20
3e. Jesús-durgusad
(20:1-31)
Jesús gannar durgusad
(Mateo 28:1-10; Marcos 16:1-8; Lucas 24:1-12)
1 Gebe-itoged-iba-onodedgi, wakudaryalaba, amba negsichi-sichigwa María-Magdalena neg-uanse nadegusad. Neg-uanse modapgu, dakdapid akwa-dummad onirar sii.
2 Degisoggu, María-Magdalena, Simón-Pedroʼse, degi, Jesús-sapin-baidse abarmakalid. A-sapinde, Jesús na-nue-sabesailadid. Amarga sogdapid:
—Anmar-Dummad-neg-uangi-digar-maid anmar-ibe sesmalad. Anmar wissulid bia mesismardibe.
3 Geb degi, Pedro, Jesús-sapin-baidbo, neg-uanse armalad.
4 Ebobela dare neg-uanse abarmakarmalad, degi-inigwele, Jesús-sapin-baid-Juanʼye-nugad bur Pedroʼba binnasur abarmaksasoggu, a-inse neg-uanse modapid.
5 Juan neg-uanyaba nue-dakega, dulluu imaksad. Agi atued-sibu bukwa daksad. Ar neg-uanyabardi dogsasulid.
6 A-sorbali, Simón-Pedro nonimogad. Simón-Pedroʼdi neg-uanyaba-dogsagu, atued-sibu bukwa daksad.
7 Degine, mor-Jesús-nonogi-obirmaklesad bukwa daksabalid. We-mor-Jesús-nonogi-obirmaklesad atued-sibu-walik buksulid. Nue-obipirmakar bachikii bukwad.
8 Geb degi, Juan, we-inse neg-uanse nonigusadi, neg-uan-yaba dogsamosunnad. A-sapin, deyob ibmar-gusad-daksagu, Jesús-durgusadgi bengussulid.
9 Ar ade, amba akusunna Bab-Dummad-Garda-narmakaled itomalad. Agi sognaid, Jesús burgwisar, gannar durguergebye.
10 Geb, wemar-Jesús-sapingan-warbogwad gannar e-negse nadmarsunnad.
Jesús, María-Magdalenaʼse magarosad
(Marcos 16:9-11)
11 Ar María-Magdalenaʼdi neg-uan-dikarba, neg-magaba bogwichid. Bogwichidgine, neg-uanyaba nue-atakegala, dulluu imaksad.
12 Geb agine, María baliwiturmar-warbo mor-sibu-yoyoi-sii dakalid. Baliwitur-wargwen Jesús-e-nono-megisadgi siid. Baiddi, e-mali-duku-megisadgi siid.
13 Baliwiturmar Maríaʼga sogded:
—Omegwa, ¿ibiga be boe?
María, abin-sogded:
—An-ibe an-Dummad sesmalad. An wissulid, bia an-ibe mesismala.
14 María degisogsagu, aibiridgu, dakalid, Jesús e-walik-gwichi. Degi-inigwele, María wissulid, dule-e-walik-gwichidi, we, Jesúsʼdeeye.
15 Jesús ega sogded:
—Omegwa, ¿ibiga be boe? ¿Doa be amie?
Ar María, we-dule dule-nainu-akwedye-bisoggu, ega sogded:
—Dule, ar mui be sesale, anga be soge, bia be mesisa, adi, an ase aminaoed.
16 Jesús ega sogded:
—¡María!
María Jesúsʼsik-aibiris-imasgu, binnasur sogded:
—¡Raboni! (Arameo-gayaba sogleged, Odurdaked-Saila).
17 Jesús Maríaʼga sogded:
—Mer be an-gae, ar amba yoo an-Babse an nakwed. Degi-inigwele, be an-gwenadganse nae, amarga be sogna: ‘An-Babse an nae sokarye. A-Baba, bemar-Babmogad, ase an nasokarye. An-Bab-Dummadse an nae sokarye. A-Baba, bemar-Bab-Dummadmogad, ase an nasokarye.’
18 Geb María-Magdalena, Jesús-sapinganse gayaburba sognadsunnad: “An Dummad-Jesús-daksaye.”
Degine, María bela-Jesús-ega-ibmarsogsadi, amarga sogdapid.
Jesús e-sapinganse magarosad
(Mateo 28:16-20; Marcos 16:14-18; Lucas 24:36-49)
19 Gebe-itoged-iba-nagudedgi, mutikusgu, Jesús-sapingana Judíoʼmar-dobed-ular, bela yawagak atibukwa, neg-gwagwengi na danar ambikusmalad. Agi-bukwa Jesús nonikid. Geb amar-abargi-gwisgunoniki, ega sogded:
—¡Na, degite! Ulubgi-bogidik be itomarsun.
20 Jesús deyob e-sapinganga sogsagu, e-argan, degi, e-dikar amarga oyoded. Geb e-sapingan e-Dummad-dakarmargu, bela weligwar-ito nadmalad.
21 Degi, gannar Jesús e-sapinganga sogdebalid:
—Ulubgi-bogidik be itomarsun. Ar igi Bab an-barmiali, deyobi an bemar-barmidmogad.
22 Ar Jesús amarga degisogsagu, e-burba amargi buu imaksad, geb amarga sogded:
—Bemar Bab-Burba-Isligwaled nikumarsun.
23 Ar bemar doamarga isgued-osuloye-sogele, amar isguedsuli gunonikoed. Ar bemar doamarga isgued-osulosulile, amarga isgued osulolegosulid.
Jesús Tomásʼse magarosad
24 Tomásʼdi, e-sapin-ambe-gakabogwad-wargwenadid, Dídimoʼye nugbalid. A-dule, Jesús-nonigusgu, deun Jesús-sapinganba sisurgusad.
25 Degisoggu, Jesús-sapingan-baigan ega sogsamalad:
—Anmar, Dummad-daksamalad.
Tomás, abin-sogded:
—An Jesús-argangi esgoro-yolesad-e-wilubgan an daksulile, degi, an-goo an agi odosulile, gege an itoged. Deginbali, an-argan e-dikargi an odosurbalile, gege an itobalid.
26 Itoged-irgwenad-nasad-sorba, gannar Jesús-e-sapingan negyaba bukwamalad, agi Tomás emarba sii gusmogad. Deun, bela yawagakmar atibukwa-inigwele, Jesús dognonikid. Geb amar-abargi-gwisgunoniki, ega sogded:
—¡Na, degite! Ulubgi-bogidik be itomarsun.
27 Geb degi, Jesús Tomásʼga sogded:
—Wegi be-goo be odoge, an-argan be dake. Be-argan be seda, an-dikargi be ododage. Mer be an-bengue. An-gannar-durgusad mer be bengue.
28 Geb degi, Tomás, abin-imakde, sogded:
—¡An-Dummad, an-Bab-Dummad!
29 Geb Jesús, Tomásʼga sogded:
—Be an-daksad-ular, be angi bengussulid. Dule-an-daksasurmaladgi, degi, angi-bengussurmaladgi, bur nued binsalessun.
Juan ibiga we-garda narmaksa
30 Jesús ibmar-wilubgan-dakledisurmalad-bukidar e-sapingan-abargi imaksad. Degi-inigwele, we-gardagi bela narmakar naisulid.
31 Ar wemar-narmaklesaddi, bemar mer bengumalagalad:
We-Jesús, Bab-Dummad-dule-wargwen-barmidagoye-sogsad-dule-sunnadye.
We-Jesús, Bab-Dummad-Machi-sunnadye.
Adi deyobi, bemar Jesúsʼgi-bensulid-nikadba burba-geg-bergued nikumalaga.