46
Dios jiñʌch la cajcotyaya
1 Dios lac pꞌʌtyʌlelʌch baꞌ mi lac majlel ti putsꞌel.
Wʌꞌʌch an la quicꞌot chaꞌan i cotyañonla cheꞌ an wocol bʌ.
2 Jin chaꞌan aunque jini mulawil mi nijcʌyel maꞌan lac bʌqꞌuen.
Aunque mi nijcʌyel ochel wits ti xinil colem mar,
3 Aunque wen cꞌam miꞌ chaꞌlen tꞌan jini witsꞌlaw bʌ jaꞌ,
Aunque mi nijcʌyel wits chaꞌan ti jini jaꞌ,
Machꞌan mi quejel lac chaꞌlen bʌqꞌuen.
4 Jini río loqꞌuem bʌ baꞌan Dios
Mi yʌqꞌuen cꞌajacña bʌ i yoj jini añoꞌ bʌ ti lum i chaꞌan bʌ Dios,
Jini Chꞌujul bʌ Ajnibʌl i chaꞌañʌch jini Ñoj Ñuc bʌ.
5 Dios yaꞌan ti xinil jini lum. Jin chaꞌan machꞌan mi quejel i nijcʌyel.
Dios mi quej i waꞌ cotyan jini añoꞌ bʌ ti i lum cheꞌ mi sʌcꞌan.
6 Ti ñoj michꞌʌyob yumʌlob ti mulawil.
Ti chilbentiyob i yumintyel.
Tyoj bʌcꞌñʌjel jini añoꞌ bʌ ti mulawil
Cheꞌ ñac tiꞌ chaꞌle tꞌan Dios.
7 Lac Yum an la quicꞌot. I Yumʌch panchan yicꞌot mulawil.
I Dios Jacob jiñʌch la cajcotyaya i wenta chan bʌ tsꞌajc chaꞌan laj cʌñʌtyʌntyel.
8 Laꞌla. Qꞌuelbenla i melbal lac Yum.
Qꞌuelela bajcheꞌ tiꞌ chaꞌle jisaya wʌꞌ ti mulawil.
9 Miꞌ lajmisan guerra tyac cꞌʌlʌ ti pejtyel mulawil.
Miꞌ bicꞌti xul jini wʌn tyeꞌ, miꞌ xul jini lanza tyac:
Miꞌ pulbeñob i carreta tyac muꞌ bʌ i cꞌʌñob ti guerra tyac.
10 Yom ñʌchꞌʌletla chaꞌan mi laꞌ ñaꞌtyan joñon Dioson.
Mi quej i qꞌueloñob ti ñuc añoꞌ bʌ ti pañimil tyac.
Mi quej c ñuc isʌntyel ti mulawil, cheꞌen.
11 I Yum panchan yicꞌot mulawil an la quicꞌot.
I Dios Jacob jiñʌch la cajcotyaya i wenta chan bʌ tsꞌajc chaꞌan laj cʌñʌtyʌntyel.