21
Yꞌni tnun neꞌ ꞌin Jesús bra nu ngala yu Jerusalén
1 Wa kala ti Jesús loꞌo neꞌ nu ngiꞌni xaꞌan chaꞌ ꞌin yu kichen Jerusalén. Wa tyijin ti neꞌ ska kichen xuwe ti seꞌen naan Betfagé, siꞌ kiꞌya Olivos ndiꞌin kichen kanꞌ. Ngulo Jesús tñan ꞌin tukwa neꞌ nu ngiꞌni xaꞌan chaꞌ ꞌin yu bra kanꞌ:
2 ―Yaa wan lo kichen kwa ―ndukwin yu―. Ndla ti tyija ska buru nu nduun nchkanꞌ ꞌwan; nduun iꞌ loꞌo sñiꞌ iꞌ. Xtiꞌ wan ꞌin iꞌ chaꞌ kan loꞌo wan ꞌin iꞌ nde re.
3 Si kunichaꞌ neꞌ kichen kwa ꞌwan: “¿Ni sa ñaꞌan tñan kuꞌni wan loꞌo buru kwa?”, katsaꞌ wan chaꞌ re ꞌin neꞌ bra kanꞌ: “Ndiya tñan kuꞌni buru re chaꞌ ꞌin ti kwiꞌ nu nka Xꞌnaan.” Bra ti ta neꞌ chabiyaꞌ ꞌwan chaꞌ kan loꞌo wan ꞌin iꞌ bra kanꞌ.
4 Ayman nu ykwiꞌ chaꞌ ꞌin Ndiose loꞌo nten nu ngwa sꞌni, sa ñaꞌan nu ngwaꞌan neꞌ chaꞌ re lo kityi, ngwañaꞌan nchka chaꞌ ni:
5 Katsaꞌ wan ꞌin neꞌ kichen Sión:
“Ñaꞌan kwiꞌya wan chinꞌ nde re, chaꞌ wa ndijyan nu ka ndloo la ꞌwan.
Ja tlá yu kula kanꞌ, chunꞌ buru ti ndukwa yu.
Ska buru kuneꞌ lka iꞌ, sñiꞌ ꞌni nu ndiꞌya yuꞌwa lka buru kuneꞌ kanꞌ.”
Ngwañaꞌan nchkwiꞌ lo kityi kanꞌ.
6 Kanꞌ ndyaa tyukwaa neꞌ kanꞌ lo kichen bra kanꞌ, sa ñaꞌan nu ngulo Jesús tñan ꞌin neꞌ chaꞌ tsaa neꞌ.
7 Ndijyan loꞌo neꞌ ꞌin buru kanꞌ loꞌo sñiꞌ iꞌ. Kanꞌ mstya neꞌ steꞌ neꞌ chunꞌ buru chaꞌ tyukwa Jesús. Loꞌo ndyaa tukwa Jesús chunꞌ iꞌ bra kanꞌ.
8 Kwiꞌ ngwañaꞌan, kaꞌan ꞌa nten nu ndiꞌin la kanꞌ mslaa tiꞌin neꞌ steꞌ neꞌ, mstya neꞌ ꞌin ran tuwiin chaꞌ ka suꞌwe tuwiin seꞌen ndijyan Jesús ndukwa chunꞌ buru kanꞌ. Xka ta nten msiꞌyu stanꞌ yka chaꞌ xtya neꞌ tuwiin seꞌen ndijyan yu.
9 Loꞌo nchga nten msiꞌya ꞌa neꞌ chaꞌ suꞌwe ꞌa nka tiye neꞌ, loꞌo neꞌ nu ndyaa nde loo la, loꞌo neꞌ nu ndijyan nde chunꞌ la, suꞌwe ꞌa nka tiye nchga neꞌ kanꞌ.
