28
Kutemiligwa mate kwa wanhu wotegeleza
(Walawi 26:3-13; Kumbukumbu 7:12-24)
1 “One muhamtegeleza Mndewa Mulungu, Mulungu wenu na kuzindilila chigangamavu malagilizo yake yonimulagilizani diyelo, Mndewa Mulungu, Mulungu wenu, kezamtendani muwe na nguvu kufosa zisi zose.
2 One muhamtegeleza Mndewa Mulungu, Mulungu wenu, mwizatemeligwa mate vino,
3 “Yezatemeligwa mate mabululu yenu na migunda yenu.
4 “Mwizatemeligwa mate muladi mupate wana wengi na ndiya nyingi na ng'ombe wengi na ng'hondolo wengi.
5 “Vizatemeligwa mate visege venu va mhule na via venu va kubulugila.
6 “Mwizatemeligwa mate vimukwingila na vimulawa.
7 “Wehi wenu wahamtowani, Mndewa Mulungu kezamtendani muwahume. Wezakwiza kumtowani kwa nzila imwe mbali wezakimbila kwa nzila saba.
8 “Mndewa Mulungu, Mulungu wenu, kezatemela mate madungu yenu na sang'hano zenu zose. Kezamtemelani mate muna iisi iyomwing'hani.
9 “Mndewa Mulungu kezamtendani muwe wanhu wake wa chiidumwe fana viyamulaganileni, one muhazindilila malagilizo yake yeye Mndewa Mulungu, Mulungu wenu na kusondelela nzila zake.
10 Maabaho wanhu wa zisi zose wezawona kuwa Mndewa Mulungu kamsagulani muwe wanhu wake mwenyewo, nawo wezamdumbani.
11 Mndewa Mulungu kezamwing'hani wana wengi na ng'ombe wengi na mavuno mengi muna iisi iyawalaganile wasaho zenu kuwa kezamwing'hani.
12 Mndewa Mulungu kezamvugulilani dungu jake dinogile kulawa kuulanga na kugala mvula muna iisi kwa lusita lwake na kutemela mate sang'hano zenu. Mwizawazima wanhu wa zisi nyingi, mbali mweye hamwizakwazimigwa na munhu yoyose.
13 Mndewa Mulungu, Mulungu wenu, kezamtendani muwe ditwi siyo mkila, mwizakuwa uchanyha siyo hasi, one muhazindilila malagilizo ya Mndewa Mulungu, Mulungu wenu, yonimulagilizani diyelo na kuiteganya kuyatenda,
14 bila kuhinduka kulume hebu kumoso kusondelela milungu imwenga na kuisang'hanila.
Kuleka kutegeleza
(Walawi 26:14-46)
15 “One hamumtegeleza Mndewa Mulungu, Mulungu wenu, hebu one hamuzindilile malagilizo yake yose na ndagilizi zake zose zonimulagilizani diyelo, mwizapatigwa na maduwilo yano yose,
16 “Mwizaduwiligwa muna yamabululu yenu na migunda yenu.
17 “Vizaduwiligwa visege venu va mhule na via va kubulugila magate.
18 “Mwizaduwiligwa kwa kwing'higwa wana wadodo na ndiya ndodo na ng'ombe wadodo na ng'hondolo wadodo.
19 “Mwizaduwiligwa vimukwingila na vimulawa.
20 “One muhatenda wihi na kumuleka Mndewa Mulungu, kezamgalilani duwilo na tibwilitibwili na manhesa muna zisang'hano zenu zose, mbaka wose munangigwe himahima.
21 Mndewa Mulungu kezamgalilani mitamu ihile mbaka mose mudanganike muna iisi imuhita kuisola.
22 Mndewa Mulungu kezamtowani kwa utamu wa kololo dikulu na homa na maihu na vuke na ng'hangu na vulavumbi na chimvuguya, mwizapatigwa na vinhu ivo mbaka munangigwe.
23 Ulanga wizanyala fana shaba ilibule mvula, na isi izakuwa fana zuma.
24 Mndewa Mulungu kezatenda timbwisi na msanga kuwa mvula yenu, timbwisi dizamtonyelani mbaka munangigwe.
25 “Mndewa Mulungu kezamtendani muhumigwe na wehi wenu. Mweye mwizahita kuwatowa kwa nzila imwe, mbali mwizawakimbila kwa nzila saba. Na mwizakuwa usisa kwa wanhu wose.
