27
Isaka komtemela mate Yakobo
Isaka viyakalile mulala meso yake yawa hayalola bule. Ivo kamtanga Esau mwanage chaudele na kamulongela, “Mwanangu!”
Nayo kamwidika, “Aino hano.”
Isaka kalonga, “Lola niye namulala, na siku yangu ya kudanganika siimanyile bule. Sola msale na upinde wako na uhite kumbago na ukanisakile mnyama wa mwiimbago kwa ichimu changu. Nyambikile ndiya inogile ija yoniilonda, na unigalile. Nahamala kuja, niye mwenyewo nizakutemelela mate ning'hali sinadanganika.”
Humbe Isaka viyakalile kolonga na Esau, Lebeka kakala yotegeleza. Ivo Esau viyahitile kusaka kwiimbago, Lebeka kamulongela Yakobo, “Nimuhulika tati yako viyamulongele sekulu wako Esau, ‘Nigalile mnyama na unyambikile ndiya inogile. Nahakomeleza kuja nizakutemela mate haulongozi wa Mndewa Mulungu ning'hali sinadanganika.’ ” Lebeka kagendelela kulonga, “Lelo mwanangu, nitegeleze na utende chinikulongela. Hita kuna dibumbila da iwaluti unigalile wanaluti waidi wanogile muladi nimwambikile tati yako ndiya inogile yoyailondaga ng'hani. 10 Na kwizamgalila tati yako yaje muladi yakutemele mate yang'hali hanadanganika.”
11 Mbali Yakobo kamulongela Lebeka mami yake, “Kuvimanya kuwa sekulu wangu Esau ni munhu mwene upipi, mbali niye nabule. 12 Yodahika tati yangu kezalonda kunibabasa, na niye nizawoneka fana viya nomvwizila, kwa ivo nizaigalila duwilo badala ya kutemeligwa mate.”
13 Mami yake kamulongela, “Duwilo jako dimhate niye, mbali weye mwanangu tenda fana viya vinikulagiliza, na hita ukanigalile wanaluti.” 14 Ivo Yakobo kahita na kawasola iwanaluti waidi na kamgalila mami yake, nayo kasasala ndiya inogile yoyailondile tati yake. 15 Maabaho Lebeka kalava viwalo vinogile va Esau mwanage imkulu, voyavikile muna ikaye, na kamuyawaliza Yakobo mwanage imdodo. 16 Iviya kamuyawaliza mbende za iwanaluti waja mmakono na muna ulukuli lutelebuke ulibule upipi muna isingo yake. 17 Lebeka kamwing'ha Yakobo indiya inogile, hamwe na diya digate doyadisasale.
18 Maabaho Yakobo kahita kwa tati yake na kamtanga, “Tata!”
Nayo kedika, “Aino.” Tati yake kamuuza, “Weye mwanangu yelihi?”
19 Yakobo kamwidika, “Niye Esau chaudele wako. Nisang'hana fana viunilagilize. Nolamba tata ukale uje nyama yonikugalile, muladi udahe kunitemela mate.”
20 Isaka kamuuza, “Mwanangu iwaze kupata himahima fanile ivo?”
Yakobo kamwidika, “Mndewa Mulungu, Mulungu wako kanitaza kupata ivo.”
21 Isaka kamulongela Yakobo, “Mwanangu kwenhuka haguhi nidahe kukubabasa muladi nivimanye fana kweli weye kwa Esau mwanangu hebu siyo.” 22 Yakobo kamkwenhukila tati yake, nayo kambabasa na kalonga, “Dizi jako dohulikika fana viya dizi da Yakobo, mbali makono yalinga fana makono ya Esau.” 23 Isaka hammanyile Yakobo kwaviya makono yake yakala na upipi fana Esau. Ivo kakala kokwandusa kumtemela mate. 24 Mbali kamuuza kaidi, “Weye kweli mwanangu Esau?”
Yakobo kamwidika, “Iyo niye.”
