Hebreomarse Garda
Narmaklesad
Hebreos
Dulemar nue wichurmalad, doa we-Hebreos-garda narmaksa. Bukidar binsamalad, Pablo garda narmaksaye. We-garda-narmaklesad Judiomar-Bab-Jesúsba-nagusmaladse, ega sogega Judiomarga Moisés-igar-uksad, Cristo-igar-bini-uknonikid-ebogwa Cristogad bur biriginedye. Hebreos-garda-narmaksiid sogdo, Jesús Bab-Dummad-Machi-sunnadsoggu, a-ulale Judiomarga Moisés-igar-uksadba bur nuedye.
We-gardagi sogbardo, dule-irwa-Bab-Dummadse-gormalad-igar-Moisés-uksad, Cristo-degiid-igar uknonimoye, degite, Cristogad bur biriginedye.
Narmakbardo, Josuéga Bab Dummad sogsa-gusad obunnoged an bega ukoye, Jesús-obunnoged-uked bur obunnoged-napiragwadye. Obunnoged-napiragwad unnila Jesúsginbi amilesiid. Igar-sered igar-binid-ebogwa emar naed, degi-inigwele, igar-binid bur nuedid. Moisés-igar-uksad, Cristo-igar-uksadga unnila e-wilubgan gued.
Judiomar-Bab-Jesúsba-nagusmalad galakubigualid, Bab-igargi bangubiguarmalad, a-ular we-garda narmaklesad, gwenadgan-ogannogegar, gatik Bab-igargi akamalagar. Bab-Jesúsgi-bensulidgi unnila abonolesisoggu, we-gardagi Judiomarga e-dadgangi sunmaknado, we bensulidba abonolesmarmoye. Degisoggu, unnila Jesucristogi ataknai-gumarmosunye.
Binsamardo, we-garda birga 70-idu narmaklesye. Be itomargua.
1
Bab Dummad E-Machiba anmarga sunmaksad
1 Bab Dummad, dikasurgus na E-gaya-burba-berbemaladba anmar-babganga sunmakdanikid, akar-akargus sunmakdanibalid.
2 Emiskwasaardi, na E-Machiba Bab Dummad anmarga sunmaksad. Bab Dummad bela ibmar na E-Machigadga guega imaksad, degine, na E-Machiba bela napneg-naid, degine, nibneg-naid nasiksabalid.
3 Bab-Dummad-yeer-dakleged-gandik-gaedi, E-Machi deyob nikmogad, degine, bela Bab Dummadga guedi, E-Machi deyob gumogad. Degine, Bab-Dummad-Machi na e-gaya-burba-sunmaked gandik-nikadba, bela agi ibmar semaid. Bab-Dummad-Machi anmar-iskued anmarga uruknonigu, nibneggi Bab-Dummad-olo-gana argan-nuedsik sigdapsunnad.
Bab-Dummad-Machi angermarba bur dule-dummadid
4 Bab-Dummad-Machi angermarba bur dule-dummadga gunonikid, ar ade gusgu angermarba bur nug-dummarba nika danikid.
5 Ar ade bipisaale Bab Dummad anger-wargwenga gwen weyob sogsasulid:
Be an-machi,
emi-ibagi an be-babga gunonikid.
Sal. 2:7
Deginbali, Bab Dummad anger-wargwenaga gwen sogsasurbalid:
Ani an e-babga guoed,
e, an-machiga gumogoed.
2 S. 7:14
6 Bab Dummad na E-Machi-wargwennaa-gued we-napnegse odenonigu, a-nikdi sogsa-gusad:
Bela Bab-Dummad-angermar
igi Bab Dummadse gormala e-nug-odummogegar,
deyob we-dule-nug odummomarmosun.
Dt. 32:43
7 Angermargindi Bab Dummad sogsa-gusad:
Bab Dummad na E-angermar burwayob imaked,
degine, e-maigandi
soo-gwabunye-gwichiyob imakbalid.
Sal. 104:4
8 Bab Dummad na E-Machi-nikdi soged:
Bedi Baba, be-neg-dakmaid
degi-na-sadegu guoed.
Igar-napiragwadbarbi be neg-dakmaid.
9 Igar-inikigwad-bina bur be soged,
igar-iskanadi istar be daksad.
Degisoggu, Bab Dummad a-ular be-susad,
be-Bab-Dummad,
be-sordamarba dule-dummadga
be-nug-imaksad,
degine, weligwar itogega be-imaksabalid.
Sal. 45:6-7
10 Degine, Bab Dummad E-Machi-nik sogbalid:
Be, Dule-Dummadid,
we-napneg-naid gebesailaunni be nasiksad.
Deginbali, nibneg-naid
be-argangi be nasiksabalid.
11 Nibneg, degi, napneg, amardi berguoed,
bedi degi-sadeguoed.
Bela nibneg, degi, napnegdi sergudmaloed,
igi mormar sergud daedyob.
12 Dule mor-nunud midedyob,
bedi we-napneg, degi, nibneg metoed.
Degine, dule mor-baid yoedyobi,
be we-napneg, degi, nibneg be ogwamogoed.
Ar bedi gwen gwagmaisulid,
Degine, be birgamardi gwen berguosulid.
Sal. 102:25-27
13 Ar bipisaale Bab Dummad anger-wargwenga gwen weyob sogsasulid:
An argan-nuedsik be sige,
be-istarmaladgi bela egi be nakwedse an be-imakoed.
Sal. 110:1
14 Bela angermala Bab-Dummadga-arbamalad burbaled gumalad. Bab Dummad a-angermar-barmialid, adi dulemar-abonolemaloed-bendakega, aga barmilearmalad.