10
Ndihco ca̱de Dendiohs che hua tehche vih ihyan che nihneva̱co ye
1 Chica Dihvo vo ya̱n Capernaum, ne cuahn ye cua̱hn esta̱do yahn Judea, ya̱hn viche la̱do ca̱h yahn ico Jordán, ne ndaconan ndo da̱ma a̱ma ya̱hn ihyan na̱n ye. Ricuahn ye ihyan chahn nduhca̱ che redin ye ro ro.
2 A̱ma ro min ne, nda̱ a̱ma o sa̱hn fariseo, ca̱va che tumarande se Dihvo vo. Tumerune se ihyan ndete che ndihquentiyon Dendiohs che co tehche ihyan nda̱hta yahn ye.
3 Ndahconan ye yahn se, ne tumerune ye sa̱hn:
―¿Deh rihquentiyon ley che dirun Moisés ne?
4 Ndahconan se, ne ra̱hn se ri se ihyan:
―Na̱n ley che dirun Moisés ne, ndirun che nduco che dendah ihyan a̱ma acta ne, co tehche ye nda̱hta yahn ye.
5 Ra̱hn Dihvo vo ri ye sa̱hn:
―Tihca̱ dirun ye yahn che duhtuno ihyan nchuhn.
6 Ate cuahn che dendah Dendiohs iyehnse ne, dendah ye cha̱hn ma̱n, nda̱hta ma̱n,
7 ne chihquentiyon ye che va che ca̱hcoma̱n ihyan chida ye ma̱n, chaco ye ma̱n, ca̱va che conan cuma ye nda̱hta yahn ye.
8 Nduco tihca̱ ne, conan cuma vih ye anduhneca̱ ndete che a̱ma no ye.
9 Chemin che cuahn che cahneva̱co ihyan ne, anduhneca̱ ndete che din da̱ma Dendiohs ihyan, ne ndihquentiyon ye che hua tehche vih ye.
10 Cuahn che a ndonda̱ Dihvo vo vah ne, tumerune ihyan apóstol deh conahn che ra̱hn ye me.
11 Ra̱hn ye ri ye ihyan chahn:
―Adecoduhno ihyan che tehche ye nda̱hta yahn ye, ne cahneva̱co tun ye nduco ta̱ma nda̱hta ne, din duche yahn ye che nihneva̱co ye.
12 Adecoduhno ihyan nda̱hta che tehche ye incha̱hn ye, ne cahneva̱co tun ye nduco ta̱ma cha̱hn ne, namin din duche yahn ye che nihneva̱co ye.
Dihvo vo Jesucristo ne, rica ye Dendiohs che din yahino ye checa̱hya
13 A̱ma yune ne, nda̱ ihyan, nda ye checa̱hya yahn ye na̱n Dihvo vo ca̱va che nahn ta̱h ye, ne ca̱ca ye Dendiohs ca̱va. Ate ihyan apóstol ne, ra̱hva ye nduco ihyan chahn.
14 Ndihchero Dihvo vo che tihca̱ redin ihyan apóstol chahn, ne chi yudo yahn ye, ne ra̱hn ye:
―Ca̱h yune nchuhn che chi checa̱hya ná̱n. Hua ca̱hdenun ne, te atena̱n ihyan che necun ye nduhca̱ checa̱hya chuhn, co nevahnecun ye che ca̱hcantiyon Dendiohs ihyan.
15 Cua̱co rá̱hn rí nchuhn te adecoduhno ihyan che hua dinahn ye che rihquentiyon Dendiohs nduhca̱ che redinahn a̱ma lihn ne, ihyan min ne, hua co conan ye na̱n che rihquentiyon Dendiohs.
16 Tuhme cheta̱h Dihvo vo checa̱hya chahn, quenuhn ye. Nahn ta̱h ye, ne chica ye Dendiohs ca̱va.
A̱ma sa̱hn cuihca che hua chinduco se Dihvo vo Jesucristo
17 Cuahn che a quenun yune Dihvo vo cuahn ye ne, nda̱ a̱ma se rano se. Chehntihya se na̱n ye, ne tumerune se ihyan:
―Ihyan Ricuahn ndah, ¿deh va che dín ca̱va che conán vahchetero numacuahn ro ne?
18 Ndahconan ye, ne ra̱hn ye ri ye sa̱hn:
―¿Dehco che rahn che ndah u ne? Metah nde a̱ma ihyan che ndah ye. Atena̱n Dendiohs, ihyan min che ndah ye.
19 A devene vederihquentiyon yahn ye: “Hua din duche yehn che nihnevaque. Hua cahne ihyan. Hua doque. Hua cahme ndudo cuahnde. Hua cahncheh ihyan. Cuendeva yavena̱n chide ma̱n, yavena̱n cheque ma̱n.”
