3
Nhambiko za tindiwalo
“ ‘One munhu yoyose yahalava ng'ombe wake fana nhambiko ya tindiwalo haulongozi ha Mndewa Mulungu, yalave ng'ombe lume hebu zike. Mnyama iyo sekeyawe na chilema. Munhu kezakwika mkono wake mchanyha ya ditwi da ng'ombe iyo na kumchinja hana ihanhu ha kwingilila muna dihema da Mulungu. Welesi wa Haluni weli wakulu wa nhambiko, wezakwitilila damu ya ng'ombe iyo banzi zose za ulupango. Mabambala yose yogubika utumbo wa ng'ombe iyo wa nhambiko ya tindiwalo kezavitimbula fana nhambiko iyolaviligwa Mndewa Mulungu kwa moto. Iviya kezalava figo mbili na mabambala yake hamwe na hanhu hanogile ha ini. Welesi wa Haluni weli wakulu wa nhambiko, wezaitimbula nhambiko iyo hana ulupango uchanyha ya nhambiko ya kutimbula ili uchanyha ya zingodi. Iyo ni nhambiko kwa moto ili na mnung'ho unogile wa kumnogeza Mndewa Mulungu.
“ ‘One nhambiko iyo ya tindiwalo iyomulavila Mndewa Mulungu yolawa muna dibumbila jake da ng'hondolo hebu luti, basi disaguligwe lume hebu zike dilibule chilema. One munhu yahalava mwanang'hondolo kuwa nhambiko yake, kolondeka yamulave haulongozi ha Mndewa Mulungu, kezakwika mkono wake mchanyha ya ditwi da mnyama iyo na kumchinja haulongozi wa hema da Mulungu. Wakulu wa nhambiko wezakwitilila damu muna ulupango banzi zose. Maabaho kulawa muna inhambiko iyo ya tindiwalo iyolaviligwa Mndewa Mulungu kwa moto, kezamulavila mabambala yake na mkila wose uli na mabambala yakanhigwe habehi ng'hani na umgongosango hamwe na mabambala yogubika utumbo, 10 figo mbili na mabambala yake ya mavuta hamwe na hanhu hanogile ha ini. 11 Mkulu wa nhambiko kezavitimbula ivo vose mchanyha ya lupango fana ndiya iyolaviligwa Mndewa Mulungu kwa moto.
12 “ ‘One munhu yahawa na nhambiko ya luti, kezamulava haulongozi ha Mndewa Mulungu, 13 kezakwika mkono wake mchanyha ya ditwi da mnyama iyo na kumchinja haulongozi wa hema da Mulungu. Maabaho welesi wa Haluni wezakwitilila damu ulupango banzi zose. 14 Maabaho kezamulavila Mndewa Mulungu kwa moto mabambala yose yogubika utumbo, 15 figo zose mbili na mabambala yake hamwe na hanhu hanogile ha ini. 16 Wakulu wa nhambiko wezavitimbula vinhu ivo hana ulupango fana ndiya, nhosa yoilavigwa kwa moto kulava mnung'ho unogile wa kumnogeza Mndewa Mulungu. Mabambala yose ya mavuta ni ya Mndewa Mulungu. 17 Mbuli ino izakuwa lagilizo da siku zose, muna zinyelesi zenu zose na hanhu hohose homukala. Sekemuje mavuta hebu damu.’ ”