6
Jesús-sapingan obunnoged-ibagi ibmar-gwag gwachamalad
(Mateo 12:1-8; Marcos 2:23–3:6)
1 Ibagwengine, obunnoged-ibagi, Jesús orosgi-dakleged-digaled-abargi-nadapgu, e-sapingan orosgi-dakleged gwane-gwane imaknadapi gusmalad, degine, e-san-onogegala e-argan-abin iir-iir-imaknadapgusmalad, geb gutedamalad.
2 Degi, gwen-gwen Fariseoʼmar-Jesúsʼba-nadapmaladi, Jesús-sapinganga sokarmalad:
—¿Ar ibiga bemar ibmar-gwag gwane-gwane nadapmala? ¿Obunnoged-ibagi mer arbaoye igar-maisursi? Emide bemar igar-maidgi annanaimalad.
3 Jesús, abin-imakdegu, ega sogded:
—An-sapingan igar-maidgi annanaisulid. ¿Ar bemar David-ibmar-imaksad absodisurmarsi? Deun, David, degi, e-sordamar ukumecharmargu, igi imaksamala.
4 ”Ar David Bab-Dummadse-goled-negse dognoni gusad, degi, Bab-Dummadga-madu-uklesad guchagusad. Ar David, degi, e-sordamar a-madu gunnedsulinad, ar ade, madu-isedid. ¿Unnila dule-irwa-Babse-gormaladbi we-madu-gunnoye igar-maisursi? Degite, ¿David, degi, e-sordamar igar-noar-imaksar be insae? Suli, ar ukudba nabir madu guchamalad. Degisoggu, an-sapingan nabir imaksamarmodo.”
5 Geb degi, Jesús sogdebalid:
“Ani Dule-Machi, obunnoged-iba-e-Dummadid.”
Jesús, dule-argan-burgwaled-nudaksad
(Mateo 12:9-14; Marcos 3:1-6)
6 Obunnoged-iba-baidgi, Jesús, Judíoʼmar-onmakednegse dognonigu, emar-odurdaksii gusbalid. Agine, dule-wargwen, sakwa-nuedsik-argan-burgwaled sii gusad.
7 Agi Garda-Narmaked-Dulemar, degi, Fariseoʼmar, Jesús-argabukwa-gusmalad, dakega, bule obunnoged-ibagi Jesús dule-nudakodibeye, adi, egi sogmalagar, obunnoged-igar-maidgi annadiiye.
8 Ar Jesúsʼdi nue-wisid igi binsabukmala, a-ular dule-argan-burgwaledga sogded:
—Dage, neg-abarse be gwisguda.
Geb agi neg-abargi dule gwisgunonikid.
9 Geb degi, Jesús sogded:
—Ibmar-soggwen an bemarse egisbimardo: Obunnoged-ibagi ibmar-nued-imakedi, wede, ¿igar-nuedi? Ibmar-isgana-imakedi, wede, ¿igar-nuedi? ¿Igid bur-nabiri? ¿Dule-oburgwedi? ¿Dule-odurguedi? ¿Igi bemar sogsunna?
10 Jesús bela dulemar-dikarba-bukmalad-daksagu, dule-argan-burgwaledga sogded:
—Be-argan be onak.
Dule na e-argan-onakgwidgu, yog-nuguar-naded.
11 Dummagan-bukmalad sae-itodmalad, na sunmakarmalad, igi anmar Jesús-imakmalargebye.
Jesús, e-sapingan-bur-dummaganga-guega ambe-gakabo (12) susad
(Mateo 10:1-4; Marcos 3:13-19; Gusmalad 1:13)
12 Deun, a-ibagangine, Jesús Bab-Dummadse-golega yarse nade gusad. Agi Bab-Dummadse-gorsii oibosad.
13 Oibosgu, eba-nanaimaladse gochad. Agi ambe-gakabo (12), e-sapingan-bur-dummaganga-guega susad. Amar-sulesad, e-sapingan-bur-dummaganye onugsanonikid.
14 Sulesmaladi, wemalad:
Simón, a Jesús, Pedroʼye onugsasbalid,
degi, Simón-e-urba-Andrés,
Jacobo, Juan,
Felipe, Bartolomé,
15 Mateo, Tomás,
Alfeo-machi-Jacobo,
Simón, Zeloteʼye-bimarbalid,
16 Jacobo-e-machi-Judas,
degine, Judas-Iscariote, darba-Jesús-uknonikid-dule.