―¡Kuꞌni tnun ba ꞌiin! Nuꞌwin lkaa ti kwiꞌ taꞌa ayman ree David nu ndiꞌin chaꞌ kan ―ndukwin neꞌ ꞌin Jesús―. ¡Suꞌwe ꞌa kuꞌni Ndiose loꞌoo chaꞌ ndijyaan chabiyaꞌ ꞌin Ni nu nka Xꞌnaan! ¡Kuꞌni tnuan ꞌin Ndiose ni! ―ndukwin neꞌ.
10 Kanꞌ mdiyan neꞌ kanꞌ loꞌo Jesús tuꞌwa kichen Jerusalén, yten neꞌ tuloꞌoo kichen kanꞌ. Loꞌo yuwe ꞌa tiꞌ neꞌ kichen kanꞌ bra kanꞌ. Kwen ꞌa msiꞌya neꞌ loꞌo taꞌa neꞌ:
―¿Ti ka nu lka ndijyan re a? ―ndukwin neꞌ.
11 Mxkwen nten kaꞌan kanꞌ ꞌin neꞌ kichen bra kanꞌ:
―Jesús Nazaret lka yu re. Nde lo yuu ꞌin Galilea ndukwa kichen tyi yu. Kwiꞌ nchkwiꞌ yu chaꞌ ꞌin Ndiose loꞌo nten ―ndukwin neꞌ.
Ngulo Jesús ꞌin nten nu ngiꞌni chaꞌ kuxi niꞌ lyaa tnun
12 Chunꞌ ndiꞌin la mdiyan Jesús tu laa tnun seꞌen ngiꞌni tnun nten ꞌin Ndiose. Yten yu ndyaa yu niꞌ lyaa kanꞌ, ngulo yu ꞌin nchga nten nde liyaꞌ bra kanꞌ, neꞌ nu ndujwiꞌ yuꞌwa niꞌ lyaa kanꞌ loꞌo nchga nten nu ndiꞌin nsiꞌi yuꞌwa kanꞌ. Kanꞌ mxlyuu Jesús msaa seꞌen nxaꞌan neꞌ tñi ꞌin nten, mxlyuu yu yka seꞌen ndukwa neꞌ nu ndujwiꞌ kiñi cha kuun.
13 ―Chkwiǐnꞌ chaꞌ nu ndukwa lo kityi ꞌin Ndiose, chaꞌ ꞌin laa re ―ndukwin Jesús bra kanꞌ―: “Seꞌen nu ka chkwiꞌ nchga nten loꞌo Ndiose lka naꞌan re, ngwañaꞌan chkwiꞌ neꞌ chaꞌ ꞌin naꞌan tyiǐn, ndukwin Ndiose.” Loꞌo ꞌwan, wa yꞌni wan chaꞌ naꞌan tyi neꞌ nu ngiꞌni kunan lka naꞌan re ―ndukwin Jesús ꞌin neꞌ kanꞌ.
14 Loꞌo mdiyan chinꞌ nu kwityiinꞌ seꞌen ndiꞌin Jesús niꞌ lyaa tnun kanꞌ, kwiꞌ mdiyan nten nu tiꞌí kiyaꞌ; yꞌni Jesús chaꞌ nchkaa nu tiꞌí kanꞌ bra kanꞌ.
15 Naꞌan sti joꞌo nu lka ndloo chaꞌ tnun nu yꞌni Jesús bra kanꞌ; loꞌo mstru nu nduꞌu chaꞌ joꞌo kanꞌ, naꞌan neꞌ sa ñaꞌan ngwa chaꞌ nchkaa nu tiꞌí kanꞌ. Loꞌo naꞌan neꞌ kanꞌ, chaꞌ ndiꞌin tyun nu xuwe ti, nu kwen ꞌa nchkwiꞌ xa ngiꞌni tnun neꞌ ꞌin Jesús:
―¡Kuꞌni tnun ba ꞌiin! Nuꞌwin lkaa ti kwiiꞌ nu lka taꞌa ayman ree David nu ndiꞌin chaꞌ kan ―ndukwin nu xuwe kanꞌ.
