146
Dios miꞌ cotyan jini pꞌumpꞌuñoꞌ bʌ
1 Subula i ñuclel lac Yum. Yom mic sub i ñuclel c Yum ti pejtyelel c pusicꞌal.
2 Mi quej c bej sub i ñuclel lac Yum cheꞌ cuxulon tyo.
Mi quej j cꞌʌyben i ñuclel c Dios cheꞌ wʌꞌ tyo añon ti mulawil.
3 Mach yom mi laꞌ xucꞌchocon laꞌ pusicꞌal ti yumʌlob wʌꞌ ti mulawil.
Como winicob jach. Mach chꞌujbi i cotyañonla.
4 Cheꞌ miꞌ cʌy i japob icꞌ mi sajtyelob. Mi sujtyelob ti lum.
Ti jini jach bʌ qꞌuin mucꞌ jach i jilel chʌ bʌ tiꞌ pensaliyob i chaꞌlen.
5 Cꞌajacña i yoj jini muꞌ bʌ i tyaj i cotyʌntyel ti i Dios Jacob.
Ñʌchꞌʌl i pusicꞌal chʌncol i pijtyan lac Yum, como jiñʌch i Dios jeꞌel.
6 Jiñʌch Dios tsaꞌ bʌ i mele panchan yicꞌot mulawil.
Yicꞌot colem jaꞌ yicꞌot ti pejtyelel i bʌl. Mach yujil lot. Ñoj melel i tꞌan.
7 Mi quej i mel ti tyoj jini tyʌcꞌlʌbiloꞌ bʌ cheꞌ miꞌ chaꞌlen melojel.
Mi yʌqꞌueñob i yuchꞌel jini añoꞌ bʌ i wiꞌñal.
Lac Yum miꞌ colob jini cʌchʌloꞌ bʌ yubil.
8 Lac Yum miꞌ jambeñob i wut jini xpotsꞌob.
Lac Yum miꞌ tijicñisʌbeñob i pusicꞌal jini chꞌʌjyemoꞌ bʌ.
Lac Yum miꞌ pꞌuntyañob jini tyojoꞌ bʌ i pusicꞌal.
9 Lac Yum miꞌ cʌñʌtyan jini tyʌlemoꞌ bʌ ti ñajt bʌ lum.
Miꞌ cotyan mebaꞌ xꞌixicob yicꞌot mebaꞌ alpꞌeñalob.
Pero miꞌ jisʌbeñob i tijicñʌyel jini simaroñoꞌ bʌ.
Mi yʌqꞌuentyel i ñusañob wocol.
10 Mi yumintyel lac Yum ti pejtyel ora.
Jiñʌch laꞌ Dios jeꞌel, añet bʌ la ti Sión.
I Diosʌch laꞌ walobilob yicꞌot i chaꞌan laꞌ wijob yicꞌot i yijob laꞌ wijob cꞌʌlʌ ti beleꞌ ora.
Subula i ñuclel lac Yum.