30
Malagilizo kusonhela vilaho
1 Maabaho Musa kawalongela walangulizi wa makabila ya Isilaili, “Chino icho chayalagilize Mndewa Mulungu.
2 Munhu yahamwikila chilaho Mndewa Mulungu hebu vondayailahe muladi kuifunga yeye mwenyewo kwa chilagano, kolondeka sekeyagalule mbuli yake, kezatenda viya viyalongile kwa mulomo wake.
3 “Mndele yeli yang'hali kokala muna ikaye ya tati yake yahamulahila Mndewa Mulungu hebu kuifunga mwenyewo kwa chilagano,
4 tati yake yahahulika chilaho hebu chilagano chiya na halonga chochose, mndele ija kezafungigwa na chilaho na chilagano choyachitendile.
5 “Mbali one tati yake komgomesa lusita voyohulika voyokwika chilagano icho, hezafungigwa na chilaho. Mndewa Mulungu kezamulekelela kwaviya tati yake kamgomesa.
6 “Ihawa mndele yahasoligwa yahamala kwika chilagano hebu kaifunga kwa chilaho chake bila kugesa
7 na mulumake yahahulika mbuli iyo na hamgomesa, imuke kezafungigwa na chilaho chake chiyekile.
8 Mbali one mulumake yahamgomesa siku iyo iyahulike, baho mulume iyo kezasegeza chilagano icho cha imuke na chilaho chiya chiyailahile bila kugesa. Mndewa Mulungu kezamulekelela.
9 “Mbali chilaho hebu chilagano chochose chikigwe na mgane hebu muke yasigwe, kezafungigwa na chilaho chake.
10 One muke yasoligwe yahailaha hebu yaheka chilagano yahawa ukaye kwa mulumake,
11 na mulumake yahahulika mbuli iyo na hamgomese hebu kumulongela chinhu chochose, baho vilaho na vilagano vake vose vizamfunga.
12 Mbali one mulumake yahamgomesa viyohulika mbuli zake, muke iyo halondeka kuchifikiza chilaho chake. Mndewa Mulungu kezamulekelela muke iyo kwaviya mulumake kamgomesa kufikiza chilagano chake.
13 Mulumake kodaha kutogola hebu kusegeza chila chilaho hebu chilagano chochimfunga muke iyo.
14 Mbali one mulumake yahamnyamalila siku ija viyahulike, baho kezakuwa katogola vilaho vake vose na vilagano vake vose, mana mulumake viyahulike kanyamala.
15 Mbali yahazilema na kuzisegeza yahamala kuhulika, baho mulume iyo kezasola ubananzi wa muke wake.”
16 Zino izo ndagilizi Mndewa Mulungu zoyamulagilize Musa kusonhela mulume na muke wake, na kusonhela tata na mndele wake, mndele wake yahawa muna ikaye ya tati yake.