20 Ra̱hn se ri se ihyan:
―Ihyan Ricuahn, nde ro che lihn u ne, redináhn nducuahn vederihquentiyon min.
21 Tuhme ndihchero Dihvo vo sa̱hn numacuahn vedeyahino, ne ra̱hn ye:
―Va ta̱ma na̱n che va che din. Cuehn condihcue nducuahn che va yehn, ne cuinen ihyan cheva̱h ca̱va che conen vahchetero numacuahn ro. Tuhme cochi condoque u, andahre nahn ya̱hn ihyan di na̱n a̱ma cruz.
22 Ate a̱ma chi ra̱n se che tihca̱ ra̱hn ye, yahn che a̱ma cuihca se. Tahque ndah se ne, ca se yune yahn se cona̱hn se.
23 Tuhme chaconan Dihvo vo ndihchero ye ihyan apóstol yahn ye, ne ra̱hn ye:
―¡A̱ma va̱hche ca̱va ihyan che nevahnecun ye vederihquentiyon yahn Dendiohs!
24 Chahn ino ihyan apóstol chahn che tihca̱ ra̱hn Dihvo vo. Ate ndaconan ra̱hn tun ye:
―Da̱yá, ¡a̱ma va̱hche ca̱va ihyan che yahino ye vedecuihca ca̱va che nevahnecun ye vederihquentiyon yahn Dendiohs!
25 Nde hua co nevahnecun ye.
26 Ate nde tahque cuahn ino ihyan chahn che tihca̱ ra̱hn Dihvo vo, ne ra̱hn ye va̱n ma̱n ye nduco vih:
―Ndete che tihca̱ ne, nde a̱ma ihyan hua co ndevahn ye.
27 Ndihchero ye ihyan chahn, ne ra̱hn ye:
―Che la̱do yahn ihyan ne, hua co. Ate che la̱do yahn Dendiohs ne, co, te Dendiohs ne, ri redin ye nducuahn.
28 Tuhme tumerune Pedro:
―¿Ta̱ca̱ co yahn nuhn tuhme ne? Chihcoma̱n nuhn nducuahn yahn nuhn, ne chinduco nuhn ndih.
29 Ndahconan Dihvo vo, ne ra̱hn ye ri ye ihyan:
―Cua̱co rá̱hn rí nchuhn te vate ihyan che a chihcoma̱n ye dehtenduh yahn ye ca̱va u nduco ndudo ndah yahn Dendiohs. A chihcoma̱n ye va̱co ye ma̱n, dihno ye ma̱n, cahve ye ma̱n, chida ye ma̱n, chaco ye ma̱n, ihyan nda̱hta yahn ye ma̱n, da̱ya ye ma̱n, ya̱hn yahn ye ma̱n.
30 Ma̱n ro cuh ne, nta̱ca ihyan chahn a̱ma ciento queri a̱ma che chihcoma̱n ye. Andahre che va̱co ye ma̱n, dihno ye ma̱n, cahve ye ma̱n, chaco ye ma̱n, da̱ya ye ma̱n, ya̱hn yahn ye ma̱n. Rechuhrihn ye, ate adive ne, conan ye vahchetero numacuahn ro.
31 Ate nda̱ ro che cuhnde ca̱de yahn nducoya̱ca ihyan ne, a̱ma ya̱hn ihyan che rivahn che quenda̱h ndah ye ne, hua quenda̱h ndah ye, ne ihyan che nde hua ro che quenda̱h ndah ye ne, quenda̱h ndah ye.
Dihvo vo Jesucristo ne, ra̱hn ye ta̱ma yune te va che ca̱hno se ihyan
32 Quendi Dihvo vo cuahn ye ya̱n Jerusalén, ne nda̱hna̱n ye yahn ihyan apóstol yahn ye. Namin cuahn a̱ma ya̱hn ihyan cua̱hn veda̱me ye. Ihyan apóstol ne, a̱ma cuahn ino ye che cuahn Dihvo vo ya̱n Jerusalén na̱n che ca̱hnda yahn ye, ne ihyan chena̱hn ne, a̱ma va̱hino ye. Tuhme quenda Dihvo ihyan apóstol chahn a̱ma la̱do, ne ca̱h cuande ye ihyan nducuahn che va che cuahno co ye.
33 Ra̱hn ye:
―Condihche nchuhn. Uvo ne, a chenun yuno vo cuahn vo ya̱n Jerusalén. U che rinducó nducoya̱ca ihyan ne, neca̱h sa̱hn nunde u ta̱h chidocuya̱n ndina̱n ma̱n, sa̱hn devano ley che dirun Moisés ma̱n. Sa̱hn chahn ne, ca̱hco ca̱de se che ca̱hno se u, ne nda̱co se u ta̱h sa̱hn ta̱ma nación
34 che din duche yahn se u ma̱n, ca̱hnan dan se u ma̱n, cuahn se u ma̱n, nde ca̱hno se u ma̱n. Ate cuihno ino ro ne, ntuché va̱n tena̱hn.
