycuiꞌ Ndyosi lacua? ―nacui̱ nguꞌ jiꞌi̱ Jesús liꞌ.
26 ―Biꞌ laca sca chaꞌ nu ná nchca cuaꞌni ni sca ñati̱ chalyuu; pana ycuiꞌ Ndyosi ni, nchca jiꞌi̱ Ni cuaꞌni chaꞌ tyalaa nguꞌ slo Ni ―nacui̱ Jesús jiꞌi̱ nguꞌ.
27 Liꞌ nchcuiꞌ Pedro xi loꞌo Jesús:
―Loꞌo cuare ni, cua nguxtyanu ya lcaa na nu ntsuꞌu jiꞌi̱ ya chaꞌ tyaꞌa̱ ya loꞌo nuꞌu̱, ñiꞌya̱ nu nacui̱ nuꞌu̱ chaꞌ cuaꞌni ya ―nacui̱ Pedro jiꞌi̱ Jesús―. ¿Na laca caja jiꞌi̱ ya nde loo la liꞌ?
28 ―Chaꞌ liñi nchcuiꞌ naꞌ loꞌo ma̱ juani ―nacui̱ Jesús jiꞌi̱ nguꞌ―, chaꞌ nu loꞌo caca chalyuu cucui biꞌ ni, liꞌ ca̱a̱ naꞌ nu cua nda Ni ꞌna lijya̱a̱ chaꞌ caca naꞌ ñati̱; tsaa tucua naꞌ ca su tsoꞌo tsa ñaꞌa̱ ca biꞌ, chaꞌ cuaꞌni cuayáꞌ naꞌ jiꞌi̱ lcaa ñati̱ chalyuu liꞌ. Loꞌo cuꞌma̱ nu ndyaꞌa̱ ma̱ loꞌo naꞌ, tiyaꞌ la tyucua ma̱ lo tii tyucuaa tyaꞌa yaca nu tsoꞌo tsa ñaꞌa̱, chaꞌ cuaꞌni cuayáꞌ ma̱ jiꞌi̱ tyaꞌa ñati̱ ma̱, nu tii tyucuaa tyaꞌa taju nguꞌ Israel biꞌ.
29 Loꞌo juaꞌa̱ cua ñaꞌa̱ ca ñati̱ nu ntsuꞌu chaꞌ tsaa tyijyuꞌ chaꞌ cuaꞌni nguꞌ cña cuentya jnaꞌ, nu nguxtyanu lcaa na nu ntsuꞌu jiꞌi̱ nguꞌ chaꞌ ndyuꞌni nguꞌ cña biꞌ, ná xtyanu naꞌ jiꞌi̱ nguꞌ biꞌ juaꞌa̱ ti; masi tyi nguꞌ, masi tyaꞌa ngula nguꞌ, masi sti nguꞌ, masi xtyaꞌa̱ nguꞌ, masi sñiꞌ nguꞌ, masi yuu nu ntsuꞌu jiꞌi̱ nguꞌ, masi xtyanu nguꞌ lcaa chaꞌ biꞌ, pana caja chalyuu nu ná ngaꞌa̱ chaꞌ tye jiꞌi̱ nguꞌ. Loꞌo juaꞌa̱ xaꞌ caja quiñaꞌa̱ la chaꞌ jiꞌi̱ nguꞌ biꞌ, tsa ñaꞌa̱ nu ngunaꞌ jiꞌi̱ nguꞌ biꞌ ngua tiꞌ nguꞌ.
30 Pana nu nguꞌ nu tyuꞌu tucua loꞌo cua tye ti chaꞌ biꞌ laca nguꞌ nu caca nde loo la; nu nguꞌ nu nduꞌu tucua clyo, biꞌ nguꞌ laca nu tyanu nde chu̱ꞌ la liꞌ.