19
1 Tuhme chihquentiyon Pila̱to che chahn sanda̱do Dihvo vo.
2 Sanda̱do chahn ne, dendah se a̱ma corona ya̱n, tihyon se tin Dihvo vo, ne tihyon se a̱ma tino mora̱do ihyan, nduhca̱ tino che rahtenun rey.
3 Chihno min ne, ndo da̱ma se na̱n ye, ne redin ca̱ se che rendeva se yavena̱n ye. Rah se:
―¡Ndeva vo yavena̱n Rey yahn ihyan nación yahn Israel!
Namin chahn se va̱cona̱n ye.
4 Quenda̱h tun Pila̱to, ne ra̱hn se ri se sa̱hn ndina̱n chahn:
―Condihche nchuhn. Ndetendá̱h ihyan meniyon ca̱va che codevano ne te metah nde a̱ma nunde yahn ye.
5 Quenda̱h Dihvo vo, quenun tin ye corona ya̱n me ma̱n, quenun ye tino mora̱do me ma̱n. Tuhme ra̱hn Pila̱to ri se sa̱hn chahn:
―¡Nga̱ ye! ¡Condihchero nchuhn ihyan!
6 Cuahn che ndihchero chidocuya̱n ndina̱n chahn ma̱n, sa̱hn policía ma̱n, Dihvo vo ne, numacuahn vedeta̱n cah se:
―¡Cuaconahn ya̱h ne sa̱hn! ¡Cuaconahn ya̱h ne sa̱hn!
Ra̱hn Pila̱to ri se sa̱hn:
―Cuiquenda ma̱n nchuhn ihyan, cuaconahn ya̱h ne ihyan, te u ne, a techeca̱dé yahn ye, ne a devanó te metah nde a̱ma nunde yahn ye.
7 Ndahconan sa̱hn chahn, ne ra̱hn se ri se Pila̱to:
―Sa̱hn tih ne, va che coh se, te tihca̱ rihquentiyon ley yahn nuhn yahn che ra̱hn se che Da̱ya Dendiohs sa̱hn.
8 Cuahn chihnevan Pila̱to che tihca̱ ra̱hn sa̱hn chahn ne, nde tahque dihya se chi.
9 Ndaconan ndonda̱ se chete pala̱cio yahn se, ne tumerune se Dihvo vo:
―¿Ti ya̱n va̱co ne ne?
Ate Dihvo vo ne, nde hua ndahconan ye yahn se.
10 Tuhme ra̱hn se ri se ihyan:
―¿Dehco che hua rendahconan ne yáhn? ¿A hua devano ne te va vederihquentiyon yáhn? Co nda̱hcó libre ndih ndete che náhn. Namin co ca̱hcantiyón che conan ya̱h ne.
11 Ndahconan Dihvo vo, ne ra̱hn ye ri ye sa̱hn:
―Nde a̱ma vederihquentiyon, hua co conan come ná̱n, ndete che Dendiohs hua te ye di. Chemin che sa̱hn che checu se u tah ne, tahque chendihco se nunde che co di.
12 A nde ura min rinuhn ino Pila̱to ta̱ca̱ co nda̱hco se libre Dihvo vo, ate sa̱hn ndina̱n chahn ne, cah se yahn se:
―Ndete che nda̱hco ne libre sa̱hn tih ne, ¡hua amigo yahn ne emperador ndih!, te adecoduhno ihyan che nahn co ye rey ne, redin va̱hche ye yahn ye.
13 Cuahn che chihnevan Pila̱to che tihca̱ ra̱hn sa̱hn chahn ne, chihquentiyon se che ndiquenda̱h Dihvo vo, ne chihnde se na̱n che retecheca̱de se, na̱n che duche Gabata che deva̱co hebreo, che conahn tuhca̱: “Na̱n Che Chenun Tu.”
14 Ura min ne, ri tenduh na̱n ma̱hn ya̱hn, ne a ta̱ma ro me che ro yudo. Tuhme ra̱hn Pila̱to ri se sa̱hn ndina̱n chahn:
―¡Nga̱ Rey yahn nchuhn!
