BURBAR-OYOLESAD-GARDA
APOCALIPSIS
GEBE-SOGLENAID
Garda-nug
Juan, Jesús-sapingan-warambe-gakabogwad-wargwenad we-garda narmaksad. We-garda-sorba, Bab-Dummad-Garda bar narmaklessulid, wese bergunaid. Juan, Bab-Jesúsʼba-naid-ular, Patmos-dupugi mellesii gusad. Agi odurdaklesigua, Bab-Jesús yoedse-ibmar-guoed, ega burbar oyosad. Binsamardo, we-garda birga 96ʼgi narmakles-insaye.
Burbar-Oyolesad-Gardagi weyob sunmaklenaid
Bab-Jesús, Juanʼga sogsad, Jesúsʼba-nanaimalad-danar-ambikunonidamalad-sogagugle-siidse (7) an bega-sogsadyob be garda narmakoye.
Juan, Bab-Jesús-bela-ega-burbar-ibmar-oyosad, bela narmaksad. We-gardagi anmarga oyoged, Jesucristo nia-sailaba bur dummaye, degine, bur dutusurbarye. Ibmar-isganamar bur bule ibmar-nueganba nakwemaiyob dakle-inigwele, Bab-Dummad-gangued bur gannarbasoggu, a bur nakoye. Bab-Jesús, na e-sordamar-Roma-dulemarse nue-wiledimar-inigwele, weyob ogannonaid: “Bab-Dummad amba negsemaiye, bela a-sogedba ibmar-gumaiye, degisoggu, mer galakued imakmaloye, ar Bab-Dummad bela negsemai guoeddeeye.”
We-gardagine, weyob ilemakar sunmaklenaid:
1. Gebe-sikwas-soglenaid (1:1-8).
2. Iglesia-sogagugledga (7) sunmaksad (1:9–3:22).
3. Wilubgan-sogagugled (7) (4:1–8:1).
4. Gar-trompeta-walagugled (7) (8:2–11:19).
5. Ibmar-wilubganmar-oyolenaid (12:1–14:20).
6. Nog-dummagan-gwagugled (7) (15:1–16:21).
7. Dulemar-sabsur-odurdaklegoed-oyolesad (17:1–20:15).
8. Jerusalén-neggwebur-binid (21:1–22:5).
9. Cristo-danikid nue-warmaksad (22:6-20).
10. Napi-soglenaid (22:21).
Be itogua.
1. GEBE-SIKWAS-SOGLENAID
1
(1:1-8)
Jesucristo, yoo-ibmar-guoed oyosad
1 We-yoedse-ibmar-guoed-oyolesadi, Jesucristoʼgadid. Bab-Dummad Jesucristoʼga we-yoedse-ibmar-gumaloed oyosad. Jesucristo, na e-maigan we-ibmar-emissaar-gumaloed-wisgumalaga oyosad. Wisgumalagala, Jesucristo na e-baliwitur e-mai-Juanʼse barmialid.
2 We-Juan, na e-sunnad-daksadbali, Bab-Dummad-bela-ega-sogsadba, degine, Jesucristo-bela-ega-oyosbalidba, narmaknonikid.
3 Dule-we-garda-absomaladga, yoo-ibmar-guoed-itomarbalidga, degine, bela narmakar-naidba-eba-damaladga ibnuedga gued. Ar we-ibmar-guoed-ibagan emiskwaa deyob gunonikoed.
Juan, Jesúsʼba-nanaimalad-sogagugledga (7) nued-sogeye sogsiid
4 Ani Juan, Jesúsʼba-nanaimalad Asiaʼgi-bukmalad-sogagugledse (7) an we-garda narmaksiid.
Bab-Dummad-Dula-Maidi, gusgu-danikidi, degisadegu-mai-guoedi, degi, burbamar-walagugle (7) Bab-Dummad-ologana-asabin-bukwamaladi, degine, Jesucristoʼmala, bemargi nued binsasun, degine, ulubgi bogidik bemar-itogega-imakbarsun.
5 Ar Jesucristo we-ibmar-napiragwad-daksadid, e-inse-durgusadid, reymar-napneggi-negsemamaid-e-dummadid.
We-Jesucristo anmar-sabgusadid,
e-abegi anmar-isgued-osulononikid.
6 E-Bab-Dummadga reymarga-guega anmar-imaksad,
dule-irwa-Bab-Dummadse-gormaladga-guega anmar-imaknonikid.
A-Jesucristo-nug odummolesun,
e-gangued degisadegu odummomarsun.