Msinꞌ ꞌa tiꞌ neꞌ nu lka ndloo kanꞌ bra kanꞌ, bra nu ynan neꞌ tnun nchka kanꞌ sa ñaꞌan chaꞌ nu nchkwiꞌ nu xuwe kanꞌ.
16 Bra ti ykwiꞌ neꞌ tnun nchka kanꞌ loꞌo Jesús:
―¿Ta ja nnaan chaꞌ kwiñi nu nchkwiꞌ nu xuwe ti re chaꞌ ꞌiin a? ―ndukwin neꞌ kanꞌ ꞌin Jesús.
―Wa ynaǎn ―ndukwin Jesús bra kanꞌ―. Loꞌo siꞌi chaꞌ kwiñi nchkwiꞌ nu xuwe re. ¿Ja ya chkwiꞌ wan lo kityi seꞌen ndukwa chaꞌ re a?:
Ngala tuꞌwa kuwiꞌ, ngala tuꞌwa nu xuwe kuneꞌ; chañi chaꞌ ngiꞌni tnun neꞌ kanꞌ ꞌin Ndiose.
17 Mdoꞌo Jesús ndyaa yu ska kichen xuwe nu naan Betania. La kanꞌ yijaꞌ yu tla bra kanꞌ.
Yꞌni Jesús chaꞌ mtyi ska yka kwiñii
18 La xka tsan mxitukwi Jesús ndyaan kichen tlyu kanꞌ, ngiteꞌ tiꞌ yu bra kanꞌ.
19 Kanꞌ naꞌan yu ska yka kwiñii nu nduun tuꞌwa tuwiin. Ndyaa naꞌan yu ꞌin yka kanꞌ si kaja nan ku yu lo ran, loꞌo ja nsuꞌwi nan lo ran, xkwiꞌ lkaꞌ ti nsuꞌwi lo ran. Ykwiꞌ Jesús chaꞌ ꞌin yka bra kanꞌ:
―Ja tyoꞌo ꞌa nan lo yka kwa xka yijan ―ndukwin yu.
Bra ti mtyi yka kanꞌ.
20 Yuwe ꞌa tiꞌ neꞌ nu ngiꞌni xaꞌan chaꞌ ꞌin yu bra kanꞌ:
―¿Nan lka ngwa ꞌin yka kwiñii kwa a? Mtyi ran siyaꞌ ti ―ndukwin neꞌ kanꞌ ꞌin Jesús.
21 Mxkwen Jesús ꞌin neꞌ kanꞌ bra kanꞌ:
―Chañi chaꞌ nu nchkwiǐnꞌ loꞌo wan ni ―ndukwin yu―. Bra nu chañi chaꞌ ndyaa ñaꞌan tiꞌ wan ꞌin Ndiose, loꞌo ja lka tukwa chaꞌ nsuꞌwi tiye wan nchkwiꞌ wan loꞌo Ni, loꞌo ꞌwan, ka ꞌwan kuꞌni wan ska chaꞌ tnun ngwañaꞌan. Siꞌi chaꞌ kityi ska yka ti chkwiꞌ wan loꞌo Ndiose bra kanꞌ, loꞌo ka chkwiꞌ wan chaꞌ re loꞌo kiꞌya kwa: “Tyoꞌo tsuuꞌ, yaa tukwaa lo tyiꞌa tujoꞌo” nchkwin wan ꞌin kiꞌya kwa. Loꞌo tyoꞌo tsuꞌ kiꞌya kwa bra kanꞌ.
