7
Israel Tamo Kayau 144,000 Bun Uris Dinon
1 Anĩ bure fele di, aya engel aiwa adodo, teneub idikeleya uyu uyu aiwa adodo bun, difar fen, teneub uyu uyu aiwa adodo nẽ yau, yau takam teneub be, maaĩ be, aa taka bun to fũ fouf nigin kafĩ difel mog, ailen.
2 Age afe fen, aya engel taka mata ibodõya Negur nẽ ĩtãfiya uris ado gaa iseyan ise mog, ailen. Ĩ engel aiwa adodo teneub ado maaĩ daũ fiya nẽ megeir ifenẽdin anidi, ait odugem iweig irokenẽdin:
3 “Ã teneub be, maaĩ be, aa taka fau mog to daũg, amã neda Negur nẽ ferfer demeid bun ĩtãfiya uris manol len.”
4 Age ye di, aya idi ĩtãfiya nẽ uris dinon anidi ganĩ anĩ karĩ aun, are 144,000 idi Israel ibor ganan bun temeleid.
5 Juda nẽ ibor bun tamal 12,000 are ĩtãfiya uris dinon,
Ruben nẽ ibor bun tamal are 12,000,
Gad nẽ ibor bun tamal are 12,000,
6 Aser nẽ ibor bun tamal are 12,000,
Naftali nẽ ibor bun tamal are 12,000,
Manase nẽ ibor bun tamal are 12,000,
7 Simeon nẽ ibor bun tamal are 12,000,
Lewi nẽ ibor bun tamal are 12,000,
Isakar nẽ ibor bun tamal are 12,000,
8 Sebulun nẽ ibor bun tamal are 12,000,
Josef nẽ ibor bun tamal are 12,000,
Benjamin nẽ ibor bun tamal are 12,000.
Guru Fiya Mala Odug Kolos Lalau Meluk Difonundin
9 Anĩ bure fele di, aya lo afen, aya wageun an guru fiya mala odug bagai, taka nem iwesleya kisi feleya sã, idi teneub ganan bun, ibor ganan bun, tamo kayau ganan bun ado, od fire fire ganan bun temeleid, idi king nẽ sia wagen ado Sipsip Naal wagen difaren. Idi kolos lalau meluk difoun ken, pam boge anã boge gen anĩ imedim guri difen.
10 Age de fen, idi aiteid odugem diweig diron:
“Kel gei fiya are
neda Negur king nẽ sia bun ibodok ado
Sipsip Naal nẽ.”
11 Engel ganan, king nẽ sia ado, mudur adodo ado, ereb mata ibodõya aiwa adodo salili difiyeĩd difar fen, king nẽ sia wagen neweid lẽ kuku de fen, Negur yana dalesen.
12 Idi diron:
“Momoi!
Yana yaleseya, fula fiya medeĩya,
kisi biya, de fiyẽya, yana odug,
megeir ado, totol are
neda Negur bun gai gai ibodkalauf.
Momoi!”
13 Age de di, mudur adodo takam aya to fiyan, “Idi eneidi kolos lalau meluk difonun are nanidim, idi nainenem disin?”
14 Aya ĩ arokenen, “Tamo biya, õ keleĩ.”
Age au di, ĩ irokanan, “Eneidi are darau, kafĩ fiya odug bun temeleid disin. Idi dogo neid kolos meluk Sipsip Naal naud nem kulo dife di, lalaun.
15 Anĩ nigin,
“idi Negur nẽ king nẽ sia wagen difar fen,
yogon tempel bun gaa ado bõ ganan aruna daledig.
Age dife di, ĩ king nẽ sia bun ibodok anim yogon salafat biraraũ fe fen, kerũ fediyouf.
16 Idi baban to naũ fediyouf,
to naan ail fediyouf.
Gaam be, ereb uruwa adom,
baban to isaĩnẽdiyouf.
17 Ere nigin, Sipsip Naal king nẽ sia atun ifaref inim, dogo neid lo fiya tamo ibodõf.
Ĩ idi mata ibodõya nẽ naan warur bun gurif iroulediyouf.
Age fe di, Negur ĩ idi meleid bun tamal maruid ganan waĩ falauf.”