6
Jesús dule-miliatar (5,000) masgi-oguchad
(Mateo 14:13-21; Marcos 6:30-44; Lucas 9:10-17)
1 We-degigusad-sorbali, Jesús Galilea-mata-dummad-obakar nade gusad. We-mata-dummad Tiberias-Mataye nugbalid.
2 Dule-bukidar Jesúsʼba nadegusmalad, ar ade, boni-nikamaladgi ibmar-wilubgan-dakledisulid-imakdiid daksamalad.
3 Degidgine, Jesús yar-birse-nakwisgu, agi e-sapinganmala sigdapmalad.
4 Deun Judíoʼmar-iba, Oburgwilegoenad-Iba bato omosad.
5 Jesús atakdegu, dakded, dulemar-bukidar ese nonimala. Agi Felipeʼga sogded:
—Wemar madu-gunmalaga, ¿wede bia anmar madu bakoe?
6 Unnila Jesús binsa Felipe-wilubdakega weyob Felipeʼga sogsagusad, ar edi bato wisid igi imakoe.
7 Felipe, Jesús-abin sogded:
—Belagwapa wis madu bipi-bipi-gunmalaga dule-nii-walabaabak-arbasad-manigi (8), madu-bakele, amba madu unnisuliled.
8 Geb degi, e-sapin-baid-Andrés, Simón-Pedro-e-urba, Jesúsʼga sogded:
9 —Wegi machigwa-wargwen cebada-madu-gwaatar wis sediid, degine, ua-burwigana wis ukabo sedibalid. ¿Ar wede unniosi? Ar dule bukidarad.
10 Geb degi, Jesús sogded:
—Nabir. Dulemar be urbemar.
Agine, gagan-bukidar naid. Agine, dulemar ambikusmargu, geb machergan miliatar-wilub-mergu (5,000) daklealid.
11 Jesús madu-susgua, Bab-Dummadga dog-nuedye-sogsagu, e-sapinganga madu uke-uke imaksad. Geb e-sapingan dulemar-gagan-birgi-bukmaladga ukdemogad. Jesús amba deyob ua-imaksabalid, ar bule-mergu abemala, abali ega uksamalad.
12 Bela dulemar immelesmargu, Jesús, e-sapinganga sogded:
—Mer binsa mas milegega, bela gwabgusad be wemar.
13 Cebada-madu-gwaataled bela guchamalad-sorba, gwabgusadi garba-gwaambe-gakabo-mergu (12) wesmalad.
14 Dulemar, Jesús-madu-gwaataled-omelosad-daksamaladi, sogdemalad: “We, Bab-Dummad-gayaburba-barsoged we-napnegse-nonikoed-sunnadye.”
15 Ar Jesús, dulemar ise-ebipiar reyga-guega e-imakdanimalo-daksagu, e-iduar yarse walagwengi banguded.
Jesús demar-birgi nanasad
(Mateo 14:22-33; Marcos 6:45-52)
16 Dad-argwategu, Jesús-sapingan, Jesús-ega-sogsadba demar-gakase aidenonimalad.
17 Urgi nakwismargu, Capernaúmʼse-namalaga mata-dummad obakdemalad. Deun, bato neg nue-mutikgusad, Jesúsʼdi amba yoggumaid.
18 Ar burwa binnasur-gormaisoggu, demar dunguded.
19 Jesús-sapingan wachi-irbogus, igi, wachi-irbaagus-gammimaladgindibe, dakarmalad, Jesús demar-birgi daniki, e-urse warmakdaniki. Deyob dakarmargu, dobguarmalad.
20 Jesús e-sapinganga sogded: “Ani an daniki, mer be dobgumar.”
21 Geb degi, e-sapingan weligwar urgi Jesús-abindaksamalad, degine, bia na nadapmaladse warmaksamarsunnad.
Dulemar Jesús-amidimalad
22 A-banedgine, dule-bukidar Jesúsʼba-mata-obakar-gudimaladi, wisguarmalad ur-wargwen-naigusadgi unnila Jesús-sapinganbi nadmarye. Jesúsʼdi e-sapinganba urgi nadsurye.
23 Ur-baigan-Tiberias-neggweburgi-danimaladdi, bia dulemar Bab-Jesús Babga-dog-nuedye-sogsad-sorba madu-omelosad-guchamalad-walik nagunonikid.
24 Ar dulemar, Jesús-daklesur-dakargu, degi, e-sapingan-sate-dakarmargu, Jesús-amiegala, urgi Capernaúm-neggweburse nadegusmalad.
