3
Salomón Bab-Dummadse-goled-neg sobsad
(1 Reyes 6:1-38)
1 Salomón, Jerusalénʼgi, Moriahʼye-yar-nugadgi, Bab-Jehováʼse-goled-neg sobded. A-yargi Bab-Jehová e-bab-Davidʼse magaros gusad. We-negde David Bab-Jehováʼga-neg-sobega napaneg guakwa amis gusad. Jebuseo-dule-Ornánʼye-nugad a-ibmar-gwag-omukued-neggi Bab-Jehováʼse-goled-neg sobarmalad.
2 Rey-Salomón birgabake gaka nii-warbo gaka ibabogus yar-semaidgi, Bab-Dummadse-goled-neg-sobed onoded.
3 Salomón Bab-Jehováʼse-goled-neg-sobega, weyob neg-wilub-imaksad.
Neg-uluba-neg-gaega, daliambe-gakatar-sugue (15) wilub-imaksad.
E-matardungueddi, daliatar-sugue (5) wilub-imaksad.
4 Degi, Babse-goled-neg-e-ubeb, Babse-goled-neg-matardunguedbo emar dungued.
Neg-ubeb daliatar (5) matardungued,
degi, e-nibgueddi, daliatar (5) nikad.
Geb Salomónʼdi, bela negyaba or-sunnadbi nasiksa gusad.
5 Degi, Babse-goled-negyaba baryawar-urgo-sunnabi ebo-matak-matak imaksa gusad.
Geb a-baryawar-uki or-sunsogedbi nasiksabalid.
A-birgi, ogobwargii dakleged,
degi, esgoro-dubgi-dakleged or-sunsogedgi sobsabalid.
6 Bab-Jehováʼse-goled-neg, yeerdakle-imakega,
olo-naidgi akwa-nuegan-dakar-dakar-gamalad, nasiksa nabalid.
We-or-sunsogeddi neg-ogannogega Parvaimʼye-neg-nugadgi-or-nikad selenonikid.
7 Deginbali, bela or-sunnabi irdimar,
neg-yawagak-doged, e-galu-dikar, e-yawagakmar,
degi, bela negyaba, olobi nasiksa gusad.
Degine, baliwitur-querubinʼye-nugad neg-dikar-birgi sobar-sobar imaksabalid.
8 Amba deyobi Salomón, Neg-Ise-Islidikid sobsabalid:
E-suguedi, Babse-goled-neg-yaadunguedyobi, daliatar (5) sugued.
E-matardunguedi, e-suguedbo emala, daliatar (5) nikamogad.
Wemargi bela or-nuegan egi nasikles nanaed.
Agi, or nibir-milidulabo-gakanergwa (46,000) bela ebulesad.
9 Esgoro-orbimalad-gagwen nibirgwen-gaka aidiku naed. Babse-goled-neggi neg-niba-siidgi or-sunnabi nasiksabalid.
10 Neg-Ise-Islidikidyaba, baliwitur-querubinʼye-nugad-walabo sakan-nika-nika urgogi sobsabalid. Geb baliwitur-birgi or nasiksabalid.
11 Baliwitur-querubin-e-sakanmar bela daliatar (5) sugued. Ar ade, baliwitur-sakan-gwensakgi daligwen gaka bisgigwen sugued, bela neg-dikarse warmaknaid. Geb sakan-baid daligwen gaka bisgigwen sugubalid, adi, baid-baliwitur-querubin-e-sakanse warmaknaimogad.
12 Baid-baliwitur-querubin-e-sakan amba daligwen gaka bisgigwen sugumogad. A-sakan-gwensak neg-dikarse warmaknaimogad. Geb e-sakan-baid, baliwitur-baid-e-sakanse warmaknaimogad.
13 We-baliwitur-querubinʼmar gwigwichi nanaed. E-sakan-nallabukwad belagwable daliatar (5) sugued, degi, yawagaksik bela atakbukwa nanaed.
14 Geb mor-dummad imaksabalid,
nirba-aradgi, nirba-suir-akwagiidgi sobsabalid.
Nirba-ginnidgi, nirba-linoʼye-nugadgi sobsabalid.
Geb we-nirba-dub-akar-akar-daklegedba mor-dummadgi baliwitur-querubinʼmar oniar sobsad.
Salomón buar-warbo ogwichisad
(1 Reyes 7:15-22)
15 Rey-Salomón, buar dalibaabak (8) sugunanaed-walabo neg-asabin ogwichisad. Geb buarmar-birgi, e-nono daligwen-gaka-dungu sobsad.
16 Deginbali, esgoro-dubyob dubmar sobsabalid. Geb buar-e-nono-birgi nasiksa nabalid. Geb esgoro-dub-naidgi sapi-e-san-granadaʼye-nugad-dulatar (100) sobar-sobar nasiksabalid.
17 Babse-goled-neg-asabin buar-warbo ogwichisad. Gwensak argan-nuedsik, baiddi argan-sapiledsik ogwichisad. Salomón, buar-argan-nuedsikidi Jaquínʼye nug-imaksad. Buar-baid sapiledsik-gwichidi Boazʼye nug-imaksabalid.