7
Lungangnae hoi pathunae
1 Minhawinae teh hmuitui satui hlak ahawi. Duenae hnin hai khenae hnin hlak bet ahawi.
2 Ro im cei e heh pawi koe cei e hlak ahawi.
Bangkongtetpawiteh, tami pueng ni ro im vah lam a pâpout awh.
Kahring lahun e naw ni hai a lungthin thungvah a pâkuem awh han.
3 Panui e hlakvah lungmathoe e bet ahawi.
Bangkongtetpawiteh, lungmathoenae ni lungthin bet ahawi sak.
4 Lungkaangnaw e lungthin teh ro im vah ao.
Tamipathunaw e lungthin teh pawi im vah ao.
5 Tamipathunaw e la sak lawk thai hlakvah,
lungkaangnaw e tounnae lawk tarawi e bet ahawi.
6 Bangkongtetpawiteh, tamipathunaw e panuinae teh
hlaam rahim vah pâkhing ka kang e lawk hoi a kâvan.
Hot naw hai ahrawnghrang doeh.
7 Atangcalah, rektapnae ni a lungkaangnaw a pathu sak.
Tadawngnae ni lungthin a rawk sak.
8 Apoutnae teh kamtawngnae hlak ahawi,
a lungkasaw e tami teh a lungkalen e tami hlakvah ahawi.
9 Lungkhuek han totouh na lungduem sak hanh.
Lungkhueknae teh kapathunaw e lungthung vah hmuen ouk a la.
10 Bangkongmaw yampa e atueng teh
atu e atueng hlak ahawi telah na pacei awh hanh.
Hottelah na pacei pawiteh lungangnae lahoi pacei e na hoeh.
11 Lungangnae teh râw patetlah ahawi.
Kanî ka hmawt e naw koe hnokahawi a sak.
12 Bangkongtetpawiteh, lungangnae ni na rawngkhan,
tangka ni hai na rawngkhan thai.
Thoumthainae teh banghloimaw aphu ao.
Thoumthainae ka coe e tami teh hringnae hai a coe.
13 Cathut ni hno a sak e hah pouk haw,
a longkawi sak e teh apinimaw a palan thai han.
14 Yawhawinae na coe nah lunghawi awh.
Rucatnae na kâhmo nah kâpouk awh.
Tami ni ka tho hane kawi a panue nahanlah
Cathut ni hawinae hoi roedengnae kâletta lah a poe.
15 Ayawmlah ka onae atueng nah hno pueng ka hmu thai toe. Tami kalan ni a lannae dawk a sung e tie hoi, tami kahawihoeh ni ahawihoehnae, dawk a hringsaw e hai thoseh ka hmu.
16 Hloi lan hanh, hloi lungang hanh. Bangkongmaw nama e hawinae hah raphoe hanelah na ngai.
17 Hloi mathout hanh, hloi pathu hanh. Bangkongmaw atueng a pha hoehnahlan due hane na ngai.
18 Hete lawk heh pâkuem hanelah ahawi. Thada hanh, Cathut ka taket e tami teh hno pueng dawk hoi a hlout han.
19 Khopui thung kaawm e ukkung hra touh hlak, tami lungkaang buet touh e lungangnae a tha aohnawn.
20 Yon nuen laipalah hnokahawi ka sak e tami a nuen kahawi e talai van buet touh hai awm hoeh.
21 Ayâ ni a dei e pueng hah pâkuem hanh. Hottelah na tetpawiteh, na san e thoebo lawk na thai han.
22 Nama roeroe ni atuhoitu, ayânaw thoe na bo e hah na lung hoi na panue.
23 Hetnaw pueng heh, kai ni lungangnae hoi ka noumcai toe. Ka lungang han toe ka ti navah, lungangnae hoi hoe ka kâhla.
24 Kahlat ni teh kadung poung e hno hah apinimaw a tawng vaiteh a hmu thai han.
25 Lungangnae hoi akongnaw hah ka tawng teh panue hanelah thoseh, povangtanae hoi pathunae panue nahanelah thoseh, ka lung ni a kâyawm toe.
26 Tangkhek hoi tamlawk lah kaawm e napui e lungthin teh duenae hlak bet akhahnawn tie ka panue. Cathut a lung ka youk lah kaawm e ni duengdoeh hote napui kut dawk hoi a hlout han. Yon ouk ka sak e teh a kâman han.
27 Phungdeikung ti e teh kai ni ka tawng teh ka hmu hoeh rae hah hmu hanelah buet touh hnukkhu buet touh a pâphue.
28 Tongpa thong touh thung dawk buet touh ka hmu toe. Napui thong touh thung buet touh boehai ka hmawt hoeh.
29 Kai ni ka hmu e buet touh teh, Cathut ni tami hah tamikalan lah a sak ei teh, taminaw ni moikapap e pouknae hah a tawng awh.