2
Unyendanyenda na Ukulu wa Chilisito
1 One mogumigwa moyo kwa kwiilumba na Chilisito, one ulondo wake wowagela moyo, one muna mvava na Muhe Yelile na one muna ubazi na uhole,
2 maabaho dimemezeni deng'ho jangu kwa kuwa na magesa yamwe, ulondo umwe, na moyo umwe na muhe umwe.
3 Sekemutende chinhu chochose kwa moyo wa chimasolo wala kuigoda, mbali muinyenyende mweye kwa mweye, chila munhu yamuwone miyage kofaya kufosa yeye mwenyewo.
4 Chila imwe wenu sekeyazahile malondo yake mhuhala mbali uzahile malondo ya miyago.
5 Muwe na lungilo diya da umanyi fana diya diyakalile najo Chilisito Yesu.
6 Chilisito kakala Mulungu kweli,
mbali hagesile kuwa kulinga fana Mulungu ni chinhu cha kunanahila kwa ludabwa.
7 Mbali kwa kulonda yeye mwenyewo, kayalekelela yayo yose,
na kawa fana mtumwa.
Kelekigwa kuwa munhu,
kawoneka fana munhu.
8 Kainyendanyenda na kutegeleza mbaka kudanganika mbaka kadanganika mumsalaba.
9 Kwa chimu icho Mulungu kamwinula mchanyha ng'hani na kamwing'ha zina didifosa mazina yose.
10 Mbali kwa zina da Yesu,
vilumbigwa vose kuulanga, muna isi na kowadanganike,
vitumbale mavindi haulongozi wake,
11 Na kwa utunhizo wa Mulungu Tata,
chila lulimi lwizatogola kuwa,
“Yesu Chilisito ni Mndewa!”
Bung'hulo fana nhondo
12 Ivo wambwiya zangu walondwa, siku zose vinikalile na mweye munhegeleza, fana vinili kutali na mweye, gendeleleni kutegeleza. Sang'haneni sang'hano kwa ludumbo na kugudemeka kwa ichimu cha ukombola wenu,
13 kwaviya Mulungu kosang'hana mgati yenu yawadahizeni muwe na lungilo na mudahe kutegeleza lungilo jake mwenyewo.
14 Tendeni chila chinhu bila kulongelela wala kuihuma.
15 Mbali muwe wanhu wanogile mulibule uhasanyi fana wana wa Mulungu welibule ubanazi wokala muna isi ihile na yagile. Mwizabung'huka hagati yawo fana nhondo vizimwemwesa ulanga.
16 Muhamha mbuli yoigala ugima, nidahe kuwona kupata chinhu cha kuigodela muna Dizuwa dondayabwele Chilisito, kwaviya izawoneka funhu funhu kuiyoha kwangu na sang'hano yangu hayagile bule!
17 Fana yahawa nilavigwa sadaka hamwe na uhuwilo wenu na kumsang'hanila Mulungu. Ivo nodeng'helela ng'hani na kuweng'hani mweye mose deng'ho ijo jose.
18 Na mweye iviya molondeka mudeng'helele na kusekelela hamwe na niye.
Timoseyo na Epafuladito
19 One Mndewa Yesu yahalonda, nololela kuwa nizadaha kumtuma Timoseyo kumwenu sambi, ivo nodaha kugumigwa moyo kwa mbuli zenu.
20 Nabule munhu imwenga fana yeye yoyowasang'hanileni kwa ulondo.
21 Wanhu wamwenga wose wolonda mbuli zawo wenyewo, hawalonda mbuli za Yesu Chilisito.
22 Mbali mweye movimanya viya Timoseyo viyailaguse kuwa kofaya, kasang'hana sang'hano na niye, fana tati na mwanage, kasang'hana na niye kwa ichimu cha Mbuli Inogile.
23 Ivo nololela kumtuma Timoseyo kumwenu, baho vondanivimanye yondayanilawilile.
24 Nomuhuwila Mndewa kuwa niye mwenyewo nizadaha kwiza kumwenu vino sambi.
25 Mbali niwona yolondeka nimtume ndugu yetu Epafuladito, msang'hani na kaugombela usenga wa Mndewa fana niye. Iyo yomumtumile kunitaza muuzidilwa wonili nawo.
26 Kolonda ng'hani kumuwonani mweye wose, na kowona usungu kwaviya muhulika kuwa kakala mtamu.
27 Mbali kakala mtamu inula tambalisa. Mbali Mulungu kamuwonela ubazi, na siyo yeye muhala, mbali na niye iviya, muladi sekeniwe na usungu ng'hani.
28 Ivo nolonda ng'hani kumtuma kumwenu, muladi vondamumuwone mudeng'helele, na usungu wangu wizamala.
29 Muhokeleni kwa deng'ho, fana ndugu wa Mndewa. Wahulikeni wanhu wose walingile fana yeye.
30 Kauhonza ugima wake habehi na kudanganika kwa ichimu cha sang'hano ya Chilisito, yanitaze viya mweye wenyewo hamudaha kunitaza bule.