8
Yesu mkulu wetu wa nhambiko digogogo
1 Mbuli ng'hulu muna zimbuli zino, cheye chinayo Mkulu wa nhambiko digogogo, kokala ubanzi wa kulume wa chigoda cha chifalume cha Mulungu kuulanga.
2 Yeye kosang'hana sang'hano ya Mkulu wa nhambikowa Digogogo hanhu helile ng'hani, muna dizewe da kweli da Mulungu dodikigwe na Mndewa, wala siyo kwa makono ya munhu.
3 Kwaviya chila Mkulu wa nhambiko digogogo kosaguligwa muladi yalave chitumetume na nhosa kwa Mulungu, kwa ivo Mkulu wa nhambiko digogogo wetu iviya kolondeka yawe na chinhu cha kumulavila Mulungu.
4 One yawile hano muna isi, sigambeyawe mkulu wa nhambiko ng'o, kwaviya wauko walava nhosa za vitumetume vivilondeka kwa malagilizo ya Mulungu yoyamwing'hile Musa.
5 Usang'hano wowousang'hana fana wakulu wa nhambiko ni simwe hebu sisila da mbuli za kuulanga, fana Musa viyalagilizigwe na Mulungu, viyakomeleze kuzenga dizewe da Mulungu kwaviya kalonga, “Lola ukavitende vinhu vose kwa simwe diya donikulaguse viukalile kulugongo.”
6 Mbali sambi Yesu keng'higwa sang'hano ya ukulu wa nhambiko inogile ng'hani kufosa yawo, fana yeye viyekigwe kuwa mulumbilizi wa dilagano diya dinogile ng'hani, na chandusilo chake chikala muna ivilagano vinogile ng'hani.
7 Kwaviya lagano diya da mwanduso one dinogile, sigambe dilondeke lagano dekaidi.
8 Mbali Mulungu kawawona kuwa wanhu wake wahasanya viyalongile,
Mndewa kolonga, “Siku zokwiza,
nizatenda lagano da sambi na wanhu wa Isilaeli na wanhu wa Yuda.
9 Lagano dino hadizakuwa fana diya donitendile na wasaho zawo
zuwa diya viniwasolile kwa mkono wangu na kuwalanguliza kulawa Misili.
Kwaviya hawategeleze chiya chiniwalongele,
na niye siwagesile.
10 Mndewa kolonga, lagano dino nizatenda na wanhu wa Isilaeli
Zahafosa siku ziya,
nizakwika malagilizo yangu muna zinzewele zawo
na kwandika mwiimizoyo yawo.
Nizakuwa Mulungu wawo,
nawo wezakuwa wanhu wangu.
11 Habule yonda yamfundize miyage,
hebu yonda yamulongele ndugu yake,
‘Mmanye Mndewa.’
Kwaviya wose wezanimanya niye,
kwandusila mbugilambugila na wanhu wamanyike.
12 Nizawalekelela wihi wawo
na hezaugesa uhasanyi wawo bule.”
13 Kwa kulonga lagano dino da sambi, Mulungu katenda lagano da umwaka disakale, na chinhu chochose chochisakala na kuwa cha umwaka chizasegezigwa sambi.