5
Cui̱i̱ nu nda Pedro loꞌo ñati̱ tyaꞌa ngusñi chaꞌ jiꞌi̱ Jesucristo
1 Sca nguꞌ cusuꞌ nu laca loo laca naꞌ, loꞌo juani ntiꞌ naꞌ ta naꞌ sca cui̱i̱ loꞌo cuꞌma̱ tyaꞌa cusuꞌ na. Loꞌo naꞌ, cua naꞌa̱ naꞌ jiꞌi̱ Cristo loꞌo nguxcubeꞌ nguꞌ jiꞌi̱ yu, biꞌ chaꞌ jlo tiꞌ naꞌ chaꞌ stuꞌba ti tyiꞌi̱ lcaa tyaꞌa na ca slo ycuiꞌ Ndyosi; ñaꞌa̱ na chaꞌ tlyu nu caca liꞌ.
2 Ntsuꞌu chaꞌ ñaꞌa̱si̱i̱ tsoꞌo ma̱ jiꞌi̱ lcaa nguꞌ tyaꞌa ma̱, ñaꞌa̱ taju nguꞌ tyaꞌa ma̱ ca su laca ma̱ loo jiꞌi̱ nguꞌ. Ñiꞌya̱ ntiꞌ xlyaꞌ, juaꞌa̱ laca nguꞌ biꞌ; ñiꞌya̱ ntiꞌ ñati̱ nu ñaꞌa̱si̱i̱ jiꞌi̱ xlyaꞌ, juaꞌa̱ laca na, nguꞌ cusuꞌ tyaꞌa na. Ngaꞌa̱ chaꞌ xtyucua na jiꞌi̱ nguꞌ tyaꞌa na chaꞌ tyanu tachaa la chaꞌ jiꞌi̱ Cristo tyiquee nguꞌ. Tyucui tyiquee ma̱ cuaꞌni ma̱ cña biꞌ, chaꞌ juaꞌa̱ ntiꞌ ycuiꞌ Ndyosi chaꞌ cuaꞌni na; ná tsoꞌo si ntsuꞌu chaꞌ tatsaa nguꞌ tyaꞌa ma̱ jiꞌi̱ ma̱ chaꞌ cuaꞌni ma̱ cña biꞌ. Loꞌo juaꞌa̱ ná tsoꞌo si quiñaꞌa̱ tsa cayaꞌ xñi ma̱ jiꞌi̱ nguꞌ chaꞌ cuaꞌni ma̱ cña biꞌ, pana tsoꞌo la si tyucui tyiquee ma̱ cuaꞌni ma̱ cña biꞌ cuentya jiꞌi̱ ycuiꞌ Ndyosi.
3 Ná laca ma̱ xuꞌna nguꞌ tyaꞌa ma̱, biꞌ chaꞌ tsoꞌo ti cuaꞌni ma̱ slo nguꞌ, chaꞌ taca ca cuayáꞌ tiꞌ xaꞌ la nguꞌ tyaꞌa ma̱ ñiꞌya̱ nu ntsuꞌu chaꞌ cuaꞌni nguꞌ.
4 Nu loꞌo tyuꞌu tucua ycuiꞌ nu Xuꞌna na, liꞌ ta Ni na tsoꞌo nu tyacua jiꞌi̱ ma̱. Ná ngaꞌa̱ chaꞌ tye tsiyaꞌ ti na nu ta Ni jiꞌi̱ lcaa na nu ntsuꞌu cña jiꞌna chaꞌ ñaꞌa̱si̱i̱ na jiꞌi̱ taju ñati̱ jiꞌi̱ Ni; siꞌi ñiꞌya̱ ntiꞌ ngana nu caja jiꞌna loꞌo ndyuꞌni na cña nde chalyuu nu yala ti tye biꞌ.
5 Loꞌo juaꞌa̱ cuꞌma̱ nguꞌ cuañiꞌ ni, ta naꞌ sca cui̱i̱ loꞌo ma̱. Taquiyaꞌ ma̱ jiꞌi̱ chaꞌ nu nchcuiꞌ nguꞌ cusuꞌ nu laca loo jiꞌi̱ ma̱. Loꞌo juaꞌa̱ ntsuꞌu chaꞌ xtyucua ma̱ jiꞌi̱ tyaꞌa ñati̱ ma̱, chaꞌ ná tsoꞌo cuaꞌni tyucuaa tiꞌ ma̱ jiꞌi̱ nguꞌ biꞌ. Ndiꞌya̱ nscua chaꞌ lo quityi jiꞌi̱ ycuiꞌ Ndyosi:
Xu̱u̱ tyaꞌa ycuiꞌ Ndyosi loꞌo ñati̱ nu nduꞌni tyucuaa tiꞌ jiꞌi̱ tyaꞌa ñati̱,
pana xtyucua tsa Ni jiꞌi̱ ñati̱ nu xti ti chaꞌ ntsuꞌu tyiquee nguꞌ cuentya jiꞌi̱ ycuiꞌ ca nguꞌ.
6 Biꞌ chaꞌ taquiyaꞌ ma̱ jiꞌi̱ chaꞌ nu nchcuiꞌ ycuiꞌ Ndyosi nu laca loo tsiyaꞌ ti, chaꞌ ná cuaꞌni tyucuaa tiꞌ ma̱ jiꞌi̱ tyaꞌa ñati̱ ma̱; cua jlo tiꞌ ycuiꞌ Ni ni tsa̱ laca nu loꞌo cuaꞌni Ni chaꞌ caca ma̱ ñati̱ tlyu la.
