7
Sa ñaꞌan taꞌa neꞌ Israel nu kwaꞌan biyaꞌ Ndiose tuꞌ chkan neꞌ
1 Chunꞌ ndiꞌin la naꞌaǎn jakwa angajle ꞌin Ndiose; naꞌaǎn la kiyaꞌ chalyuu siyaꞌ ti, taꞌa jakwa nskan chalyuu seꞌen nduun jakwa angajle kanꞌ bra kanꞌ. Ndlo angajle kanꞌ tñan ꞌin taꞌa jakwa kwiꞌin nu ndijin lo chalyuu. Ja nda angajle kanꞌ chabiyaꞌ chaꞌ ka kwiꞌin kanꞌ; ni siya nde lo yuu, ni siya nde tujoꞌo, ja ska chunꞌ yka tyijin kwiꞌin bra kanꞌ.
2 Loꞌo naꞌaǎn mdoꞌo tukwa xka angajle nu mdoꞌo ndijyan nde seꞌen ndoꞌo tukwa kwichaa bra kanꞌ. Ndiꞌya yu biyaꞌ nu wa mda Ndiose ꞌin yu, ti kwiꞌ Ndiose nu luꞌu, chaꞌ kwaꞌan biyaꞌ yu ꞌin nu lka nten ꞌin Ndiose. Kwen nchkwiꞌ yu loꞌo jakwa angajle nu nsuꞌwi chabiyaꞌ kuꞌni ñuꞌun ꞌin chalyuu loꞌo tujoꞌo bra kanꞌ.
3 Nde ñaꞌan ykwiꞌ yu loꞌo angajle kanꞌ bra kanꞌ:
―Ja kalaꞌ wan chalyuu, ja kalaꞌ wan tujoꞌo, ja kalaꞌ wan yka; ti ji kwaꞌan biyaꞌ Ndiose nu lka Stian tuꞌ chkan nten nu ngiꞌni tñan ꞌin Ni nde kwa.
4 Loꞌo ngwaꞌu neꞌ ꞌñaǎn sa ñaꞌan taꞌa nten neꞌ israel nu ngwaꞌan biyaꞌ Ndiose chkan neꞌ: ska siyentu nsuꞌwi tuꞌwa ndukwa jakwa mi nten lka kanꞌ bra kanꞌ. Tyoꞌo neꞌ kanꞌ laja tii tyukwa ta neꞌ Israel, ska nin lka ꞌin ska ta neꞌ kanꞌ:
5 Tyoꞌo tii tyukwa mi nten laja neꞌ taꞌa nin Juda nu ngwaꞌan biyaꞌ Ndiose ꞌin,
kwiꞌ tyoꞌo xka tii tyukwa mi nten laja neꞌ taꞌa nin Rubén,
kwiꞌ tyoꞌo tii tyukwa mi nten laja neꞌ taꞌa nin Gad,
6 kwiꞌ tyoꞌo tii tyukwa mi nten laja neꞌ taꞌa nin Aser,
kwiꞌ tyoꞌo tii tyukwa mi nten laja neꞌ taꞌa nin Neftalí,
kwiꞌ tyoꞌo tii tyukwa mi nten laja neꞌ taꞌa nin Manasés;
7 kwiꞌ ngwañaꞌan tyoꞌo tii tyukwa mi nten laja neꞌ taꞌa nin Simeón,
kwiꞌ tyoꞌo tii tyukwa mi nten laja neꞌ taꞌa nin Leví,
kwiꞌ tyoꞌo tii tyukwa mi nten laja neꞌ taꞌa nin Isacar,
8 kwiꞌ tyoꞌo tii tyukwa mi nten laja neꞌ taꞌa nin Zabulón,
kwiꞌ tyoꞌo tii tyukwa mi nten laja neꞌ taꞌa nin Se,
kwiꞌ tyoꞌo tii tyukwa mi nten laja neꞌ taꞌa nin Benjamín.
Sa kwa ti taꞌa neꞌ Israel ngwaꞌan biyaꞌ Ndiose ꞌin.
Xka ta nten nu tyoꞌo tyukwi ñaꞌaan chalyuu nu ta Ndiose teꞌ ngaten ꞌin
9 Chunꞌ ndiꞌin la naꞌaǎn sa tlyu ti nduun nten nu wa ngulaa Jesús ꞌin; kaꞌan ꞌa nten ndiꞌin, kanꞌ chaꞌ ja tukwin ngwa kwa ꞌin neꞌ kanꞌ. Tyukwi ñaꞌaan chalyuu la seꞌen ndiꞌin nten mdoꞌo neꞌ kanꞌ mdiyan neꞌ; nchga lo nten chalyuu mdiyan, chaꞌ nchga kichen tyi neꞌ mdoꞌo neꞌ, nchga lo chaꞌ nu nchkwiꞌ nten chalyuu nchkwiꞌ neꞌ kanꞌ bra kanꞌ. Nduun neꞌ nde loo seꞌen ndukwa yka xlya tnun, nde loo seꞌen nduun nu lka ñaꞌan tiꞌ slyaꞌ kanꞌ. Teꞌ ngaten kanꞌ lkuꞌ neꞌ, ndukwi lkaꞌ kiñan yaꞌ neꞌ nduun neꞌ bra kanꞌ.