22 Nchga lo chaꞌ nu jñan wan ꞌin Ndiose, bra nu chañi chaꞌ ndyaa ñaꞌan tiꞌ wan ꞌin Ni, kaja chaꞌ kanꞌ ꞌwan bra kanꞌ.
Ngiꞌni Jesús tñan chabiyaꞌ ꞌin Ndiose
23 Bra nu mdiyan neꞌ kichen tlyu kanꞌ xiyaꞌ, bra kanꞌ yten Jesús ndyaa yu niꞌ lyaa tnun kanꞌ; nduꞌu yu ꞌin nten xiyaꞌ. Loꞌo sti joꞌo nu lka ndloo, loꞌo xka ta neꞌ kula nu lka ndloo, naꞌan neꞌ ꞌin Jesús bra kanꞌ. Bra ti ndyaa neꞌ kanꞌ seꞌen ndiꞌin yu chaꞌ kunichaꞌ neꞌ ꞌin yu bra kanꞌ:
―¿Ti ka lka nu nda ra chabiyaꞌ ꞌiin chaꞌ kuꞌnii sa ñaꞌan tñan nu ngiꞌnii ni? ―ndukwin neꞌ nu lka ndloo kanꞌ ꞌin Jesús―. ¿La nde yaꞌ mjwi chabiyaꞌ kwa ꞌiin? ―ndukwin neꞌ kanꞌ ꞌin yu.
24 ―Loꞌoǔn kunichaǎnꞌ ska chaꞌ ꞌwan sikwa, ni sa ñaꞌan xkwen wan ꞌñaǎn bra kanꞌ ―ndukwin Jesús ꞌin neꞌ bra kanꞌ―. Si ka ꞌwan xkwen wan ꞌñaǎn, loꞌoǔn xkweěn ꞌwan bra kanꞌ; katsaǎnꞌ ñiǐn ꞌwan ti ka lka nu nda chabiyaꞌ ꞌñaǎn, chaꞌ kuꞌniǐn sa ñaꞌan nu ngiꞌniǐn nde re ni.
25 ¡Suꞌwe sikwa! Bra nu ti ndukwatya Xuwa ꞌin nten, ¿ta chabiyaꞌ ꞌin Ndiose ngwa kanꞌ a? ¿Ta chabiyaꞌ ꞌin nten chalyuu ti ngwa kanꞌ a?
Mnan ti ykwiꞌ neꞌ nu lka ndloo kanꞌ loꞌo taꞌa neꞌ bra kanꞌ:
―¿Ni sa ñaꞌan xkwean ra ꞌin yu re? Si xkwean: “Chabiyaꞌ ꞌin Ndiose mdukwatya Xuwa kanꞌ ꞌin nten”, ja suꞌwe chaꞌ kanꞌ, chaꞌ bra ti chkwiꞌ yu chaꞌ re ꞌñaan: “¿Ni chaꞌ ja msñi wan chaꞌ nu ykwiꞌ Xuwa sikwa?”
26 Loꞌo si xkwean: “Chabiyaꞌ ꞌin nten ti mdukwatya Xuwa kanꞌ ꞌin nten”, ti kwiꞌ ti chaꞌ, ja suꞌwe chaꞌ kanꞌ, chaꞌ nchga neꞌ kichen re ndyaa ñaꞌan tiꞌ neꞌ chaꞌ chañi chaꞌ ykwiꞌ Xuwa kanꞌ xkwiꞌ chaꞌ ꞌin Ndiose loꞌo nten. Loꞌo ntsean ꞌin neꞌ kichen re.
27 Kanꞌ chaꞌ mxkwen neꞌ kanꞌ ꞌin Jesús:
―Ja jlyo tiꞌ ba ―ndukwin neꞌ.
―Suꞌwe sikwa ―ndukwin Jesús ꞌin neꞌ―. Loꞌoǔn, ja katsaǎnꞌ ꞌwan ti ka lka nu nda chabiyaꞌ ꞌñaǎn chaꞌ kuꞌniǐn sa ñaꞌan nu ngiꞌniǐn bra ni.
Chaꞌ ꞌin ska yu loꞌo taꞌa ngula yu
28 Ti ngwaꞌu la Jesús chinꞌ chaꞌ ꞌin neꞌ bra kanꞌ:
―Chkwiǐnꞌ ska chaꞌ tiya re loꞌo wan, chaꞌ xkwen wan ꞌñaǎn ―ndukwin Jesús ꞌin neꞌ―. Wa ndiꞌin ska yu kula nu ndiꞌin tukwa yu kiꞌyu sñiꞌ yu. Kanꞌ ykwiꞌ yu kula kanꞌ loꞌo sñiꞌ yu nu kula la: “Sñiěnꞌ” ndukwin yu, “yaa kuꞌnii tñan niꞌ lyoꞌoo ꞌñaǎn ni, seꞌen ndukwa yka kwiñii ꞌñaǎn.”
