22
Balaki komtanga Balaamu
1 Maabaho Waisilaili wagendelela na umwanza na kwika lago jawo kuna dibawe da Moabu, dili kuumwambu wa Yoludani habehi na Yeliko.
2 Balaki mwana wa Sipoli kawona mbuli zose Waisilaili zowawatendele Waamoli.
3 Wamoabu wawadumba ng'hani wanhu wawo kwaviya wakala wengi. Wamoabu wawadumba ng'hani Waisilaili.
4 Wamoabu wawalongela walala wa Midiani, “Mting'hano uno wa wanhu wizananga chila chinhu mumgwazo yetu fana viya ng'ombe lume viyoja mgina muna imigunda.” Ivo Balaki mwana wa Sipoli yoyakalile mfalume wa Moabu lusita ulo,
5 katuma wasenga kwa Balaamu mwana wa Beoli, uko Pesoli habehi na lwanda lwa Efulati muna iisi ya Waamawi. Wamulongela Balaki, “Nolonda uvimanye kuwa wanhu wose wowalawile muna iisi ya Misili wenela muna iisi yose na wokala habehi na niye.
6 Lelo izo uwaduwile wanhu wano, kwaviya wana nguvu kufosa niye. Huwenda nizadaha kuwahuma na kuwawinga walawe muna iisi. Kwaviya nivimanya kuwa wose wouwatemela mate wotemeligwa mate na wouwaduwila woduwiligwa.”
7 Walala wa Moabu na walala wa Midiani wasola mayombe kumuliha mganga, wahita kwa Balaamu na wamulongela mbuli zilawile kwa Balaki.
8 Balaamu kawalongela, “Kaleni hano ichilo chino, niye nizamulongelani mbuli zondayanilongele Mndewa Mulungu.” Ivo walangulizi wawo wa Moabu wakala na Balaamu.
9 Mulungu kamwizila Balaamu na kamuuza, “Wano welihi woukalile hamwe nawo?”
10 Balaamu kamulongela Mulungu, “Balaki mwana wa Sipoli, mfalume wa Moabu, kanigalila usenga uno,
11 ‘Kuna wanhu wowalawile Misili wenela muna iisi. Lelo izo uniduwilile wanhu wano, huwenda nizadaha kuitowa nawo na kuwawinga.’ ”
12 Mulungu kamulongela Balaamu, “Sekeuhite hamwe nawo na sekeuwaduwile wanhu wawo, kwaviya watemeligwa mate.”
13 Imitondo Balaamu kalamka na kawalongela walala wa Balaki, “Bweleni kuna iisi yenu, kwaviya Mndewa Mulungu halonda nihite hamwe na mweye.”
14 Ivo wakulu wa Moabu wasegela na wabwela kwa Balaki na wamulongela, “Balaamu kalema kwiza hamwe na cheye.”
15 Maabaho Balaki kawatuma wakulu wamwenga wengi ng'hani na wakulu kufosa waja wa ichanduso.
16 Wahita kwa Balaamu na wamulongela, “Balaki mwana wa Sipoli kolonga, ‘Nokulamba mbuli yoyose sekeikukimilile kwiza kumwangu.
17 Nizakiwng'ha vinhu vingi, na chochose chondaunipule nizakutendela. Izo uwaduwile wanhu wano.’ ”
18 Mbali Balaamu kawedika, “Hata one Balaki yahaning'ha kaye yake imemile hela na zahabu, niye sidaha kubena lagilizo da Mndewa Mulungu, Mulungu wangu, kwa mbuli yoyose, ng'hulu hebu ndodo.
19 Lelo kaleni hano ichilo chino fana viwatendile wayenu, muladi nivimanye chondayanilongele Mndewa Mulungu kaidi.”
20 Ichilo chiya Mndewa Mulungu kamwizila Balaamu na kamulongela, “Fana wanhu wano weza kukutanga, inuka uhite hamwe nawo, mbali chondanikulongele, niicho chondautende muhala.”