Jesús, dulemar-bukidar-nudaksad
(Mateo 4:23-25)
17 Jesús e-sapingan-ambe-gakabogwadmala (12), e-sordagan-bamaladmala, gulluse aidenonikid. Agi nebagi dulemar-bukidar-bukwamalad. Amar, wemalad:
Jesúsʼba-nanaimalad-baigan,
Judea-yalaginmalad,
Jerusalénʼginmalad,
degi, demar-gakaba-bukmalad: Tiro-dorgan, degi, Sidón-dorgan.
Amarde, bela Jesús-itogega nonimalad, degi, ega bonigan-osulogega nonimalad.
18 Agi dulemar niaburbase-nue-wiledigusmalad nudaklesmalad.
19 Bela dulemar-bukidar Jesús-ebubidamalad, ar ade, e-gangued-nikadba, bela dulemar-onudakdiid.
Doamargi bur-nued binsalesa
(Mateo 5:1-12)
20 Jesús e-sapingan-dakdegu, sogded:
“Bemar-wilemalad, bemargi nued binsalesad,
ar Bab-Dummad-e-negdakmaid, bemargadid.
21 Bemar-emi-uku-mesdimalad, bemargi nued binsalesad,
ar bemar immerbaa itononimaloed.
Bemar-emi-bodidimalad, bemargi nued binsalesad,
ar bemar allenonimaloed.
22 Ani Dule-Machi, an-nug-ular,
dulemar isdar be-dakarmalar,
dulemar be-obannarmalar,
dulemar be-ichoarmalar,
degi, be-nuggi sunmakarmalar be dule-isganamarye,
bemargi nued binsalesad.
23 A-ibagangi, dulemar sabsur-be-imaksadba, be wergumaloed,
be weligwar itomaloed,
ar nibneggi bemarga ibmar-uklegoedi dummarbagwad.
Ar e-babgan bemar-idu amba sabsur Bab-Dummad-gayaburba-barsogmalad-wiosmarmogad.
24 Ar bemar mani-ibgan, ¡duledar-wilesmar!
Ar bato bemardi wegi yeer itodimalad.
25 Ar bemar wegi-immedik-itodimalad, ¡duledar-wilesmar!
Ar be ukud itononimaloed.
Ar bemar emi-alledimalad, ¡duledar-wilesmar!
Ar bemar nunmaked itononimaloed,
degine, bemar bononimaloed.
26 Ar bemargi bela-dulemar nuedbi sunmakarmalar, ¡be duledar-wilesmar!
Ar deyob e-babgan Bab-Dummad-gayaburba-barsogmalad-napiragwadsulid imaksamarmogad.”
Jesús sogsad, be-isdarmalad be sabgumarye
(Mateo 5:38-48)
27 Jesús sogdebalid: “Ar bemar an-itobukmaladgardi an sogdo:
Dule-isdar-be-dakdimalad be sabgumar,
dule sae-be-dakmaladga ibmar-nuegan be imakmar.
28 Dulemar-be-ukabsadimaladgi nued be binsamar.
Dulemar-be-ogakansadimaladga Bab-Dummadse ega be gormar.
29 ”Ar dule-wargwen wagargi be-bibyosale, wagar-baid ega be oyobalo. Dule mor-suid bei susale, mer be-mor-baid ega be uksuli guo, ega be ukbalo.
30 Ar doa-dule bese ibmar egichialir, ega be uko. Ar dule be-ibe-ibmar susale, mer ese be gannar bar egiso.
31 Ar igi-dulemar be-imakbi be abege, deyob dulemar be imakmogoed.
32 ”Ar dulemar-be-sabmaladbi be sabguele, ¿Bab-Dummadgi ibi-nued be amiosunna? Be ibmar-nued amiosuli. Ar dulemar-isgudimalad deyob dule-e-sabmalad sabgumarmogad.
33 Ar dulemar-ibmar-nued-bega-imakmaladgarbi ibmar-nued be imakmogale, ¿Bab-Dummadgi ibi-nued be amiosunna? Ibnued be amiosuli. Ar dulemar-isgudidimalad amba deyob imakmarmogad.
34 ”Ar unnila dule-gannar-bega-ibmar-ukoedgarbi be ibmar ukele, ¿Bab-Dummadgi ibi-nued be amiosunna? Ibnued be amiosuli. Ar dule-isgudimaladi dule-isgudimaladga ibmar ukdamarmogad, adi, sorba gannar ega ukbaligar.
