8
Jisɔs kɔ fwu wi bətii mfə gia wi miŋkaiŋ mimfiaŋ
1 Fwu wi gia wə bukumbɛiŋ dzakaki kɔm wi kɔ a, bukumbɛiŋ kaŋaki lə ŋkaiŋni wi fwu wi bətii mfə gia widɔkɔ a num mi wə wi shinum i tsɛiŋ yiləkəli yi kiŋkii ki Nyɔ wi Kiŋkɔkni i bɛiŋ.
2 Wi kɔ mi wi nɔm i di biə Nyɔ kɔ, wi nɔm i nɔni ki Nyɔ kə ki kɔ na kintaŋ ki ŋkɔŋ ki Nyɔ, maka a kɛiŋsi bəni. A kɛiŋsi Bah Nyɔ kintaŋ kiwɔ.
3 Na winaiŋ fwu wi bətii mfə gia kɔ num Nyɔ si ba jiə, a wi nyâki binya chu fə̂ tə bimfə gia i Nyɔ. Ayakadəiŋ, yi ndzɔŋ tə a tii mfə gia wələ kâŋaki lə tə fiɛŋ fiə wi kɔ i nya i Nyɔ.
4 Asi kɔ a wi numki fa kuku, ma wi kɔkə na tii mfə gia, kɔm bətii mfə gia si num lɔ fɛiŋ bə̀ bɔ nyaki binya biəli si nchi wi Muses nəŋki.
5 Nɔm wə bə nɔmki fa kuku kɔ a kimbwɔsi bəh kinjəŋnjəŋ ki nɔm wə wi kɔ i nɔni ki Nyɔ wə i bɛiŋ. Akɔ gia yə yi nì kɔ jɔbi wə Muses nì nəŋki i maa kintaŋ ki Nyɔ i fa kuku, wi Nyɔ nì təfi wi dzaka a tɔkni,
“Yɛ̂iŋ a wɔ fə̂ biɛiŋ bichi bi num a liŋ,
ka biə mih nì chusi i wɔ i ŋkwuŋ bɛiŋ.”
6 Ayakalə, Jisɔs kɔ num bə nya nɔm i wi, wi kɔkni tsə wi bətii mfə gia bə ninshiŋ a liŋ si miŋkaiŋ mə wi num i fintəŋ fintəŋ i Nyɔ nshiŋ bəh mi wiwɔm, mɔ kɔkniki lə tə tsə mikpu. Mɔ tsəki kɔm mɔ biəliki biŋkaka biə bi tsəki bi ninshiŋ.
7 A kabə num a miŋkaiŋ mi ninshiŋ mələ nì kaŋaki kə ŋgəkə widɔkɔ, ma ŋgəkə chu mɔŋ i nəŋki bidɔkɔ.
8 Nyɔ nì kɔ wi yɛiŋ a ŋgəkə kɔlə bəh bəni, wi ka dzaka a,
“Mih Bah dzakaki a chɔkɔ dzəki lə
biə mih bi dzi Miŋkaiŋ Mimfiaŋ,
bəh juŋ yi Islae bəh yi Juda.
9 Ayaka miŋkaiŋ mələ kɔkə ka mə mih nì dzi
buku bətii tii bəbɔ,
chɔkɔ biə mih nì kaŋa bɔ i tsɛiŋ wə,
dzɔ buku bəh bɔ i tumi ki Ijib wə.
Bɔ nì ka num baaŋ dəkə a miŋkaiŋ mələ bɛiŋ.
Ayakadəiŋ, mih ka nyɔkɔ jum yiŋ i bɔ. Yələ dzakaki mih Bah.
10 Bah Nyɔ dzakaki a, akɔ miŋkaiŋ mələ,
mih bi dzi buku bɔ i kaŋ yiwɔ jum,
mih bi jiə bənchi bəŋ i shɔ́m yibɔ mə,
mih chu nyaka yi i biŋkwaka bibɔ wə.
Mih bi numki Nyɔ wibɔ, bɔ num bəni mbəŋ.
11 Mi bi chu lani kə mi wi wi kwili widɔkɔ lanini
nabə waiŋnih wi, dzaka a wi kîə Bah Nyɔ,
kɔm mi wichi bi kiə lə mih
i yisi i mi wi nchiŋ i tsə buku i wimbum.
12 Mih ni kwasi lə nshɛiŋ i bɔ,
mih dalinya gia yibɔ yichu.
Mih bi chu kwaka kə chu bibɔ.”
13 Si Nyɔ nì dzaka a miŋkaiŋ mimfiaŋ bi numki lə, yaka wi nì kɔ wi yɛiŋ lɔ a miŋkaiŋ mi ninshiŋ mə kɔ fiɛŋ fikpu. Ayaka fiɛŋ ka numki fikpu nabə a fi jwiŋ, yaka fi baaŋ a twɛsi i laka i bəni nshiŋ.