Jesús sogsagusad ede madu-burba-duladye
25 Dulemar mata-dummad-obakar Jesús-amismargu, ega sogdemalad:
—Odurdaked-saila, ¿sana wese be noniki?
26 Jesús, abin-imakdegu, emarga sogded:
—Napira an bemarga soged, be an-amimaladi, an-ibmar-dakledisulid-imaksadba be an-amisurmalad. Ar bemar madu-nue-immedik-guchadba be an-amimalad.
27 Mas-baisursunna-bergumaladga mer be arbamar. Mas-anmarga-burba-geg-bergued-ukedga be arbamar. Ar a-masdi, sunna bemarga, Dule-Machi ukoed. Ar a-dulegine, Bab-Dummad bato e-wilub nasiksad, burba-geg-bergued nikumalagar.
28 Degi, Jesús-abin sogdemarsun:
—Degite, ¿ibu an imakmalosunna Bab-Dummadga ibmar-imakegar?
29 Jesús, abin-imakded:
—Bab-Dummadga-ibmar-imaked wedo: Bab-Dummad-bemarga-dule-barmialidgi-bengusuli gued.
30 Jesús-abin sogdemalad:
—Degite, ¿ibi-ibmar-wilubgan-dakledisulid be anmarga imakosunna? Adi, anmar dakega, degi, mer begi anmar benguegar, ¿Ibi-ibmar be imaksunna?
31 Ar anmar-dadgandi nega-dulesulidgangi maná-guchamalad. Bab-Dummad-gardagi sognaid:
‘Madu-nibneggined-gunmalaga an imaksad.’
Éxodo 16:4; Salmo 78:24
32 Jesús amarga sogded:
—Napira an bemarga soged, Moisés bemarga madu-nibneggi-danikid uksasulid. Ar an-Bab madu-nibneggi-danikid-sunnad bemarga uked.
33 Ar Bab-Dummad-madu nibneggi-aidenonikidi, we-napnegginmaladga burba-duladi uked.
34 Jesúsʼga sogdemalad:
—Dummad, madu-degiid be anmarga ukdigu imake.
35 Jesús, abin-sogded:
—Ani an madu-burba-duladid. Ar dule anse danikile, bar gwen ukumesosulid. Ar dule an-bengusulile, bar gwen uku-uku itogosulid.
36 ”An bemarga epenne bato sogsad, ibmar-dakledisulid imaksa be an-daksamar-inigwele, degite, amba be an-benmalad.
37 Ar Bab bela dulemar-anga-ukedi, anba-naguega anse dagoed. Ar dule anse danikile, gwen an obanosulid.
38 ”An-itolegedba ibmar-saega nibneggi an danisulid. Dule-an-barmialid-sogedba an ibmar-imakega nonikid.
39 Bab-an-barmialidi we abemaid: Bela dulemar-anse-nonikidi gwen wargwensaar oyoggubisur an-abeged. Adi, ibagan-napi-naguoedgi a-dulemar an gannar odulogegar.
40 ”Dule-an-barmialid we abemaid: Bela dulemar-E-Machi-dakoedi, degi, egi bensuli-gunonikile, burba-geg-bergued nikued. Degine, ani, ibagan-napi-naguoedgi a-dulemar an odulogoed.”
41 Degi, Judíoʼmar, Jesúsʼgi sunmakedbi guarmalad, ar ade, Jesús sogsad, ani an madu-nibneggi aidenonikidye.
42 Judíoʼmar Jesúsʼgi sogdemalad:
—¿Ar wede Jesús, José-machisursi? Degine, e-bab, e-nan, ¿anmar mag daksursi? Ar degite, ¿ibiga sogsunna? ‘Nibneggi an aidenoniye.’
43 Jesús amar-abin-imakde, sogded:
—Mer be muchub-muchub angi isdar sunmakmar.
44 Ar Bab-an-barmialid, anse-dule-dagega imaksulile, gege dule-wargwensaale anse daged. Ibagan-napi-naguoedgi, dule-anse-nonimaladdi, ani an a-dule-odulogoed.
45 Bab-Dummad-gayaburba-barsogmalad-gardagi narmakar maid:
‘Bab-Dummad na e-igargi bela dulemar-odurdakoed.’
Isaías 54:13
”Degisoggu, bela Bab-itosmalad, degi, egi durdaksamarbalid, anba-naguegala anse danimaloed.