7 Cachaꞌ ma̱ jiꞌi̱ ycuiꞌ Ni lcaa chaꞌ nu nclyacua tsa tiꞌ ma̱ jiꞌi̱, loꞌo liꞌ cuaꞌni Ni chaꞌ ngaꞌaa cube tiꞌ ma̱ jiꞌi̱ chaꞌ biꞌ. Chañi chaꞌ ndube tiꞌ ycuiꞌ Ni ñaꞌa̱ Ni jiꞌi̱ cuꞌma̱.
8 ¡Tii ti tiꞌ ma̱ tyiꞌi̱ ma̱ chalyuu! Ná cajaꞌ ma̱, chaꞌ tyaꞌa cusu̱u̱ ma̱ laca ycuiꞌ nu xñaꞌa̱, loꞌo juaꞌa̱ cacua tsa ndu̱ biꞌ slo ma̱. Ñiꞌya̱ ntiꞌ sca cuichi nu tyaala tsa nu nclyana jiꞌi̱ sca ñati̱ chaꞌ cacu niꞌ, juaꞌa̱ ntiꞌ ndyaꞌa̱ yuꞌu nu xñaꞌa̱ biꞌ chalyuu.
9 Xñi tsoꞌo ma̱ chaꞌ jiꞌi̱ ycuiꞌ Ndyosi chaꞌ caca nguula tiꞌ tyiquee ma̱; liꞌ ná ta ma̱ chacuayáꞌ tyiji̱loo nu xñaꞌa̱ biꞌ jiꞌi̱ ma̱. Jlo tiꞌ na chaꞌ sca ti cuayáꞌ ndyacua chaꞌ tiꞌí jiꞌi̱ lcaa tyaꞌa na tyucui ñaꞌa̱ chalyuu.
10 Pana xti ti tsa̱ tyacua chaꞌ tiꞌí jiꞌi̱ ma̱. Loꞌo tye tsa̱ nu nchcubeꞌ ma̱, liꞌ cuaꞌni ycuiꞌ Ndyosi chaꞌ caca tsoꞌo ma̱, cuaꞌni Ni chaꞌ caca nguula tiꞌ tyiquee ma̱ chaca quiyaꞌ; ta Ni juersa jiꞌi̱ ma̱, chaꞌ xcuiꞌ tsoꞌo tsa nduꞌni ycuiꞌ Ni loꞌo na. Xquiꞌya Cristo cua ngusubi Ni jiꞌna chaꞌ taca tyiꞌi̱ na ca su tlyu su ntucua ycuiꞌ Ni.
11 Ná ngaꞌa̱ chaꞌ tye tsa̱ nu cuaꞌni tlyu na jiꞌi̱ ycuiꞌ Ndyosi liꞌ, chaꞌ laca Ni loo tsiyaꞌ ti. Juaꞌa̱ caca chaꞌ tuꞌni.
Nchcuiꞌ salyaꞌ Pedro loꞌo nguꞌ
12 Jlo tiꞌ naꞌ chaꞌ tsoꞌo tsa ngusñi Silvano tyaꞌa na chaꞌ jiꞌi̱ ycuiꞌ nu Xuꞌna na; yu biꞌ laca nu nguxtyucua tsa ꞌna loꞌo nguscua ya quityi sube re chaꞌ ca̱a̱ slo cuꞌma̱. Ntiꞌ naꞌ chaꞌ caca nguula tiꞌ tyiquee ma̱, chaꞌ chañi chaꞌ tlyu tsa chaꞌ tsoꞌo nduꞌni ycuiꞌ Ni loꞌo na. Jlo tiꞌ naꞌ chaꞌ biꞌ, loꞌo juaꞌa̱ tsoꞌo tsa si loꞌo cuꞌma̱ tyiꞌu tiꞌ ma̱ chaꞌ biꞌ, ñiꞌya̱ laca loꞌo nxtyucua tsa ycuiꞌ Ni jiꞌna lcaa tsa̱.
13 Ñaꞌa̱ tsaca taju ñati̱ jiꞌi̱ Jesucristo nde Babilonia re nda nguꞌ xlyo niꞌi̱ jiꞌi̱ ma̱. Nguꞌ tyaꞌa na laca nguꞌ biꞌ, chaꞌ loꞌo tyucui taju nguꞌ biꞌ, ngusubi ycuiꞌ Ndyosi jiꞌi̱ nguꞌ chaꞌ caca nguꞌ ñati̱ jiꞌi̱ Ni. “Xlyo niꞌi̱”, nacui̱ Marcos jiꞌi̱ cuꞌma̱, nu Marcos nu laca ñiꞌya̱ ntiꞌ sca sñiꞌ naꞌ.
14 Chcuichaꞌ ma̱ jiꞌi̱ lcaa nguꞌ tyaꞌa ma̱; quityi ma̱ jiꞌi̱ tyaꞌa ma̱ cuentya jnaꞌ, chaꞌ chañi chaꞌ tsoꞌo ntsuꞌu tyiquee na ñaꞌa̱ na jiꞌi̱ tyaꞌa na.
Cuaꞌni Ni chaꞌ ti̱ ti tyiꞌi̱ cresiya jiꞌi̱ lcaa cuꞌma̱ nu ntsuꞌu chaꞌ jiꞌi̱ ma̱ loꞌo Cristo.