7
1 Job sogdebalid:
“Ar dule we-napneggi bela arbamalargebed.
E-ibagan, dule-undar-arbadiid-e-ibaganyob gued.
2 Igi maigagudiid gwae-neg-mutikgusana gadinye binsadidae,
igi dule-arbadiid e-bennukleged-iba edarbedidae,
3 deyobi, an nii-irbali wile-itodii gusad,
mutikidbali nunmakedba an galitodii gusad.
4 An mutikidba megisale, an binsamaidaed,
sana anga neg oibogodibeye.
Mutikid anga bergusurdaed.
Deyobi, an bindumakmai gabsuli oiboardaed.
5 Bela an-san nus biinid.
An-uka sommere-sommere itoleged.
An-uka-daas-dasadba sibudik-sibudik nis ariomamaid.
6 An-bergued-ibagan binna-binna nadapsulid,
e-ibagan omosad.
Gwen an bar-gannarsegued itosulid,
bato an bela itoged.
7 ”Bab-Dummad, be ebinsao,
an-gudiidi, unnila bunnolegedyob an gudiid.
Neg-nued bar an dakosulid.
8 An bergudele, dulemar gwen bar an-dakosulid.
Be an-amidii gumaloenad,
be an-amiosurmalad.
Ar andi bar gudii guosulid.
9 Igi mogirmar aisakiddae, gwen bar dakleddasuli,
debayobi, dule neg-uangi-digledele, geg bar gannar noed.
10 E-negse geg gannar bar aibired,
bar egi binsalegosulid, deyob yoggudoed.
11 ”Degisoggu, an sunmakedi gege bar an boggued.
Nue-bukib-binsaed sunmakega an-imaked.
Neg-nued-dakdisulid-abalagi an ibmar sogoed.
12 ¿Demargi ibdula-dummad-gudiiyob be an-daksi?
Emide, be angi nakulebukwad.
13 Imbagwenar an binsaardaed:
‘An gabidele, we an-bendakoye.
Gabedi, anga naibid osulogoye.’
14 Amba an gabmaidibe, be an-ogwayeardaed,
gabgi gwayed-dummadi be anga ukdaed.
15 Bur an-gammu-gasmarsunnana gadin,
adi, an-gudiidi bar an itogosulid.
16 An-gudiidi, nabir an gwen itosulid,
bar an dula-gudii gubisulid, burgwisa an binsaed.
Ies be an-imake,
an wegi-gudiidi gwen-nabirsulid.
17 ”¿Wede dule ibusunna, bede dummarbaa imaked?
¿Ar ibiga duleba be bukib binsae?
18 ¿Ar ibiga be bane-bane egi be atakdii?
¿Ar ibiga be bane-bane wilubdakdibali?
19 Bab-Dummad, ¿sana be angi-nakulediid iegoe?
Wis gwen be an-indaksulid,
gwen wii-doega be an-imaksulid.
20 Ar an begi nosye-sogele, ¿igi an-isguedde be-imakosunna?
Ar be dulegi nakuleged gudiid.
¿Ibiga be sabsur an-imake?
¿Isdarsunna be an-dake?
21 Bab-Dummad, ¿ibiga geg be an-isgued elisunna?
¿Ibiga geg be an-isgued ies imaksunna?
Bato an-burgwed omosad.
Bato an napaga binyesokalid.
Be an-amidagoenad, bato satebin be an-dakdagoed.”