Jacobo nduco Jua̱n ne, rica ye na̱n che cuahte ye
35 Tuhme nda̱ nduh che o da̱ya Zebedeo, Jacobo nduco Jua̱n, ne ra̱hn ye ri ye Dihvo vo:
―Ihyan Ricuahn, rica nuhn a̱ma favor ndih.
36 Tumerune Dihvo vo:
―¿Deh nahn nchuhn ne?
37 Ndahconan ihyan chahn, ne ra̱hn ye:
―Cuahn che cuhnde ne ca̱hcantiyon ne ne, te yune ne che cuhnde a̱ma cha nuhn la̱do ta̱h cua̱co ne, ne ta̱ma cha nuhn ne, la̱do ta̱h cueh ne.
38 Ate ra̱hn Dihvo vo ri ye ihyan chahn:
―Nde hua devano nchuhn deh che rica ne. ¿A cocha ne chuhrihn ne nduhca̱ che va che chuhríhn ne? ¿A cocha ne che ca̱hno se nchuhn nduhca̱ che va che ca̱hno se u ne?
39 Ndahconan ihyan chahn, ne ra̱hn ye:
―Ta̱ca hua. Cocha nuhn.
Tuhme ra̱hn Dihvo vo ri ye ihyan chahn:
―Cua̱co te chuhrihn nchuhn nduhca̱ che chuhríhn. Namin ca̱hno se nchuhn nduhca̱ che ca̱hno se u.
40 Ate che cuahte ihyan la̱do ta̱h cua̱có ma̱n, la̱do ta̱h cuéh ma̱n ne, ndiyu u che ca̱hcantiyón, te Dendiohs che ca̱hcantiyon ye.
41 Checadino ihyan apóstol chena̱hn chahn, ne chi ta̱n ye nduco Jacobo ma̱n, Jua̱n ma̱n.
42 Ate nedin da̱ma Dihvo vo nducoya̱ca ihyan chahn na̱n ye, ne ra̱hn ye ri ye ihyan:
―Nchuhn ne, a devano ne te ihyan che rihquentiyon ye nducuahn nación ne, a̱ma yudo rihquentiyon ye, ne sa̱hn che rinan se ihyan ne, rendinun rendina̱hno se ihyan yahn ye.
43-44 Ate hua co tihca̱ va̱n nchuhn. Tahque ndah ne, duh ihyan che nahn cona̱n ye va̱n nchuhn ne, co ye nduhca̱ a̱ma sa̱hn deca̱hya yahn ne.
45 Tihca̱, te nde u che rinducó nducoya̱ca ihyan ne, hua ndá̱ ca̱va che dín deca̱hya yáhn ihyan. Tahque ndah ne, ca̱va che conan má̱n ihyan, nde ca̱hco mendá̱hn u, cóh, ca̱va che ndedeváhn a̱ma ya̱hn ihyan.
Dihvo vo Jesucristo ne, din ye che chi ro na̱n Bartimeo
46 Nda̱ Dihvo vo nduco ihyan apóstol yahn ye ya̱n Jericó. Cuahn che nda̱ca ye min ne, a̱ma ya̱hn ihyan nduco ye ihyan. Chihto yune ne, va a̱ma sa̱hn na̱n ve che duche se Bartimeo, da̱ya Timeo. Min va se rica se che din ihyan vedeva̱hino nduco se.
47 Cuahn che chihnevan se che a cochi nino Dihvo vo Jesucristo, ihyan min che chihta ye ya̱n Nazaret ne, cana̱n rica se favor ihyan, ne ra̱hn se numa dito se:
―Jesús, Da̱ya David, ¡cuenan va̱hino ne u!
48 A̱ma ya̱hn ihyan ra̱hn ye ri ye sa̱hn che cuhnde dihn chende se. Ate nde tahque yudo na̱n ca se ra̱hn se:
―Da̱ya David, ¡cuenan va̱hino ne u!
49 Chan Dihvo vo, ne ra̱hn ye:
―Cuahn nchuhn chehua ne sa̱hn.
Chahn ihyan, ne ra̱hn ye nduco se:
―Dehve raque. Cuenecuen, te rah ye di.
50 Tuhme chi se a̱ma la̱do tino che rendiche se, ne necuan se aderano se cuahn se na̱n Dihvo vo.
51 Tumerune ye sa̱hn:
―¿Deh nehn che dín ndoque ne?
Ndahconan se yahn ye:
―Ihyan Ricuahn, náhn che din ne che co ro ná̱n.
52 Tuhme ra̱hn ye ri ye sa̱hn:
―Co nahn. Nducote chitehne ne, a ndoyehn.
Ndeta̱hno chi ro na̱n se, ne cuahn se nduco Dihvo vo cua̱hn na̱n che cuahn ye.