26 Mitufi yenu izakuwa ndiya ya ndege na wanyama wa kumbago, hahezakuwa na munhu yoyose wa kuwawinga.
27 Mndewa Mulungu kezamgalilani maihu yoyaweng'hile Wamisili, kezamwing'hani vilonda na utamu wa mbende na kuwawa, ivo hamudaha kuhona.
28 Mndewa Mulungu kezamtendani muwe na vichala, mwizakuwa vipofu na mwizakuwa na lukwale.
29 Mwizahita kwa kubabasababasa imisi fana vipofu hebu hamwizakomeleza sang'hano zenu. Mwizakuwa mobabanyigwa na kubawiligwa chila lusita na hakwizakuwa na munhu wa kumtazani.
30 “Mwizawalavila chamha wanaake, mbali walume wamwenga wezawabandama kwa kuwawangiliza. Mwizazenga kaye, mbali hamwizakala umo bule. Mwizahanda mizabibu mbali hamwizakwaha.
31 Ng'ombe wenu wezachinjigwa haulongozi henu, mbali hamwizalanza hata chihande chimwe. Vihongwe wenu wezasoligwa kwa nguvu kuulongozi wenu na hebu hawezabwelezigwa. Ng'hondolo wenu wezakwing'higwa wehi wenu na habule munhu yondayadahe kumtazani
32 Wanenu wa chilume na wa chike wezalavigwa kwa wanhu wamwenga kuno mowalolela imisi mbaka ichigulogulo wabwele, mbali hamwizakuwa na nguvu ya kutenda chochose.
33 Isi ngeni izasola mazao yose ya isi yenu na matunda ya vuke jenu, mweye mwizabamanyigwa na kugazigwa siku zose,
34 mwizapata vichala kwa mbuli zomuziwona kwa meso yenu.
35 Mndewa Mulungu kezamgalilani muna yamavindi yenu na magulu yenu maihu yehile, hamudaha kuhonyigwa, yezakwenela kwandusila kuulwayo mbaka kudidosi.
36 “Mndewa Mulungu kezamgalani kuna iisi ya nyambenyambe, mweye na mfalume wenu, uko mweye hebu wasaho zenu hamkumanyile. Mwizasang'hanila milungu imwenga yoitendigwe kwa mibiki na mabwe.
37 Muna iisi yondayamgaleni Mndewa Mulungu, wanhu wezamwidukani kwa chiya chilawilile kumwenu, uko wezamzehani.
38 “Mwizahanda mbeyu nyingi, mbali mwizagobola chidogo, kwaviya nzige wezakuja.
39 Mwizahanda mizabibu mingi na kuihalila, mbali hamwizakwaha hebu hamwizakung'wa divai yake, kwaviya wang'onyo wezakuja.
40 Mwizakuwa na mizaituni chila hanhu muna iisi yenu, mbali hamwizakuwa na mavuta ya zaituni, kwaviya zaituni izo zizapagatika.
41 Mwizakweleka wana wa chilume na wa chike, mbali hawezakuwa wenu, kwaviya wezasoligwa kuna utumwa.
42 Mibiki yenu yose na mazao yenu yose vizabanangigwa na nzige.
43 “Nyambenyambe wowokala muna iisi yenu wezakuwa uchanyha, mbali mweye mwizakuwa hasi.
44 Wawo wezakuwa na hela za kumwazimani, mbali mweye hamwizakuwa na hela za kuwazima wawo. Wawo wezakuwa ditwi na mweye mwizakuwa mkila.
45 “Maduwilo yayo yose yezampatani mweye mbaka mudanganizigwe, kwaviya hamutegeleze dizi da Mndewa Mulungu, Mulungu wenu, kusonhela kuzindilila ndagilizi na malagilizo yake yoyamulagilizileni.
46 Mbuli izo zizakuwa ukalangama wa nhaguso ya Mndewa Mulungu kumwenu na kwa welesi wenu siku zose.
47 Mndewa Mulungu, Mulungu wenu, kamtemelani mate kwa chila nzila, mbali mweye hamumsang'hanila kwa deng'ho na kwa moyo ugoloke.
