2
Pɔdhö ‑bha ‑dho zun Yesu ‑bha bɔmɛ ‑nu 'wo Zedhizadhɛmö ‑a ‑nu ‑dhɛ 'gü ‑kɔ ‑dhiang 'ö‑ zë
1 ꞊Dhɛ 'ö ‑kwɛ ‑kaɔng do ga ‑yiisiö ꞊ya ziö, 'yö 'a dho 'zü ‑deewo Zedhizadhɛmö, yaa‑ Baanabasö waa‑ Titö ‑nu 'dhö.
2 'Dho ‑zian 'a‑ wo mü "dhʋ̈ bha, Atanna yöö ꞊dede ꞊në‑ ‑zɔn n ‑dhɛ. ꞊Dhɛ 'ma 'dho 'ma ꞊loo mü, 'yö ‑kɔ 'a‑ ‑bha naɔ ‑së 'ö‑ bɔ mɛ "bhɩɩ‑ ‑nu ‑dhɛ bha‑ ‑dhiang zë sië‑ 'ka 'mɛ 'waa Zuifö 'ka‑ ‑nu kpö 'gü bha 'a ‑ziö ‑gɛn 'gü‑ ‑nu ‑dhɛ, "kɛɛ 'yö 'a‑ ‑ya ‑a mɛ 'dhɛ 'wo ‑gɔmɛ ‑nu 'ka bha‑ ‑nu ‑kuu "dhiʋ̈ ꞊plɛ 'gü, kë "dhʋ̈ kö yë bha‑ 'dhɛ 'a‑ kë sië waa‑ 'dhɛ 'ma‑ kë 'nu bha ('wa 'dho‑ pö‑ ‑bha ꞊dhɛ wo ‑kɔ 'yaa‑ 'gü ö‑) "gbaa ‑yö to.
3 'Dho 'yi‑ wo bha n "tayɔɔ 'ö ‑kë Titö 'ka, 'ö Glɛkö 'ka, ('ö 'yaa Zuifö 'ka kö yöö 'go 'gbannë 'gü, "kɛɛ 'ö ꞊ya 'dhang bho 'pö Yesu ‑wɔn "dhiʋ̈) bha, ‑gɔmɛ ‑nu bha 'wii ‑gban ‑a ‑dho 'gbannë 'gü ‑wɔn 'gü, (yë 'a‑ ‑kë bha‑ "dhia ‑zian ꞊në kë ma‑ ‑nu 'gü).
4 "Kɛɛ 'sa kö ‑dɩ ‑kë kwa dheebhang 'ka Yesu ‑bha ziantamɛ ‑nu ‑wo yi kpö 'gü mü 'ö gun wo ‑zë ‑nu "piʋ̈ ꞊dhɛ ‑yö 'dho 'gbannë 'gü gbonggbongdhö. Mɛ 'wo "dhʋ̈ bha ‑wo ‑kaan yi 'ka ꞊dhɛ 'wɔnsuanbhomɛ ‑nu 'dhö yi tii' 'ka, kö ‑ya ‑dɩ 'flëë‑ 'gü ‑sü 'kwa‑ ꞊slɔɔ Yesu Klisi 'saa‑ 'gü bha 'wo‑ dɔ. 'Sa ‑yö ‑gun wo ‑zë ‑a ‑nu "piʋ̈ 'nu ꞊dhɛ 'wo yi "gan ꞊në‑ wo 'zü ‑deewo kö 'wo yi ‑da ꞊dhuëngdhɛ bha‑ 'gü wo "piʋ̈.
5 "Kɛɛ ‑a ‑nu ‑bha ‑nëng 'gü ‑sü 'ö "dhʋ̈ bha‑ ꞊gban 'gü 'yii‑ "wɩ‑ ‑nu ‑gɔ ‑bha tongtongdhö, kë "dhʋ̈ kö tɛan‑ ‑zian 'yi‑ ‑zɔn 'mɛ 'kaa Zuifö 'ka ka ‑dhɛ 'ö ‑gban Atanna ‑bha naɔ ‑së ‑bha bha 'ya 'dho 'go "gblʋʋ.