29 “¡Ja tsaꞌaǎn!” ndukwin sñiꞌ yu bra kanꞌ. Chunꞌ ndiꞌin la ngwa jyuꞌu tiꞌ yu kuneꞌ chaꞌ ja mdukwa yu tñan ꞌin sti yu, kanꞌ chaꞌ mdoꞌo yu ndyaa yu tñan kanꞌ.
30 Loꞌo ti kwiꞌ tñan kanꞌ ngulo sti yu ꞌin xka sñiꞌ. “Tsaꞌaǎn, ja kuwe tiiꞌ” ndukwin yu kuneꞌ la kanꞌ ꞌin sti yu, loꞌo chaꞌ kwiñi ykwiꞌ yu, chunꞌ ja yaa yu tñan ꞌin sti yu.
31 ¿Ni sa ñaꞌan xkeꞌ tiꞌ wan ni? Taꞌa tyukwaa yu kuneꞌ kanꞌ ni, ¿ti lka ska nu yꞌni tñan nu ngulo sti ꞌin a?
―Sñiꞌ yu nu kula la, kanꞌ nu yꞌni tñan kanꞌ ―ndukwin neꞌ ꞌin Jesús bra kanꞌ.
―Chañi chaꞌ ꞌwan ―ndukwin Jesús ꞌin neꞌ―. Loꞌo chañi chaꞌ nu nchkwiǐnꞌ loꞌo wan ni, chaꞌ ndiya neꞌ kuxi, ñaꞌan tiꞌ msu ꞌin neꞌ xka laꞌa tsuꞌ nu kwiñi ti ndlo kaꞌan ꞌa tñi ꞌin nten, ndiya neꞌ kanꞌ nu ndla la sten chaꞌ ꞌin Ndiose, chaꞌ ka Ni ndloo la niꞌ kasiya ꞌin neꞌ; kwiꞌ ndiya nu kunaꞌan calle ti nu ndla la sten chaꞌ ꞌin Ndiose, chaꞌ ka Ndiose ndloo la niꞌ kasiya ꞌin neꞌ. Loꞌo ꞌwan ni, tiyaꞌ la kala wan seꞌen ndiꞌin Ndiose.
32 Bra nu yan ayman Xuwa kanꞌ, xkwiꞌ chaꞌ nu ñi ykwiꞌ yu loꞌo wan. Ñi ꞌa yꞌni yu, loꞌo ja msñi wan kwenta chaꞌ nu ykwiꞌ yu loꞌo wan. Loꞌo neꞌ kuxi kanꞌ nu kaꞌan tñi ndlo ꞌin nten ni, wa ynan neꞌ chaꞌ nu ykwiꞌ Xuwa kanꞌ loꞌo neꞌ bra kanꞌ; kwiꞌ ngwañaꞌan nu kunaꞌan calle kanꞌ, ynan neꞌ chaꞌ nu ykwiꞌ Xuwa. Loꞌo ꞌwan, wa naꞌan wan sa ñaꞌan nu ndyaa ñaꞌan tiꞌ neꞌ nu kuxi tiye kanꞌ chaꞌ nu ngwaꞌu Xuwa, loꞌo ja ngwa jyuꞌu tiꞌ wan ꞌin kiꞌya nu ndiꞌin ꞌwan, chunꞌ chaꞌ ja msñi wan chaꞌ nu ykwiꞌ Xuwa kanꞌ.