Ar deyob gusun.
7 Bela-dulemar Jesús-mogir-imbaba-aidedani dakmaloed.
Dulemar-Jesús-ewarismalad amba dakmogoed.
Bela-dulemar-baid-baid-we-napneggi-danar-danar-bukmalad Jesús-dani-dakdagogu, bodmaloed.
Eye, deyob gusun.
8 Bab-Dummad-Bur-Birigined weyob soged:
Ani an Gebesailaginedid, (Alfa).
Ani an Napisoladbalid, (Omega).
Ani an Bela-Gangued-Nikad, gudiid,
ani an Bela-Gangued-Nikad, gudigusad,
ani an Bela-Gangued-Nikad, gudigubaloed.
2. IGLESIA-SOGAGUGLEDGA (7) SUNMAKSAD
(1:9–3:22)
Juan negburgan-daksadgi Jesús-daksad
9 Ani Juan bemar-gwenad, bemar-sunnaa wiledimogad. Bemar-sunnaa Bab-Dummad negdakmaidgi dogarmogad, degi, bemar-sunnaa binnalegwadgi Bab-Jesús-igargi alamaknaimogad-duled. An Bab-Dummad-gayaburba-barsogdiid-ular, degi, Jesucristoʼgi-sunmakdiid-ular, an Patmos-dupgi odurdaklesiid.
10 Bab-itoged-ibagi Bab-Dummad-Burba-Isligwaled bela-bela angi nonikid, an-yarganba gar-trompeta-goleyob binnasur gayaburba gornonikid,
11 sognonikid: “[Ani an Gebesailaginedid (Alfa), ani an Napisoladbalid (Omega)]. We-ibmar be dakedi, gardagi be narmake. Jesúsʼba-nanaimalad-Asia-yargi-bukmalad-sogagugledse (7) be we-garda barmide:
Éfesoʼgi-bukmaladse,
Esmirnaʼgi-bukmaladse,
Pérgamoʼgi-bukmaladse,
Tiatiraʼgi-bukmaladse,
Sardisʼgi-bukmaladse,
Filadelfiaʼgi-bukmaladse,
degi, Laodiceaʼgi-bukmaladse.”
12 Dule-anga-sunmaknaid-dakega an aibirided. An aibirisgu, gwallu-sied-orbiid gwagugle (7) gwichi an dakalid.
13 We gwallu-sied-gwagugled-abargi, Dule-Machi-sunnaa gwichi an daksad, mola-suid naga-dukuse-yoi an daksad. E-binasgargi-molidubyob-ebirnai olo-sunnabi-nai an daksabalid.
14 E-nonodi, degi, e-sailagiadi, bela dagudik, sibad-wawaad-e-absar-sibudikidyob an daksabalid, dambed-bated-sibudikidyobid. E-ibyadi, sooyob-gae an daksabalid.
15 Degine, e-nagmar, igi esgordikid-soo-yagi-dulenair dakarmake, ayob gaed. E-sunmaked suke-dummad-aryomaidyob goled.
16 E-argan-nuedsik niisgwa-gwagugle (7) ganibalid, e-gaya-yaba es-suid isedar-swiswimakaled nugar-abinbela-nikad nogwichid. E-wagar, dad-ibe isedar-daarmakar-gaedyob dakleged.
17 A-dule deyob an dakargu, burgwisayob an e-nag-naba aimukuded. We-dule, e-argan-nued an-birgi-mesisgu, anga sogded:
“Mer dobgu, ani an Gebesailaginedid,
ani an Napisoladbalid.
18 An dula gudiid.
Ani an burgwis gusadid.
Emigindi, degisadegu an dula gudiid.
Ar napiragwad.
Deginbali, ani an burgwed-yabe,
degine, burgwarmalad-e-neg-Hadesʼye-nugad-yabe an ganikidbalid.
19 ”Be ibmarmar-daksad narmake, be ibmar-daked narmakbalo, we-sorba-ibmar-gumaloed-dakoed be narmakbalo.
20 Niisgwa-gwagugle (7) an-argan-nuedsik-gani be an-daksadi, degine, gwallu-sied-gwagugled-olobiid be daksabalidi, ¿wede ibu obarilesunna? Niisgwamar-gwagugle (7) be daksadi, wemar Jesúsʼba-nanaimalad-bukmalad-sogagugled-e-baliwiturmalad. Gwallu-sied-gwagugled (7) be daksabalidi, wemar Jesúsʼba-nanaimalad-sogagugledid.”