5
Abirgunagwarsuli-nanaedgi bangued
1 Machi, an-binsaed-nikagued an bega-ukedi, nue be itoge,
an ibmar-nue-wisidi an bega-sogedi, nue-ise-itogar be imake.
2 Adi, be sunmakalile, nue-itoakwaa sunmakegar,
nue-ibmar-wisi be guegar.
3 Ome-sui-dikarba-yoleged-e-agumakedi, ibmar-nuediyob sunmaked.
E-gwabin-ibmar-biedi, ibmar-nueganbi sogdaed.
4 Dule ese-binsaed-galesale, ina-gagbisailadyobi ega gued,
es-suid-nugar-darbogwadba bur bule dule-naibi-saeyob gued.
5 Dule a-ome-ebogwa negsichidgi nanaele, burgwedse nilemaid.
Neg-uanse selemaid.
6 A-ome dule-egi-sunmakmalad bai-itosulid.
E-sunnasur-daedi, na bargasulid,
e-ichakwa-nanadiidi na aku itoged.
7 Machi, emigi nue be an-itoge.
An-ibmarmar-bega-sogedba be nanae.
8 Ome-e-sui-yardakdiidgi, be bangue.
Melle e-neg-yawagakse be warmako,
9 adi, melle dule-baid-aku-be-dakedga be-arbasadgi-ibmar-nikusad be ukegar,
melle be-burba-gandikid dule-baidga be ukegar.
10 Degiile, dule-baid be-ganguedgi yeer-itogoed.
Degiile, be-arbasad-mani dule-baid-negse dogoed.
11 Geb agine, bela binna-binna be-san bergumaidba,
be bodii gudoed.
12 Agi be sogdoed: “Ar wede, ibiga dule-anga-binsaed-uksamalad an itossuli.
Ar wede, ibiga dule-sabsur-an-odurdaknaigua, an itossuli.
13 Dule-anga-binsaed-daknanai-gusmalad an itossulid.
Dule-an-odurdaknanai-gusmaladba an ibsassulid.
14 Emide, dulemar-abargi, an oitolegednaga gudiid,
wis ugak an gudiid.”
Ome-dikarba-yolesulid
15 Be nog-gobbigualile,
be-ome-ebo be nog gobo.
16 Unnila be-omesebi be golo,
melle be-omesulidse be golo.
17 Be-ome unnila begadbiid,
melle dule-baidga be-ome be urmakdii nanao.
18 Ome-bega-uklesadgi nued-binsalesun.
Nuchukwagwadgi bega abirgin-uklesad-ebo be wergudii gusun.
19 Ome goe-sapuryob, yeer dakleged.
Ome wasa-omeyob, yeer dakleged.
Bele-bele be-imakar-sogele, egi be wergudii sao.
E-sabguedgi be wergudii guo.
20 Machi, melle ome-baidse-binsaed-galedii be guo,
melle ome-baid be-werguega, be imako.
Dule-isganamar-e-odurdaklegoed
21 Bab-Jehová bela dulemar-e-daed nue-wisid.
Dulemar-nanaedi egi gwen yoggumaisulid.
22 Ibmar-isgana, dule-isganagi aibinoed,
e-isguedgi ollorguosulid.
23 Dule-isgana, igar-maidba-nanabisulidbali burgwidoed.
Na e-binsaed-satedbali, burgwidsunnoed.