39
Kutenda mawalo ya wakulu wa nhambiko
(Kulawa 28:1-14)
1 Kwa nyuzi za langi ya buluu na zambalau na ndung'hu, wabota mawalo ya kuvala lusita lwa kulava nhambiko hanhu helile. Wamsonela Haluni mawalo yelile fana Mndewa Mulungu viyamulagilize Musa.
2 Watenda chizibawo kwa nyuzi za zahabu na nyuzi za langi ya buluu na zambalau na ndung'hu na walo dinogile dibotigwe.
3 Wahonda zahabu iyo mbaka iwa sisili ng'hani na kukanha nyuzi, muladi kuzibota hamwe na nyuzi za langi ya buluu na za zambalau na ndung'hu na walo dinogile dibotigwe vinogile.
4 Chizibawo icho chitendigwa kwa nzabi muna yamayega zozisonigwe kuna imihelelo yake midi.
5 Mkwiji ubotigwa goya mchanyha yake muladi kuifunga, ukala chinhu chimwe na chizibawo icho. Utendigwa kwa vinhu ivo ivo, nyuzi za zahabu na nyuzi za buluu na ya zambalau na ndung'hu na walo dinogile dibotigwe, fana Mndewa Mulungu viyamulagilize Musa.
6 Wasasala mabwe ya salidoniki na kuyahamba na kuyengiza muna ivihindo va zahabu, yacholigwa fana munhu voyochola muhuli, mazina longo na maidi ya wana wa Isilaili.
7 Wayeka mabwe yayo muna ivihande va muna yamayega va chizibawo chiya muladi kulagusa makabila longo na maidi ya Isilaili, fana Mndewa Mulungu viyamulagilize Musa.
Kutenda chifuko cha muimhambaga
(Kulawa 28:15-30)
8 Katenda chifuko cha muimhambaga fana viya viyatendile ichizibawo chiya, kwa nyuzi za zahabu na nyuzi za langi ya buluu na ya zambalau na ndung'hu na kwa walo dinogile dibotigwe.
9 Utali wa chifuko icho na ugalamu wake vikala voilinga, utali sentimita malongo maidi na mbili, ugalamu sentimita malongo maidi na mbili, nacho chikunjigwa.
10 Chihambigwa kwa misitali mine ya mabwe ya bei ng'hulu. Msitali wa mwanduso ukala wa hakiki na topazi na alimasi ndung'hu.
11 Msitali wekaidi ukala wa zumalidi na johali ya langi ya buluu na alimasi.
12 Msitali wekatatu ukala wa yasito na agate na amesisito.
13 Msitali wekane ukala wa zabalajadi na shohamu na yasipi, yose yagumigwa muna ivihindo va zahabu
14 Hakala na mabwe longo na maidi yoyacholigwe mazina longo na maidi ya wana wa Isilaili. Yakala yacholigwa fana viwochola muhuli, chila dibwe dicholigwa zina kulagusa makabila longo na maidi.
15 Kwa ichimu cha chifuko icho cha mwiimhambaga, katengeneza mikufu ya zahabu yelile ibotigwe fana luzabi.
16 Iviya kachitengenezela ichifuko cha muimhambaga vihindo va zahabu na mhete mbili za zahabu na kuziguma muna zimhembe mbili za chifuko icho.
17 Mikufu iyo midi ya zahabu waifunga muna zimhete izo za zimhembe za chifuko cha muimhambaga.
18 Zimhembe ziya mbili za mikufu ya zahabu waziguma muna ivihindo viya vidi na wazilumbiliza na ivihande viya vidi va muna yamayega ya chizibawo, ubanzi wa kuulongozi.
19 Watenda mhete mbili za zahabu na waziguma kuna zimhembe mbili za hasi ubanzi wa mgati wa chifuko cha muimhambaga habehi na chizibawo.
20 Watenda mhete zimwenga mbili za zahabu na kuziguma kuulongozi hana zimhembe za hasi za vihande va chizibawo, hanhu hochiilumba na mkwiji uja ubotigwe vinogile.