46 ”Dule-wargwensaar Bab-daksaye an sogsulid. Unnila dule-Bab-Dummadgi-danikidbi Bab-daksad.
47 Napira an bemarga soged: Ar dule angi bensulidi, a-dule, burba-geg-bergued nikad.
48 ”Ani an madu-burba-duladid.
49 Ar be-dadgan nega-dulesulidgangi maná-guchamar-inigwele, bela burgwismalad.
50 ”An bemarga madu-nibneggi-aidenonikidgi-an-sunmakedi, a-madu dule guchale, bar burgosulid.
51 Ani an a-madu-duladid, nibneggi aidenonikidid. Ar dule-wargwen a-madu-guchale, bar burgosulid, degidula sadeguoed. An madu-ukoedi, we an-sanad. We-napneg-naidgi dule-bukmalad-dula-gudiguega an-san an ukoed.”
52 Agi Judíoʼmar abin-abin imakarmalad, sokarmalad:
“Anmar e-san-gunnegala ¿igi anmarga e-san ukosunna? Geg gued.”
53 Jesús amarga sogded:
—Napira an bemarga soged: Ar bemar Dule-Machi-e-san gunsulile, degine, e-abe gobsurbalile, bemar burba-dulad nikuosurmalad.
54 Ar dule an-san gunnele, degi, an-abe gobele, a-dule burba-geg-bergued nikuodo, degine, ibagan-napi-naguoedgi, ani an a-dule odulogoed.
55 Ar an-sana, masgunned-sunsogedid, degine, an-abe, gobed-sunsogedbalid.
56 Ar dule-an-san-gunmalad, degi, an-abe-gobmalad, anginbi gudigumalad, degine, an egi gudigumogad.
57 ”Ar igi Bab-dulamaid an-barmiali, degine, igi Babgi an dula gudimoga, deyobi, dule an-san-guchale, a-dule angi dula-gudii gumogoed.
58 Ani an madu-nibneggi-aidesadid. We-madu-nibneggi-aidesadi, be-dadgan-maná-guchadyobsulid. Ar maná-gucha-inigwele, amardi amba burgwismalad. Ar dule we-madu-guchardi, bar burgosulid, degisadeguoed.”
59 Jesús Capernaúmʼgi dulemar-odurdaksigusgu, Judíoʼmar-onmakedneggi we-ibmar sogsagusad.
Bukidar Jesúsʼgi bangudmalad
60 Bukidar-Jesúsʼba-gudimaladi weyob Jesús-soge-itosmargu, sogdemalad:
“We-ibmar-sogedi gwen nollo sogsulid. ¿Ar doa eba ibsaoe?”
61 Ar Jesús na wissoggu, e-sapingan muchub-muchub we-igargi sunmaknanai, amarga sogdesun:
—¿We-an-bemarga-sogedi, be isdar itomala?
62 Ar Dule-Machi nibneggi-mai-gusadse gannar nakwemai be dakarmalar, ¿igi be sogsamalarsunna?
63 Ar Bab-Dummad-Burbabi dulagudigued uked. Dule-sandi, binsaledid. An bemarga-ibmar-sogsadi, we burba-napiragwadid, degine, dula-gudiguedbalid.
64 Ar gwenna-gwenna bemar an-benmalad.
Ar ade, Jesús gebesaila-akar bato wisid doamala e-benmala, degine, doa darba e-ukbaloe.
65 Jesús sogded:
—A-ulale, an sogsad, dule, anba-naguegala Bab anse-sedasulir, gege anse dagye.
66 Degidgine, bukidar Jesús-sapingan Jesúsʼgi bangudmalad, bar Jesúsʼba gudigussurmalad.
67 Geb degi, Jesús na e-sapingan-warambe-gakabogwadga (12) sokalid:
—¿Bemar nabimarmoga?
68 Simón-Pedro, abin-sogded:
—Dummad, ¿doaba anmar naosunna? Ar bebi unnila burba-geg-bergued-igar nikad.
69 Ar anmar begi bensulid, degine, anmar wisid, be Bab-Dummad-dule-wargwen-barmidagoye-sogsad-duled. Bab-Dummad-Dula-Maid-E-Machi-sunnadid.
70 Jesús, Pedro-abin sogded:
—¿Ar warambe-gakabo (12) an be-susmarsursi? Gwensak bemar nia gued.
71 Jesús, e-sapingan-ambe-gakabogwad-wargwengi Simón-machi-Judas-Iscarioteʼgi deyob sogsagusad, ar a-dule, Jesús-darba-uknai guoedid.