15
Mwaka wesaba
(Walawi 25:1-7)
“Chila kuuhelelo wa mwaka wesaba mwizawalekela wanhu wose wodaigwa. Vino niivo vondamutende, chila imwe yoyamwazime miyage, kolondeka yamulekelele deni ijo, sekeyamdai kwaviya Mndewa Mulungu mwenyewo kalagiliza deni ijo disegezigwe. Modaha kuwawangiliza nyambenyambe wamuliheni, mbali wakaya wayenu Waisilaili muwalekelele.
“Mndewa Mulungu, Mulungu wenu, kezamtemelani mate muna iisi iyomwing'hani iwe yenu. Habule hata munhu imwe yondayawe ngayengaye, one muhamtegeleza Mndewa Mulungu, Mulungu wenu kwa kuzindilila vinogile malagilizo yonimulagilizani diyelo. Mndewa Mulungu, Mulungu wenu, kezamtemelani mate fana viyamulaganileni. Mweye mwizawazima wanhu wa zisi nyingi, mbali mweye hamwizakwazima. Iviya mwizatawala zisi nyingi, mbali wawo hawezamtawalani.
“Kuhawa na munhu ngayengaye muna dibululu diyomwing'hani Mndewa Mulungu, Mulungu wenu, sekemuwe wagila na wagahigahi kumwake. Gubuleni makono yenu na mumwazime chiyasi chiyolonda bila kuwangilizigwa. Muiteganye magesa yehile sekeyamwingileni muna imizoyo yenu na kulonga, ‘Mwaka wa saba, mwaka wa kuwalekela wochiwadai, wahabehi.’ One muhamgesa ndugu yenu ngayengaye kwa ukali na kulema kumwing'ha chochose, yeye kodaha kumulilila Mndewa Mulungu kwa ichimu chenu na ivo yokuwa uhasanyi kumwenu. 10 Mwing'heni ngayengaye kwa makono maidi na kwa moyo umwe bila kulongelela, kwaviya kwa ichimu icho Mndewa Mulungu, Mulungu wenu, kezamtemelani mate kwa chila chimusang'hana. 11 Kwaviya ngayengaye hawaswela muna iisi, ivo nomulagilizani mugubule makono yenu kwa wakaya wayenu na ngayengaye na wanhu wolonda muna iisi yenu.
Voilondeka kuwatendela watumwa
(Kulawa 21:1-11)
12 “One mkaya miyago Muisilaili, wa chilume hebu wa chike yahachuuzigwa kumwako, kezakusang'hanila kwa miyaka sita, mbali mwaka wesaba kwizamuleka yailegehe. 13 Vondaumuleke yailegehe, sekeumuleke yasegele bila chinhu. 14 Mwing'he kwa makono maidi chiya chiyakwing'hile Mndewa Mulungu, Mulungu wako, bumbila jako da ng'hondolo na mhule na divai. Kwizamwing'ha fana Mndewa Mulungu viyakutemele mate. 15 Kumbuka weye kukala mtumwa kuja Misili na Mndewa Mulungu, Mulungu wako, kakukombola, lekamana diyelo nokwing'ha lagilizo dino.
16 “Mbali msang'hani wako yahakulongela, ‘Silonda kusegela kumwako,’ kwaviya kokulonda weye na wanhu weli muna ikaye yako na konogelwa kukala na weye, 17 sola sanziya na utobole gutwi jake mbaka sanziya iyo ingile muna ulwivi, nayo kezakuwa mtumwa wako siku zose. Iviya msang'hani wako wa chike mtendele ivo ivo. 18 Wala sekeuwone udala vondaumuleke mtumwa wako yailegehe, kwaviya kakusang'hanila miyaka sita kwa nusu ya maliho ya msang'hani wa kulihigwa. Tenda ivo na Mndewa Mulungu, Mulungu wako, kezakutemela mate kwa chila chinhu choutenda.
Waudele wa ng'ombe na ng'hondolo
19 “Mwikile hakwe Mndewa Mulungu, Mulungu wako, waudele wose wa chilume wa bumbila jako da ng'ombe na ng'hondolo. Sekeuwasang'hanize ng'ombe wawo na ng'hondolo wawo na sekeuwakanhe yamazoya. 20 Chila mwaka weye na wanhu wa muna ikaye yako mwizakuja wanyama wawo haulongozi ha Mndewa Mulungu, Mulungu wenu, hanhu hondayahasagule Mndewa Mulungu. 21 Mbali mnyama iyo yahawa mbetembete hebu chipofu hebu chilema chochose, sekeumulave nhambiko kwa Mndewa Mulungu, Mulungu wako. 22 Kwizamuja mnyama iyo uhawa muna dibululu jako, wanhu wose wambule mwiko na hawambule mwiko wodaha kumuja fana viuja mhala hebu ng'hulungu. 23 Sekemuje damu yawo, mbali mwiitile hasi fana mazi.