19
Malagilizo kusonhela kutenda mbuli zinogile
Mndewa Mulungu kamulongela Musa, “Walongele Waisilaili wose, ‘Muwe welile kwaviya niye Mndewa Mulungu, Mulungu wenu, nyela. Chila munhu vimwili yawahulike tati yake na mami yake, na molondeka muizindilile siku yangu ya mhumulo. Niye niiyo Mndewa Mulungu, Mulungu wenu.
“ ‘Sekemutambikile nyang'hiti na sekemuitendele milungu ya zuma na kuitambikila. Niye niiyo Mndewa Mulungu, Mulungu wenu.
“ ‘Vomumulavila nhambiko ya tindiwalo Mndewa Mulungu, mumulavile fana voilondeka muladi mupate kutogoligwa. Nyama iyo yolondeka idigwe muna isiku iyachinjigwe mnyama iyo hebu igolo yake. Nyama yoyose yondaisigale mbaka siku yetatu yolondeka isomigwe na moto, kwaviya yambula mwiko, na one munhu yoyose yahaja nyama iyo, nhambiko iyo sizaitogola bule. Munhu yoyose yoja nhambiko iyo kolondeka yatagusigwe kwa ubananzi wake, kwaviya kachitenda chinhu chelile cha Mndewa Mulungu chambule mwiko. Munhu iyo kezabaguligwa mwa wanhu wake.
“ ‘Vondamugobole vinhu vimuhandile muna imigunda yenu, sekemugobole ng'hani mbaka muna zimhaka za migunda, hebu sekemusalale. 10 Sekemusalale migunda yenu ya mizabibu hebu sekemudondole zabibu zilagale, muwalekele nyambenyambe na ngayengaye. Niye niiyo Mndewa Mulungu, Mulungu wenu.
11 “ ‘Sekemubawe hebu sekemuivwizile, hebu sekemuilongele uvwizi. 12 Sekemuilahe uvwizi kwa zina jangu, na ivo kudiliga zina da Mulungu wenu. Niye niiyo Mndewa Mulungu, Mulungu wenu. 13 Sekemumbamanye munhu yoyose hebu kumbawila. Yombe da munhu yekigwe kusang'hana kwa kulihigwa, sekedikale kumwenu misi na chilo. 14 Sekemumduwile msuwamagutwi hebu sekemumwikile ng'walo munhu chipofu, mbali mumdumbe Mulungu wenu. Niye niiyo Mndewa Mulungu, Mulungu wenu.
15 “ ‘Muhumize voilondeka, sekeumpendelee ngayengaye hebu kumdumba tajili. Mbali molondeka muwataguse wayenu voilondeka. 16 Sekemufose kuno na kuno kuwalongeleza mbuli za uvwizi wanhu wenu, hebu sekemuwatende wayenu wadanganike kwa mbuli zenu. Niye niiyo Mndewa Mulungu, Mulungu wenu.
17 “ ‘Sekemuwehile ndugu zenu muna imizoyo yenu, mbali molondeka muwazume wakaya wayenu muladi sekemutende ubananzi kwa ichimu chawo. 18 Sekemuwalihizile hebu kuwehila wayenu, mbali muwalonde wakaya wayenu fana vomuilonda wenyewo. Niye niiyo Mndewa Mulungu.
19 “ ‘Zindilileni malagilizo yangu, sekemuleke wanyama wenu walele na wanyama wa modeli imwenga. Muna imigunda yenu sekemuhande mbeyu za modeli mbili. Sekemuyawale mawalo yasonigwe kwa modeli mbili za chitambala.
20 “ ‘Mulume yahambandama mwanamke yeli mtumwa wa chike yoyauzigwe na mulume imwenga, mbali yang'hali hanakomboligwa hebu hanatendigwa yailegehe, wolondeka watagusigwe, mbali sekewakomigwe kwaviya mwanamke iyo yang'hali hanailegeha. 21 Mulume iyo kezagala nhambiko yake ya ubananzi haulongozi ha hanhu ha kwingilila muna dihema da Mulungu. Nhambiko iyo ni bebelu da ng'hondolo kunilavila niye Mndewa Mulungu. 22 Mkulu wa nhambiko kezamtendela kuilumba kwa ng'hondolo iyo haulongozi ha Mndewa Mulungu kwa ichimu cha uhasanyi uyatendile, nayo kezalekelelwa uhasanyi wake.
23 “ ‘Vondamufike kuna iisi ya Kanaani na kuhanda modeli zose za mibiki ya matunda, matunda yayo hamwizayaja bule. Mwizalemesigwa kuyaja kwa miyaka mitatu. 24 Muna umwaka wekane matunda yake yose yezakuwa yela, yezalavigwa kuwa nhosa ya kumwing'ha nhogolwa Mndewa Mulungu. 25 Mbali matunda ya kusongela mwaka wetano modaha kuja. One muhatenda yano yose, mibiki yenu izakwima matunda mengi. Niye niiyo Mndewa Mulungu, Mulungu wenu.
26 “ ‘Sekemuje nyama yoyose ili na damu. Sekemulole bawo na sekemutende uhawi. 27 Sekemusenye nyele zili mumgwazo wa matwi yenu hebu sekemuwegule ndevu zenu.
28 “ ‘Sekemuichanje sale yoyose muna zing'huli zenu kwa ichimu cha wadanganike, hebu sekemwandike chilaguso muna zing'huli zenu. Niye niiyo Mndewa Mulungu.
29 “ ‘Sekeumtende mwanago wa chike yambule mwiko kwa kumtenda malaya, muladi isi yose sekeimeme umalaya na wihi.
30 “ ‘Zindilileni Siku zangu za Mhumulo na muhahishimu hanhu hangu helile. Niye niiyo Mndewa Mulungu.
31 “ ‘Sekemuhite kwa wanhu wolonga na mizimu hebu wahawi, muladi kuwapula wamulagulileni na kuitenda mwambule mwiko. Niye niiyo Mndewa Mulungu, Mulungu wenu.
32 “ ‘Muhawa haulongozi ha mulala molondeka mwime muladi kumwing'ha hishima yake. Mumdumbe Mulungu wenu. Niye niiyo Mndewa Mulungu.
33 “ ‘One nyambenyambe yahakala muna iisi yenu, sekemumtendele vihile. 34 Nyambenyambe iyo yokala muna iisi yenu molondeka mukale nayo vinogile fana mkaya miyenu. Mumulonde fana vomuilonda wenyewe, mana na mweye iviya mukala nyambenyambe muna iisi ya Misili. Niye niiyo Mndewa Mulungu, Mulungu wenu.
35 “ ‘Sekemumvwizile munhu yoyose kwa kusang'hanila ningo za uvwizi, za utali hebu nzamo hebu lumemo. 36 Molondeka musang'hanile ningo za vibaba na mhishi za kweli. Niye niiyo Mndewa Mulungu, Mulungu wenu, yonimulavileni muna iisi ya Misili. 37 Zindilileni na kutenda malagilizo yangu na ndagilizi zangu zose. Niye niiyo Mndewa Mulungu.’ ”