6 'Sa 'mɛ 'wo ‑kë "yan ‑to Atanna ‑bha 'kɔdhigümɛ ‑nu ‑bha ‑mɛ ‑nu 'ka ‑a ‑bha zian ‑ta 'ö 'wo gun ‑gɔmɛ ‑nu 'ka bha, ‑a ‑nu ‑bha ‑kë "dhʋ̈ ‑sü ꞊gban waa‑ ‑bha ‑bha 'wii 'tɔng‑ ‑dee 'bha dɔ yi ‑dhɛ, "kɛɛ n "tʋ ‑zian 'yaa gun‑ ‑nu ‑bha ‑kë ‑gɔmɛ 'ka ‑sü ‑bha, ‑a ‑gɛn ‑mü ꞊dhɛ Atanna 'yaa mɛ ‑zë 'gü zë kö ‑yö mɛ 'bha fië‑ bho mɛ 'bha ‑bha.
7 "Kɛɛ woo ‑zian ‑zë, ꞊dhɛ 'kö 'wo‑ 'wɔn ‑zë dɔ ꞊dhɛ Atanna ꞊në n ‑ya ö ‑bha naɔ ‑së bha‑ ‑dɔ mɛ 'waa Zuifö 'ka ‑a ‑nu ‑gɔmɛ 'ka, ꞊dhɛ ‑kɔ 'ö Piɛdhö 'dhö‑ 'ka Zuifö ‑nu kpö 'gü 'pö ‑a 'dhö, ‑a "dhia ꞊në ma‑ ‑nu 'gü.
8 'Sa mɛ do 'ö Piɛdhö ‑ya Yesu ‑bha bɔmɛ 'ka Zuifö ‑nu kpö 'gü bha ꞊në n ‑ya 'pö 'mɛ 'waa Zuifö 'ka‑ ‑nu kpö 'gü.
9 ꞊Dhɛ 'ö ꞊waa‑ 'wɔn dɔ ꞊dhɛ Atanna yöö ꞊dede ꞊në ‑gasitɛ bha‑ ‑kë n ‑dhɛ, Zakö waa‑ Piɛdhö waa‑ Zan 'wo ꞊dhɛ ꞊kaɔ 'ö ‑ya ‑sü 'ka ‑a ‑bha mɛ ‑nu 'wo Zedhizadhɛmö ‑a ‑nu ‑gɔ ‑a 'dhö bha, ‑wo wo ‑kɔ ꞊në‑ ‑da yaa‑ Baanabasö yi ꞊kwɛng, 'yö yi ‑wʋ ‑yö ‑kë do ‑a ‑bha yë bha‑ kë ‑sü 'gü ꞊dhɛ: yi ‑zë 'yi 'dho yi ‑bha 'ka 'mɛ 'waa Zuifö 'ka‑ ‑nu kpö 'gü, kö wo ‑zë 'wo 'to wo ‑bha 'ka Zuifö ‑nu kpö 'gü.
10 ‑Dhio 'wo‑ dɔ yi ‑ta 'yö 'wo‑ pö ꞊dhɛ yi ‑zʋ 'ya 'dho bhɔ "flɛɛmɛ ‑nu 'wo‑ ‑nu kpö 'gü bha ꞊në‑ ‑nu 'ka doseng kö 'yi‑ ‑nu ‑ta 'kun. 'Sa yii ‑dɩ 'pö yi kë pë ꞊gban ‑pë ꞊gban ‑kë kö 'ya 'dho ꞊fië ‑dhio 'ko bha ꞊në‑ ‑bha tongtongdhö.
11 "Kɛɛ ꞊dhɛ 'ö Piɛdhö ꞊ya nu Angtiɔsö yi do 'ka, 'mii ‑kpla ‑gɔ, a kë ꞊sua ‑yɛ "yan‑ mɛ kpö 'gü. ‑A ‑gɛn ‑mü ꞊dhɛ 'ö gun "dhʋ̈ kö ꞊ya zian 'to.