25 Isaka kalonga, “Nigalile nyama muladi nije na kukutemela mate.” Yakobo kamgalila na kaja, nayo iviya kamgalila divai kang'wa. 26 Maabaho Isaka tati yake kamulongela, “Mwanangu, nikwenhukile uninonele.” 27 Yakobo kamkwenhukila na kamnonela, Isaka viyahulike mnung'ho wa viwalo vake, kamtemela mate na kalonga,
“Lola mnung'ho wa mwanangu
ulinga fana mnung'ho wa mgunda woutemeligwe mate na Mndewa Mulungu.
28 Mulungu yakwing'he mvula kulawa kuulanga
na yakwing'he ulongo unogile ulava nafaka na divai nyingi.
29 Makabila yose wezakusang'hanila,
na wezakutumbalila mavindi,
kwizakuwa mulangulizi wa wandugu zako wose
na welesi wa mami yako wakutumbalile mavindi,
wanhu wokuduwila weye waduwiligwe na
wokutemela mate wezatemeligwa mate.”
30 Isaka viyakomeleze kumtemela mate Yakobo, lusita Yakobo viyasegele, Esau sekulu wake kabwela kulawa kuukala. 31 Iviya Esau kambika ndiya inogile na kamgalila tati yake. Kamulongela, “Haya tata, kala uje nyama yonikugalile, muladi udahe kunitemela mate.”
32 Isaka kamuuza, “Weye kwa yelihi?”
Nayo kamwidika, “Niye niiyo Esau mwanago chaudele.”
33 Isaka kagudemeka ng'hani na kalonga, “Humbe yelihi yoyalawile kuukala na kanigalila nyama, na niye nija yose nimala ung'hali hunakwiza? Iviya nimtemela mate nimala, ivo katemeligwa mate kamala!”
34 Esau viyahulike ivo kalila kwa dizi kulu na giyogiyo ng'hani na kalonga, “Tata, na niye iviya nitemele mate!”
35 Mbali Isaka kamwidika, “Mdodo wako kanizila na kunivwizila. Na kasola kutemeligwa mate kwako.”
36 Esau kalonga, “Lekamana kotangigwa Yakobo kwaviya kanivwizila miyanza midi. Mosi kasola haki yangu ya uchaudele, maabaho kasola kutemeligwa mate kwangu.” Esau kalonga, “Hunisigazile kutemeligwa mate kwangu?”
37 Isaka kamwidika Esau, “Nimala kumtenda Yakobo kuwa mulangulizi wako na nimwing'ha ndugu zake wose kuwa wasang'hani wake. Nimpatila nafaka na divai. Lelo nikutendele choni weye mwanagu?”
38 Esau kamulongela tati yake, “Kodaha kutemela mate mwanza umwe muhala tati yangu? Tati yangu na niye iviya nhemele mate!” Kandusa kulandula dizi na kalila.
39 Maabaho Isaka tati yake kamwidika,
“Kwizakala kutali na mgunda unogile ulava nafaka na divai nyingi
na kutali na mvula ya kuulanga.
40 Kwizakala kwa kuwakoma wanhu kwa sengo,
Kwizamsang'hanila ndugu yako.
Mbali uhalema,
kwizatenda voulonda mwenyewo.”
41 Esau kamwihila Yakobo kwa ichimu cha kutemeligwa mate koyatemeligwe na tati yake. Kagesa, “Siku za matanga ya tata zaabehi, zihamala nizamkoma mdodo wangu Yakobo.”
42 Mbali Lebeka viyavimanyile chiyailungile Esau, kamtumila usenga kumtanga Yakobo na kalonga, “Wiiteganye, sekulu wako Esau koiguma moyo kwa kulonda kukukoma. 43 Lelo mwanangu tegeleza chonikulongela na uchitende. Hima kimbilila kwa lumbu jangu Labani uko Halani, 44 kala nayo kwa lusita, mbaka ludoko lwa sekulu wako luhunguke. 45 Ludoko lwa sekulu wako vondaluhunguke na vondayazimize youmtendele, nizamtuma munhu yakubweleze. Habali nidanganikiligwe na mweye wose waidi siku dimwe?”
Isaka komtuma Yakobo kwa Labani
46 Lebeka kamulongela Isaka, “Niye ndegezigwa na wanaake wano Wahiti wa Esau. One Yakobo iviya yahasola muke kulawa mwa wanaake wano Wahiti, muhavu nidanganike.”