48 Ivo mwizawasang'hanila wehi wenu waja Mndewa Mulungu wondayawatume kumwenu, kwa nzala na ng'hilu na kukala mwazi na kuhungukilwa chila chinhu. Kezamfungani nila ya zuma mbaka yamdanganizeni.
49 “Mndewa Mulungu kezagala wanhu wa isi imwe kulawa kutali wamvunhileni fana masumula, isi iyo hamuimanya ulonzi wake.
50 Wanhu wa isi iyo hawezagesa walala hebu kuwawonela ubazi wabwanga.
51 Wezakuja wanyama wenu na vinhu venu vimuhandile, mbaka vondamudanganizigwe. Hawezamulekelani mhule hebu divai hebu mavuta hebu ng'ombe hebu ng'hondolo mbaka wamdanganizeni.
52 Wanhu wawo wezamzungulukani muna yamabululu yenu yose, mbaka ng'huta zenu za mhongono zimuhuwila zipolomosigwe hasi chila hanhu muna iisi yenu yoyamwing'hileni Mndewa Mulungu, Mulungu wenu.
53 “Lusita lwa kuzungulukigwa na kugazigwa na wehi wenu, nzala izamtendani muwaje wanenu woyamwing'hileni Mndewa Mulungu, Mulungu wenu.
54 Hata munhu muhole ng'hani na yaleligwe vinogile ng'hani kezamwima ndiya ndugu yake na muke wake yoyomulonda na mwanage yasigalile,
55 hebu hezamgolela munhu yoyose nyama ya wanage wondayawaje. Lusita ulo lwa kuzungulukigwa na kugazigwa na wehi wenu muna yamabululu yenu, hamwizasigalilwa na chinhu chochose.
56 Hata muke yeli muhole yoyaleligwe vinogile na yanogile na hanabojoga ulongo kwa chisiginho chake hezadaha kutenda vimwenga. Lusita ulo lwa kuzungulukigwa hezakuwa na nzala,
57 kezamuja mwanage yeli ching'hele na kondo jake bila mulumake hebu mwanage yoyose kuvimanya.
58 “One hamutendile mbuli zose za malagilizo yano yoyandikigwe muna ichitabu chino, hebu kudihishimu zina da kudumbiza da Mndewa Mulungu, Mulungu wenu,
59 Mndewa Mulungu kezamgalilani mweye na welesi wenu manhesa na matamu makulu yoyogendelela.
60 Kezamgalilani matamu yomuyadumbile kuna iisi ya Misili, nayo yezamgazani siku zose.
61 Iviya Mndewa Mulungu kezamgalilani matamu ya chila modeli na manhesa yamwenga yaja hayatambuligwe muna ichitabu chino cha malagilizo mbaka mudanganizigwe.
62 Ingawa mweye wengi fana nhondo za kuulanga, mbali mwizakuwa wadodo kwaviya hamutegeleze dizi da Mndewa Mulungu, Mulungu wenu.
63 Fana viya Mndewa Mulungu viyanogeligwe kumtendelani yanogile na kumtendani muwe wengi, ivo ivo Mndewa Mulungu kezanogeligwa kumgalilani manhesa na kumdanganizani. Mwizawingigwa muna iisi iyomwing'hani muisole.
64 “Mndewa Mulungu kezampwililisani muna izisi zose, kulawa ubanzi umwe wa isi mbaka ubanzi umwenga. Uko mwizaisang'hanila milungu imwenga ya mibiki na mabwe, milungu ija mweye hebu wasaho zenu hawaimanyile.
65 Hamwizakuwa na tindiwalo hebu hanhu ha kukala goya ha kuhumula hebu muna izisi izo. Mbali Mndewa Mulungu kezamwing'hani ludumbo wa moyo, kufila kwa meso na kugaya muna muhe.
66 Ugima wenu wizakuwa wa kudumba, mwizadumba imisi na ichilo na hamwizakuwa na kuhuwila ugima wenu.
67 Mizoyo izadumba chila chinhu chondamuwone. Imitondo mwizalonga, ‘Ihawile ichigulogulo,’ ihafika ichigulogulo mwizalonga, ‘Ihawile imitondo.’
68 Mndewa Mulungu kezambwelezani Misili kwa meli, mwanza uyekile chilagano kuwa hamwizahita kaidi. Uko mwizageza kuichuuza kwa wehi wenu kuwa watumwa, mbali habule munhu yondayamguleni.”