12 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'ö gun kö 'mɛ 'wo go Zakö ‑dhɛ 'gü Zedhizadhɛmö 'wii nu ꞊kö kwa ‑dhɛ 'gü, Piɛdhö waa‑ 'mɛ 'waa Zuifö 'ka 'ö ꞊wa bɔ Yesu 'ka ‑wo ‑gun pë ‑bhö sië wo "kwëë, "kɛɛ ꞊dhɛ 'ö 'mɛ 'wo bha ꞊wa nu ꞊wa ꞊loo mü, 'yö ö bo pë ‑bhö ‑a ‑nu "piʋ̈ ‑sü 'ka, kö ‑yö "suʋ̈ sië 'mɛ 'wo ꞊nëng mɛ ꞊gban ‑go 'gbannë 'gü ‑wɔn 'gü bha‑ ‑nu ‑gɔ.
13 ꞊Dhɛ 'ö kwa dheebhang Zuifö ‑nu 'dhɛ 'wo gun mü bha 'wo‑ ‑dhɛ yö, 'yö 'wo wo zü bɔ Piɛdhö 'ka, 'yö 'wo ‑kan 'pö 'mɛ 'waa Zuifö 'ka bha‑ ‑nu ‑bha. 'Yö Baanabasö yöö ‑dɩ 'pö 'ö ‑da ꞊flü bha‑ 'gü‑ ‑nu "piʋ̈.
14 ꞊Dhɛ 'a 'wɔn bha‑ ‑dhɛ yö, 'ö 'a‑ 'wɔn dɔ ꞊dhɛ tɛan‑ ‑zian 'ö Atanna ‑bha naɔ ‑së bha 'ö kwa ꞊klang ‑kë 'ka bha 'waa‑ ‑ta 'zü, 'yö 'a‑ pö Piɛdhö ‑dhɛ mɛ ꞊gban "yaan mü 'a‑ pö: «Piɛdhö, bhi 'ö bhi ‑zë 'i Zuifö 'ka, 'bha ‑tosɛa kë 'mɛ 'waa Zuifö 'ka‑ ‑nu kpö 'gü yö ꞊dhɛ 'pë 'bhaa Zuifö 'ka ‑a 'dhö, 'bhii‑ ‑nu ‑bha 'tɔng‑ 'kun bha ‑oo, i ‑mɔɔ ‑bha 'zü ‑deewo i zun 'mɛ 'waa Zuifö 'ka bha‑ ‑nu "dhiʋ̈ kö ‑wo ‑tosɛa kë ꞊dhɛ Zuifö ‑nu 'dhö ‑kɔ ‑kë ꞊dhɛ?»
Mɛ ꞊gban "pɛpɛ ‑bha ‑dha 'dhang ‑bho Yesu "dhiʋ̈ ‑sü ꞊në‑ 'saa‑ 'gü ‑sü ‑dhiang 'ö Pɔdhö ‑ya zë
15 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ yi ‑zë yi ‑bhɔ Zuifö 'ka, 'wii yi 'kpɔ Atanna ‑bha 'tɔngbhomɛ 'ka ꞊dhɛ mɛ "wɛɛ ‑kpɛa 'dhö.
16 "Kɛɛ yö ‑zë ꞊gban 'gü yi‑ 'wɔn dɔ ‑sü 'ka 'kpakpadhö ꞊dhɛ za ‑yö ‑dhi mɛ ‑gɔ Atanna ‑kuu "dhiʋ̈ 'dhang ‑bho Yesu Klisi "dhiʋ̈ ‑sü doseng ꞊në‑ 'gü, 'yaa dɔ ‑a ‑bha 'tɔng‑ ‑kun ‑së ‑sü ‑bha. 'Wɔn 'ö‑ ‑wɔn 'gü 'yö yii ‑dɩ 'pö 'yi 'dhang bho Yesu Klisi ‑wɔn "dhiʋ̈ kë "dhʋ̈ kö 'yi dha bha 'yö bha, kë "dhʋ̈ kö 'yi dha yö ꞊në‑ ‑bha, ꞊dhɛ 'ö ‑kë ꞊dhɛ mɛ 'bha ‑mɛ 'bha 'yii 'dho dha ‑a ‑bha Atanna ‑bha 'tɔng‑ ‑kun ‑së ‑sü ‑bha bha‑ ‑wɔn 'gü.
