4
1 Mweye wenevale watendeleni yanogile na fana Mulungu viyolonda kwa watumwa wenu, muhavimanya kuwa na mweye iviya munayo Mwenevale wenu kuulanga.
Ndagilizi kwa wahuwila wose wa Chilisito
2 Sekemuleke kutosa, na muhatosa, muwe meso na mumwing'he hewela Mulungu.
3 Muchitosele cheye iviya, muladi Mulungu yaching'he nzila inogile ya kupeta usenga wake haumanyika wa Chilisito. Kwa ichimu icho lekamana niye sambi namuna ichifungo.
4 Nitambikileni muladi nidahe kugong'onda funhu funhu fana vonilondeka.
5 Muwe wabala muna ukukala na wanhu weli si wahuwila wa Chilisito, sang'hanileni vinogile lusita lumwili nawo.
6 Ulonzi wenu uwe na unovu siku zose, udahe kunogeza, na molondeka muvimanye kumwidika vinogile chila munhu.
Mbuli za kukomelezela
7 Ndugu yetu mulondwa Tukiko, yeli msang'hani mwaminika na msang'hani miyetu muna usang'hano wa Mndewa, kezamwing'hani mbuli zose kusonhela niye.
8 Lekamana nomtuma kumwenu muladi yamsangalazeni mizoyo yenu kwa kuwalongeleni mbuli zetu.
9 Kezakwiza na Onesimo, ndugu mulondwa yeli munhu wa kwaminika, iyo ni munhu wa kumwenu kezawalongelani mbuli zose za hano hamwetu.
10 Alisitaliko yeli muna ichifungo hamwe na niye, komulamsani, na Maliki iviya, mwihwa wa Balinaba. Muhokela mumala ndagilizi za kumuhokela Maliki yaheza kumwenu.
11 Na Yosuwa, zina jake dimwenga Yusito, iviya komulamsani. Wano watatu wawo Wayahudi muhala wowahuwile na kusang'hana usang'hano hamwe na niye kwa ichimu cha Ufalume wa Mulungu, na wanitaza ng'hani.
12 Na Epafulo yeli munhu wa kumwenu, msang'hani wa Yesu Chilisito, komulamsani, koiyoha kumtoselani muladi mwime chigangamavu na mkangale na muyamanye ng'hani malondo ya Mulungu.
13 Nomulavila ukalangama kuwa kosang'hana ng'hani kwa ichimu cha mweye na kwa ichimu cha wawo weli Laodikiya na kwa ichimu cha wawo weli Hiyelapoli.
14 Na Luka yeli mganga wetu mulondwa na Dema, womulamsani.
15 Walamseni ndugu weli Laodikiya, na mulamseni mwali Nimifa, na bumbila da wahuwila woiting'hana mwiikaye yake.
16 Muhakomeleza kusoma usenga uno, weng'heni na wayenu bumbila da wahuwila wa Laodikiya na wawo wasome, na usenga woniwandikile wanhu wa Laodikiya, wamwing'heni na mweye musome.
17 Na mulongeleni Alikipo, “Wilole goya sang'hano ija yowing'higwe na Mndewa.”
18 Niye Paulo nokwandika ndamsa zino kwa mkono wangu mwenyewo. Kumbukeni mizabi yangu.
Nowapulileni unovu wa Mulungu.