15 Ate sa̱hn chahn ne, rah se:
―¡Cuedecuihno ne sa̱hn! ¡Cuedecuihno ne sa̱hn! ¡Cuaconahn ya̱h ne sa̱hn!
Ra̱hn Pila̱to ri se sa̱hn chahn:
―¿Ta̱ca̱ che cuaconahn yá̱h Rey yahn ne?
Ate sa̱hn chicocuya̱n ndina̱n chahn ne, ndahconan se, ne ra̱hn se ri se Pila̱to:
―Nuhn ne, atena̱n emperador che rey yahn nuhn.
16 Nduco ndudo che tihca̱ ra̱hn se ne, nda̱hco Pila̱to Dihvo vo ta̱h se ca̱va che conan ya̱h ye, ne quenda se ihyan.
Chaconahn ya̱h se Dihvo vo Jesuchristo
17 Quenda se Dihvo vo, ne quenda ye cruz na̱n che va che conan ya̱h ye, cuahn ye a̱ma cua̱n na̱n che duche Cuete Ine Tin Tena̱hn, ne che deva̱co hebreo ne, duche Gólgota.
18 Min chaconahn ya̱h se Dihvo vo da̱ma nduco o se, a̱ma se a̱ma a̱ma la̱do chihto na̱n ye.
19 Dirun Pila̱to a̱ma letrero, ne chihquentiyon se che quenan tin cruz. Ndirun tuhca̱: “Ihyan cuh che Jesús yahn ya̱n Nazaret, Rey yahn ihyan nación yahn Israel.”
20 A̱ma ya̱hn sa̱hn nación yahn Israel ndihchenan se che tihca̱ ndirun, te na̱n che chaconahn ya̱h se Dihvo vo ne, nino viya̱n me. Letrero me ne, ndirun deva̱co hebreo ma̱n, griego ma̱n, latín ma̱n.
21 Chidocuya̱n ndina̱n chahn ne, ra̱hn se ri se Pila̱to:
―Hua nda̱hca̱ che dirun ne “Rey yahn ihyan nación yahn Israel.” Tahque ndah ne, codirun ne “Ihyan cuh ne, ra̱hn ye che ma̱n ye che Rey yahn ihyan nación yahn Israel.”
22 Ate Pila̱to ne, ra̱hn se ri se sa̱hn:
―Che dirún ne, a tihca̱ conan, ametah nda̱hcorún.
23 Cuahn che a chihno chaconahn ya̱h sanda̱do chahn Dihvo vo ne, cahn ma̱hn se tino yahn ye va̱n cun se. Namin cheta̱h se cahteca tu yahn ye, ne nducote chemin ne, hua nta̱hyon te ndiya ne,
24-25 chemin che ra̱hn se nduco vih:
―Tahque ndah ne, hua ndeh vo, ne tenda̱h vo suerte yuhn vo ca̱va che cadino vo cha uvo che quenda̱h yuhn vo che co yuhn vo.
Tihca̱ din se, ne chinahn nduhca̱ che ndirun na̱n Ndudo yahn Dendiohs tuhca̱: “Cahn ma̱hn se tino yáhn nduco vih, ne tenda̱h se suerte cha sa̱hn quenda̱h yahn se che co yahn se tino tu yáhn.”
Chihto cruz na̱n che quenan ya̱h Dihvo vo ne, nti chaco ye ma̱n, coh chaco ye María, nda̱hta yahn Cleofas ma̱n, María yahn ya̱n Magdala ma̱n.
26 Cuahn che ndihchero Dihvo vo chaco ye ma̱n, a̱ma ihyan apóstol, ihyan min che a̱ma din yahino ye ma̱n, che vatendi ye min ne, ra̱hn ye ri ye chaco ye:
―Chacó, nga̱ da̱ya ne, nti se ta̱n.
27 Namin ra̱hn ye ri ye ihyan apóstol me:
―Nga̱ cheque, nti ye ta̱n.
Nde ro min ndeva ihyan apóstol min chaco Dihvo vo ndeva̱co ye.