17 ꞊Ya kë "dhʋ̈ 'mɛ 'yi Zuifö 'ka bha 'ya yi ‑dɩ kë ꞊dhɛ 'mɛ 'waa Zuifö 'ka‑ ‑nu 'dhö kë "dhʋ̈ kö 'yi dha Klisi ꞊në‑ 'saa‑ 'gü 'dhang ‑bho ‑a "dhiʋ̈ ‑sü "gblʋ̈ "piʋ̈ bha ‑oo, kö Klisi ꞊në yi ‑kë 'wɔnyaakëmɛ 'ka bha ‑ee? ‑Abin! ꞊Ya kë ꞊dhɛ 'ya yi ‑dɩ ‑da 'zü ‑deewo 'tɔng‑ ‑gɔ ꞊dhuëngdhɛ 'gü kö 'yi ‑tosɛa kë ꞊dhɛ 'mɛ Atanna 'yii ‑gasitɛ kë‑ ‑dhɛ, 'ö ö ‑dɩ ‑dhi ‑a ‑dhɛ ‑dhɛ mɔɔ‑ sië 'tɔng‑ 'kun ‑sü ꞊në‑ 'ka ‑a 'dhö kö 'ya "gla 'zü ‑deewo 'wɔnyaakëmɛ 'gü ꞊naa bha.
18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ pë 'dhɛ 'kö mɛ ꞊ya bo‑ see‑ ‑sü 'ka, ꞊yaa‑ baa‑ ‑dee wo kö yö ꞊në ö ‑dɩ ‑da 'wɔn 'gü.
19 ‑A ‑gɛn ‑mü ꞊dhɛ Atanna ‑bha 'tɔng‑ ‑zë 'ma ga 'nu‑ ‑gɔ, "kɛɛ 'sa 'tɔng‑ bha yöö ꞊dede ꞊në‑ ‑kë "dhʋ̈ 'yö 'a ga bha‑ wo, kë "dhʋ̈ kö 'a ‑tosɛa kë Atanna ‑bha ‑kë 'gü, ‑a ‑gɛn ‑mü ꞊dhɛ ga 'ö Klisi ‑ya wo "dhü ‑bha bha ‑yö ‑ga ma ꞊në n ‑wɔn 'gü, ꞊ya kë "dhʋ̈ kö ma ꞊në 'a ga bha.
20 ‑A kë "dhʋ̈ ‑sü bha‑ 'gü kö mang ꞊dede ‑zë 'maa ‑tosɛa kë sië 'zü, 'kö Klisi ꞊në ‑tosɛa kë sië n 'gü, kö ma ‑tosɛa a‑ kë sië ꞊taamasü ya‑ 'gü bha a‑ ‑kë 'dhang ‑bho Atanna ‑bha 'në 'ö n ‑dhɔ ‑ya ‑kë 'ö ö ‑dɩ nu n ‑wɔn 'gü bha ꞊në‑ 'saa‑ 'gü 'dhang ‑bho ‑a "dhiʋ̈ ‑sü "gblʋ̈ "piʋ̈.
21 ‑A ‑kë "dhʋ̈ ‑sü bha‑ 'gü, 'mii 'dho "wɩ‑ ‑bha kö 'a n ‑kɔ bho ‑gasitɛ 'ö Atanna ‑ya ‑kë n ‑dhɛ bha‑ 'gü. ‑A ‑gɛn ‑mü ꞊dhɛ ꞊ya kë ꞊dhɛ dha ‑sü 'ö‑ "piʋ̈ ‑a ‑gɛn ꞊ya kë ‑a ‑bha 'tɔng‑ 'kun ‑sü ‑zë 'ka, kö Klisi ga ‑gɛn 'yii kë.