21 Ivo Balaamu kalamka imitondo, kamsasala chihongwe wake na kahita hamwe nawo.
Chihongwe wa Balaamu na msenga wa kuulanga
22 Mbali Mulungu kehilwa kwaviya kahita. Msenga wa kuulanga kamkimilila muna inzila. Balaamu kakala kakwela chihongwe wake yahawa hamwe na wasang'hani wake waidi.
23 Chihongwe viyamuwonile msenga wa kuulanga kema muna inzila kuno kamha zele dodisomoligwe muna iyala, kaileka inzila na kengila kumgwazo. Balaamu kamtowa chihongwe muladi yambweleze muna inzila.
24 Maabaho msenga wa kuulanga kema hana inzila sisili, hagati ya migunda ya mizabibu, iviya hana ng'huta mbili chila ubanzi.
25 Chihongwe viyamuwone msenga wa kuulanga, kaisung'hila kuna ing'huta na kamulumiza Balaamu umgulu. Balaamu kamtowa kaidi ichihongwe.
26 Maabaho msenga wa kuulanga kalongola kaidi, kema hanhu helibule nyafasi ya kufosa ukulume hebu ukumoso.
27 Chihongwe viyamuwonile msenga wa kuulanga, katambalala hasi. Balaamu kawona ludoko ng'hani na kamtowa kwa fimbo yake.
28 Maabaho Mndewa Mulungu kaugubula mulomo wa chihongwe iyo. Chihongwe kamulongela Balaamu, “Nikutenda choni mbaka unitowe miyanza ino mitatu?”
29 Balaamu kamwidika, “Kwaviya kunizeha! One nihawile na panga muna umkono wangu, nihakukomile sambi baha.”
30 Chihongwe kamulongela Balaamu, “Vino niye siyo chihongwe wako ija ija yonikupapile siku zose mbaka diyelo? Vino niwahi kukutendela fana vino?” Balaamu kedika, “Aka.”
31 Maabaho Mndewa Mulungu kayagubula meso ya Balaamu, nayo kamuwona msenga wa kuulanga kema muna inzila, kuno kamha zele dodisomoligwe muna iyala. Balaamu kaibwanha chingubingubi.
32 Msenga wa kuulanga kamulongela Balaamu, “Habali kumtowa chihongwe wako miyanza mitatu? Niza kukukimilila muladi sekeugendelele na mwanza uno.
33 Chihongwe wako kaniwona na kahita kumgwazo miyanza mitatu. One hatendile ivo, nihadahile kukukoma na kumuleka chihongwe yawe mgima.”
34 Balaamu kamulongela msenga wa kuulanga, “Nitenda uhasanyi, mana sivimanyile kuwa kukala kunikimilila muna inzila. Lelo one hulonda niye nigendelele na mwanza uno, basi nizabweleganya.”
35 Msenga wa kuulanga kamulongela Balaamu, “Hita hamwe na wanhu wano, mbali kwizalonga chiya chondanikulongele muhala.” Ivo Balaamu kahita hamwe na wanhu watumigwe na Balaki.
36 Balaki viyahulike kuwa Balaamu kokwiza, kahita kumuhokela kuna dibululu da Ali, bululu dikalile mumgwazo wa lwanda lwa Alinoni, muna imhaka ya Moabu.
37 Balaki kamulongela Balaamu, “Vino situmile wanhu kumwako muladi wakutange? Mbona hwizile? Vino niye sidaha kukuliha goya?”
38 “Balaamu kamulongela Balaki, ‘Lelo niza!’ Mbali nodaha kulonga chochose? Mbuli yondayanilongele Mulungu niiyo yondaniilonge.”
39 Maabaho Balaamu kahita hamwe na Balaki, wafika Kiliasi Husosi.
40 Balaki kachinja nhambiko ya ng'ombe na luti, kamgalila Balaamu na walangulizi wowakalile hamwe nayo.
Balaamu kowatemela mate Waisilaili
41 Igolo yake Balaki kamsola Balaamu na kakwela nayo mbaka Bamosi Baali. Kulawa uko Balaamu kawawona Waisilaili wamwenga.