36
Bab-Dummad-dule-wiledaked
Bab-Dummad-e-mai-David we-namaked narmaksad. Namakmalad-e-iduedga soglenaid.
1 Dule-Bab-Dummadgi-isgudiid weyob soged: “Isgudiid an yeer-itoged.”
Bab-Dummad-dobe-nanaodeeye gwen binsasulid.
2 Dule-isgana e-nug-odummolegoye binsaed,
e-isgued akudaklegoye binsaed.
Bab-Dummad ega akar-sogosurye binsaed.
3 E-sunmaked, galagwensuli sunmaked,
gakansaale sunmaked.
Dule-binsaedsulidga naded,
ibmar-nued-imaked ieded.
4 Megidele, isgued-imakedginbi binsamegisdaed.
Igar-nued-imakedgi gwen binsadasulid.
Isguedgi bangugwelodeeye gwen binsadasulid.
5 Bab-Jehová, be-sabguedi bela nibnegse warmaked,
be-innikidaedi, bela mogir-billise warmaked.
6 Be-igar-innikimaladi, yala-dummagan-gandik-bukwadyob gued.
Muu-billi-wilasaila-naibayobi, be-igar-nabomalad mamaid.
Bab-Jehová, bela be dulemar-akwemaid,
bela be ibdurgan-bukwadi, akwemaibalid.
7 Bab-Dummad, ibibayobi bedi bela-belad wile dule-dakmai.
Gannir e-mimmigan e-sakan-urba-odukueyob,
dulemar begi bendakleged amied.
8 Be-neggi ega be mas-obineba-ukmaidgi, nue immelebukwad,
be-dii-nued-ariomaidgi nue-immelebukwa be imaked.
9 Ar beginbi, san-burba-geg-bergued danikid.
Anmar unnila beginbi, san-burba-dula-gued amied.
10 Bab-Dummad, dule-beba-ibmar-imakdimaladi be wiledaksun.
Dule-gwage-nuegan, be-igar-innikigwadba be bendaksun.
11 Dule-san-dummarba-imakdimaladi, melle an-ogalakuega be sao.
Dule-isgudimaladse, melle galakuega be an-imako.
12 Nue be dakmar, dule-isgudimaladi, igarga gudasulid.
Galakuddamalad, gege bar igarga gudamalad.