Chaꞌ ꞌin msu xaꞌan
33 ’Nde chkwiǐnꞌ xka chaꞌ tiya loꞌo wan, ñaꞌan tiꞌ ska nkwin: Ndiya ska nu kuliyaꞌ, yta yu kaꞌan ꞌa yka kwiñii. Msuꞌwa yu ska loꞌoo chunꞌ yka kanꞌ bra kanꞌ. Loꞌo mñan yu ska tu tiyuu niꞌ kee seꞌen lyoꞌo sta neꞌ mta chi kutun, chaꞌ kulo neꞌ tyiꞌa xi nu nsuꞌwi niꞌ ran. Loꞌo mñan yu ska naꞌan seꞌen kuꞌni neꞌ kwan tñan kanꞌ bra kanꞌ.
’Loꞌo mda xꞌnan yuu kanꞌ mjñan xka ta nten bra kanꞌ, chaꞌ kuꞌni neꞌ tñan niꞌ lyoꞌoo ꞌin yu, chunꞌ nsuꞌwi ska tñan tsaa yu tijyuꞌ.
34 Chunꞌ ndiꞌin la, wa tiya ti bra xtun neꞌ mta chi kutun kanꞌ, loꞌo tijyuꞌ ndiꞌin xꞌnan loꞌoo kanꞌ. Kanꞌ ngulo yu tñan ꞌin ska ta msu ꞌin yu chaꞌ tsaa neꞌ seꞌen ngiꞌni neꞌ tñan niꞌ lyoꞌoo ꞌin yu bra kanꞌ, chaꞌ tsaa yꞌya msu kanꞌ chinꞌ nan nu ndiꞌin chaꞌ kanun ꞌin xꞌnan loꞌoo kanꞌ.
35 Bra nu naꞌan neꞌ nu ngiꞌni tñan kanꞌ chaꞌ ndijyan msu kanꞌ, bra ti msñi neꞌ ꞌin msu; mjiꞌin neꞌ ꞌin ska, yjwi neꞌ ꞌin xka, mguun kee neꞌ ꞌin xka.
36 Chunꞌ ndiꞌin la msuꞌwa xꞌnan loꞌoo ꞌin xka ta msu kaꞌan la bra kanꞌ, chaꞌ tsaa neꞌ seꞌen ngiꞌni neꞌ tñan kanꞌ. Bra nu naꞌan neꞌ chaꞌ ndijyan msu kanꞌ, kwiꞌ ngwañaꞌan yꞌni neꞌ loꞌo bra kanꞌ.
37 ’Loꞌo kanꞌ msuꞌwa xꞌnan loꞌoo kanꞌ ꞌin sñiꞌ yu, ndyaa seꞌen ngiꞌni neꞌ tñan kanꞌ. “Ja chan tukwa neꞌ kanꞌ chaꞌ nchkwiꞌ sñiěnꞌ” nka tiye xꞌnan loꞌoo bra kanꞌ.
38 Xa wa naꞌan neꞌ kanꞌ ꞌin sñiꞌ yu, bra kanꞌ ykwiꞌ neꞌ loꞌo taꞌa neꞌ: “Sñiꞌ xꞌnan loꞌoo ndijyan ni” ndukwin neꞌ ꞌin taꞌa neꞌ. “Nu kwa ka xꞌnan yka kwiñii re nde loo la, kanꞌ chaꞌ suꞌwe la si kujwian ꞌin yu, chaꞌ kanun loꞌoo re ꞌñaan” ndukwin neꞌ kanꞌ.
39 Kanꞌ chaꞌ msñi neꞌ ꞌin sñiꞌ yu kanꞌ, ndyaa loꞌo neꞌ ꞌin sñiꞌ yu chunꞌ loꞌoo, yjwi neꞌ ꞌin sñiꞌ yu bra kanꞌ.
40 ’¿Nan lka kuꞌni xꞌnan loꞌoo loꞌo yu xaꞌan nu ngiꞌni tñan niꞌ lyoꞌoo ꞌin yu, bra nu tyaan yu xiyaꞌ, xkeꞌ tiꞌ wan a? ―ndukwin Jesús ꞌin neꞌ bra kanꞌ.
