15
Wasenga wa kuulanga saba na mahulo saba ya uhelelo
1 Maabaho niwona chilaguso chikulu cha kwazanya chimwenga muna ulanga, baho hakala na wasenga wa kuulanga saba weli na mahulo yoyogaza ng'hani saba ya uhelelo, kwaviya kwa mahulo yayo saba yoyogaza ng'hani, ludoko lwa Mulungu lwizakomelezeka.
2 Kaidi niwona chinhu fana bahali ya chilole yoihanganyike na moto. Iviya niwawona waja wadihumile diya ding'onyo dikali na nyang'hiti yake na helufi ya zina jake ditambuligwa kwa helufi ija. Wakala wemile mumgwazogwazo wa bahali iyo wamha vilimba voweng'higwe na Mulungu.
3 Nawo wakala wokwimba wila wa Musa, msang'hani wa Mulungu na wila wa Mwanang'hondolo, walonga,
“Weye Mndewa Mulungu wili na Udaho,
sang'hano zako zina ludabwa na za kwazanya!
Mfalume wa zisi zose
na nzila zako zigoloka na za kweli.
4 Weye Mndewa yelihi hakudumba na hakutogoza kwa ichimu cha ukulu wako,
kwaviya weye wiidumwe iyo welile.
Wanhu wa zisi zose wezakwiza na kutambika haulongozi wako,
kwaviya sang'hano zako zigoloke zigubuligwa.”
5 Viyamalile yano niwona Kaye ya Mulungu yili Zewe da Ukalangama, ivuguligwa kuulanga.
6 Na wasenga wa kuulanga saba wowakalile na mahulo saba walawa umo muna Ikaye ya Mulungu. Wayawala mawalo mazelu yanang'hane na yomelemeta na wazingilizigwa mikwiji ya zahabu muna zimhambaga zawo.
7 Maabaho imwe wa viumbe waja wene ugima wane kaweng'ha waja wasenga wa kuulanga saba mahamha saba ya zahabu, yamemile ludoko lwa Mulungu yokala siku zose.
8 Kaye ya Mulungu ikala imemezigwa yosi dodigaligwe na utunhizo na ludabwa lwa Mulungu, habule munhu yadahile kwingila muna Ikaye ya Mulungu mbaka uhelelo wa mahulo saba yoyamhililigwe na waja wasenga wa kuulanga saba.