10 Kwen nchkwiꞌ neꞌ kanꞌ bra kanꞌ:
Kuꞌniin tnuun ꞌin Ndiose nu nka Xꞌnaan, ndukwin neꞌ ꞌin taꞌa neꞌ, kwiꞌ nu ndukwa lo yka xlya tnun, ti kwiꞌ Ni kanꞌ lka Ni ndloo ꞌñaan;
kwiꞌ ngwañaꞌan nu lka ñaꞌan tiꞌ slyaꞌ kanꞌ nduun loo la Ni ꞌñaan, ndukwin neꞌ.
11 Loꞌo nchga angajle kanꞌ nduun nde chunꞌ seꞌen ndukwa yka xlya tnun kanꞌ; nde chunꞌ seꞌen nduun ꞌni kti kanꞌ, nde chunꞌ seꞌen nduun taꞌa yu kula, la kwa ndiꞌin angajle bra kanꞌ. Mdyisti neꞌ nde loo neꞌ lyuu bra kanꞌ, chaꞌ kuꞌni tnun neꞌ ꞌin Ndiose bra kanꞌ.
12 Ykwiꞌ angajle kanꞌ bra kanꞌ:
¡Ngwañaꞌan ka sikwa! Kuꞌniin tnuan ꞌin Ndiose, suꞌwe ꞌa chkwianꞌ chaꞌ ꞌin Ni, tyaan xuꞌwe ꞌin Ni.
Chkwianꞌ chaꞌ nchga chaꞌ jlyo tiꞌ Ni, nan ꞌin Ni lka nchga lo nan nu nsuꞌwi lo chalyuu;
nchga lo tñan nchka ꞌin Ni kuꞌni Ni siyaꞌ ti, ska ti Ndiose nsuꞌwi chabiyaꞌ kuꞌni nchga tñan.
Nchga bra ja tsaa tii ꞌa chaꞌ ngwañaꞌan ka ꞌin Ndiose Stian. Loꞌo chañi chaꞌ ngwañaꞌan ka.
Ngwañaꞌan ykwiꞌ angajle loꞌo taꞌa bra kanꞌ.
13 Kanꞌ mnichaꞌ ska yu kula ꞌñaǎn bra kanꞌ:
―¿Ti lka nu lkuꞌ teꞌ ngaten kwa, xkeꞌ tiiꞌ a? ―ndukwin―. ¿La nde yaꞌ mdoꞌo nten kwa ndijyan a?
14 ―Ja jlyo tiǎnꞌ, yu kula. Katsaaꞌ chinꞌ ꞌñaǎn ―niǐn ꞌin yu kula kanꞌ.
Nchkwiꞌ yu kula loꞌoǔn bra kanꞌ:
―Tka mdijin ti nten kwa ska nu tiꞌí tnun, chunꞌ msñi neꞌ chaꞌ ꞌin Jesús ―ndukwin yu kula ꞌñaǎn―. Wa ngujwi nu lka ñaꞌan tiꞌ slyaꞌ kanꞌ lo wsi chaꞌ ꞌin neꞌ kanꞌ, kanꞌ chaꞌ wa ngwa luwi niꞌ kasiya ꞌin neꞌ, kanꞌ chaꞌ mjwi chabiyaꞌ kuꞌ neꞌ teꞌ ngaten.
15 Kwiꞌ ngwañaꞌan, sa bra ni nduun neꞌ kanꞌ nde loo seꞌen tnun seꞌen ndukwa Ndiose ―ndukwin yu kula kanꞌ―, chaꞌ tsan loꞌo tla ngiꞌni neꞌ kanꞌ tñan ꞌin Ni nde seꞌen ndiꞌin Ni. Ndiose nu ndukwa lo yka xlya tnun kanꞌ, kanun Ni kwiꞌ seꞌen ndiꞌin neꞌ kanꞌ, chaꞌ ja ta Ni chabiyaꞌ chaꞌ tyukwa neꞌ kanꞌ chaꞌ kuxi.
16 Ja kiteꞌ ꞌa tiꞌ neꞌ kanꞌ xiyaꞌ, kwiꞌ ja kityi ꞌa tiꞌ neꞌ; ja xuwenꞌ ꞌa xaa kwan ꞌin neꞌ kanꞌ, ja kiꞌni ꞌa kwan chunꞌ neꞌ, kwiꞌ ja ka naꞌan ꞌa tiꞌ neꞌ chaꞌ tikeeꞌ kwan bra kanꞌ.
17 Ñaꞌansiin nu lka ñaꞌan tiꞌ slyaꞌ kanꞌ ꞌin neꞌ kanꞌ, chaꞌ ndiꞌin Ni ti kwiꞌ seꞌen nka Ndiose ndloo; ti kwiꞌ Ni tsaa loꞌo Ni ꞌin neꞌ kanꞌ seꞌen kaja tyiꞌa koꞌo neꞌ chaꞌ kaja chalyuu nu kwi ꞌin neꞌ kanꞌ bra kanꞌ. Loꞌo ngwañaꞌan xtyi Ni tyiꞌa kiloo neꞌ kanꞌ, chaꞌ ja kunan ꞌa neꞌ bra kanꞌ.