4
Dummagan Salomónʼga-yar-semamaid
1 Degisoggu, Salomón bela-Israel-dulemar-e-reyga megnonikid.
2 Salomónʼga sordamar-idumalaga gunonimalad, wemalad:
Sadoc-machi-Azarías, dule-irwa-Bab-Dummadse-goledga megisad.
3 Sisa-e-masmala, gwen Elihorefʼye-nugad, baiddi Ahíasʼye nugmogad.
Amala, reyga garda-narmakmaladga megismalad,
Ahilud-machi-Josafat, negselemaidga-garda-narmakedga megisad.
4 Joiada-machi-Benaía, sordamar-bila-onomalad-e-dummadga megisad.
Sadoc, degi, Abiatar,
wemar, dule-irwa-Bab-Dummadse-gormaladga megismalad.
5 Natán-machi-Azarías, dule-negsedimalad-e-dummadga megisad.
Natán-machi-Zabud, dule-irwa-Bab-Dummadse-goledga megisad,
degi, reyga-binsaed-ukedga megisbalid.
6 Ahisar, reyneg-akwedga megisad.
Abda-machi-Adoniram,
reyga-sabsur-oarbaledimalad-e-dummadga megisad.
7 Deginbali, Salomón Israel-dulemargi e-ambe-gakabo (12) ega-negsemalad nugsanonikid. Amar reyga, degi, rey-neguyagi-gudimaladga mas-amidimalad. Wemar-ambe-gakabogwad (12), birgagine war-wargwen niigwen-niigwen, mas-amidimalad.
8 Wemar-ambe-gakabogwad (12), wemalad:
Hur-e-machi, Efraín-yalaganba negdakmaid.
9 Decar-e-machi, we-neggweburmar-e-dummadid:
Macaz, Saalbim, Bet-Semes, Elón, degi, Bet-Hanán.
10 Hesed-e-machi, we-neggweburmar e-dummadmogad:
Arubot, Soco, degi, bela Hefer-yar-naid dakmaibalid.
11 Abinadab-e-machi, Dor-yar-naid-dakmaid.
Deginbali, we-dule Salomón-sisgwa-Tafatʼye-nugad nikusad.
12 Ahilud-machi-Baana we-neggweburmar dakmaid:
Taanac, Meguido, Bet-Seán.
We-Bet-Seánʼde, Saretán-neggwebur-dikarba siid,
Jezreel-neggwebur-deale bukwad.
Baana bela Bet-Seán-neggwebur-siid-akale,
degi, Abel-Mehola-neggweburse negdakmaid.
Amba Jocmeam-neggwebur-obakar negdakmaibalid.
13 Geber-e-machi,
Ramot-De-Galaad-neggwebur-e-dummadga-maid,
degi, Galaad-yar-naidgi neggwebur-bukmaladse-bakar, dakmaibalid.
We-neggweburmarde, Manasés-machi-Jairʼgadinad.
Aginbali, Geber-e-machi Basán-yar-naidgi
Argob-neg-nugad-e-dummadga gusbalid.
Agine, neggwebur gwadulapaa (60) bukwad.
A-neggweburmar akwa-galu-matusulid-ebiris-bukwa nanaed.
Deginbali, e-yawagak-eduedi esgoro-gordikidgi sobaled.
14 Iddo-machi-Ahinadab, Mahanaim-neggwebur-e-dummadid.
15 Ahimaas, Neftalí-yar-naid-e-dummadid.
Deginbali, Ahimaas, Salomón-sisgwa-Basematʼye-nugad nikusad.
16 Husai-machi-Baana, Aser-yar-naid, degi, Alot-yar-naid-e-dummadid.
17 Parúa-machi-Josafat, Isacar-yar-naid dakmaid.
18 Ela-machi-Simei, Benjamín-yar-naid dakmaid.
19 Uri-machi-Geber, Galaad-yar-naid dakmaid.
Galaad-yarde, Rey-Sehónʼgadinad.
Sehónʼde Amorreo-dulemar-e-reyga maigusanad.
Geberʼde Rey-Og-e-yar ganikinad.
Ogʼde Basán-yar-naid-e-reyga maigusanad.
Galaad-yargindina, Geber wargwenna yar-semaid.
Salomón ibmar-bukidar-nikusad
20 Israel-dulemar, degi, Judá-dulemar ichesur gumarsoggu, demar-gakagi-ukub-naidyob gumalad. Aga, geg ebisleged. Ibmar-gobleged, degi, ibmar-gulleged, obinebaka nikasoggu, weligwar itobukwad.