21 Wafunga chifuko cha muimhambaga hana ichizibawo kwa kulumbiliza mhete zake na chizibawo kwa luzabi lwa buluu, muladi chifuko icho sekechihagaye ila chikalile mkwiji uja lubotigwe vinogile, fana Mndewa Mulungu viyamulagilize Musa.
Kutenda mawalo yamwenga ya ukulu wa nhambiko
(Kulawa 28:31-43)
22 Katenda joho da kuvala mgati ya chizibawo cha nyuzi za langi ya buluu.
23 Joho ijo dikala na nyafasi ya kufosezela ditwi hagati, najo dizungulusiligwa lukingilo lubotigwe muladi sekeidegeke.
24 Kuna imhindo ya hasi ya dijoho wabota mahambo ya makomamanga ya nyuzi za langi ya buluu na za zambalau na ndung'hu na walo dinogile dibotigwe vinogile.
25 Maabaho watenda mbugi za zahabu yelile, chila dihafosa komamanga dimwe weka mbugi hana imhindo ya dijoho.
26 Ivo mbugi na komamanga, mbugi na komamanga, viyandakana kuizunguluka imhindo ya joho ijo, fana Mndewa Mulungu viyamulagilize Musa.
27 Wawatendela Haluni na wanage majoho ya chitani inogile.
28 Chilemba cha chitani inogile na kofiya da chitani inogile na kaputula za chitani ibotigwe vinogile,
29 na mikwiji ya walo dinogile dibotigwe kwa nyuzi za langi ya buluu na ya zambalau na ndung'hu na kuihamba vinogile, fana Mndewa Mulungu viyamulagilize Musa.
30 Watenda chihande cha zahabu yelile kwa ichimu cha chilemba chelile kwa zahabu yelile na kuchola uchanyha yake fana viwacholile muhuli, “Yelile kwa Mndewa Mulungu.”
31 Maabaho wachifunga kwa luzabi lwa langi ya buluu haulongozi wa ichilemba chiya, fana Mndewa Mulungu viyamulongele Musa.
Kukomelezeka kwa sang'hano
(Kulawa 35:10-19)
32 Ivo sang'hano yose ya hema da Mulungu ikomelezeka. Waisilaili watenda chila chinhu fana Mndewa Mulungu viyamulagilize Musa.
33 Maabaho wadigala dihema da Mulungu kwa Musa, hamwe na via vake vose, vihindo vake na mibiki yake na mapalo yake na mhanda zake na vikalilo vake,
34 na ngubiko ya mbende za ng'hondolo lume yoihakigwe langi ndung'hu na ngubiko ya mbende za wanyama wamwenga na panzia da hanhu helile,
35 na sanduku da lagano na mibiki yake na ngubiko ya kuilumba,
36 na meza na via vake vose na magate yelile yekigwe haulongozi ha Mulungu,
37 na chinala cha chitasa cha zahabu na vitasa vake, via vake vose na mavuta ya vitasa ivo,
38 na lupango lwa zahabu, mavuta yelile na ubani uli na mnung'ho unogile na panzia da hanhu ha kwingilila muna dihema da Mulungu,
39 na lupango lwa shaba na lwavu lwake lwa shaba, mibiki yake na via vake vose na ziga na kalilo jake,
40 na mapanzia ya luwa, mhanda zake na vikalilo vake na panzia da lwivi lwa luwa na nzabi zake na vigingi vake na via vose vovilondeke kuna isang'hano ya hema da Mulungu, iviya dotangigwa hema da Mulungu
41 na mawalo yabotigwe vinogile kwa ichimu cha sang'hano ya hanhu helile, yaani mawalo yelile ya mkulu wa nhambiko Haluni na ya wanage kwa ichimu cha sang'hano ya ukulu wa nhambiko.
42 Waisilaili wasang'hana sang'hano zose fana Mndewa Mulungu viyamulagilize Musa.
43 Musa kalola chila chinhu, kawona Waisilaili wasang'hana chila chinhu fana Mndewa Mulungu viyalagilize. Ivo Musa kawatemela mate.