14
1 Maabaho Mndewa Mulungu kamulongela Musa,
2 “Walongele Waisilaili wabwele hachisogo na kwika mahema haulongozi ha Pihahilosi, hagati ya Migidoli na Bahali ya Shamu, haulongozi wa Baali Sefoni.
3 Mfalume wa Misili kezagesa kuwa Waisilaili wowegela muna iisi na chuwala chiwahindila.
4 Nizautenda moyo wa mfalume wa Misili kuwa mdala, nayo kezamsondelelani. Niye nizaipatila utunhizo kwa kuwananga mfalume wa Misili na wakalizi wake, Wamisili wezavimanya kuwa niye iyo Mndewa Mulungu.” Maabaho Waisilaili watenda fana viya viwalongeligwe.
5 Mfalume wa Misili viyalongiligwe kuwa wanhu wamala kusegela, yeye na wasang'hani wake wagalula magesa yawo na kulonga, “Choni chino chochitendile? Chiwalekela Waisilaili wasegele na chipuwa wasang'hani wa kuchisang'hanila.”
6 Mfalume kasasala mtuka wake wa kubululigwa na falasi na kuwasola wakalizi wake.
7 Iviya kasola mituka inogile magana sita na mituka imwenga yose ya Wamisili, wakulu wa wakalizi wake wose, wakwela mituka iyo.
8 Mndewa Mulungu kautenda moyo wa mfalume wa Misili kuwa mdala, muladi yawasondelele Waisilaili, wowasegele kwa ugangamalo.
9 Wamisili hamwe na falasi wawo wose na mituka yoibululigwa na falasi na wakalizi wake wawasondelela Waisilaili, wawafika wozenga lago hamgwazo ya bahali, habehi na Pihahilosi, haulongozi wa Baali Sefoni.
10 Lusita Waisilaili viwamuwonile mfalume wa Misili na wakalizi wake wowasondelela wawo, wadumba ng'hani na kumulilila Mndewa Mulungu yawataze.
11 Wamulongela Musa, “Vino hakukalile na maleme muna iisi ya Misili mbaka kuchigala chidanganikile kuno kuchuwala? Habali kuchitendela yano kwa kuchilava muna iisi ya Misili?
12 Vino hachikulongele mbuli zino vichikalile ching'hali muna iisi ya Misili? Chikulongela uchilekele chigendelele kuwasang'hanila Wamisili. Ihawile muhavu kuwasang'hanila Wamisili sembuse kudanganikila kuno kuchuwala.”
13 Musa kawedika Waisilaili, “Sekemdumbe! Imeni chigangamavu! Diyelo mwizawona viya Mndewa Mulungu vondayawakomboleni. Mana Wamisili wano womuwawona diyelo, hamwizawawona kaidi.
14 Mndewa Mulungu kezawagombeleni mweye, mweye molondeka munyamale hupi.”
15 Mndewa Mulungu kamulongela Musa, “Habali monililila? Walongele Waisilaili wagendele na mwanza.
16 Inula mhome yako na uigolose uchanyha ya bahali uyagole yamazi, muladi Waisilaili wadahe kufosa hagati ya bahali hanhu hanyalile.
17 Niye nizawatenda Wamisili wawe na mizoyo midala muladi wawasondeleleni mgati muibahali, nizaipatila utunhizo kwa kumuhuma mfalume wa Misili na wakalizi wake na mituka yake na wakwela falasi wake.
18 Na wanhu wa isi ya Misili wezanimanya kuwa niye Mndewa Mulungu, vondaniipatile utunhizo kwa mfalume wa Misili na mituka yake na wakwela falasi wake.”
19 Maabaho msenga wa Mulungu kawalongolela wakalizi wa Isilaili, kasegela na kukala hachisogo chawo. Iiviya mhanda ija ng'hulu ya wingu isegela na kukala hachisogo chawo,
20 ima hagati ya Wamisili na Waisilaili. Mhanda ya wingu iyo ubanzi umwe ilava ziza, ubanzi umwenga ilava bung'hulo. Ivo mabumbila yayo maidi, wakalizi wa Misili na Waisilaili hawaikwenhukile chilo chose.
21 Musa kagolosa mkono wake uchanyha muibahali, Mndewa Mulungu kaibweleza bahali kuchisogo kwa beho kulu kulawa ulawilo wa zuwa, beho ijo dibuma ichilo chose, diigola bahali banzi mbili, hagati halawilila isi inyalile. Mazi yaigola,
22 Waisilaili wafosa muibahali hana iisi inyalile, mazi yaigola banzi mbili fana ng'huta.
23 Wamisili wawasondelela na wengila mgati muna ibahali, falasi wawo wose na wakwela falasi wawo na mituka yawo ya ng'hondo.
24 Habehi na kucha, Mndewa Mulungu kawalola wakalizi wa Wamisili kulawa muna imhanda ija ya moto na wingu, kawatenda bumbila da wakalizi wa Misili wawe na lugano ng'hani.
25 Kayemiza maguludumu ya mituka yawo ya ng'hondo, yakala yogenda ugaluga ng'hani. Wamisili walonga, “Leka chiwakimbile Waisilaili! Mndewa Mulungu kowagombela Waisilaili!”
26 Maabaho Mndewa Mulungu kamulongela Musa, “Golosa mkono wako uchanyha ya bahali, muladi mazi yabwele na kuwagubika Wamisili na mituka yawo na wakwela falasi wawo.”
27 Musa kagolosa mkono wake uchanyha ya bahali, vikukunguzuke mazi yabwela fana viyakalile. Wamisili wageza kuyakimbila yamazi, mbali Mndewa Mulungu kawasung'hila muna yamazi.
28 Mazi yabwela na kugubika mituka hamwe na wakwela falasi, wakalizi wose wa mfalume wa Misili wowawasondelele Waisilaili wadanganika muibahali. Hasigale Mmisili hata imwe.
29 Mbali Waisilaili wafosa hagati ya bahali hanhu hanyalile, mazi yakala fana ng'huta kulume kwawo na kumoso kwawo.
30 Siku iyo Mndewa Mulungu kawakombola Waisilaili kulawa muna yamakono ya Wamisili. Waisilaili wawawona Wamisili mumgwazo mwa ibahali wadanganika.
31 Waisilaili viwawonile udahi mkulu Mndewa Mulungu uyalaguse kwa Wamisili, Waisilaili wamdumba Mndewa Mulungu na wamuhuwila yeye na Musa msang'hani wake.