29
Yakobo kofika kuna ikaye ya Labani
1 Yakobo kagendelela na mwanza wake na kafika muna iisi ya ulawilo wa zuwa.
2 Kalola na kawona chisima mwiichuwala na mumgwazo yake mabumbila matatu ya ng'hondolo wagona. Ng'hondolo wakala wong'wizigwa muna ichisima icho chochigubikigwe na dibwe kulu.
3 Mabumbila yose ya ng'hondolo yahaiduganya, wadimaji wobimbilisa idibwe ijo kwa hamwe kulawa hana ichisima na kuwang'wiza iwang'hondolo. Maabaho wogubika kaidi ichisima kwa dibwe ijo.
4 Yakobo kawauza waja iwadimi, “Wambwiya zangu, mweye mulawa kulihi?”
Wamwidika, “Cholawa Halani.”
5 Kawauza kaidi, “Vino mummanya Labani mwana wa Naholi?”
Wamwidika, “Ona chimmanya.”
6 Yakobo kagendelela kuwauza, “Vino mgima?”
Nawo wamwidika, “Mgima! Lola mndele wake Laheli iyo ija kokwiza na ng'hondolo zake.”
7 Yakobo kalonga, “Nowona ing'hali misi na siyo lusita lwa kuwaduganya ng'hondolo hamwe, ivo wang'wizeni mazi muhite mukawadime.”
8 Nawo wamwidika, “Hachidaha bule mbaka ng'hondolo wose wawe hano, na dibwe dibimbiliswe mwiichisima, maabaho chowang'wiza mazi ng'hondolo.”
9 Yakobo viyakalile yang'hali kolonga nawo, Laheli yakalile mdimi wa ng'hondolo, kafika na ng'hondolo wa tati yake.
10 Yakobo viyamuwone Laheli mndele wa mtumba wake Labani hamwe na zing'hondolo, kahita hana disima na kudibimbilisa idibwe kulawa hana disima na kuwang'wiza mazi iwang'hondolo wa mtumba wake.
11 Maabaho Yakobo kamnonela Laheli na kandusa kulila kwaviya kakala na deng'ho.
12 Yakobo kamulongela Laheli, “Niye ni ndugu wa tati yako, na mwana wa Lebeka.”
Maabaho Laheli kakimbila kumulongela tati yake.
13 Labani viyahulike mbuli ya Yakobo mwihwage, kahita yokimbila kumuhowela, viyamfikile kamuhagatila na kamnonela na kamkalibisha ukaye yake. Yakobo kamulongela mbuli zose zozilawilile.
14 Labani kalonga, “Ivo weye ni lukuli lumwe na damu imwe na niye.” Yakobo kakala na Labani mwezi umwe.
Yakobo kowasola Laheli na Leya
15 Labani kamulongela Yakobo, “Weye kwa ndugu yangu hudaha kunisang'hanila bila kukuliha. Lelo nikulihe hela nyingahi?”
16 Labani kakala na wandele waidi, imkulu zina jake Leya na imdodo Laheli.
17 Leya kakalayanogile, mbali Laheli kakala lumondo ng'hani.
18 Yakobo kamulonda Laheli, ivo kamulongela Labani, “Nizakusang'hanila miyaka saba, one uhanitogolela kumsola Laheli.”
19 Labani kamwidika, “Muhavu nikwing'he weye Laheli sembuse kumwing'ha munhu imwenga yoyose. Gendelela kukala hano na niye.”
20 Yakobo kamsang'hanila Labani miyaka saba muladi yampate Laheli, mbali kumwake miyaka saba ni fana viya siku ndodo, kwaviya kamulonda Laheli.
21 Maabaho Yakobo kamulongela Labani, “Lusita lwangu lufika, ning'he muke wangu.”
22 Ivo Labani kasasala dugila na kawagoneka wanhu wose wa hanhu haja.
23 Mbali viifikile ichigulogulo, Labani kamulava Leya mwanage imkulu na kumgala kwa Yakobo, nayo Yakobo kagona nayo.
24 Labani kamwing'ha Zilipa mtumwa wake wa chike yawe mtumwa wa Leya mwanage.
25 Igolo yake imitondo, Yakobo katola kuwa ni Leya. Kamgendela Labani na kamuuza, “Choni chino chounhendele? Nikusang'hanila muladi nimpate Laheli. Habali kunivwizila?”
26 Labani kamwidika, “Chino siyo chihendo chetu kusoligwa imndele imdodo kuno imkulu yang'ali hanasoligwa.
27 Gozela mbaka siku saba za dugila, maabaho nizakwing'ha Laheli kwa usang'hano wa miyaka saba imwenga.”
28 Yakobo katogola, viifikile juma da dugila, Labani kamwing'ha Laheli mwanage yawe muke wake.
29 Labani kamulava Biliha mtumwa wake wa chike, yawe mtumwa wa Laheli.
30 Yakobo kagona na Laheli iviya, na Yakobo kamulonda kufosa Leya. Maabaho Yakobo kamsang'hanila Labani miyaka saba imwenga.
Wana wa Yakobo
31 Mndewa Mulungu kawona kuwa Leya halondigwa goya, ivo kamtenda yeleke, mbali Laheli heleke bule.
32 Leya kapata wimo na kaibasula mwana wa chilume na kamtanga zina jake Lubeni kwa viya kalonga, 'Mwana aino'. Leya kalonga, “Mndewa Mulungu kawona manhesa yangu na lelo mulume wangu kezanilonda.”
33 Maabaho kapata wimo kaidi na kaibasula mwana imwenga wa chilume. Kalonga, “Mndewa Mulungu kahulika kuwa nokwihilwa.” Ivo Leya kamtanga zina jake Simeoni.
34 Leya kapata wimo kaidi na kaibasula mwana imwenga wa chilume, nayo kamtanga zina jake Lawi. Leya kalonga, “Lelo mulume wangu kezailumba vinogile na niye, kwaviya nimwelekela wana wa chilume watatu.”
35 Maabaho kapata wimo kaidi na kaibasula mwana imwenga wa chilume na kalonga, “Lusita luno nizamtogoza Mndewa Mulungu.” Kamtanga zina jake Yuda, maabaho Leya kaleka kweleka.