41 ―Ndla ti kujwi xꞌnan loꞌoo kanꞌ ꞌin nchga yu xaꞌan kanꞌ ―ndukwin neꞌ ꞌin Jesús―. Loꞌo ta yu loꞌoo kanꞌ jñan xka ta nten chaꞌ kuꞌni neꞌ tñan lo yuu kanꞌ. Tsaa naan xꞌnan loꞌoo ꞌin nten suꞌwe nu xlyaa tya chinꞌ yuꞌwa ꞌin yu, liyaꞌ ꞌin yuu kanꞌ; tya neꞌ yuꞌwa nchga yijan bra nu ndiya bra xtun neꞌ mta chi kutun kanꞌ.
42 Xiyaꞌ ykwiꞌ Jesús loꞌo neꞌ nu lka ndloo kanꞌ bra kanꞌ:
―¿Ja ya chkwiꞌ wan lo kityi ꞌin Ndiose a? Nde lka chaꞌ kanꞌ:
Ti kwiꞌ kee tnun nu mxkwan nten nu mñan naꞌan ti kulo, chaꞌ ja suꞌwe kee kanꞌ, mskeꞌ tiꞌ neꞌ, wa mjwi tñan kuꞌni kee kanꞌ ni;
nduun ran seꞌen nka ndloo la ꞌin naꞌan ꞌin Ndiose.
Ndiose yꞌni chaꞌ ngwañaꞌan ngwa chaꞌ tnun kanꞌ, kanꞌ chaꞌ nduwe ꞌa tianꞌ.
Ngwañaꞌan nchkwiꞌ kityi;
43 kanꞌ chaꞌ katsaǎnꞌ ñi ꞌwan ni, chaꞌ ja ta ꞌa Ndiose chabiyaꞌ sten wan chaꞌ ꞌin Ni, chaꞌ ka Ni ndloo la niꞌ kasiya ꞌwan. Ta Ni chabiyaꞌ kala xka ta nten seꞌen ndiꞌin Ni, nten nu suꞌwe nka tiye chaꞌ kuꞌni tñan ꞌin Ni.
44 Loꞌo chaꞌ ꞌin kee tnun kanꞌ ni, naꞌ lkaǎn ñaꞌan tiꞌ kee tnun kanꞌ; sa ñaꞌan nu yꞌni neꞌ nu mñan naꞌan loꞌo kee tnun kanꞌ, ngwañaꞌan ngiꞌni wan loꞌoǔn. Loꞌo nten nu nchka tiꞌ tukunꞌ chaꞌ ꞌñaǎn, ja ka suꞌwe chaꞌ ꞌin neꞌ kanꞌ bra kanꞌ; bra nu kuꞌni biyaꞌ Ndiose ꞌin nchga nten chalyuu, ska yaꞌ ti tyii chaꞌ ꞌin nten nu ja xlyaa xñi chaꞌ ꞌñaǎn tyukwi nu yan neꞌ lo chalyuu.
45 Sti joꞌo nu lka ndloo loꞌo neꞌ fariseo ni, bra nu ynan neꞌ chaꞌ nu tka ykwiꞌ ti Jesús loꞌo neꞌ, mskeꞌ tiꞌ neꞌ chaꞌ ykwiꞌ kaꞌan Jesús ꞌin neꞌ bra nu ykwiꞌ yu chaꞌ ꞌin neꞌ xaꞌan nu yꞌni tñan niꞌ lyoꞌoo ꞌin xꞌnan yuu kanꞌ, kwiꞌ chaꞌ ꞌin kee nu mxkwan neꞌ nu mñan naꞌan.
46 Lye ꞌa nka tiye neꞌ nu tnun nchka kanꞌ xñi neꞌ ꞌin Jesús, chaꞌ kujwi neꞌ ꞌin yu, ngwa tiꞌ neꞌ. Loꞌo ja ngwa ꞌin neꞌ, chaꞌ ntsen neꞌ ꞌin nten kaꞌan kanꞌ, chaꞌ kaꞌan ꞌa nten ndyaa ñaꞌan tiꞌ chaꞌ ska nten nu nchkwiꞌ chaꞌ ꞌin Ndiose lka Jesús.