Chih Dihvo vo Jesucristo
28 Chihno min ne, nducote a devano Dihvo vo che a chinahn nducuahn ne, ca̱va che conan conahn nduhca̱ che a ndirun na̱n Ndudo yahn Dendiohs ne, ra̱hn ye:
―Ya̱ca rí.
29 Va a̱ma ja̱rro min ndito vino. Tuhme chaconahn sa̱hn chahn a̱ma esponja tin a̱ma nduco che duche hisopo, ne deca̱hnda se esponja me nduco vino me, chaconahn se chende Dihvo vo.
30 Tihve ye vino me, ne ra̱hn ye:
―Ma̱n ne, a chinahn nducuahn.
Tuhme chendih ye, ne chih ye.
A̱ma sanda̱do ne, terun se la̱nza ticua Dihvo vo Jesucristo
31 A ta̱ma ro me che vihco ro yudo, ne chemin che hua nahn chidocuya̱n ndina̱n chahn che cuahtendihco tena̱hn na̱n cruz ro che rahtetuhno ihyan, te a̱ma yudo ro min. Chemin che chica se Pila̱to che dechuh se sanda̱do che ca̱hn se, ndeh se ine dihma ihyan che chenan ya̱h chahn, ne ndedevah se ihyan.
32 Tuhme tahve Pila̱to sanda̱do, chahn se, ndeh se ine dihma a̱ma sa̱hn che quenan ya̱h chihto na̱n Dihvo vo. Chihno min ne, ndeh se ine dihma sa̱hn che ta̱ma me.
33 Me cuahn che chahn nda̱ se na̱n che quenan ya̱h Dihvo vo ne, ndihchero se che a ndih ye. Chemin che ametah ndeh se ine dihma ye.
34 Ate nde nduco nduh ne, ca̱h a̱ma sanda̱do la̱nza ticua ye nino van chete ye, ne quenda̱h yun ma̱n, nune ma̱n.
35 U che dirún ca̱ca cuh ne, cua̱co ndudo che dirún, te má̱n ndihcheró che tihca̱ chi. Dirún yahn ca̱va che namin nchuhn ne, cotahno ne.
36 Tihca̱ chahno chi Dihvo vo ca̱va che conahn nduhca̱ che a ndirun na̱n Ndudo yahn Dendiohs tuhca̱: “Hua ndeh se nde a̱ma ine yahn ye.”
37 Namin chinahn nduhca̱ che a ndirun ta̱ma cua̱n na̱n Ndudo yahn Dendiohs tuhca̱: “Cuahtendi se, ndihchero se ihyan che ca̱h se la̱nza.”
Quenun Dihvo vo Jesucristo chete ya̱yan
38 Chihno min ne, a̱ma ihyan ya̱n Arimatea che duche ye José, che chitahno ye Dihvo vo cua̱hn ndeh yahn che va̱h ye chidocuya̱n ndina̱n chahn ne, chica ye Pila̱to ca̱va che ca̱h yune se che ndedevah ye Dihvo vo, quenda ye ihyan, cuhche ye ihyan. Ca̱h yune Pila̱to, ne chahn José quenda ye Dihvo vo.
39 Nicodemo, ihyan min che chahn ye vino chendihchero ye Dihvo vo ne, namin chahn ye nduco José, ne quenda ye ndico ndiche kilo nuneda̱n che ndindah nduco mirra ma̱n, áloes ma̱n.
40 Ndedevah ihyan chahn Dihvo vo, ne chacota̱hme ye nuneda̱n me tino, chahcotuma ye Dihvo vo nduhca̱ costumbre yahn ihyan nación yahn Israel che rihche ye tena̱hn.
41 Nino na̱n che nahn ya̱h se Dihvo vo ne, va a̱ma cua̱n na̱n che va ya̱hn nda̱ta. Min va a̱ma ya̱yan ra na̱n che nde a̱ma tena̱hn metah conun ye.
42 Min chaconuhn ihyan chahn Dihvo vo yahn che nino ri, te a cuana̱n ro che rahtetuhno ihyan.