24
Vitasa va hanhu helile
(Kulawa 27:20-21)
1 Mndewa Mulungu kamulongela Musa,
2 “Walagilize Waisilaili wakugalile mavuta yanogile ya mzaituni muladi vitasa vigendelele kwaka.
3 Haluni kezachika chinala icho cha vitasa mgati ya hema da Mulungu, kunze ya panzia da hanhu helile ng'hani muladi vigendelele kwaka haulongozi ha Mndewa Mulungu kwandusila ichilo mbaka imitondo. Ndagilizi ino yolondeka izindililigwe siku zose muna zinyelesi zenu.
4 Haluni kezavika vitasa ivo hana ichinala cha zahabu inogile haulongozi ha Mndewa Mulungu na vizagendelela kwaka chila siku.
Magate yolavigwa kwa Mulungu
5 “Soleni chilo malongo maidi na nne za usage unogile moke magate longo na maidi.
6 Yekeni yamagate muna imisitali midi uchanyha ya meza ya zahabu inogile, chila msitali uwe na magate sita.
7 Chila msitali mwizakwika ubani unogile muladi uilumbe na magate yayo na kuwa hanhu ha nhambiko ya lukumbuso kwa Mndewa Mulungu kwa moto.
8 Chila Siku ya Mhumulo Haluni kezayapanga goya magate haulongozi ha Mndewa Mulungu, kwa ichimu cha wanhu wa Isilaili fana lagano da siku zose.
9 Haluni na wanage wa chilume wolondeka kuja magate yayo, nawo wezayadila hanhu helile, kwaviya kumwawo yela ng'hani muna zinhambiko ziyolaviligwa Mndewa Mulungu kwa moto. Iyo ni hanhu hawo siku zose.”
Nhaguso yoilondeka
10 Siku dimwe mbwanga imwe mami yake Muisilaili na tati yake Mmisili, kahita kuitowa ng'hondo na Muisilaili imwenga kuna dilago.
11 Mbwanga ija mami yake yatangigwe Shelomisi mndele wa Dibili wa kabila da Dani, kadiliga na kudiduwila zina da Mndewa Mulungu. Wanhu wamgala imbwanga iyo kwa Musa.
12 Wamkaliza mbaka vondawavimanye chiyolonda Mndewa Mulungu.
13 Maabaho Mndewa Mulungu kamulongela Musa,
14 “Mulave kunze ya lago munhu iyo yaduwile, wanhu wose wowamuhulike viyoduwila weke makono yawo uchanyha ya ditwi jake, waleke wanhu wose wamkome kwa kumtowa na mabwe.
15 Iviya walongele Waisilaili, ‘Munhu yoyose yomduwila Mulungu wake kolondeka yatagusigwe kwa uhasanyi wake.
16 Munhu yoyose mkaya hebu nyambenyambe yodiliga zina da Mndewa Mulungu, wanhu wose wezamkoma kwa kumtowa na mabwe.
17 “ ‘Munhu yoyose yomkoma miyage kolondeka yakomigwe.
18 Munhu yoyose yomkoma mnyama kolondeka yalave mnyama imwenga muladi kulihila ija yakomigwe, ugima kwa ugima.
19 “ ‘Munhu yoyose yomulumiza miyage kolondeka yalumizigwe fana viya viyamulumize miyage.
20 One munhu yahambena miyage divuha, nayo kolondeka yabenigwe divuha, ziso kwa ziso, zino kwa zino. Chila munhu yomulumiza miyage kolondeka yalumizigwe fana viyamulumize miyage.
21 Munhu yoyose yomkoma mnyama kolondeka yalave mnyama imwenga muladi kuliha ija yakomigwe, mbali munhu yoyose yomkoma munhu miyage, kolondeka yakomigwe.
22 Mwizakuwa na lagilizo dimwe kusonhela nyambenyambe na wakaya. Niye niiyo Mndewa Mulungu, Mulungu wenu.’ ”
23 Musa kawalongela Waisilaili mbuli izo zose. Wamulava kunze ya lago munhu ija yamduwile Mndewa Mulungu na wamkoma kwa kumtowa na mabwe. Waisilaili watenda fana Mndewa Mulungu viyamulagilize Musa.