8
1d. Salomón ibmar-baigan imaksad
(8:1-18)
(1 Reyes 9:10-28)
1 Rey-Salomón, Bab-Dummad-Jehováʼse-goled-neg-oguega, degi, reyneg-oguega, birga-dulagwen (20) gagasad.
2 A-sorbali, Salomón, Hiram-ega-neggweburmar-uksadi nudaksad. Geb agi Israel-dulemar-oambikusad.
3 Geb degine, Salomón, Hamat-neggwebur, Soba-yargi-siid, a-ebo bila-onosgua, Hamat-neggwebur-susa gusad.
4 Salomón, Tadmor-neggwebur nega-dulesulidganba-siid sobsad. Degi, bela Hamat-neggweburmargi mas-sabolemalad-neg sobsabalid.
5 Deyopira, neggweburmar-gandikmalad Bet-Horón-Nakwaled, degi, Bet-Horón-Dealed gannar sobsabalid, degi, e-galu-matusulid, e-yawagakmar obinosbalid, degi, yawagakmar-idu-suar-biir-megmalad obinosbalid.
6 Deginbali, Salomón, Baalat-neggwebur, degine, e-gingi-sabolemalad-negmar sobsabalid. E-ur-napagined-osabomalad-negmar sobsabalid, e-moli-ambikued-negmar sobsabalid.
Degi, Salomón baigan-negmar e-itolegedba sobsabalid: Jerusalénʼgi, Líbano-yargi, degine, bela e-negdakmaid-ugakagi negmar-sobsa-naed.
7 Bela-neggweburmargi Israel-dulesurmalad-besmaladi, wemalad:
Het-dulemar, Amorreo-dulemar,
Ferezeo-dulemar, Heveo-dulemar,
degi, Jebuseo-dulemar.
8 Ar Israel-dulemar bela amar-obelossurmarsoggu, wemardi, we-yargi e-sergan-sorba besmalad. Salomón a-dulemarga we-garda-narmaklenaidse gandik-arbaleged-igar mesisad.
9 Degi-inigwele, Salomón, Israel-dulemar-wargwensaar maimaryob-arbaega imaksasulid.
Ar ade, Salomón, Israel-dulemar:
Sorda-bila-onomaladga-onug-imaksad,
sordamar-e-dummaganga onug-imaksabalid.
Sordamar-ur-napaginedgi-urwemalad-e-dummaganga onug-imaksabalid,
degi, sordamar-moligi-sii-urwemalad-e-dummaganga onug-imaksabalid.
10 Deginbali, Salomón, ega-arbamalad-dakega e-dummagan dulataled-ilabo gaka dulabo-gakambe (250) nikabalid.
11 Salomón, Faraón-sisgwa David-neggweburgi-maidgi sesad, bia ega reyneg-sobsadse. Ar ade, Salomón binsaed: “Bab-Jehová-e-Ulu Rey-David-neggi-signonisoggu, reyneg neg-swilidikidga gunonisunnad. Degisoggu, an-ome we-neggi geg gudii gued.”
12 Degidgi, Salomón neg-ubeb-naid-asabin, ibmar-ogumakar-ukleged-ailagi, Bab-Jehováʼga ibmar-ogumakar uksasunnad. We-ailade, Salomón, Bab-Jehováʼga sobsa gusad.
13 Salomón, Moisés-Igar-Maidba, ibmar ogumakar ukdaed:
Itoged-ibamargi, nii-bini-gwisgued-ibamargi,
birgagi irbaa iba-dummagan-onolegedgi ibmar ogumakar ukdaed.
A-ibamar-dummagandi, wemalad:
Madubur-Inasulid-Iba,
Itoged-Irgwenad-E-Ibamar,
degi, Neg-Matargana-Iba.
14 Deginbali, Salomón e-bab-David-igar-mesisadbali, dule-irwa-Bab-Dummadse-gormaladga igar mesisad, adi, e-iba-arbamaladgi na muchub-muchub arbamalagar. Degi, Levita-dulemardi Bab-Dummad-nug-odummogega urbilesmogad, adi, dule-irwa-Bab-Dummadse-gormaladbogwa bane-bane igar-megisadba arbamalagar. Ar David Bab-Dummadga-arbaedi, deyob igar mesisad. Degi, yawagak-dakmaladga yawagak-iliba e-igar-maidba ega mesisbalid.
15 Degisoggu, dule-irwa-Bab-Dummadse-gormalad,
Levita-dulemar, mani-dakmalad,
degi, ibmar-baigangi-arbabukwamalad,
rey-igar-mesisadba nanabukwa gusmalad.
16 Weyobi, Salomón Bab-Jehováʼse-goled-neg-e-sailagan-mesialid-akale, bela-ogusadsega, bela ibmar-imaksad. Bab-Jehováʼse-goled-neg bela weyob ogulenonisunnad.
17 Degidgine, Salomón, Edom-yargi, demar-gaka naidsik, Ezión-Geber-neg-nugadse, degi, Elot-neg-nugadse naded.
18 Hiram, Salomónʼga e-gapdanmarba ur-dummagan barmisad. Degi, Hiram-e-gapdanmar, degi, e-selamar demargi nerguarmaladid. Amar, Ofirʼye-neg-nugadse Salomón-sordamarbo nadmalad. Agi, or nibir-milidulagwen-gakambe-gakapaa (33,000) Rey-Salomónʼse senonimalad.