33
Musa koyatemela mate makabila ya Isilaili
1 Uno niuwo utemela mate wa Musa munhu wa Mulungu kwa Waisilaili ing'hali hanadanganika. Kalonga,
2 “Mndewa Mulungu keza kulawa mulima wa Sinai,
kachilawilila kulawa mulima wa Seili,
kamwemwesa kulawa mulima wa Palani.
Kalawa hagati ya wasenga wa kuulanga maelufu longo,
na moto woukwaka muna umkono wake wa kulume.
3 Kawalonda wanhu wake
na kawakaliza welile wake.
Ivo wanhu wake watumbala mavindi hana imigulu yake,
na kuhokela malagilizo kulawa kumwake.
4 Malagilizo yayo yoyaching'hile Musa,
ni uhazi wa mting'hano wa Yakobo.
5 Kakala mfalume wa Yeshuluni,
lusita wakulu wa wanhu viwaiting'hane,
viyaiting'hane hamwe makabila ya Isilaili.
6 “Dileke kabila da Lubeni dikale, sekedidanganike,
buleivo wanhu wake wezakuwa wadodo.
7 “Kusonhela kabila da Yuda kalonga,
‘Weye Mndewa Mulungu itegeleze ndilo ya kabila da Yuda,
mbweleze kwa wanhu wake.
Udigombele kwa ichimu chake,
uditaze kuwahuma wehi wake.’
8 Kusonhela kabila da Lawi kalonga,
‘Weye Mndewa Mulungu uweng'he kabila da Lawi mbuli yako ya Ulimu,
mbuli yako ya Sumimu kwa wanhu wako wokwaminika,
wouwagezile uko Masa.
Kuihuma nawo kuna yamazi ya Meliba.
9 Walawi walamula kuwaleka tati zawo na mami zawo,
wawazimiza ndugu zawo,
hawawamanyile hata wana wawo,
kwaviya wazindilila malagilizo yako
na kwamha lagano jako.
10 Wawafunze welesi wa Yakobo malagilizo yako,
wawafunze Waisilaili ndagilizi zako.
Walawi wafukize ubani haulongozi wako
na nhambiko ya kutimbula hana ulupango wako.
11 Mndewa Mulungu utemele mate ludabwa lwawo lose,
uzitogole sang'hano zawo zowosang'hana,
ubene nguvu za wehi wawo,
nguvu za waja wowehila,
sekewenuke kaidi.’
12 “Kusonhela kabila da Benjamini kalonga,
‘Dino ijo kabila diyodilonda Mndewa Mulungu,
dokala goya haulongozi wake,
kodikaliza siku yose,
na kokala hagati yawo.’
13 “Kusonhela kabila da Yosefu kalonga,
‘Mndewa Mulungu yaitemele mate isi yake,
kwa vitumetume vilawa kuulanga,
na kwa mazi yolawa hasi ng'hani muna iisi.
14 Isi yawo itemeligwe mate kwa matunda yanogile yevile na zuwa,
kwa matunda ya chila miyezi.
15 Kwa mazao yanogile ya milima ya umwaka,
na mazao mengi ya milima ya siku zose.
16 Isi yawo imemezigwe vinhu vose vinogile,
itemeligwe mate kwa unovu wa Mndewa Mulungu,
yoyalongile kulawa muna chibago chikwaka moto.
Kutemeligwa mate kuno kuwahulumukile wanhu wa kabila da Yosefu,
yoyakalile mulangulizi wa ndugu zake.
17 Ng'ombe wa mwanduso kalinga fana ukulu wake,
mahembe yake ni ya ng'ombe mbago lume.
Kezayasang'hanila kuwakenha wanhu wa zisi zose,
kezawakenha mbaka uhelelo wa isi.
Efulaimu kezakuwa na wanhu wa ng'hondo maelufu mengi
na Manase kezakuwa na wanhu wa ng'hondo maelufu.’
18 “Kusonhela makabila ya Zabuloni na Isakali kalonga,
‘Mweye wanhu wa kabila da Zabuloni deng'heleleni vimulawa
na mweye wanhu wa kabila da Isakali deng'heleleni vimukingila muna yamahema yenu.
19 Wezawatanga wanhu kuna imilima yawo,
uko wezalava nhambiko zozilondeka.
Mana wezapata utajili wawo kulawa muna ibahali
na ngama zawo muna umsanga wa mhwani.’
20 “Kusonhela kabila da Gadi kalonga,
‘Yatunhizigwe Mulungu, yoding'ha kabila da Gadi isi ng'hulu
kabila da Gadi dosepasepa fana simba
yakwahule mkono na dosi.
21 Waisagulila isi inogile kufosa zose,
hanhu hohekigwe hakwe kuwa ha mulangulizi,
wawalanguliza wanhu na kumtegeleza Mndewa Mulungu,
watenda mpango wa Mulungu kwa Isilaili.’
22 “Kusonhela kabila da Dani kalonga,
‘Dani ni mwana wa simba,
yozumha kulawa Bashani.’
23 “Kusonhela kabila da Nafutali kalonga,
‘Mweye wanhu wa kabila da Nafutali mumema kutemeligwa mate kwa Mndewa Mulungu,
isi yenu ni kusi kuna dilamba.’
24 “Kusonhela kabila da Asheli kalonga,
‘Asheli utemeligwe mate kufosa wana wose wa Yakobo,
yalondigwe na ndugu zake wose,
yachofe mgulu wake muna yamavuta.
25 Mabululu yako yana lwivi lukulu lwa zuma na shaba,
kwizakalizigwa siku zose.’
26 “Habule yalingile fana Mulungu wa Isilaili,
yokwiza kulawa kuulanga muladi yamtazeni,
yofosela uchanyha muna utunhizo wake.
27 Mulungu iyo mgombelaji wenu siku zose
makono yake ya hasi yenu, muladi yamtazeni.
Kawawinga wehi kuulongozi wenu,
na kowalongelani muwanange wose.
28 Ivo Waisilaili wakala goya,
welesi wa Yakobo muhala,
muna iisi ili na mhule na divai,
isi ija langa jake dolagaza nhungwe.
29 Mumweda Waisilaili!
Habule yalingile fana mweye,
wanhu womukomboligwe na Mndewa Mulungu, nili ngawo ya utazi wenu
na panga dodimgalilani uhumi!
Wehi wenu wezakwiza kuinyendanyenda kumwenu,
mweye mwizawabojoga.”