35 ”Degisoggu, be-isdarmalad be sabgumar, ibmar-nued ega be imakmar. Ibmar-bei-abeged ega be ukmar, mer gannar-bega-ibmar-uked edarbedii be gumalo. Ar bemarga ibmar-uklegoed bur-dummarba gued. Degine, Bab-Dummad-Bur-Birigined-e-mimmiga bemar gunonikoed. Ar Bab-Dummad bela dulemar-sunnasurdamalad, degi, dulemar-isganamar wiledakmaid.
36 Ar igi be-Bab, dulemar-wiledakmaimoga, ayob bemar dulemar-wiledakmarmosundo.”
Mer yogasaar be sogo, we dule-isganaye
(Mateo 7:1-5)
37 Jesús sogdebar: “Mer yogsaar be sogo, we dule-isganaye, adi, melle Bab-Dummad deyob begi sogmogagar. Mer be sogo, we-dule-sabsur-odurdakye, adi, melle Bab-Dummad sabsur be-odurdakmogagar. Dulemar begi nossuliyob be dako, adi, Bab-Dummad egi nossuliyob bemar-dakmogagar.
38 ”Aimarga ibmar be uko, adi, Bab-Dummad bega ibmar ukmogoed. Bab-Dummad bega ibmar-wilubsaleged-nuedgi, nue-gindilegar, nue-gwamakar, degi, nue-enargwaagwadgi ibmar ukoed. Ar be ibmar wilub-imakedgine, Bab-Dummad bega ibmar wilubsamogoed.”
39 Geb degi, Jesús burbar emarga ibmar sogded:
“¿Ar dule-ibyasulid, sunna dule-ibyasulid-idumai guosi? Suli. ¿Ar ebobela yaa-guregedgi argwachasulir be insae? Argwachale.
40 ”Dule-ibmar-durdaknaid geg e-sailaba dummad gued. Ar ibmar-durdaknaid obelosardi, sunna e-odurdakedyob gumogodo.”
41 Jesús burbar sogdebalid: “¿Ar ibiga be-gwenad-ibyagi durgan-maid magarsunna be dake? ¿Ar ibiga be-ibya-yaba-suar-maiddi akusunna be dake?
42 ”Ar igi be-gwenadga be sogoe: ‘Be-ibya-yaba-durgan-maid an bega onogweloye.’ ¿Ar be-ibya-yaba suar-maiddina? ¡Bemar yogasaar-darba-sunmakmaladid! Suar be-ibya-yaba-maid-insa be onoge. Geb agi nabir be atakoed. Adi, agi nabir be-gwenad-ibya-yaba-durgan-maid be onogoed.”
Dule e-daedgi mag be dakmaloed
(Mateo 7:16-20; 12:33-35)
43 Jesús sogdebalid: “Sapi nuedile, geg san-isgana nikued, e-sanmaked nued sanmaked. Ar sapi isganale, geg san-nued nikued, e-sanmaked ichakwa sanmaked.
44 Ar sapimar war-wargwen na e-sanmakedgi dakleged. Ar higo-san ikogi sanmaksulid, degine, uva-san gwen sapi-ikogangi welesulid.
45 ”Anmar-dule amba deyobmodo, dule-nued, na e-gwagegi ibmar-nued-nikadba ibmar-nued onoged. Ar dule-isganadi, na e-gwagegi ibmar-isgana-nikadba ibmar-isgana onomogad. Ar dule-sunmakedi, gwagegi-ibmar-naidba na sunmaked.”
Dulemar-neg-sobedgi Jesús sunmaksad
(Mateo 7:24-27)
46 Jesús sogdebalid: “¿Ibiga be anse, ‘Dummadye, Dummadye,’ gormala? Ar degite an-ibmar-sogedba be dasurmalad.
47 ”Ar bela dulemar anse danikile, an-ibmar-soged itogele, degi, eba daele, an bega sogmalo, we-dule doasunnaa dae. Weyobdo:
48 We-dule-gwensak na neg-sobbargu, yaa akwisad, matusur akwisad, degi, neg-e-saila akwa-birgi mesisad. Diwar noargu, diwar binnasur a-neggi yolenonikid, degite, gwen neg ogiglimaksasulid, ar ade akwasaila-birgi neg nue-sobar siid.
49 ”Ar dule an-gayaburba-itogele, ar a-sogedba imaksasulile, adi, we-dule weyobmodo: Dule neg-sobsagu, unnila napa-birgi sobsad, neg-e-saila mesissulid. Diwar noargu, a-neggi binnasur yolenonikid, neg-ayarided, neg dummad-bibichisdo. Be itogua.”