Tohuatti ebreo cajimanajaridenidsa ima teppe dosse inaridsajaro
Hebreos
Jodiodenipa Isaraeri potemahi. Poccadeni ididenipa Abarahao, Isahaca, Jacobo quinajarideni. Pohuadeni atti oninipi ebreo. Pohuadenidsa naco: ebreodeni, quiquinanajari.
Ajijaro ima dsodode onipa ssamo inani. Dio Atti nahatoqquiri najarideni attidenipa: Pablojine jeranitide, quinajari. Jodiodeni Jesodsa jehe quinajarideni nanajidso toquejenadsa Jeso inebomanabote nadsa ajijaro ima dsododepa pohuadenidsa dsodo inajaro. Jeso inebomana-jarahijine dsodo inajaro. Ima onihipi: Moisesicca marinaja ia tonassiaja-baqquinijine pajira-jerani. Jesocristodsa pajissa inajarona denima bica tajaro. Najarodsana icassiejeranijine pajirani, najari pocca dsodonijidsa.
Maittaccadsama jodiodenipa poccadeni imasiri manaconi tojahijine bani bedi bicahi inanadsoqque-manadsa emene Diodsa da da quiquinanajari. Najaro bani bedi emene dada Jesocristojine nebojaro jodiodeni mittamanahissa tahijine pohuadenidsa dsodo inajaro.
1
Diopa iadsa huati tahijine Pohua Bedi dosse inaronajari
1 Maittaccadsama Diopa Pohua Atti cacomeraqquiri najaridenidsana huati tadsa najaridenina icca ididenidsa huati huati ihiqquimamana najaro. Diopa pocca dosseniji, madija pohuadeni tedsejemacca ima ahuato inanajaropi onihi onihi inanajaro. Naraha Pohua Attidsa huati tahi ojari-jerani. Pohua Atti cacomeraqquiri najaridenicca huadadsa naqui ahuato inanajaro, bodideni naco inahattabaqquijari.
2 Naraha jidapana dsama jicanicca tohuajiradsa iadsa huati tahijinepa Pohua Bedi dosse inaronajaride. Najarina iadsa Imehi Atti huati huati ihiqquima najarode. Jehe, Pohua Bedipa tahide Imehi tedseje meme, nami, huapima aniridsajaricca inahatomanapojari. Nadsama Diopa Pohua Bedina cacahuade inanajari. Huapima jinede tojajaripaja.
3 Jehe, najari Dio Bedijinena Imehi Diocca dacorehe, deni tojehe, canahatori canehe iadsa ahuato tajaro. Pohuapa pina Imehi Diossa najari. Nahato tajari. Bica tajari. Meme, nami, huapima aniridsajaricca pohua atti dacorajarodsa: —Anidsanapona −nadsa pohuajine anidsanapojari. Nadsama itohui dsoqquehijine ibora tadsapa pohua emenejine ibodicca imasiri sse naridsadsa ibodi tohuirejaro. Dsotode Diojine deni tojadsapa memehuaji toccamacossanidsa Dio Bicabote inori nahatonihuaji huittarijari.
Diojine Pohua Bedi deni tojadsapa Diocca dodosse tabaqqui memehuajicca ajamani toquejenajari
4 Jehe, Dio Bedi Imehi inorihuaji huittarijaripa Diocca dodosse tabaqqui memehuajiccadsa deni tojajari. Najarossa najaro Dio Pohua Bedi oni icanacanijaripa pocca dodosse tabaqqui onidenidsa deni tojajaro.
5 ¿Diopa pocca dodosse tabaqquideni ojariadsa ajama najarico?
—Tiapi occa Ejedeni tijani.
Jidapana Ohuapi ticca Abi ojani −¿najarittaco?
Nohuerahi. Pohua Bedidsana nama najari nade.
Pohua Atti pocca dodossedsa:
—Ohuapi pocca Abi ojanitohui.
Pohua naco occa Ejedeni tojahitohui −¿najarittaco?
Nohuerahi. Pohua Bedi tahimari huati tapodsana nama nahi nade Abi Dio.
6 Pocca Ejedeni tahidecca pina madija iassa naha tossonahijine iahuaji dosse inaronajari. Nadsapa Pohua Attipa:
—Occa dodosse tabaqqui huapimapa occa Ejedenidsa: “Deni tijani” quinana.
Pohuadsana huahuatidsemana nana, onajaro −nahi nade Dio.
7 Diopa pocca dodosse tabaqqui tahimarideni huati tadsa naco Pohua Attipa:
—Occa dodosse tabaqquipa pina jojode dacorajarossa,
pina jororoni ppocorajarossa onanaridsabaqquijari −nahi nade Dio.
8 Naraha Pohua Bedi tahimari huati tadsapa:
—Tiapi Dio tijani. Ticca cacahuehe nema dsanaponitohui.
Ticca cacahuehepi dacorajaro, pajiranissa dsanaponitohui.
9 Ima bicani, pajiranissa tanicca tohuinira tajaro.
Ima tabaccora taniccadsa jipera tinajaro.
Nema tajaropi Ohuapi ticca Abi Dio tia ocattejidsajaro, tamine tijanijine.
Titessedenidsa tia deni onanajaro.
Tiadsara huatidsehe deni tojanicca onanajaro −nahi nade Dio.
10 Pohua Bedi tahimari denima huati tadsa naco ajama najari:
—Jehe ohua Medsede, tiapi ajijaro dsama nohueraccadsama timadipojaro.
Tiana nami tinahato, meme tinahato najarode.
11 Nidsa najaropi huapima jicaridsanitohui. Naraha tiana timadi-dsanaponitohui.
Aja tinahatoridsajari huapimapa pina etero jadani tocajadsa tojorarajarossa nahitohui.
12 Nadsapi domo taqquininitohui, pina etero jadani domo taqquinijarossa nanitohui.
Pina etero jadani inebodsa onihira edsajarossa najaro.
Najarossa nanitohui aji tinahatoridsajari huapimapa cacajiqquimerahitohui.
Naraha tiana nema tidsanaponitohui. Jadahi ticaja-jeranitohui −nahi nade Dio.
13 Diopa pocca dodosse tabaqquideni ojariadsa naco: —Deni tijani −¿najarittaco? Nohuerahi. Naraha Pohua Bedidsana Atti ajama najari:
—Ohuinori nahatonihuaji tittariji. Ohua tedsejepi tohuatti dacorajaro ticajiji.
Nidsaranibote tia huadidedenipa ajamani onanabaqquihitohui. Poccadeni dacorehepi onajicanitohui −nahi nade Dio.
14 Aja, pocca dodosse tabaqquipa assiredeni qqui inabaqqui-jarahi. Pina madija iassa quina-jarahi. Dio pocca madija tocassiejerajarideni acco camadedeni ahuaji dosse, ahuaji dosse ihinaridsabaqqui najari. Najaridenipa bicaqquiri naraha ajamani toquejenajari. Dio Pohua Bedina deni tojajari, onajaro. Epejeni.