Kiŋwakti ki Nyɔ Miŋkaiŋ Mifiaŋ 1 Tɛsalɔnika 1

Kiŋwakti ki Bɔɔl ki ninshiŋ kə wi nì nyaka i kijuŋni ki

Tɛsalɔnika

Gia yə yi kɔ i Kiŋwakti ki Tɛsalɔnika ki ninshiŋ kələ mə

Tɛsalɔnika nì kɔ kwili widɔkɔ i kimbu ki tumi ki Masedɔnia wə a num di biə Bɔɔl nì yisi kijuŋni ki bəni bə bumni. Yi nì ka dzɔ dəkə jɔbi wi dəəŋ si kijuŋni kələ nì yisi, Bəju ka yisi i baiŋŋki Bɔɔl kindɔŋ fini bɔ kɔm wi. Bɔɔl ka nyaka kiŋwakti ki ninshiŋ kələ i bəni bə Klistus bə̀ bɔ kɔ i Tɛsalɔnika i shîliki shɔ́m yibɔ, fə̂ a bɔ nûm dzɔŋ bəh ŋga.

Kifwu ki gia kə ki kɔ i Kiŋwakti kələ mə

1:1 Kin'yisi

1:2–3:13 Bɔɔl wɔkɔ ndzɔŋni chu kɔksi bəni bə bumni

4:1-12 Ntəfi kɔm nɔni ki bəni bə̀ bɔ kɔ bə Klistus

4:13–5:11 Ntəfi kɔm si Klistus bi fiəni dzəki

5:12-22 Ntəfi wi gɔksini

5:23-28 Kiŋgɔksi

1 Akɔ mih Bɔɔl, mih kɔ buku Silas bəh Timɔti. Mih nyakaki kiŋwakti kələ i kijuŋni ki bəni bə bumni bə kwili wi Tɛsalɔnika bə̀ bɔ chiŋni num bəh Nyɔ Ba bəh Bah Jisɔs Klistus.

Bɔ chûsi shɔm yindzɔŋni i mbɛiŋ chu nyâ mbɛiŋ bəh kimbɔiŋni.

Bɔɔl nya kiyɔŋni i Nyɔ kɔm kijuŋni
ki bəni bə bumni bə Tɛsalɔnika

2 Buku si nya lə kiyɔŋni i Nyɔ jɔbi wichi kɔm mbɛiŋ bəchi, jiə mbɛiŋ jɔbi wichi i ntsa wibuku wə. 3 Jɔbi wə buku kɔ i Nyɔ Bah wibukumbɛiŋ nshiŋ, buku si kwaka lə nɔni kimbɛiŋ kə ki bukuki dzəki i shɔm yə mbɛiŋ jiə i Klistus wə, bəh nɔm wimbɛiŋ wə wi bukuki dzəki i kiŋkɔŋ wə, bəh shɔm yə mbɛiŋ kaŋa, yi buku dzə i ntsɛiŋ wə mbɛiŋ tsɛiŋki tsəki a ninshiŋ i Bah wibukumbɛiŋ wə Jisɔs Klistus.

4 Bwa bə nih bəbuku bə̀ Nyɔ kɔŋki, buku kiəki lə a Nyɔ sabibwili mbɛiŋ. 5 Buku kiəki lə yakadəiŋ kɔm ntum wi ndzɔŋni wə buku nì dzə bəh wi i mbɛiŋ wi nì ka dzə a ndzaka wə shəŋ. Wi nì dzə num bəh ŋga biə bi nyəki dzəki i Kiŋ'waka ki Baiŋni wə tə, buku tɔksi kiə a ntum wiwɔ kɔ ŋkɔŋ. Mbɛiŋ kiəki lə ŋkaiŋni bəni bə buku nì kɔ jɔbi wə buku nì nɔki i mbɛiŋ kintəəŋ kɔm mbɛiŋ. 6 Mbɛiŋ nì dzɔ gvu yibuku bəh yi Bah kɔm mbɛiŋ nì dzɔ ntum wiwɔ bəh kilaŋ gwu kə ki nì bukuki dzəki i Kiŋ'waka ki Baiŋni na si mbɛiŋ nì kɔ i ŋgəkə wimbum wə. 7 Ayakadəiŋ, mbɛiŋ ka fiəni chu bəni bə̀ bəni bə bumni bəchi i kimbu ki Masedɔnia wə bəh ki i Akɛya wə nì dzɔki kinchəsi i bɔ. 8 Mih dzakaki kə lə kɔm a kɔkə a gia yi Bah shəŋ yə yi buku i kimbu kimbɛiŋ wə, ka waŋ fiəli kimbu ki Masedɔnia bəh ki Akɛya wə. Ntum wiwɔ kɔm shɔm yimbɛiŋ yə mbɛiŋ jiə i Nyɔ wə waŋ tsə tə i di bichi wə. Ayakadəiŋ, gia yidɔkɔ chu mɔŋ yə buku kɔ i chu dzaka kɔm yi. 9 Mbɛiŋ kîə a bəni bəwɔ mwi fukuki lə kɔm si mbɛiŋ nì dzɔ buku i mbɛiŋ kintəəŋ, bəh si mbɛiŋ nì bee mimɔsɔ fiəni i Nyɔ i nɔmki i Nyɔ wi ŋkɔŋ wə wi kaŋaki nɔni. 10 Bɔ fukuki lə tə si mbɛiŋ wɔkɔliki Waiŋ wi wə wi bi dza dzə i bɛiŋ. Waiŋ wi wələ kɔ wə wi nì dzasi i kpi wə, num Jisɔs wə wi bwiliki bukumbɛiŋ i shɔm yi Nyɔ yi bɔksini yə, wi bi chusiki i bəni.