21 Salomón, Éufrates-diwar-maid-akale, Filistea-yar-naidse bela yar-ganonikid. Aginbali, Egipto-yar-abingunaidse-bakar, Salomón bela-we-yar-nanaid-semaigu, bela dulemar-bukmalad ega ibmar-bukidar senonidamalad, degi, Salomón-e-maiga gusmarbalid.
22 Salomónʼga bane-bane weyob ibmar-mergu ebuleged:
Madubur-nued,
nibir-miliambe-gakabake gaka dulataled-ilatar-aidiku (14,500) ebuleged.
Madubur,
nibir-milidulagwen-gakambe-aidiku (30,000) ebulebalid.
23 Moli-bebe-nikad-wardadagan mas-nuedbi-madimalad,
warambe (10) ebulebalid.
Moli-bebe-nikad gaganbi-madimalad,
waladulagwen (20) ebulebalid.
Sibad-wawaadmar, degi, sibadmar,
waladulatar (100) ebulebalid.
Goe-sapurmar, goe-sapingan, degi, wasamar ebulebalid.
Degi, nuumar-nabir-gullemalad ebulebalid.
We-nuumar gege ebisleged.
24 Salomón Éufrates-diwar-dad-argwanedsiki, Tifsaʼye-neg-nugad-akale Gaza-neg-nugadse, bela reymar-mamaid-birgi yar-ganonikid. Degisoggu, bela yar-abingunanaidgi neg-bogidikid nagunonikid.
25 Salomón yar-semaigu, bela Judá-dulemar, degi, Israel-dulemar, nabir-gudii gusmalad. Dan-yar-naid-akale, Beersebaʼye-neg-nugadse, bela neg-bogidik nagunonikid. Degisoggu, Israel-dulemar e-nainugi uvaʼdub-urba, degi, higuera-sapi-urba bonisuli ambikudii gusmalad.
26 Salomón molimar miliambe-gakabo (12,000) nikad. Deginbali, moli-ur-bilagi-ebuleged-e-galumar milibake (4,000) nikabalid.
27 Dummagan-ambe-gakabogwad (12) Salomónʼga-yar-sedimaladi, niigwen-niigwengi Salomónʼga mas ukdimalad. Degi, bela e-sordamar-arbadimaladga mas-ukdimarbalid. Degisoggu, mas-sate gudii gussurmalad.
28 We-ambe-gakabogwad-yar-sedimaladi (12) e-mas-uked-nii-mosale, cebada-e-gwag, degi, gagan-molimar-maed, sogedba molimarga senonidamarbalid.
Salomón nue-binsaed-nikarba gusad
29 Bab-Dummad, Salomón nue-binsaed-ibedga imaksad, degi, nue-itoakwaa-nanaega imaksabalid. Agine, gurgin-bukidar-nika gunonibalid.
30 Salomón-e-ibmar-wisidi, bela dulemar-ibmar-wismaladgi obined, dulemar-ibmar-wismalad yar-dad-nakwedsik-bukwamaladgi obinbalid. Degi, Egipto-dulemar-ibmar-wismaladgi obinbalid.
31 Salomón we-dulemarba bur bule ibmar-wisid:
Ezraí-neggined-Etánʼye-nugadgi.
Aginbali, Mahol-e-masmalagi,
Hemánʼye-nugadgi,
Calcolʼye-nugadgi,
degi, Dardaʼye-nugadgi obinbalid.
A-ulale, Salomón-nug-dummarba-guedi, bela dulemar-yar-baid-baidgi-bukwamaladi wisgusmalad.
32 Salomón binsaed-nuegan, milipaa (3,000) narmaksad, degi, namaked miligwen gakatar (1,005) narmaksabalid.
33 Salomón sapi-durbamargi Líbano-urwala-akale, degi, galugi-hisopo-gagan-dungumaladse-bakale, egi sunmaksabalid.
Deginbali, Salomón ibdurgangi dulemar-odurdaksad:
Ibdurgan-ursirmaladgi,
nuumargi,
ibdurgan-unimakdimaladgi,
degi, uamargi dulemar-odurdaksabalid.
34 Bela yar-nanaid-e-reymar, Salomón-bela-bela-ibmar-wisid wisgunonimalad. Degisoggu, we-reymar Salomón-e-binsaed-nikarba-gued-wisgunonimaladi, Salomón-itogegala, e-sordagan Salomónʼse barmiardamalad.