138
Wocox i yʌlʌ lac Yum chaꞌan i yutslel
Ti pejtyelel c pusicꞌal mic subeñet wocox a wʌlʌ, c Yum.
Mij cꞌʌybeñet a ñuclel yaꞌ tiꞌ tyojlel jini muꞌ bʌ i chꞌujutisañob dios tyeꞌ tyac.
Mic chꞌujutisañet tiꞌ tyojel chꞌujul bʌ a templo.
Mic subeñet wocox a wʌlʌ chaꞌan ñuc a cꞌabaꞌ.
Tiꞌ xucꞌtyʌlel a pusicꞌal maꞌ pꞌuntyañon lojon.
Más ñuc a tꞌan bajcheꞌ pejtyelel yan tyac bʌ a melbal.
Ti a jacꞌbeyon coración ti jini jach bʌ qꞌuin cheꞌ ñac tic pejcʌyet.
Ti a ñuc isʌbeyon c pusicꞌal cheꞌ ñac ti a pꞌʌtyʌlitisʌyon.
Ti pejtyelel yumʌlob ti mulawil mi quej i subob a ñuclel, c Yum, cheꞌ mi yubiñob a tꞌan.
Melel, mi quej i cꞌʌyiñob a melbal, c Yum,
Como ñajt mi tsictiyel a ñuclel.
Aunque ñoj ñuc lac Yum ti panchan, miꞌ ñaꞌtyan jini muꞌ bʌ i peqꞌuisañob i bʌ,
Pero miꞌ ñajtyʌ qꞌuel jini muꞌ bʌ i chan isañob i bʌ
Cheꞌ an c wocol maꞌ cʌñʌtyañon chaꞌan mic ñusan ti wen,
Maꞌ pʌs a pꞌʌtyʌlel tiꞌ contra jini michꞌoꞌ bʌ muꞌ bʌ i contrajiñoñob.
Maꞌ cotyañon ti ñoj bʌ a cꞌʌb.
C Yum, mi quej a tsꞌʌctisʌbeñon chʌ bʌ yom tic tyojlel cheꞌ bajcheꞌ wʌ ñaꞌtyʌbil a chaꞌan.
Ti beleꞌ ora maꞌ pꞌuntyañon.
Maꞌ maꞌ cʌyon como i melbalon a cꞌʌb.