Kiŋwakti kə bə nì nyaka i
Bəhibulu
Gia yə yi kɔ i Kiŋwakti ki Hibulu kələ mə
Bukumbɛiŋ tɔksiki kiəki kə mi wə wi nì nyaka kiŋwakti kələ, ayakalə bukumbɛiŋ kiə a bə nì nyaka i bəni bə Klistus bə̀ bɔ kɔ Bəhibulu. Hibulu kɔ yɛli wi Ju widɔkɔ. Bə nì nyaka i fə̂ a Bəju bə̀ bɔ nì kɔ bɔ jiə lɔ shɔm i Klistus wə bâaŋ a nûmki a yi wə, na si bəŋgəkə nì dzəki i bɔ i dzəh yiduli wə. A nì kɔ tə i fə̂ a bɔ kiə̂ a miŋkaiŋ mimfiaŋ mə Jisɔs dzə bəh mɔ kaŋaki lə ŋga tsə mikpu. Bə nì nyaka tə i tə̂fi a bɔ kîəki a gia yə Nyɔ kɔ wi kaka bəni yɛiŋ bi tsə kə i kuku. Bə kɔ bə chusi lɔ a gia yə Klistus Waiŋ Nyɔ dzə bəh yi tsəki lə yi bəni bə ntum bə Nyɔ bə kikpu, kɔm yibɔ nì kɔ a binjəŋnjəŋ, yi Klistus num gia yə yi kɔ yi ŋkɔŋ.
Kifwu ki gia kə ki kɔ i kiŋwakti kələ mə
1:1-3 Klistus tɔksi kɔ kimbwɔsi ki Nyɔ mwi
1:4–2:18 Klistus tsəki lə bəchinda bə Nyɔ
3:1–4:13 Klistus tsəki lə Muses bəh Jɔshua
4:14–7:28 Klistus kɔ tii mfə gia wə wi tsəki bətii mfə gia bəchi
8:1–9:28 Miŋkaiŋ mə Klistus dzə bəh mɔ tsəki lə mikpu
10:1-39 Mfə gia wə Klistus nì fə tsəki lə bimfə gia bichi
11:1–12:29 Kɔm njiə wi shɔm i Nyɔ
13:1-25 Kintəfi kigɔksini
1
Nyɔ kɔ wi dzaka lɔ i bukumbɛiŋ i Waiŋ wi wə
1 A nì kɔ i kikpu wə, Nyɔ nì dzakaki i bətii tii bəbukumbɛiŋ tsə dzəh i bəni bu bə ntum wə i jɔbi widuli wə bəh i dzə́h wə chi chi.
2 Ayakalə, i chɔkɔ bi gɔksini biələ wə, wi dzakaki lə i bukumbɛiŋ i waiŋ wi wə. Akɔ waiŋ wi wələ wi kɔ wi saiŋbwili wi, jiə a wi ni numki ndzi kwili i biɛiŋ bichi wə. Ayaka a num wi wə Nyɔ nì maa mbi wələ bəh biɛiŋ bichi tsə i wi kaŋ.
3 Baiŋni bi Nyɔ mwayi i waiŋ wi wə, wi num kimbwɔsi ki Nyɔ mwi. A fəki wi ka bɔɔli bəh nshwaiŋ numki. Ayaka wi fəki a bəh ja yi yə yi kaŋaki ŋga. Wi nì maiŋ chu bibukumbɛiŋ. Jɔbi wə wi nì maiŋ ka yaka i bɛiŋ shinum i tsɛiŋ yiləkəli yi Nyɔ wi Kiŋkɔkni wə.
Waiŋ Nyɔ kɔkniki tsəki lə bəchinda bə Nyɔ
4 Yaka yi kɔ a, Nyɔ nì fə waiŋ wi kɔkni nalə tsə bəchinda bə Nyɔ, a liŋ asi yɛli wə Nyɔ du wi yɛiŋ kɔkniki nalə tsə kibɔ.
5 Bukumbɛiŋ kiəki lə a wi kɔkniki tsəki lə kɔm chinda wi Nyɔ widɔkɔ kɔkə wə Nyɔ nì num dzaka i wi a,
“Wɔ kɔ Waiŋ wuŋ,
Ndaiŋ mih dzaka lɔ a mih kɔ Ba wa.”
Ayaka widɔkɔ kɔbi wə wi nì num dzaka kɔm wi a,
“Mih ni numki Ba wa,
wɔ num Waiŋ wuŋ.”
6 A nì kɔ jɔbi wə Nyɔ nì kɔ i faaŋ Waiŋ wi wi ninshiŋ i mbi wələ wə, wi dzaka a,
“Bəchinda bə Nyɔ bəchi kɔ̂ksiki wi.”
7 Ayaka gia yə Nyɔ nì dzaka kɔm bəchinda bu kɔ yələ a,
“Nyɔ si fə bɔ ka numki ka fiəkə,
fə tə a bə̀ bɔ kɔ bəni bu bə nɔm
numki aka lɔm wi gbuku.”
8 I fiəni dzə i Waiŋ wi, wi ka dzaka a,
“Ɔ Nyɔ, wɔ ni numki lə i kiŋkii ka wə saka jɔbi wichi kiŋgɔksi kɔbi.
Nɔni ki chəŋ bi numki mbəŋ wi ŋkuŋ wi ntɔŋ bia.
9 Wɔ kɔŋki num gia yi chəŋ, baiŋŋ yichu.
Ayakadəiŋ, mih Nyɔ wə mih kɔ Nyɔ wa
mih ka yaksi wɔ tsə bəni ba bə mbaŋ,
si mih fiaŋsi wɔ bəh kwɔkɔ ki kinsaŋli.”
10 Ayaka wi chu dzaka tə i Waiŋ wi a,
“Bah, akɔ wɔ wə wɔ nì maa mbi i kin'yisi wə,
biɛiŋ bichi biə bi kɔ i bɛiŋ bi kɔ nɔm wa wi kaŋ.
11 Biɛiŋ biələ bi kaaki lə, wɔ bi baaŋ.
Bi bi jwiŋki aka mbuŋ.
12 Wɔ bi kii bi aka dala.
Wɔ bi kwuni bi aka mbuŋ jɔbi wə wi jwiŋ.
Ayakalə, wɔ bi baaŋki asi wɔ kɔ.
Jía ya bi kaa kə.”
13 Akɔ i winaiŋ chinda wi Nyɔ wə Nyɔ num dzaka i wi a,
“Shînum i tsɛiŋ yiŋ yiləkəli wə,
i tsə̂ bûku jɔbi wə mih bi nɔsiki
bəni ba bə̀ bɔ baiŋŋki wɔ i wɔ nshiŋ
ka kiŋgbɔkɔ ka ki gvu,
wɔ tɔmyi gvu ya i bɔ bɛiŋ?”
14 Ntə bəchinda bə Nyɔ bələ kɔ a biŋ'waka biə bi nɔmki i Nyɔ, wi faaŋ bɔ, bɔ nyani gamti bəni bə̀ bɔ bi kwatiki mbɔiŋ a?